1 ᑯᕆᓐᑎᔭᓇ 16
16
ᒋᓴᒪᓂᑐᐤ ᐅᑦ ᐃᔨᒪ ᒐ ᐃᓯ ᒥᔭᑭᓄᔨᒋ
1ᐊᑯ ᒐ ᐊᔨᒧᑎᒪᑎᑯᒡ ᐊᓐ ᓱᓇᔭᐤ ᒋᐸ ᒪᒧᓴᒋᓂᑭᓄᐤ ᒐᒋ ᐎᒋᐊᑭᓄᐎᒡ ᑲ ᑕᑈᑕᒡ ᐊᓐᑕ ᐊᓂᔭ ᐊᔅᒋᔪᐤ ᒍᑎᔭ ᐊ ᐃᓯᓂᐧᑲᑕᔨᒡ ᐊ ᑕᒡ᙮ ᒧᔭᒻ ᒪᒃ ᑲ ᐃᑎᓱᒥᒂᐤ ᐊᓐᒡ ᒪᒧᐤ ᑲ ᐊᔭᒥᐊᐛᑎᓯᒡ ᐊᓐᑕ ᑲᓚᓯᔭ ᐊ ᐃᓯᓂᐧᑲᑕᔨᒡ ᐊᔅᒋᔪᐤ ᐊ ᑕᒡ ᒐᒋ ᐃᑎᒡ ᐊᐅᑯᓐ ᑭᔭ ᒋᔨᐛᐤ ᐃᑎᒄ᙮ 2ᐊᓐ ᐊ ᒋᒋᐱᔨᒡ ᒥᓇᔅᑕᑭᓐ, ᒥᓯᐛ ᐊᐛᓐ ᐊᓐᑕ ᐊ ᑎᓯᔭᒄ ᒋᐸ ᑎᐸᓂᔅᑕᐤ ᓱᓇᔭᔪᐤ ᐊ ᓂᓇᑭᑐᐛᔨᑎᒥᐃᑯᑦ ᑕᓐ ᒪᒧᐤ ᑲ ᐃᓯ ᒥᔨᑯᑦ ᒋᓴᒪᓂᑐᐛ ᒐᒋ ᐅᑎᓂᒪᒐᑦ᙮ ᒥᓯᐛ ᒋᐸ ᒪᒧᐤ ᑭᓄᐛᔨᑕᑭᓄᐤ᙮ ᐊᑯ ᒪᒃ ᓇᒪ ᒋᐸ ᐅᒋ ᑎᑯᓐ ᐊ ᒪᒧᓴᒋᓂᑭᓄᐅᒡ ᓱᓇᔭᐤ ᑎᑯᓯᓂᔭᓇ᙮ 3ᑎᑯᓯᓂᔭᓇ ᒪᒃ ᐊᓐᑕ ᐊ ᑕᔭᒄ, ᓂᑭ ᐃᑎᓴᐛᐅᒡ ᓇᐸᐅᒡ ᒋᕈᓯᓕᒥᒡ ᒐᒋ ᐃᑐᑕᒡ ᒋᓱᓇᔭᓂᒧᐛᐅᔪᐤ᙮ ᒋᔨᐛᐤ ᒋ ᓂᑐᐛᔨᒥᑎᓇᐛᐤ ᒐᒋ ᐅᑎᓇᑯᒡ ᐅᒡ ᓇᐸᐅᒡ ᐊᓐᑕ ᒐ ᐃᑎᓴᐅᒂᐤ᙮ ᓂᑭ ᒥᔭᐅᒡ ᒥᓯᓇᐃᑭᓇ ᒐ ᐃᑐᑕᒡ ᐊᓐᑕ ᒋᕈᓯᓕᒥᒡ ᐊᔭᒥᐊᐅᒋᐛᐱᒡ, ᒋᔨᐛᐤ ᐊ ᐊᔨᒧᒥᑎᑯᒡ ᑭᔭ ᐎᔨᐛᐤ ᐊᓐᒡ ᓇᐸᐅᒡ ᐊ ᐊᔨᒧᒥᒂᐤ᙮ 4ᐊᑯ ᒪᒃ ᐃᑕᔨᑕᒂᒐ ᑭᔭ ᓂᔾ ᒐᒋ ᐃᑐᑕᔭᓐ ᒋᕈᓯᓕᒥᒡ ᑭᑈ ᒐ ᐎᒐᐅᒂᐤ᙮
ᑈᓪ ᑲ ᐃᓯ ᐎᔭᔨᑕᐧᒃ ᒐ ᐃᑎᑦ
5ᒪᓯᑐᓂᔭ ᐊ ᐃᓯᓂᐧᑲᑕᒡ ᐊᔅᒋᔾ ᓂᑭ ᓴᐳᑐᐛᑕᓐ᙮ ᐊᑯ ᒪᒃ ᒐ ᓂᑐᐛᐱᒥᑎᑯᒡ ᐃᔅᐱ ᒋ ᐃᑐᑕᔭᓇ ᐊᓐᑕ᙮ 6ᒂᔄᓐ ᐛᐃᐱᔅᒋᔅ ᓂᑭ ᑕᓐ ᐊᓐᑕ ᐊ ᑕᔭᒄ, ᑭᔭ ᒪᒃ ᐃᔅᑭᓐ ᐱᐳᓇ ᒐ ᑕᐛᓇ ᐊᓐᑕ ᐊ ᑕᔭᒄ᙮ ᐊᑯ ᒪᒃ ᒐᒋ ᐛᐎᒋᐃᔭᒄ ᑕᓐ ᒐ ᐃᓯ ᓂᑐᐛᔨᑎᒧᐛᓇ ᑕᓐᑕ ᒥᓐ ᒐ ᐃᑐᑕᐛᓇ᙮ 7ᓇᒪ ᐊᓄᒡ ᒋ ᐎ ᐸᒋ ᓂᑐᐛᐱᒥᑎᓇᐛᐤ᙮ ᐛᔅ ᐊᑎ ᐊᓄᒡ ᓂᑐᐛᐱᒥᑎᑯᒡ ᒥᒄ ᐛᐃᐱᔅᒋᔅ ᓂᐸ ᒋ ᑕᓐ᙮ ᓂ ᐱᑯᓴᔨᑕᓐ ᒪᒃ ᓇᐅᓴᓯᔅ ᒐᒋ ᑕᔭᓐ ᐊᓐᑕ ᐊ ᑕᔭᒄ ᐃᑕᔨᑕᒐ ᐅᑎᐸᔨᒋᒐᐤ ᒐᒋ ᑕᐅᒡ ᐊᓐᑕ ᐊ ᑕᐛᒄ᙮ 8ᒥᒄ ᐊᑯᑕ ᐅᑕ ᐃᐱᓴᔅ ᒐ ᑕᔭᓐ ᐊᓄᒡ ᐎ ᐸᑐᔅ ᐅᑎᒋᐱᔨᒐ ᐸᓐᑎᑯᔅᑦ᙮ 9ᒪᒂᒡ ᓇᔅᒡ ᓇᐃᐱᔪᐤ ᒐᒋ ᒥᔪ ᐊᑐᔅᒐᔭᓐ ᐅᑕ ᐊᑎ ᐊ ᒥᒐᑎᒡ ᐊᐛᓐᒋ ᐊ ᐎ ᒥᒋᐱᔨᒡ᙮
10ᒐᒃ ᐸᒋ ᓂᑐᐛᐱᒥᑕᒂ ᑎᒧᑎ ᓱᒃ ᒐ ᐎ ᒥᔪᐧᑯᐛᒄ ᐛᔅ ᑭᔭ ᐎᔾ ᐊᑐᔅᑯᐛᐤ ᐅᑎᐸᔨᒋᒐᐛ ᒧᔭᒻ ᓂᔾ ᐊ ᐃᓯ ᐊᑐᔅᒐᔅᑐᐅᒥᒋ᙮ 11ᓇᒪ ᐊᐛᓐ ᒋᐸ ᐅᒋ ᐊᑐᐛᔨᒪᐤ ᐊᓂᔭᔪᐛ ᑎᒧᑎᔨᒋ᙮ ᐃᔭᐱᒡ ᐎᒋᐊᐧᒄ ᒐᒋ ᑎᑯᓯᐧᒃ ᐅᑕ ᐊ ᑕᐅᒡ ᐊᑲ ᒐᒂᔪᐤ ᒋᐱᔅᑲᑯᑦ᙮ ᐛᔅ ᓂ ᐱᑯᓴᔨᒪᐤ ᒐᒋ ᐸᒋ ᒋᐛ ᐎᒐᐛᑦ ᐊᓂᔭᔪᐛ ᑯᑎᑲ ᒋᐧᑲᓂᓱᓄᐛ᙮
12ᐊᑯ ᒪᒃ ᒋᐧᑲᓂᓴᓄᐤ ᐊᐳᓚᔅ ᒐ ᐊᔨᒧᒥᒃ᙮ ᒧᔅ ᓂᒋ ᓯᒋᒪᐤ ᒐᒋ ᒧᐱᔅᑕᑕᒄ ᐃᔅᐱ ᑲ ᒧᐱᔅᑕᑎᑕᑯ ᐊᓂᔭᔪᐛ ᑯᑎᑲ ᒋᐧᑲᓂᓱᓄᐛ᙮ ᓇᒪ ᐅᒋ ᐎ ᐃᑐᑕᐤ ᐊᓄᒡ ᐎᔾ᙮ ᐎᐱᒡ ᑭᑈ ᓇᐃᐱᔨᒐ ᒋᑭ ᓂᑐᐛᐱᒥᑯᐛᐤ᙮
ᑈᓪ ᒪᔅᑕᔾ ᑲ ᐃᔅᒋᔄᑦ
13ᐛᔅᑭᒥᓯᒄ, ᐊᒐᐧᑯᐅᓂᒡ ᐃᔅ ᐃᔭᒂᒥᒄ᙮ ᓱᒃ ᐊᔨᒋᑲᐳᐅᒄ ᑕᓐ ᐊ ᐃᓯ ᑕᑈᑎᒪᒄ᙮ ᐊᑲᐎᔾ ᑯᔅᑕᒋᒄ᙮ ᓱᒃ ᓱᒋᑲᐳᐅᒄ᙮ 14ᓄᑯᑕᒄ ᒋᓴᒋᐃᐛᐅᓄᐛᐤ ᒥᓯᐛ ᒐᒂᓐ ᐊ ᐃᑐᑎᒪᒄ᙮
15ᓂᐧᑲᓂᓯᑐᒄ, ᒋ ᒋᔅᒐᔨᑕᓇᐛᐤ ᐊᓐᑕ ᐊ ᐸᐃᑯᔅᑲᓇᓯᑦ ᔅᑎᐸᓇᔅ ᐊᐅᑯᓐᒡ ᐊᓐᒡ ᓂᔅᑎᒻ ᑲᑕᑈᔭᔨᑕᒡ ᐊᓐᑕ ᐊᓂᔭ ᐊᔅᒋᔪᐤ ᐊᑲᔭ ᐊ ᐃᓯᓂᐧᑲᑕᔨᒡ᙮ ᒋ ᐱᔅᑎᓂᓱᐅᒡ ᒐᒋ ᐊᑐᔅᑯᐛᒡ ᑲ ᑕᑈᑎᒥᔨᒋ᙮ 16ᓂᐧᑲᓂᓯᑐᒄ, ᓇᔅᒡ ᑕᑈ ᒋ ᓯᒋᒥᑎᓇᐛᐤ ᒐᒋ ᐱᔅᑕᔨᒥᑎᓱᔅᑐᐛᑯᒡ ᐊᓐᒡ ᐊᐛᓐᒋ ᐅᔭ ᑲ ᐃᑕᔨᑕᑯᓯᒡ᙮ ᐱᔅᑕᔨᒥᑎᓱᔅᑎᒪᑯ ᑭᔭ ᒥᓯᐛ ᐊᓂᔭᔪᐛ ᑲ ᐎᒋᐃᑯᒡ ᐊᓂᔭ ᐅᑦ ᐊᑐᔅᒐᐅᓄᐛᐤ ᑭᔭ ᓱᒃ ᑲ ᐊᒋᔅᑎᒥᔨᒋ ᐊᓂᔭ ᐊ ᐃᓯ ᐎᒋᐃᑯᒡ᙮ 17ᓂ ᒥᔽᔨᑎᒺᓐ ᔅᑎᐸᓇᔅ, ᐳᕐᑐᓇᑕᔅ ᑭᔭ ᐊᑲᔭᑲᔅ ᐊᒋ ᑎᑯᓯᒡ ᐅᑕ ᐊ ᑕᐅᒡ᙮ ᒧᔭᒻ ᒋᔨᐛᐤ ᐊ ᑕᔭᒄ ᐅᑕ ᐊ ᑕᔭᓐ ᐊᐅᑯᓐ ᑲ ᐃᑕᔨᑎᒧᒡ ᑲ ᑕᒡ ᐅᑕ ᐊ ᑕᐅᒡ᙮ 18ᐛᔅ ᒋ ᑎᑯᓂᔪᐤ ᑲ ᐃᓯ ᒥᔽᔨᑎᒥᔨᒡ ᒧᔭᒻ ᑲ ᐃᓯ ᑎᑯᓂᔨᒡ ᑲ ᐃᓯ ᒋ ᒥᔽᔨᑎᒥᐃᑕᑯᒡ ᑭᔭ ᒋᔨᐛᐤ᙮ ᒋᐸ ᒋᔅᑕᔨᒪᑭᓄᐎᒡ ᓇᐸᐅᒡ ᐅᔭ ᐊ ᐃᑕᔨᑕᑯᓯᒡ᙮
19ᐊᓐᒡ ᒪᒧᐤ ᑲ ᐊᔭᒥᐊᐛᑎᓯᒡ ᐊᓐᑕ ᐊᐃᓴ ᐊ ᐃᓯᓂᐧᑲᑕᔨᒡ ᐊᔅᒋᔪᐤ ᐊ ᑕᒡ ᒋ ᐛᒋᔭᒥᑯᐛᐅᒡ᙮ ᑭᔭ ᐊᑯᐎᓚ ᑭᔭ ᐳᕆᓯᓚ ᑭᔭ ᐊᓂᔭᔪᐛ ᐅᒪᒧᐊᔭᒥᐊᐛ ᑲ ᒪᒧᐎᔨᒋ ᐊᓐᑕ ᐊ ᑕᒡ ᐊ ᐊᔭᒥᐊᔨᒋ ᒋ ᐛᒋᔭᒥᑯᐛᐅᒡ᙮ 20ᒥᓯᐛ ᒋᐧᑲᓂᓯᓄᐅᒡ ᐅᑕ ᐊ ᑕᒡ ᒋ ᐛᒋᔭᒥᑯᐛᐅᒡ᙮ ᒋᔨᐛᐤ ᑲ ᐎᐧᑲᓂᓯᑕᑐᔭᒄ ᐅᒐᒥᑐᒄ ᐊ ᐛᒋᔭᒥᑐᔭᒄ᙮
21ᓂᔾ ᑈᓪ᙮ ᓂᔾ ᑎᐱᔨᐛ ᓂᑎᒋᔾ ᓂᑦ ᐊᐱᒋᑕᓐ ᐅ ᐊ ᒥᓯᓇᐊᒪᑎᑯᒡ ᑭᔭ ᐊ ᐛᒋᔭᒥᑎᑯᒡ᙮
22ᐊᐛᓐ ᐊᑲ ᓴᒋᐊᒐ ᐅᑎᐸᔨᒋᒐᐛ, ᐊᑯᔅ ᒋᑭ ᐛᐛᓯᐃᑯᐤ ᒋᓴᒪᓂᑐᐛ᙮ ᑎᑯᓯᓂ ᒪ, ᐅᑎᐸᔨᒋᒐᐤ᙮
23ᓂᑐᑎᒧᐛᐤ ᐅᑎᐸᔨᒋᒐᐤ ᒋᓴᔅ ᒐᒋ ᓱᐛᔨᒥᑕᒄ᙮
24ᒥᓯᐛ ᒋ ᓴᒋᐃᑎᓇᐛᐤ ᒋᓴᔅ ᙭ ᐅᒡ᙮ ᐊᒥᓐ᙮
Currently Selected:
1 ᑯᕆᓐᑎᔭᓇ 16: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
