1 ᑕᓴᓗᓂᔭᓇ 3

ᑕᓐ ᑲ ᐃᓯ ᒥᔪ ᐊᐱᑎᓯᑦ ᑎᒧᑎ ᑕᓴᓗᓇᐃᑲᒡ

1ᐊᑯ ᒪᒃ ᐃᔅᐱ ᐊᑲ ᐅᒋ ᐃᑎᔭᒡ ᒐ ᐊᑲ ᒋ ᐛᐱᒥᑕᒡ ᐊᑯ ᑲ ᐎᔭᔨᑎᒪᒡ ᐅᑕ ᐊᑕᓐᔅ ᒐᒋ ᑕᔭᒡ, 2ᐊᑯ ᑎᒧᑎ ᑲ ᐃᑎᓴᐅᒋᒡ ᐊᓐᑕ ᐊ ᑕᐛᒄ᙮ ᐅ ᒋᐧᑲᓂᓯᓄᐤ ᓂ ᐎᒋ ᐊᑐᔅᒐᒥᑯᓇᓐ ᒋᓴᒪᓂᑐᐛ ᐊ ᐊᑐᔅᑯᐅᒥᒋᒋ ᑭᔭ ᐎᔾ ᐊ ᐛᐎᑕᐧᒃ ᒥᔽᒋᒧᐅᓂᔪᐤ ᐊ ᑎᐸᒋᒪᑭᓄᔨᒋ ᙭ᑕ᙮ ᓂᒋ ᐃᑎᓴᐛᓇᓐ ᒐᒋ ᐎᒋᐃᑕᒄ ᐊᑐᐎᔅ ᒐᒋ ᓱᒋᑲᐳᐛᒄ ᑕᓐ ᐊ ᐃᓯ ᑕᑈᔭᔨᒪᒄ ᙭, 3ᐊᑲ ᐛᒋ ᐸᐃᒄ ᐊ ᑎᓯᔭᒄ ᒐᒋ ᒋᐛᑲᐳᔭᒄ ᐊᓐ ᐊ ᓂᓇᐧᑲᒋᐃᑯᔭᒄ ᙭ ᐅᒡ᙮ ᒋᔨᐛᐤ ᓇᓂᑎᒻ ᒋ ᒋᔅᒐᔨᑕᓇᐛᐤ ᐊᐅᑯᓐ ᑭᔭ ᑲ ᐃᓯ ᐎᔭᔨᑕᐧᒃ ᒋᓴᒪᓂᑐᐤ, ᒐᒋ ᓂᓇᐧᑲᒋᐃᑯᐛᐧᒄ ᐊ ᓇᓴᐅᒪᐧᑯ ᒋᓴᓴ᙮ 4ᐛᔅ ᐊᔅᒄ ᐊᓐᑕ ᐊ ᑕᔭᒄ ᐊᒋ ᑕᔭᒡ ᓴᔅ ᓂᑲᓐ ᔅᒋ ᐎᑎᒪᑎᓇᓐ ᒐ ᐅᑎᒋᐱᔨᒡ ᒐ ᓂᓇᐧᑲᒋᐃᑯᔭᐧᒄ᙮ ᐊᐅᑯᓐ ᒪᒃ ᒧᔭᒻ ᑕᑈ ᑲ ᐃᔅᐱᔨᒡ ᒧᔭᒻ ᐊ ᐃᓯ ᒋᔅᒐᔨᑎᒪᒄ ᐊᑯ᙮ 5ᐊᐅᒄ ᒪᒃ ᐊᓂᔭ ᐛᒋ ᔭᐃᑕᔾ ᒋ ᐃᑎᓴᐅᒄ ᑎᒧᑎ ᐊᓐᑕ ᐊ ᑕᐛᒄ᙮ ᐃᔅᐱ ᐊᑲ ᑲᒋ ᐃᑎᔭᓐ ᐊᑲ ᒋᔅᒐᔨᒥᑎᑯᒡ ᑕᓐ ᐊ ᐃᔅᐱᔨᔭᒄ ᐊᑯ ᒂ ᐃᑎᓴᐅᒃ ᑎᒧᑎ ᐊᓐᑕ ᐊ ᑕᐛᒄ ᒐᒋ ᓂᑐ ᒋᔅᒐᔨᒥᑕᒡ ᑕᓐ ᐊ ᐃᔅᐱᔪᐛᒂ ᐊ ᑕᑈᔭᔨᒪᒄ ᙭᙮ ᓂᒋ ᓴᒋᓯᓐ ᒐᒋ ᐃᑐᑕᑕᒄ ᒥᒋᒥᓂᑐᐤ ᒐᒋ ᐳᓂᐛᒄ ᐊ ᑕᑈᑎᒪᒄ ᒐᔅᑲ ᒐᒋ ᐃᓯᓇᒂᒡ ᑕᓐ ᑲ ᐃᓯ ᐊᑐᔅᑯᐅᒋᒡ ᐅᑎᐸᔨᒋᒐᐤ ᐊᓐᑕ ᐊ ᑕᔭᒄ᙮

6ᐊᑯ ᒪᒃ ᐊᒋ ᐸᒋ ᑎᑯᓯᐧᒃ ᑎᒧᑎ ᐊᓐᑕ ᐊ ᑕᐛᒄ ᐊ ᐅᑐᑕᑦ ᑭᔭ ᐊᒋ ᒥᔪ ᐊᔨᒧᑎᒧᔨᒥᑦ ᒋᑕᑈᑎᒧᐅᓄᐛᔪᐤ ᑭᔭ ᒋᓴᒋᐃᐛᐅᓄᐛᔪᐤ, ᐊᔪᐤ ᓂᒋ ᐎᑎᒪᑯᓇᓐ ᒧᔅ ᐊ ᒥᔪ ᒋᔅᒋᑐᐎᔭᒡ ᑭᔭ ᓇᔅᒡ ᐊ ᐎ ᐛᐱᒥᔭᒡ ᒧᔭᒻ ᓂᔭᓐ ᐛ ᐃᔅᐱᔅ ᐎ ᐛᐱᒥᑕᒡ᙮ 7ᐊᑯ ᒪᒃ ᐊᓐ ᒪᒂᒡ ᐊ ᒥᑯᔅᑲᑕᔨᑎᒪᒡ ᑭᔭ ᐊ ᓂᓇᐧᑲᑕᔨᒧᔭᒡ ᓂᒋ ᐅᐱᓂᑯᐛᓇᓐ ᓂᐱᒪᑎᓯᐅᓇᒡ ᐅᔭ ᑲ ᐃᑕᒋᒥᑕᒄ᙮ ᓇᔅᒡ ᓂ ᒥᔽᔨᒧᐃᑯᐅᓇᓐ ᐊ ᐸᑎᒪᒡ ᑕᓐ ᐊ ᐃᓯ ᑕᑈᔭᔨᒪᒄ ᙭᙮ 8ᐊᑯ ᒪᒃ ᒧᔭᒻ ᐊ ᐅᔅᒋᐃᑯᐅᔭᒡ ᓂᐱᒪᑎᓯᐅᓇᒡ ᓂᑦ ᐃᑕᔨᑕᓇᓐ ᐊ ᒋᔅᒐᔨᒥᑕᒡ ᐊᔅᒄ ᐃᔭᐱᒡ ᐊ ᓱᒋᑲᐳᐅᔭᒄ ᐊ ᐎᒐᐛᒄ ᐅᑎᐸᔨᒋᒐᐤ᙮

1 Thessalonians 3.9-13 (Advent-1 Year C)

9ᑕᓐᑕ ᒪᒃ ᒐᒋ ᐅᒋ ᑕᑈ ᓂᓇᔅᑯᒥᒋᒡ ᒋᓴᒪᓂᑐᐤ ᒋᔨᐛᐤ ᐅᒋ ᐊᓐ ᐊ ᐃᔅᐱᔅ ᓇᔅᒡ ᒥᔽᔨᑎᒥᐃᔭᒡ ᐃᔅᐱ ᐊ ᐃᔨᒥᐃᒋᒡ ᒋᓴᒪᓂᑐᐤ᙮ 10ᒧᓯᓇᐤ ᓂ ᓂᑐᑎᒧᐛᓇᓐ ᒋᓴᒪᓂᑐᐤ ᒐᒋ ᐛᐱᒥᑕᒡ ᒥᓐ ᒐᒋ ᑕᔭᒡ ᐊᓐᑕ ᐊ ᑕᔭᒄ ᑭᔭ ᒐᒋ ᐎᒋᐃᑕᒡ ᑕᓐ ᐊᔅᒄ ᐊ ᐃᓯ ᓄᑕᐱᔨᔭᒄ ᑕᑈ ᒐᒋ ᑕᑈᔭᔨᒪᒄ ᙭ ᑕᓐ ᒋᐸ ᐃᓯ ᑕᑈᔭᔨᒪᐛᐤ᙮

11ᐊᐅᒄ ᒪᒃ ᐅ ᐊ ᐃᓯ ᐊᔭᒥᐊᔅᑎᒪᑕᒡ, ᓂ ᓂᑐᑎᒧᐛᓇᓐ ᒋᓴᒪᓂᑐᐤ ᒍᑕᐎᓄᐤ ᑭᔭ ᐅᑎᐸᔨᒋᒐᐤ ᒋᓴᔅ ᒐᒋ ᓇᐃᐱᔨᑕᒡ ᒥᓐ ᒐᒋ ᓂᑐᐛᐱᒥᑕᒡ᙮ 12ᓂ ᓂᑐᑎᒧᐛᓇᓐ ᐅᑎᐸᔨᒋᒐᐤ ᒐᒋ ᐃᑐᑕᑕᒄ ᐊᔭᔅᒃ ᒐᒋ ᓴᒋᐃᑐᐛᒄ ᑭᔭ ᑯᑎᑲ ᐊᐛᔪᐛ ᐊᔭᔅᒃ ᒐᒋ ᓴᒋᐃᒪᑯ, ᒐᒋ ᐊᑎ ᐃᔅᐱᔅ ᓴᒋᐃᑐᔭᒄ ᑭᔭ ᒐᒋ ᐊᑎ ᐃᔅᐱᔅ ᓴᒋᐊᑯᒡ ᑯᑎᑭᒡ ᐊᐛᓐᒋ ᒧᔭᒻ ᓂᔭᓐ ᐊ ᐃᔅᐱᔅ ᓴᒋᐃᑕᒡ᙮ 13ᐊᑯᑕ ᒐ ᐅᒋ ᒥᔅᑯᓯᔨᑕᒄ ᑭᔭ ᑯᐃᔅᒄ ᒐ ᐃᓯ ᐱᒪᑎᓯᔭᒄ ᑭᔭ ᒐ ᐸᔭᒋ ᐱᒪᑎᓯᔭᒄ ᐃᔅᐱ ᐅᑎᔅᑯᑲᐳᔅᑎᐛᒂ ᒋᓴᒪᓂᑐᐤ ᒍᑕᐎᓄᐤ ᑎᑯᓯᒐ ᐅᑎᐸᔨᒋᒐᐤ ᒋᓴᔅ ᙭ ᐊ ᐸᒋ ᐎᒐᐛᑦ ᒥᓯᐛ ᐊᓂᔭᔪᐛ ᑲ ᑕᑈᑎᒥᔨᒋ᙮

Currently Selected:

1 ᑕᓴᓗᓂᔭᓇ 3: ᓇᔅᑲᐱ

Highlight

Copy

Want to have your highlights saved across all your devices? Sign up or sign in

ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ

Naskapi Development Corporation

Kawawachikamach, Québec G0G 2Z0 Canada

Canadian Bible Society

10 Carnforth Road, Toronto Ontario M4A 2S4 Canada

Learn More About ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ