2 ᑎᒧᑎ 1
1
2 Timothy 1.1-14 (Proper-22 Year C)
1ᓂᔾ ᑈᓪ, ᑲ ᒥᓯᓇᐊᒪᑕᓐ᙮ ᒋᓴᔅ ᙭ ᐅᑦ ᐊᑈᔅᑕᓂᒪ ᓂᔾ, ᐛᔅ ᐊᐅᒄ ᐅᔭ ᑲ ᐃᓯ ᐅᑎᓂᑦ ᒋᓴᒪᓂᑐᐤ᙮ ᐎᔾ ᒋᓴᒪᓂᑐᐤ ᓂᒋ ᐃᑎᓴᐅᒄ ᒐᒋ ᐊᔨᒧᑎᒧᒡ ᐊᓂᔭ ᐱᒪᑎᓯᐅᓂᔪᐤ ᑕᓐ ᑲ ᐃᓯ ᒐᔅᑎᓇᑎᔅᑕᑦ ᒐ ᐊᔭᔨᒋ ᐊᐛᔪᐛ ᑕᑈᔭᔨᒪᔨᒐ ᒋᓴᔅ ᙭ᑕ᙮
2ᒋᔾ ᑎᒧᑎ ᒋ ᒥᓯᓇᐊᒪᑎᓐ, ᒋᔾ ᓂᑯᓯᐧᑲᐅᓐ ᑲ ᓴᒋᐃᑕᓐ᙮
ᒋᓴᒪᓂᑐᐤ ᐅᑕᐎᒪᐤ ᑭᔭ ᐅᑎᐸᔨᒋᒐᐤ ᒋᓴᔅ ᙭ ᒋᑭ ᒥᔪᑐᑕᒄ, ᒋᑭ ᒋᔅᑎᒪᒐᔨᒧᒄ ᑭᔭ ᒋᑭ ᒥᔨᒄ ᒋᔭᒪᔨᑎᒧᐅᓂᔪᐤ᙮
ᓂᓇᔅᑯᒧᐅᓐ ᑭᔭ ᒥᔽᔨᒧᐅᓐ
3ᓂᓇᔅᑯᒪᐤ ᒋᓴᒪᓂᑐᐤ ᐊ ᒐᔅᑎᓇᑕᔨᒧᔭᓐ ᐊ ᑯᐃᔅᑯᐱᒪᑎᓯᔭᓐ ᐊ ᐊᑐᔅᑯᐅᒃ, ᒧᔭᒻ ᐊᓂᔭᐧᑲ ᐊᓂᔅᒐ ᓂᐛᐧᑯᒪᑭᓂᒡ ᑲ ᐃᓯ ᐊᑐᔅᑯᐛᒡ᙮ ᑭᔭ ᓂᓇᔅᑯᒪᐤ ᒋᓴᒪᓂᑐᐤ ᐊ ᒋᔅᒋᓯᑐᑕᑕᓐ ᑕᑥᐤ ᐊ ᐊᔭᒥᐊᔭᓂ ᐊ ᒋᓯᑲᒡ ᑭᔭ ᐊ ᑎᐱᔅᑲᒡ᙮ 4ᓂ ᒋᔅᒋᓯᓐ ᑕᓐ ᑲ ᐃᓯ ᐅᒋᑯᐛᐱᔨᓐ ᒪᔅᑕᔾ ᑲ ᐛᐱᒥᑕᓐ᙮ ᑕᑈ ᓂᐸ ᒥᔽᔨᑕᓐ ᒥᓐ ᐛᐱᒥᑕᓐ ᐛᔅ ᓇᔅᒡ ᒋ ᐎ ᐛᐱᒥᑎᓐ᙮ 5ᓂ ᒋᔅᒋᓯᓐ ᓇᔅᒡ ᓱᒃ ᐊᒋ ᐃᑕᔨᑎᒥᐃᑯᔨᓐ ᐊ ᑕᑈᑎᒥᓐ᙮ ᐊᐅᑯᓐ ᑲ ᐃᓯᓇᑯᓂᔨᒡ ᒋᑲᐎᔾ ᔪᓂᔅ ᑭᔭ ᒍᐧᑯᒻ ᓗᔅ ᐅᑕᑈᑎᒧᐅᓄᐛᐤ᙮ ᓂ ᒐᔅᑎᓇᑕᔨᑕᓐ ᒪᒃ ᐊᐅᑯᓐ ᐊ ᐃᓯᓇᒂᒡ ᑭᔭ ᒋᔾ ᒋᑕᑈᑎᒧᐅᓐ᙮ 6ᐊᐅᒄ ᒪᒃ ᐅ ᐛᒋ ᐎ ᒋᔅᒋᓱᒥᑕᓐ ᓱᒃ ᒧᔅ ᒐᒋ ᐊᐱᒋᑕᐅᑦ ᐊᓂᔭ ᒥᔨᐛᐅᓂᔪᐤ ᒋᓴᒪᓂᑐᐤ ᑲ ᒥᔨᔅᒃ ᐃᔅᐱ ᑲ ᓴᒥᓂᑕᓐ ᐊ ᐊᔭᒥᐊᔅᑎᒪᑕᓐ᙮ 7ᐛᔅ ᐊᓂᔭ ᐊᒐᒂ ᒋᓴᒪᓂᑐᐤ ᑲ ᒥᔨᑕᐧᒄ ᐊᐅᒄ ᐊᓐ ᒐ ᐎᒋᐃᑕᐧᒄ ᒐ ᐊᑲ ᒋ ᑯᔅᑕᒋᔭᐧᒄ᙮ ᓱᐧᑲᑎᓯᐅᓂᔪᐤ ᒋ ᒥᔨᑯᓄᐤ ᐅ ᐊᒐᐧᒄ, ᑭᔭ ᓴᒋᐃᐛᐅᓂᔪᐤ ᑭᔭ ᒋ ᐎᒋᐃᑯᓄᐤ ᒐᒋ ᓂᓇᑭᑐᐛᔨᑎᒪᐧᒄ ᑕᓐ ᐊ ᐃᑎᔭᐧᒄ᙮
8ᐊᑲᐎᔾ ᒪᒃ ᒋᑭ ᐅᒋ ᓇᓂᑲᐎᔅᑎᒺᓐ ᒋᑎᐸᔨᒋᒐᓯᒥᓄᐤ ᐅᒥᔽᒋᒧᐅᓐ ᒐᒋ ᐊᔨᒧᑎᒧᑦ᙮ ᑭᔭ ᐊᑎ ᐅ ᒪᒂᒡ ᐊ ᒋᐸᐅᑯᐅᔭᓐ ᙭ ᐅᒋ ᐊᑲᐎᔾ ᒋᑭ ᐅᒋ ᓴᒂᔨᒧᓐ ᐊ ᐎᒐᐛᑭᓂᑕᑕᓐ᙮ ᐊᔭᔅᑯᐎᔅᑕ ᐃᔭᐱᒡ ᑕᓐ ᒐ ᐃᓯ ᓂᓇᐧᑲᑕᔨᒧᔨᓐ ᐊ ᐛᐎᑎᒥᓐ ᒥᔽᒋᒧᐅᓐ ᐛᔅ ᒋᑭ ᒥᔨᒄ ᒋᓴᒪᓂᑐᐤ ᒥᔅᑯᓯᐅᓂᔪᐤ᙮ 9ᒋᓴᒪᓂᑐᐤ ᔅᒋ ᐱᒪᒋᐃᑯᓄᐤ ᑭᔭ ᔅᒋ ᑕᑈᑎᑯᓄᐤ ᒐᒋ ᐸᔭᒋᓯᔭᐧᒄ ᐊ ᐅᑦ ᐃᔨᒥᑕᑕᐧᒄ᙮ ᓇᒪ ᐎ ᐊᓂᔭ ᑕᓐ ᑲ ᐃᓯ ᐊᑐᔅᒐᐛᐧᒄ ᐅᔭ ᐛᒋ ᐃᑐᑕᑕᐧᒄ᙮ ᐊᔅᒄ ᐊᑲ ᐅᒋ ᑎᑯᓂᔨᒡ ᐅᔭ ᐊᔅᒋᔪᐤ ᓴᔅ ᒋ ᐎᔭᔨᑎᒻ ᐅᔭ ᒐ ᐃᑐᑕᑕᐧᒄ ᒋᓴᒪᓂᑐᐤ᙮ ᔅᒋ ᐎ ᐛᐸᑎᔨᑯᓄᐤ ᐅᒋᓴᐛᑎᓯᐅᓐ ᙭ᑕ ᐊ ᑕᔨᒋ ᐅᒡ᙮ 10ᐃᔅᐱ ᒪᒃ ᒋᐱᒪᒋᐃᐛᒥᓄᐤ ᒋᓴᔅ ᙭ ᑲ ᐸᒋ ᓄᑯᐊᑭᓄᐅᑦ ᐅᑕ ᐊᔅᒋᒡ ᐊᑯᑕ ᑲ ᐅᒋ ᒋᔅᒐᔨᑎᒪᐧᒄ ᒋᓴᐛᑎᓯᐅᓐ᙮ ᐎᔾ ᒋᓴᔅ ᒋ ᓴᐧᑯᒋᑕᐤ ᓂᐳᐅᓂᔪᐤ ᑭᔭ ᔅᒋ ᐛᐸᑎᔨᑯᓄᐤ ᒥᔽᒋᒧᐅᓂᒡ ᐅᒡ ᐊ ᑎᒂᒡ ᑲᒋᒡ ᐱᒪᑎᓯᐅᓐ᙮
11ᒋᓴᒪᓂᑐᐤ ᓂᒋ ᐅᑎᓂᒄ ᒐᒋ ᐛᐎᑎᒪᓐ ᐅ ᒥᔽᒋᒧᐅᓐ, ᑭᔭ ᐊᑈᔅᑕᓐ ᒐᒋ ᐃᑕᐱᑎᓯᔭᓐ ᑭᔭ ᒐᒋ ᒋᔅᑯᑎᒪᒐᔭᓐ ᐅ ᒥᔽᒋᒧᐅᓐ᙮ 12ᐊᐅᒄ ᒪᒃ ᐅ ᓇᓂᑯᑎᓂᔾ ᐛᒋ ᓂᓇᐧᑲᑕᔨᒧᔭᓐ, ᒥᒄ ᒪᒃ ᓇᒪ ᑎᑯᓐ ᑕᓐ ᒐᒋ ᐃᓯ ᐳᓂᒪᒥᓯᑐᑎᒪᓐ ᐅ ᒥᔽᒋᒧᐅᓐ, ᐛᔅ ᓂ ᒋᔅᒐᔨᒪᐤ ᐊᓐ ᐊᐛᓐ ᑲ ᑕᑈᔭᔨᒥᒃ ᑭᔭ ᓇᔅᒡ ᓂ ᒐᔅᑎᓇᑕᔨᑕᓐ ᒐ ᒥᔪ ᑭᓄᐛᔨᑕᐧᒃ ᐊᓂᔭ ᑕᓐ ᑲ ᐃᓯ ᐱᔅᑎᓂᓱᐅᒡ ᐸᑐᔅ ᐅᑎᒋᐱᔨᒐ ᐊᓂᔭ ᐊ ᒋᓯᑲᔨᒡ ᒥᓐ ᒐ ᑎᑯᓯᐧᒃ᙮
13ᓱᒃ ᐃᔭᒂ ᓂᓇᑭᑐᐛᔨᑕ ᑭᔭ ᒧᔅ ᓇᓴᐊ ᑕᓐ ᑲ ᐃᓯ ᒋᔅᑯᑎᒪᑕᓐ, ᑕᑈᑎᒧᐅᓂᒡ ᑭᔭ ᓴᒋᐃᐛᐅᓂᒡ ᒐᒋ ᐃᓯ ᐱᒪᑎᓯᔨᓐ ᐊ ᐎᒐᐅᑦ ᙭ ᒋᓴᔅ᙮ 14ᑲ ᐸᔭᒋᓯᑦ ᐊᒐᐧᒄ ᒪᒃ ᐅᓱᐧᑲᑎᓯᐅᓐ ᐊ ᐃᓯ ᐱᒋᔅᑲᑯᐅᑦ, ᓱᒃ ᐃᔭᒂ ᐃᓯ ᓂᓇᑭᑐᐛᔨᑕ ᒥᔽᒋᒧᐅᓐ ᑕᑈᐅᓐ ᑕᓐ ᐊᓐ ᑲ ᐱᔅᑎᓂᒪᑯᔨᓐ ᒐ ᐛᐎᑎᒥᓐ᙮
15ᐛᔅ ᒋ ᒋᔅᒐᔨᑕᓇᒐ ᒥᓯᐛ ᐊᓐᒡ ᑲ ᒂᔅᑲᑎᓯᒡ ᐊᓐᑕ ᐊᐃᓴ ᐊ ᑕᒡ ᐊᒋ ᓂᑭᓯᒡ, ᐱᒋᓚᔅ ᑭᔭ ᐊᕐᒪᑭᓂᔅ ᓇᒪ ᓇᔅᒡ ᓂᑦ ᐊᐱᑕᔨᒥᑯᒡ᙮
16ᓂᑦ ᐊᔭᒥᐊᔅᑎᒧᒪᔪᐛ ᐅᓂᓯᑈᕋᔅ ᐊᓐᑕ ᐊᓂᔭ ᐊ ᐸᐃᑯᔅᑲᓇᓯᑦ ᐊ ᑕᔨᒋ ᒐᒋ ᒋᔅᑎᒪᒐᔨᒥᑯᒡ ᒋᓴᒪᓂᑐᐛ ᐛᔅ ᒧᔅ ᒋ ᑎᑯᓂᔪᐤ ᑕᓐ ᑲᒋ ᐃᓯ ᐸᒋ ᐛᐎᒋᐃᑦ ᐅᓂᓯᐳᕋᔅ, ᓇᒪ ᓇᔅᒡ ᐅᒋ ᓴᒂᔨᒧᐃᑯᐤ ᐊ ᒋᐸᐅᑯᐎᒡ᙮ 17ᐃᔅᐱ ᑲ ᑎᑯᓯᐧᒃ ᕈᒥᒡ ᑎᐛᒡ ᓂᒋ ᓇᓂᑐᐛᐱᒧᒄ ᐸᑐᔅ ᑲ ᒥᔅᑯᐅᑦ᙮ 18ᑭᒪ ᒋ ᓄᑯᑥᑯᑦ ᐅᑎᐸᔨᒋᒐᐛ ᐊ ᒋᔅᑎᒪᒐᔨᒥᑯᑦ ᐊᓐᑕ ᐊᓂᔭ ᐊ ᒋᓯᑲᔨᒡ ᙭ᑕ ᒥᓐ ᑎᑯᓯᓂᔨᒐᓂ᙮ ᑭᔭ ᒋ ᒋᔅᒐᔨᑎᒺᓐ ᑕᓐ ᑲ ᐃᔅᐱᔅ ᒋ ᒥᔪᑐᑎᒧᐅᑦ ᐊᓐᑕ ᒪᒂᒡ ᐃᐱᓴᔅ ᑲ ᑕᐅᒡ᙮
Currently Selected:
2 ᑎᒧᑎ 1: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
