1 ᑯᕆᓐᑎᔭᓇ 7
7
ᑕᓐ ᒋᐸ ᐃᑐᐅᒡ ᑲ ᓂᐳᐅᒡ ᐊᐛᓐᒋ
1ᐊᑯ ᒪᒃ ᑲᐤ ᒐ ᐎᑎᒪᑎᑯᒡ ᑕᓐ ᑲ ᐃᓯ ᐊᔨᒧᑎᒪᒄ ᐅᑕ ᑲ ᐸᒋ ᒥᓯᓇᐊᒧᐅᔭᒄ᙮ ᔅᒋ ᐃᔅᒋᔄᓇᐛᐤ ᐊ ᒥᔽᓯᔨᒡ ᓇᐸᐤ ᒐ ᐊᑲ ᒋ ᐱᒪᔨᒪᑦ ᐃᔎᐛ᙮ 2ᐊ ᒥᓴᒡ ᒪᒃ ᑯᒂᒋᐃᐛᐅᓐ ᒐᒋ ᐎᓂᓱᐤ ᐱᒪᑎᓯᓇᓄᐅᒡ, ᒥᓯᐛ ᓇᐸᐤ ᑎᐱᔨᐛ ᒋᐸ ᐎᐤ, ᑭᔭ ᒥᓯᐛ ᐃᔎᐤ ᑎᐱᔨᐛ ᒋᐸ ᐅᓇᐸᒧᐤ᙮ 3ᓇᐸᐤ ᒋᐸ ᐃᓯ ᐱᒪᔨᒪᐤ ᐎᐛ ᐊᓂᔭ ᐊ ᐃᓯ ᓂᑐᐛᔨᑕᑯᓯᑦ ᒐᒋ ᐃᑎᑦ᙮ ᑭᔭ ᐃᔎᐤ ᐊᐅᑯᓐ ᒋᐸ ᐃᑐᑐᐛᐤ ᐅᓇᐸᒪ᙮ 4ᐛᔅ ᐃᔎᐤ ᑲ ᐅᓇᐸᒥᑦ, ᓇᒪ ᒥᒄ ᐎᔾ ᑎᐸᔨᑎᒻ ᐎᔪᐤ᙮ ᐛᔅ ᐅᓇᐸᒪ ᑎᐸᔨᑎᒥᔪᐛ᙮ ᐊᐅᑯᓐ ᒪᒃ ᑭᔭ ᓇᐸᐤ, ᓇᒪ ᒥᒄ ᐎᔾ ᑎᐸᔨᑎᒻ ᐎᔪᐤ᙮ ᐛᔅ ᐎᐛ ᑎᐸᔨᑎᒥᔪᐛ᙮ 5ᓇᒪ ᒋᐸ ᐅᒋ ᐃᑎᓇᐛᐤ ᒐ ᐊᑲ ᒋ ᐱᒪᔨᒥᑐᔭᒄ᙮ ᒥᒄ ᑭᑈ ᓂᑲᓐ ᑕᐱᔅᑯᓐ ᐃᓯ ᐊᑕᔨᑎᒧᐛᒂ ᐛᐃᐱᔅᒋᔅ ᒐ ᐊᑲ ᒋ ᐱᒪᔨᒥᑐᔭᒄ ᒥᒄ ᒐᒋ ᐊᔭᒥᐊᔭᒄ᙮ ᐊᑯ ᒪᒃ ᐃᔅᐱ ᐅᑎᒋᐱᔨᒐ ᐊᓐᑕ ᑲ ᐃᔅᒋᔄᔭᒄ ᒐ ᐃᔅᐱᔅ ᐊᑲ ᐱᒪᔨᒥᑐᔭᒄ ᐊᑯ ᒥᓐ ᒋᐸ ᒋ ᐱᒪᔨᒥᑐᓇᐛᐤ᙮ ᐛᔅ ᓱᒐᔨᑕᑯᓯᔭᒂ ᓇᒪ ᒋᑭ ᐅᒋ ᓴᐧᑯᒋᐃᑯᐛᐤ ᒥᒋᒥᓂᑐᐤ ᓂᑎᒥᒄ ᒐᒋ ᐃᑐᐛᒄ᙮ 6ᐊᐅᑯᓐ ᑭᑈ ᒐᒋ ᐃᑎᔭᒄ ᐅ ᐎ ᑎᔭᒂ᙮ ᓇᒪ ᒋᑦ ᐃᑎᓱᒥᑎᓇᐛᐤ ᔭᐃᑕᔾ ᐅ ᒐᒋ ᐃᑎᔭᒄ ᒥᒄ ᒋ ᐎ ᐃᑎᑎᓇᐛᐤ ᐊ ᐱᔅᑎᓂᑎᑯᒡ ᐅ ᒐᒋ ᐃᑐᑎᒪᒄ᙮ 7ᐃᐛᒃ ᒪᒃ ᓂᐸ ᒥᔽᔨᑕᓐ ᒥᓯᐛ ᐊᐛᓐ ᐃᓯᓇᑯᓯᑦ ᓂᔾ ᑕᓐ ᐊ ᐃᓯᓇᑯᓯᔭᓐ᙮ ᒥᓯᐛ ᐊᐛᓐ ᑎᐱᔨᐛ ᐊᔭᐤ ᒥᔨᐛᐅᓂᔪᐤ ᒋᓴᒪᓂᑐᐛ ᐊᒋ ᒥᔨᑯᑦ, ᒥᓯᐛ ᐊᐛᓐ ᐃᔭᒡ ᐃᓯᓇᑯᓂᔪᐤ ᑕᓐ ᑲ ᐃᓯ ᒥᔭᑭᓄᐅᑦ ᐊ ᐃᓯᓇᑯᓂᔨᒡ ᑯᑎᑲ ᐊᐛᔪᐛ ᐊ ᐃᓯ ᒥᔭᑭᓄᔨᒋ᙮
8ᐊᑯ ᐊᓐᒡ ᐊᑲ ᓂᐳᐅᒡ ᑭᔭ ᐊᓐᒡ ᑲ ᐸᐃᑯᓯᒡ ᐃᔎᐅᒡ ᓂ ᐎ ᐃᑕᐅᒡ᙮ ᐃᐛᒃ ᒥᔽᐤ ᒐ ᐊᑲ ᓂᐳᐅᔭᒄ ᒧᔭᒻ ᓂᔾ ᑕᓐ ᐊ ᐃᓯᓇᑯᓯᔭᓐ᙮ 9ᒥᒄ ᒪᒃ ᐊ ᐃᑕᔨᑎᒧᒂ ᐊᐛᓐ ᐊ ᐊᔨᐃᒥᐃᑯᑦ ᐊ ᐊᑲ ᓂᐳᐅᑦ ᐊᔪᐛᒃ ᒥᔽᓯᔪᐤ ᒐᒋ ᓂᐳᐅᑦ᙮ ᐛᔅ ᐅᔅᑕ ᒥᔽᓱᐤ ᒐᒋ ᓂᐳᐅᓇᓄᐅᒡ ᐃᔅᐱᔅ ᐎ ᒐᒋ ᐃᔎᓱᓇᓄᐅᒡ᙮
10ᐊᑯ ᐊᓐᒡ ᑲ ᓂᐳᐅᒡ ᒐ ᐎᑎᒧᐅᒂᐤ ᑕᓐ ᒋᐸ ᐃᑐᐅᒡ᙮ ᐅᑎᐸᔨᒋᒐᐤ ᐃᑎᓱᐛᐤ ᐅᔭ, ᓇᒪᔭᐤ ᓂᔾ ᐅ ᑲ ᐃᔅᒋᔄᔭᓐ᙮ ᓇᒪ ᒋᐸ ᐅᒋ ᓂᑭᑕᐤ ᐃᔎᐤ ᐅᓇᐸᒪ᙮ 11ᐅᔭ ᑎᒐ ᐃᔎᐤ, ᐊᑯᔅ ᐊᑲ ᒥᓐ ᒋᑭ ᐅᒋ ᓂᐳᐅᐤ᙮ ᒪᒃ ᑲᐤ ᒋᐸ ᐎᒋᒪᐤ ᐊᓂᔭᔪᐛ ᐅᓇᐸᒪ᙮ ᐊᑯ ᓇᐸᐤ ᓇᒪ ᒋᐸ ᐅᒋ ᐛᐱᓇᐤ ᐎᐛ᙮
12ᐊᑯ ᒪᒃ ᑯᑎᑭᒡ ᐊᐛᓐᒋ ᒐ ᐃᔨᒥᐃᒂᐤ᙮ ᐅ ᒪᒃ ᒐ ᐃᓯ ᐊᔨᒧᑎᒪᓐ ᐊᓄᒡ ᓇᒪᐎᔾ ᐅᑎᐸᔨᒋᒐᐤ ᑲ ᐃᑎᓱᐛᑦ᙮ ᓂᔾ ᐅ ᐊ ᐃᑕᔨᑎᒪᓐ ᒋᐸ ᐃᑎᑎᓇᐛᐤ᙮ ᐊ ᑕᒂ ᒋᐧᑲᓂᓯᓄᐤ ᐊ ᑕᑈᑕᐧᒃ ᐎᐛ ᒪᒃ ᐊᑲ ᑕᑈᑎᒥᔨᒋ ᓇᒪ ᒋᐸ ᐅᒋ ᐛᐱᓇᐤ ᐊᓂᔭ ᐃᔭᐱᒡ ᐛ ᐎᒋᒥᑯᒂ᙮ 13ᒪᒃ ᐃᔎᐤ ᐊ ᑕᑈᑕᐧᒃ ᐊᑲ ᒪᒃ ᑕᑈᑎᒥᔨᒋ ᐅᓇᐸᒪ, ᓇᐊᔨᑎᒥᔨᒐᓂ ᒪᒃ ᐃᔭᐱᒡ ᒐᒋ ᐎᒋᒥᑯᑦ ᓇᒪ ᒋᐸ ᐅᒋ ᐛᐱᓇᐤ᙮ 14ᐛᔅ ᓇᐸᐤ ᐊᑲ ᑕᑈᑕᐧᒃ ᐸᔭᒋᐃᑯᐤ ᐎᐛ ᐊᓂᔭ ᐅᒋ ᐊ ᑕᑈᑎᒥᔨᒋ᙮ ᑭᔭ ᐃᔎᐤ ᐊᑲ ᑕᑈᑕᐧᒃ ᐸᔭᒋᐃᑯᐤ ᐊᓂᔭᔪᐛ ᐅᒋ ᐊ ᑕᑈᑎᒥᔨᒋ ᐅᓇᐸᒪ᙮ ᐊᑲ ᒪᒃ ᑎᔭᑈᒥᑭᓂᒂ ᐅ ᑲ ᐃᔅᒋᔄᔭᓐ ᑭᑈ ᒧᔭᒻ ᐊᑲ ᐸᔭᒋᓯᒡ ᒋᐸ ᐃᓯ ᑭᓄᐛᐱᒪᐤ ᒋᓴᒪᓂᑐᐤ ᒋᑦ ᐊᐛᓯᒧᐛᐛ᙮ ᐊᓄᒡ ᒪᒃ ᐊ ᐸᔭᒋᓯᔨᒋ ᒋᑦ ᐊᐛᓯᒧᐛᐛ ᐃᓯ ᑭᓄᐛᐱᒪᐤ ᒋᓴᒪᓂᑐᐤ᙮
15ᐛ ᐛᐱᓇᒂ ᒪᒃ ᐎᒋᒪᑭᓇ ᐊᓐ ᐊᐛᓐ ᐊᑲ ᑕᑈᑕᐧᒃ ᐊᐅᑯᓐ ᑭᑈ ᒐ ᐃᓯᓇᑯᓂᔨᒡ᙮ ᐅ ᒪᒃ ᐃᔅᐱᔨᒐ, ᐊᓐ ᒋᐧᑲᓂᓯᓄᐤ ᑲ ᑕᑈᑕᐧᒃ ᒋᑭ ᒋ ᐱᔅᑎᓇᐤ ᒐᒋ ᓂᑭᑎᑯᑦ ᐊᓂᔭᔪᐛ ᐎᒋᒪᑭᓇ᙮ ᐛᔅ ᒋᓴᒪᓂᑐᐤ ᒋ ᓂᑐᐛᔨᒥᑯᓄᐤ ᒋᔭᒪᔨᑎᒧᐅᓂᒡ ᒐᒋ ᐃᓯ ᐱᒪᑎᓯᔭᐧᒄ᙮ 16ᒋᔾ ᐃᔎᐤ ᑲ ᑕᑈᔭᔨᒥᑦ ᒋᓴᔅ, ᒂᔄᓐ ᒋᑭ ᒋ ᐃᓯᓇᑯᓐ ᒐᒋ ᐱᒪᒋᐅᑦ ᒋᓇᐸᒻ ᒋᔾ ᐅᒡ, ᑭᔭ ᒋᔾ ᓇᐸᐤ ᑲ ᑕᑈᔭᔨᒥᑦ ᒋᓴᔅ, ᒋᑭ ᒋ ᐃᓯᓇᑯᓂᔪᐤ ᒐᒋ ᐱᒪᒋᐅᑦ ᒋᐅ ᒋᔾ ᐅᒡ᙮
ᐃᓯ ᐱᒪᑎᓯ ᑕᓐ ᑲ ᐃᓯ ᐎᔅᑕᑦ ᒋᓴᒪᓂᑐᐤ ᒋᐸ ᐃᓯ ᐱᒪᑎᓯᐛᓐ
17ᒥᓯᐛ ᐊᐛᓐ ᒋᐸ ᐃᓯ ᐱᒪᑎᓯᐤ ᑕᓐ ᑲ ᐃᓯ ᒥᔭᑭᓄᐅᑦ ᒐᒋ ᐃᓯ ᐱᒪᑎᓯᑦ, ᐊᓂᔭ ᑭᑈ ᑲ ᐃᓯ ᐅᑎᓂᑯᑦ ᒋᓴᒪᓂᑐᐛ ᒐ ᐃᓯ ᐱᒪᑎᓯᑯᐱᓇ᙮ ᐊᐅᒄ ᐅᔭ ᐊ ᐃᓯ ᓯᒋᒥᒂᐤ ᒐᒋ ᐃᓯ ᓂᓇᑭᑐᐛᔨᑕᒡ ᒥᓯᐛ ᒪᒧᐤ ᑲ ᐊᔭᒥᐊᐛᑎᓯᒡ᙮ 18ᒧᔭᒻ ᓇᐸᐤ ᑲ ᒋᔅᒋᓄᐛᒋᔄᑭᓄᒂ ᐎᔭᒡ, ᓇᒪ ᒋᐸ ᐅᒋ ᐃᑕᔨᑕᑯᓱᐤ ᐊᓂᔭ ᑕᓐ ᐊ ᐃᑕᔨᑕᑯᓯᔨᒋ ᐊᑲ ᒋᔅᒋᓄᐛᒋᔄᑭᓄᔨᒋ᙮ ᑭᔭ ᓇᐸᐤ ᐊᑲ ᒋᔅᒋᓄᐛᒋᔄᑭᓄᐅᑦ ᐃᔅᐱ ᒪᒃ ᐊ ᒂᔅᑲᑎᓯᑦ, ᓇᒪ ᒋᐸ ᐅᒋ ᐎ ᒋᔅᒋᓄᐛᒋᔄᑯᓯᐤ᙮ 19ᓇᒪ ᒐᒂᔪᐤ ᐃᑕᔨᑎᒻ ᒋᓴᒪᓂᑐᐤ ᑲ ᒋᔅᒋᓄᐛᒋᔄᑭᓄᐎᒂᓂ ᓇᐸᐛ ᒪᒃ ᐊᑲ ᐅᒋ ᒋᔅᒋᓄᐛᒋᔄᑭᓄᐎᒂᓂ᙮ ᐊᓐ ᒐᒂᓐ ᒋᒋᐛ ᐊ ᐃᑕᔨᑕᒂᒡ ᐊᐅᒄ ᒐᒋ ᓂᓇᐃᑕᑭᓄᔨᒋ ᒋᓴᒪᓂᑐᐤ ᐅᑦ ᐃᑎᓱᐛᐅᓇ᙮ 20ᒥᓯᐛ ᐊᐛᓐ ᐊᐅᑯᓐ ᐃᔭᐱᒡ ᒋᐸ ᐃᓯ ᐱᒪᑎᓯᐤ ᑕᓐ ᑲ ᐃᓯᑕᔨᒋ ᒋᓴᒪᓂᑐᐛ ᐅᐱᒪᑎᓯᐅᓐ ᐊᔅᒄ ᐊᑲ ᐅᒋ ᐱᒪᒋᐅᑦ᙮ 21ᐊᐱᒋᐊᑭᓐ ᑲ ᐃᑕᐱᒋᐃᑯᔨᓐ ᐃᔅᐱ ᑲ ᐱᒪᒋᐅᔨᓐ ᐊᑲᐎᔾ ᒐᒂᓐ ᐃᑕᔨᑕ᙮ ᒥᒄ ᒪᒃ ᒥᔪᐱᔨᒐ ᐊᑲ ᐊᑯ ᒐᒋ ᐅᑦ ᐊᐱᒋᐊᑭᓂᑐᑕᑯᔨᓐ ᑭᑈ ᒐᒋ ᐅᑎᓂᒥᓐ ᐊᓐ ᐃᓯ ᓇᐃᐱᔨᒐ᙮ 22ᐛᔅ ᐊᓐ ᐊᐛᓐ ᑲ ᐅᑦ ᐊᐱᒋᐊᑭᓂᑐᑐᐛᑭᓄᐅᑦ ᐃᔅᐱ ᑲ ᐱᒪᒋᐃᑯᑦ ᐅᑎᐸᔨᒋᒐᐛ, ᑲ ᑎᐸᔨᒥᓱᑦ ᐃᓯ ᑭᓄᐛᐱᒥᑯᐤ ᐅᑎᐸᔨᒋᒐᐛ, ᐊᑯ ᐊᓐ ᐊᐛᓐ ᐎᔾ ᑲ ᑎᐸᔨᒥᓱᑦ ᑲ ᐱᒪᒋᐊᑭᓄᐅᑦ ᐊᐅᑯᓐ ᐊᓐ ᙭ᑕ ᐛᑕᐱᒋᐊᑭᓂᑐᑕᑯᑦ᙮ 23ᒥᔅᑎ ᒋ ᐃᔅᐱᔨᑯᐤ ᙭ ᐎᔾ ᒐᒋ ᑎᐸᔨᒥᔅᒃ᙮ ᐊᑲᐎᔾ ᒪᒃ ᐱᔅᑎᓂᒧᐤ ᓇᐸᐤ ᒐᒋ ᑎᐸᔨᒥᔅᒃ᙮ 24ᐊᑯ ᒪᒃ ᓂᐧᑲᓂᓯᑐᒄ, ᐊᐅᑯᓐ ᐃᔭᐱᒡ ᒋᐸ ᐃᓯ ᐱᒪᑎᓯᐤ ᐊᐛᓐ ᑕᓐ ᑲ ᐃᓯᑕᔨᒋ ᒋᓴᒪᓂᑐᐛ ᐅᐱᒪᑎᓯᐅᓐ ᐊᔅᒄ ᐊᑲ ᐅᒋ ᐱᒪᒋᐅᑦ ᒋᓴᒪᓂᑐᐛ ᐊ ᐎᒐᐛᑦ᙮
ᑲ ᓂᐳᐅᒡ ᑭᔭ ᐊᓐᒡ ᑲ ᐸᐃᑯᓯᒡ ᐃᔎᐅᒡ
25ᐊᑯ ᒪᒃ ᐊᓐᒡ ᐅᔅᒋᓂᒋᓱᐅᒡ ᐊᑲ ᐅᐎᒋᒪᑭᓂᒡ ᐛ ᐃᔨᒥᐃᒂᐤ᙮ ᐅ ᒪᒃ ᒐ ᐃᓯ ᐎᑎᒪᑎᑯᒡ ᓇᒪ ᐅᑎᐸᔨᒋᒐᐤ ᐅᒋ ᐃᑎᓱᐛᐤ᙮ ᓂᔾ ᐊᐅᑯᓐ ᐊ ᐃᑕᔨᑎᒪᓐ ᒋᐸ ᒥᔽᐤ ᐃᑎᔭᒄ ᐅ ᒐ ᐃᑎᑎᑯᒡ᙮ ᓂ ᒋᔅᑕᔨᑕᑯᓯᓐ ᒪᒃ ᒐᒋ ᑕᑈᐅᒐᔨᒥᔭᒄ ᐛᔅ ᒋᓴᒪᓂᑐᐤ ᓂᒋ ᒋᔅᑎᒪᒐᔨᒥᒄ᙮ 26ᐊᓄᒡ ᑭᑈ ᐊᔅᐱᔅ ᒥᔅᑎ ᐊᔨᒥᐅᓇᓄᐅᒡ ᐃᐛᒃ ᒋᐸ ᒥᔽᔪᐤ ᐊᐛᓐ ᐊᑲ ᓂᐳᐅᑦ ᒐ ᐊᑲ ᓂᐳᐅᑦ, ᒪᒃ ᐊᓐᒡ ᑲ ᓂᐳᐅᒡ ᒐ ᐊᑲ ᓂᑭᑎᑐᒡ᙮ 27ᓴᔅ ᒪᒃ ᑲ ᓂᐳᐅᓇ, ᐊᑲᐎᔾ ᑯᒋᑕ ᒐᒋ ᐱᑯᓂᒥᓐ ᒋ ᓂᐳᐅᓐ᙮ ᐊᑲ ᒪᒃ ᓇᐳᐅᓇ, ᓇᒪ ᒐᒂᓐ ᐊᓐ ᐊᑲ ᑯᒋᑕᔨᓇ ᒐᒋ ᓂᐳᔨᓐ᙮ 28ᒥᒄ ᒪᒃ ᓂᐳᔨᓇ ᓇᒪ ᒋᒥᒋᑐᑕᓐ᙮ ᑭᔭ ᐃᔎᔅ ᓂᐳᐅᒐ ᓇᒪ ᒥᒋᑐᑎᒻ᙮ ᒥᒄ ᒪᒃ ᐊᓐᒡ ᑲ ᓂᐳᐅᒡ ᒋᑭ ᑎᑯᓂᔪᐤ ᒐ ᐃᓯ ᐊᔨᒥᐅᒡ᙮ ᐃᐛᒃ ᒪᒃ ᓂᐸ ᒥᔽᔨᑕᓐ ᐊᑲ ᐅ ᐃᓯ ᐊᔨᒥᐅᔭᒄ᙮
1 Corinthians 7.29-31 (Epiphany-3 Year B)
29ᓂᐧᑲᓂᓯᑐᒄ, ᒪᐅ ᓇᑐᐛᔨᒥᑎᑯᒡ ᒐᒋ ᒋᔅᒐᔨᑎᒪᒄ᙮ ᓇᒪ ᓇᔅᒡ ᓴᔅ ᑐᐛᐤ ᐊᓐᑕ ᒐᒋ ᐊᑐᔅᑯᐛᑭᓄᐅᑦ ᐅᑎᐸᔨᒋᒐᐤ᙮ ᐊᓐᒡ ᒪᒃ ᑲ ᑕᔨᒋ ᐎᐛᐛ ᐊᑲᐎᔾ ᒋᑭ ᐅᒋ ᐅᑎᒥᐃᑯᐅᒡ ᐊᓂᔭ ᐊ ᓂᐳᐅᒡ ᒐᒋ ᐃᑎᒡ ᑕᓐ ᐊᓂᔭᔪᐛ ᒋᒋᐛ ᐊ ᐃᓯ ᓂᑐᐛᔨᑕᑯᓯᒡ ᒐᒋ ᐃᑎᒡ ᐊᔪᐅᒄ ᒐᒋ ᐊᑐᔅᑯᐛᒡ ᐅᑎᐸᔨᒋᒐᐛ᙮ 30ᐊᓐᒡ ᑲ ᒥᓯᒪᔨᑕᒡ ᐊᑲᐎᔾ ᒋᑭ ᐅᒋ ᐅᑎᒥᐃᑯᐅᒡ ᐊᓂᔭ ᐊ ᒥᓯᒪᔨᑕᒡ ᐊ ᐎ ᐊᑐᔅᑯᐛᒡ ᐅᑎᐸᔨᒋᒐᐛ᙮ ᐊᓐᒡ ᑲ ᒧᒋᒐᔨᑕᒡ ᐊᑲᐎᔾ ᒋᑭ ᐅᒋ ᐅᑎᒥᐃᑯᐅᒡ ᐊᓂᔭ ᐊ ᒧᒋᒐᔨᑕᒡ᙮ ᐊᑯ ᐊᓐᒡ ᑲ ᐅᑎᓇᒐᒡ ᐊᑲ ᐛᓴ ᒋᒋᐛ ᒋᑭ ᐅᒋ ᐃᑕᔨᑎᒥᐃᑯᐅᒡ ᐊᓂᔭᔪᐛ ᒐᒂᔪᐛ ᑲ ᐅᑎᓇᒡ᙮ ᐊ ᒥᓯᒪᔨᑕᐧᒃ ᐊᐛᓐ ᒪᒃ ᐊ ᒧᒋᒐᔨᑕᐧᒃ ᒪᒃ ᐊ ᐛᔪᒋᑕᑦ ᒐᒂᔪᐛ ᓇᒪ ᒋᐸ ᐅᒋ ᒋᐱᔅᑲᑯᐤ ᐅᔭ ᐊ ᐎ ᐊᑐᔅᑯᐛᑦ ᒋᓴᒪᓂᑐᐛ᙮ 31ᐊᓐᒡ ᑲ ᐅᒋᐎᒋᔨᓱᒡ ᑕᓐ ᐊ ᐃᑕᐱᑎᓯᓇᓄᐎᒡ ᐅᑕ ᐊᔅᒋᒡ ᐊᓐᑕ ᒐᒋ ᐅᒋ ᐱᒪᒋᐃᓱᒡ ᐊᑲᐎᔾ ᒋᑭ ᐅᒋ ᐅᑎᒥᐃᑯᐅᒡ ᐊ ᐊᑐᔅᑯᐛᒡ ᐅᑎᐸᔨᒋᒐᐛ ᐛᔅ ᐅ ᐊᔅᒋᔾ ᑭᔭ ᑕᓐ ᐊ ᐃᑕᔨᑕᒂᒡ ᒋᑭ ᐎᒪᐱᔪᐤ᙮
32ᒥᓯᐛ ᐅ ᓂᑦ ᐃᔅᒋᔄᓐ ᐊᑲ ᓂᑐᐛᔨᒥᑎᑯᒡ ᒐᒋ ᐊᔨᒪᔨᑎᒪᒄ᙮ ᐊᑲ ᑲ ᓂᐳᐅᑦ ᓇᐸᐤ, ᐃᐛᒃ ᐃᑕᔨᑎᒥᐃᑯᐤ ᑕᓐ ᐊ ᐃᓯ ᓂᑐᐛᔨᒥᑯᑦ ᒋᓴᒪᓂᑐᐤ ᒐᒋ ᐃᑎᑦ᙮ 33ᐊᑯ ᒪᒃ ᓇᐸᐤ ᐊ ᓂᐳᐅᑦ ᒧᔅ ᒪᒥᑐᓇᔨᑎᒻ ᑕᓐᑕ ᒐᒋ ᐃᓯ ᓂᓇᐃᑎᒪᐊᑦ ᐎᐛ᙮ 34ᓂᓱᐎᒡ ᑎᑯᓂᔪᐤ ᐛ ᐃᓯ ᓂᓇᐊᔨᑎᒥᐃᐛᑦ, ᐎ ᐃᑐᑎᒻ ᑕᓐ ᐊ ᐃᑎᓱᒥᑯᑦ ᒋᓴᒪᓂᑐᐛ ᑭᔭ ᐎᐛ ᐎ ᓂᓇᑭᑐᐛᔨᒪᐤ᙮ ᐊᑯ ᒪᒃ ᐃᔎᐤ ᒪᒃ ᐃᔎᔅ ᐊᑲ ᓂᐳᐅᑦ ᐃᐛᒃ ᐃᑕᔨᑎᒥᐃᑯᐤ ᒋᓴᒪᓂᑐᐛ ᒐᒋ ᓂᓇᐃᑎᒪᐊᑦ, ᓇᔅᒡ ᐎ ᐸᔭᒋᓯᐤ ᐎᔭᒡ ᑭᔭ ᐅᑦ ᐊᒐᐧᑯᒡ᙮ ᐊᑯ ᒪᒃ ᐊᓐ ᐃᔎᐤ ᑲ ᓂᐳᐅᑦ ᐊᔅᒋᔪᐤ ᐱᒪᑎᓯᐅᓂᔪᐤ ᓇᔅᒡ ᒪᒥᑐᓇᔨᑎᒥᐃᑯᐤ ᐅᓇᐸᒪ ᐊ ᐎ ᓂᓇᐃᑎᒪᐊᑦ᙮ 35ᓇᒪ ᓂᑦ ᐃᔅᒋᔄᓐ ᐅ ᒐᒋ ᐛᐎᓱᒥᑎᑯᒡ, ᓂᑦ ᐃᔅᒋᔄᓐ ᐅ ᒐᒋ ᐎᒋᐃᑎᑯᒡ ᒐᒋ ᐃᓯ ᐱᒪᑎᓯᔭᒄ ᐊ ᓂᓇᐃᑐᐛᒄ ᐅᑎᐸᔨᒋᒐᐤ ᑭᔭ ᒐ ᐊᑲ ᒋ ᐅᑎᒥᐃᑯᔭᒄ ᒐᒂᓐ ᐊ ᐊᑐᔅᑯᐛᒄ᙮
36ᐊ ᑕᒂ ᓇᐸᔅ ᑭᔭ ᐃᔎᔅ ᐊᒋ ᓂᔅᑯᒧᒡ ᒐᒋ ᓂᐳᐊᑭᓄᐎᒡ, ᐊᓐ ᒪᒃ ᓇᐸᔅ ᐊᑲ ᐎ ᒪᔭᔨᒪᒐ ᐊᓂᔭ ᐃᔎᓴ ᐊᔅᒄ ᐊᑲ ᓂᐳᐅᒡ ᐃᐛᒃ ᒋᑭ ᒥᔽᔪᐤ ᐎᐱᒡ ᒐᒋ ᓂᐳᐅᒡ᙮ ᓇᒪ ᒋᑭ ᐅᒋ ᒥᒋᑐᑎᒧᒡ ᐎᐱᒡ ᓂᐳᑥᐛ᙮ 37ᐊᑯ ᒪᒃ ᓇᐸᔅ ᐎᔾ ᑎᐱᔨᐛ ᑲ ᐃᓯ ᐃᑕᔨᑎᒧᒂ ᒐ ᐊᑲ ᐅᒋ ᓂᐳᐅᑦ ᑭᔭ ᓇᔅᒡ ᑲ ᐃᑕᔨᑎᒧᒂ ᐊᑲ ᓂᑎᒥᒄ ᒐ ᐅᒋ ᐃᑎᑦ, ᓇᔅᒡ ᓴᔅ ᐊᒋ ᐎᔭᔨᑕᐧᒃ ᑕᓐ ᒐ ᐃᑎᑦ ᐊᑯᔅ ᐊᑲ ᒋᑭ ᐅᒋ ᓯᒋᒪᑭᓄᐤ ᒐᒋ ᓂᐳᐅᑦ᙮ 38ᓇᒪ ᒐᒂᓐ ᐃᓂᔪᐤ ᓇᐸᐤ ᐊ ᐎ ᓂᐳᐅᑦ ᒐᒋ ᓂᐳᐅᑦ, ᒥᒄ ᒪᒃ ᐃᐛᒃ ᒥᔪᐱᔪᐤ ᐊᓐ ᓇᐸᐤ ᐊᑲ ᑲ ᐎ ᓂᐳᐅᑦ᙮
39ᐊ ᓂᐳᐅᑦ ᐃᔎᐤ ᓇᒪ ᐃᑕᔨᑕᑯᓱᐤ ᒐᒋ ᐎᒋᒪᑦ ᑯᑎᒃ ᓇᐸᐤ ᐊᔅᒄ ᐊ ᐱᒪᑎᓯᔨᒋ ᐅᓇᐸᒪ᙮ ᒥᒄ ᒪᒃ ᓂᐱᒐᓂ ᐅᓇᐸᒪ ᒋᑭ ᒋ ᐎᒋᒪᐤ ᒥᒄ ᐊ ᐃᓯᓇᑯᓯᔨᒋ ᓇᐸᐛ ᐊ ᒂᔅᑲᑎᓯᒂᓂ᙮ 40ᓂᔾ ᒪᒃ ᐎ ᐊ ᐃᑕᔨᑎᒪᓐ ᐅᔅᑕ ᒋᐸ ᒥᔽᔨᑎᒻ ᐊᑲ ᒥᓐ ᓂᐳᐅᑦ ᐃᔎᐤ ᐊ ᐸᐃᑯᓯᑦ᙮ ᓇᒪ ᒋ ᐎ ᐎᓱᐛᑎᑎᓇᐛᐤ ᒥᒄ ᒪᒃ ᐊᐅᑯᓐ ᐊ ᐃᑕᔨᑎᒪᓐ ᒋᐸ ᐃᓯ ᒥᔽᐤ ᐃᑎᔭᒄ ᑭᔭ ᓂᑦ ᐃᑕᔨᑕᓐ ᐊ ᐊᔭᐅᒥᒋ ᒋᓴᒪᓂᑐᐤ ᐅᑦ ᐊᒐᒂ ᐅ ᑲ ᐃᔅᒋᔄᔭᓐ᙮
Currently Selected:
1 ᑯᕆᓐᑎᔭᓇ 7: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
