1 ᑯᕆᓐᑎᔭᓇ 15
15
᙭ ᑲ ᐅᓂᔅᑲᑦ ᓂᐳᐅᓂᒡ ᐅᒡ
1 Corinthians 15.1-11 (Easter Sunday Year B; Epiphany-5 Year C)
1ᐊᑯ ᒪᒃ ᐛ ᒋᔅᒋᓱᒥᑎᑯᒡ, ᓂᐧᑲᓂᓯᑐᒄ, ᐊᓐ ᒥᔽᒋᒧᐅᓐ ᑲ ᐊᔨᒧᑎᒪᓐ ᑲ ᑭᒐᔅᒋᒥᑎᑯᒡ, ᔅᒋ ᑕᑈᑕᓇᐛᐤ ᑭᔭ ᔅᒋ ᐅᑎᓇᓇᐛᐤ ᑕᓐ ᑲ ᐃᓯ ᐎᑎᒪᓐ᙮ ᐊᐅᒄ ᒥᔽᒋᒧᐅᓐ ᐊᔨᒋᑲᐳᐃᑯᔭᒄ᙮ 2ᐊᐅᒄ ᒥᔽᒋᒧᐅᓐ ᒋᓴᔅ ᑲ ᐊᔨᒧᒪᑭᓄᐅᑦ ᑲ ᐊᔨᒧᑎᒪᓐ ᑲ ᑭᒐᔅᒋᒥᑎᑯᒡ᙮ ᐊᐅᒄ ᒐ ᐱᒪᒋᐃᑯᔭᒄ ᓱᒃ ᒥᒪᒋᒥᓂᒪᒂ᙮ ᐊᑲ ᒪᒃ ᐅ ᑎᔭᒂ ᐊᑯ ᑭᑈ ᒐᔅᑲ ᐊᒋ ᑕᑈᑎᒪᒄ ᒐ ᐃᓯᓇᒂᒡ ᐊᑲ ᐱᒪᒋᐃᑯᔭᒂ᙮
3ᐛᔅ ᔅᒋ ᐊᓱᐤ ᐎᑎᒪᑎᓇᐛᐤ ᐊᓐ ᑲ ᒥᔨᑯᐅᔭᓐ ᒐᒋ ᒋᔅᒐᔨᑎᒪᓐ᙮ ᓇᔅᒡ ᑕᑈ ᒋᒋᐛ ᐃᑕᔨᑕᑯᓐ ᐅ ᑲ ᐛᐎᑎᒪᑎᑯᒡ᙮ ᒪᐅ ᐊ ᐃᓯ ᐎᑎᒪᒐᒥᑲᒡ᙮ ᙭ ᔅᒋ ᓂᐱᔅᑎᒪᑭᓄᐤ ᒐᒋ ᐛᐸᔨᑎᒪᑯᐛᐧᒄ ᒋᒥᒋᑥᐅᓄᐛ ᒧᔭᒻ ᐊ ᐃᓯ ᐊᔨᒧᑕᔨᒡ ᐊᓐᑕ ᒋᓴᒪᓂᑐᐤ ᐅᑦ ᐃᔨᒧᐅᓂᒡ ᒐ ᐃᑐᑎᒪᑯᐱᓇ᙮ 4ᐎᑎᒪᒐᒥᑭᓐ ᐅ ᒥᔽᒋᒧᐅᓐ ᐊᒋ ᓇᐅᔅᑕᑭᓄᐎᒡ ᙭ ᐎᔪᐤ᙮ ᐃᔅᐱ ᒪᒃ ᑲ ᓂᔅᑐ ᒋᓯᑲᔨᒡ ᐊᑯ ᑲ ᐅᓂᔅᑲᓇᑭᓄᐅᑦ ᑲᐤ ᒐᒋ ᐱᒪᑎᓯᑦ᙮ ᐊᐅᒄ ᐅ ᐊ ᐃᓯ ᐊᔨᒧᑕᒡ ᒋᓴᒪᓂᑐᐤ ᐅᑦ ᐃᔨᒧᐅᓂᒡ᙮ 5ᐊᔨᒧᑕᐤ ᑭᔭ ᐊᒋ ᓄᑯᓯᔅᑐᐛᑦ ᐱᑕᕋ᙮ ᒐᒃ ᒥᓐ ᐊᓂᔭᔪᐛ ᑲ ᓂᓱᓴᐳᔨᒋ ᒂ ᓄᑯᓯᔅᑐᐛᑦ ᐊᓂᔭᔪᐛ ᐎᔾ ᐛᒋᒡ ᑲ ᐅᑎᓇᑦ ᒐᒋ ᓇᓴᐅᑯᑦ᙮ 6ᒐᒃ ᒪᒧᐤ ᒂ ᓄᑯᓯᔅᑐᐛᑦ ᐅᔅᑕ ᐱᑕᑕᒡ ᑕᑐᐤ ᒥᑕᓯᒥᑎᓄᐤ ᐊᑎᓯᔨᒋ ᐊᓂᔭᔪᐛ ᑲ ᑕᑈᔭᔨᒥᑯᑦ᙮ ᐊᔅᒄ ᒥᒐᑦ ᐱᒪᑎᓯᔪᐛ ᐅᔭ ᑲ ᓄᑯᓯᔅᑐᐛᑦ᙮ ᐱᔅᒐ ᓴᔅ ᒋ ᐳᓂᐱᒪᑎᓯᔪᐛ᙮ 7ᒋᒥᓴ ᒥᓐ ᒋ ᓄᑯᓯᔅᑐᐛᐤ᙮ ᒥᓯᐛ ᑭᔭ ᐊᓂᔭ ᐊᑈᔅᑕᓇ ᑲ ᐃᑕᐱᑎᓯᔨᒋ ᒋ ᓄᑯᓯᔅᑐᐛᐤ᙮
8ᐃᔭᐱᒡ ᓂᒋ ᓄᑯᓯᔅᑕᒄ ᑭᔭ ᓂᔾ ᐊᑎ ᓂᔾ ᒪᐅᒡ ᓄᑕᔅ ᐊᒋ ᐃᑕᔨᑕᑯᓯᔭᓐ᙮ ᓂᔾ ᒪᔅᑕᔾ ᓂᒋ ᓄᑯᓯᔅᑕᒄ᙮
9ᐛᔅ ᓂᔾ ᒪᐅᒡ ᓇᒪ ᒐᒂᓐ ᓂᑦ ᐃᑕᔨᑕᑯᓯᓐ ᐊ ᑕᑎᓯᒡ ᒥᓯᐛ ᐊᓐᒡ ᑲ ᐅᑎᓇᑭᓄᐎᒡ ᐊᑈᔅᑕᓐᒡ ᒐᒋ ᐃᑕᐱᒋᐊᑭᓄᐎᒡ᙮ ᓇᒪ ᐛᐛᒡ ᓂ ᒋᔅᑕᔨᑕᑯᓯᓐ ᐊᑈᔅᑕᓐ ᒐᒋ ᐃᓯᓂᐧᑲᑎᑯᐅᔭᓐ ᐛᔅ ᓂᒋ ᓂᓇᐧᑲᒋᐃᒪᐛ ᒋᓴᒪᓂᑐᐤ ᐅᑦ ᐃᔨᒪ᙮ 10ᒥᒄ ᒪᒃ ᒋᓴᒪᓂᑐᐤ ᓴᒐᔾ ᐊ ᒥᔪᑐᑎᒧᐛᑦ ᐊᐛᔪᐛ ᐊᑯᑕ ᐛᒋ ᐃᓯᓇᑯᓯᔭᓐ ᑕᓐ ᐊ ᐃᓯᓇᑯᓯᔭᓐ ᐊᓄᒡ᙮ ᓇᒪ ᒪᒃ ᒐᔅᑲ ᐊᓂᔭ ᑲ ᐃᓯ ᓴᒐᔾ ᒥᔪᑐᑎᒧᐅᑦ᙮ ᓂᔾ ᒪᒃ ᐎ, ᐊᑐᐎᔅ ᓱᒃ ᓂᒋ ᐊᑐᔅᒐᓐ ᐃᔅᐱᔅ ᒥᓯᐛ ᐊ ᑕᑎᓯᒡ ᐊᓐᒡ ᑯᑎᑭᒡ ᐊᑈᔅᑕᓇᒡ᙮ ᓇᒪᐎᔾ ᒪᒃ ᓂᔾ ᑎᐱᔨᐛ ᑲ ᐃᑎᔭᓐ᙮ ᒋᓴᒪᓂᑐᐤ ᐎᔾ ᓴᒐᔾ ᐊᒋ ᒥᔪᑐᑎᒧᐅᑦ ᐛᒋ ᐃᑐᑎᒪᓐ ᐅ ᑲ ᐃᓯ ᐊᔨᒧᑎᒪᓐ᙮ 11ᐊᐅᒄ ᐅ ᒥᔽᒋᒧᐅᓐ ᒥᓯᐛ ᐊ ᑎᓯᔭᒡ ᐊ ᐃᓯ ᑭᒐᔅᒋᒧᔭᒡ, ᓂᔾ ᑭᔭ ᐊᓐᒡ ᑯᑎᑭᒡ ᐊᑈᔅᑕᓇᒡ᙮ ᐊᐅᒄ ᒪᒃ ᐅ ᑎᔭᑈᑎᒪᒄ᙮
ᒐ ᐅᓂᔅᑲᓂᑯᐅᔭᐧᒄ ᓂᐳᐅᓂᒡ ᐅᒡ
1 Corinthinans 15.12-20 (Epiphany-6 Year C)
12ᐅ ᒪᒃ ᐊ ᐃᓯ ᑭᒐᔅᒋᒧᔭᒡ ᐊ ᐊᔨᒧᑎᒪᒡ ᙭ ᐊᒋ ᐅᓂᔅᑲᓇᑭᓄᐅᑦ ᑲ ᓂᐱᑦ, ᑕᓐᑕ ᐱᔅᒐ ᐊᓐᑕ ᐊ ᑎᓯᔭᒄ ᐛᒋ ᐃᔅᒋᔄᔭᒄ ᐊᑲ ᑲᐤ ᒐ ᐅᒋ ᐅᓂᔅᑲᓇᑭᓄᐎᒡ ᐊᓐᒡ ᑲ ᓂᐱᒡ᙮ 13ᐛᔅ ᑕᑈ ᐊᓐ ᐊ ᐃᓯᓇᑯᓂᒂ ᐊᑯ ᑭᑈ ᓇᒪ ᐅᒋ ᐅᓂᔅᑲᓇᑭᓄᔨᒐ ᙭ ᑲ ᓂᐱᑦ᙮ 14ᐊᑯ ᒪᒃ ᐊᑲ ᑲᐤ ᐅᒋ ᐅᓂᔅᑲᓇᑭᓄᒂ ᙭ ᑲ ᓂᐱᑦ ᐊᑯ ᑭᑈ ᓇᒪᐎᔾ ᒐᒂᓐ ᐃᑕᐱᑎᓐ ᐊᓐ ᑲ ᐃᓯ ᑭᒐᔅᒋᒧᔭᒡ᙮ ᑭᔭ ᓇᒪᐎᔾ ᒐᒂᓐ ᐃᑕᐱᑎᓐ ᑕᓐ ᐊ ᐃᓯ ᑕᑈᑎᒪᒄ᙮ 15ᐛᐛᒡ ᒋᐸ ᓄᑯᓐ ᐊ ᑭᑭᒋᔭᒥᒋᒡ ᒋᓴᒪᓂᑐᐤ ᐛᔅ ᓂᒋ ᐃᑕᒋᒪᓇᓐ ᑲᐤ ᐊᒋ ᐅᓂᔅᑲᓇᑦ ᙭ᑕ ᑲ ᓂᐱᔨᒋ᙮ ᑎᔭᑈᒥᑭᓂᒂ ᒪᒃ ᐊᑲ ᑲᐤ ᐅᓂᔅᑲᓇᑭᓄᐎᒡ ᑲ ᓂᐱᒡ ᐊᑯ ᑭᑈ ᓇᒪ ᐅᒋ ᐅᓂᔅᑲᓇᒐ ᒋᓴᒪᓂᑐᐤ ᙭ᑕ᙮ 16ᐛᔅ ᑕᑈ ᐊᑲ ᑲᐤ ᐅᓂᔅᑲᓇᑭᓄᐛᒂ ᑲ ᓂᐱᒡ ᐊᑯ ᑭᑈ ᑭᔭ ᐎᔾ ᙭ ᓇᒪ ᑲᐤ ᐅᒋ ᐅᓂᔅᑲᓇᑭᓄᐎᔨᒐ᙮ 17ᐊᑲ ᒪᒃ ᐅᒋ ᐅᓂᔅᑲᓇᑭᓄᒂ ᙭ ᑭᑈ ᒐᔅᑲ ᑲ ᑕᑈᔭᔨᒪᒄ᙮ ᑭᔭ ᐊᔅᒄ ᒋ ᐅᓂᓯᓇᐛᐤ ᒋᒥᒋᑥᐅᓄᐛᒡ᙮ 18ᑎᔭᑈᒥᑭᓂᒂ ᐊᑲ ᑲᐤ ᐅᓂᔅᑲᓇᑭᓄᐅᒡ ᐊᓐᒡ ᑲ ᓂᐱᒡ ᑭᑈ ᐊᓐᒡ ᓴᔅ ᑲ ᓂᐱᒡ ᐊᒋ ᑕᑈᐅᒐᔨᒪᒡ ᙭ᑕ ᐅᓂᓯᓄᒐᓂᒋ᙮
1 Corinthians 15.19-26 (Easter Sunday Year C)
19ᒧᔭᒻ ᐃᔭᒂᒪᒡ ᒥᒄ ᐅᑕ ᐊᔅᒋᒡ ᐊ ᐱᒪᑎᓯᔭᐧᒄ ᐛᒋᐃᑯᐛᐅᒂ ᐊ ᑕᑈᐅᒐᔨᒪᐧᒄ ᙭ ᒋᔭᓄᐤ ᒪᐅᒡ ᒋ ᒋᔅᑎᒪᒐᔨᑕᑯᓯᓇᓄᐤ ᐊ ᑎᓯᑦ ᐊᐛᓐ ᐅᑕ ᐊᔅᒋᒡ ᐊ ᐱᒪᑎᓯᑦ᙮
20ᒥᒄ ᒪᒃ ᑕᑈᒥᑭᓐ ᙭ ᑲᐤ ᐊᒋ ᐅᓂᔅᑲᓇᑭᓄᐅᑦ ᑲ ᓂᐱᑦ᙮ ᐊᑯᑕ ᒪᒃ ᐛᒋ ᒐᔅᑎᓇᑕᔨᑕᒂᒡ ᑭᔭ ᐎᔨᐛᐤ ᒐ ᐅᓂᔅᑲᓇᑭᓄᐅᒡ ᐊᓐᒡ ᑲ ᓂᐱᒡ ᐊᒋ ᑕᑈᔭᔨᒪᒡ ᙭ᑕ᙮ 21ᐛᔅ ᒋ ᑎᑯᓂᔪᐤ ᐸᐃᒄ ᓇᐸᐤ ᒐᒂᔪᐤ ᐊᒋ ᐃᑎᑦ ᐛᒋ ᑎᒂᒡ ᓂᐳᐅᓐ, ᑭᔭ ᑕᐤ ᑯᑎᒃ ᓇᐸᐤ ᐊᓂᔭ ᑕᓐ ᑲ ᐃᑎᑦ ᐊᑯᑕ ᐛᒋ ᑎᑯᓂᔨᒡ ᑲᐤ ᒐᒋ ᐅᓂᔅᑲᓇᑭᓄᐎᒡ ᑲ ᓂᐱᒡ᙮ 22ᓂᐱᐅᓂᔪᐤ ᔅᒋ ᐸᑥᑯᓄᐤ ᐊᑕᒻ, ᐎᔾ ᒪᒃ ᙭ ᐱᒪᑎᓯᐅᓂᔪᐤ ᔅᒋ ᐸᑥᑯᓄᐤ᙮ 23ᒥᓯᐛ ᒪᒃ ᐊᐛᓐ ᑎᑯᓂᔪᐤ ᑕᐃᔅᐱ ᒐ ᐅᓂᔅᑲᓇᑭᓄᐅᑦ᙮ ᙭ ᓂᔅᑎᒻ ᒋ ᐅᓂᔅᑲᓇᑭᓄᐤ᙮ ᐊᑯ ᒪᒃ ᒐ ᐅᓂᔅᑲᓇᑭᓄᔨᒋ ᐊᓂᔭᔪᐛ ᐊᐛᔪᐛ ᑲ ᑎᐱᔨᐛᐅᓯᑦ ᐃᔅᐱ ᒥᓐ ᑎᑯᓯᒐ᙮ 24ᐊᑯ ᒪᒃ ᙭ ᒐ ᓂᓱᐅᓇᒋᑕᑦ ᒥᓯᐛ ᐅᒋᒪᐅᓂᔪᐤ, ᒥᓯᐛ ᑎᐸᔨᒋᒐᐅᓂᔪᐤ ᑭᔭ ᓱᐧᑲᑎᓯᐅᓂᔪᐤ᙮ ᐊᑯ ᒪᒃ ᒐ ᐃᔎᐱᔨᒡ ᐊᔅᒋᔾ᙮ ᐃᔅᐱ ᒪᒃ ᐅ ᒋ ᐃᔅᐱᔨᒐ ᐊᑯ ᙭ ᒐ ᒥᔭᑦ ᒋᓴᒪᓂᑐᐛ ᐅᑕᐎᒪᐛ ᒋᓴᐅᒋᒪᐅᓂᔪᐤ᙮ 25ᐛᔅ ᐎᔾ ᒋᑭ ᐅᒋᒪᐤ ᙭ ᐸᑐᔅ ᒋᓴᒪᓂᑐᐛ ᒋ ᓴᒂᔨᒐᓂ ᒥᓯᐛ ᐊᓂᔭᔪᐛ ᑲ ᐛᐧᑲᑎᑯᑦ ᙭ ᑭᔭ ᒋ ᒥᔨᑯᒐ ᓇᔅᒡ ᒐᒋ ᑎᐸᔨᒪᑦ᙮ 26ᐊᓐ ᒪᔅᑕᔾ ᒐᒂᓐ ᒐ ᓂᓱᐅᓇᒋᑕᑭᓄᐅᒡ ᐊᐅᒄ ᓂᐳᐅᓐ᙮ 27ᐛᔅ ᐃᑎᔅᑕᐤ ᒋᓴᒪᓂᑐᐤ ᐅᑦ ᐃᔨᒧᐅᓂᒡ, “ᒋᓴᒪᓂᑐᐤ ᒥᓯᐛ ᒐᒂᔪᐤ ᒋ ᒥᔭᐤ ᒐᒋ ᑎᐸᔨᑎᒥᔨᒋ᙮” ᐅ ᒪᒃ ᑲ ᐃᑎᔅᑕᒡ ᒥᓯᐛ ᒐᒂᔪᐤ ᒋ ᒥᔭᑭᓄᐤ ᐎᔾ ᒐᒋ ᑎᐸᔨᑕᐧᒃ ᓂᔅᑐᑕᑯᓐ ᐊᑲ ᐊᔅᑎᒋᒪᑭᓄᐅᑦ ᒋᓴᒪᓂᑐᐤ ᐊᓐᑕ ᐊᓂᔭ ᑲ ᐃᑎᔅᑕᔨᒡ᙮ ᐛᔅ ᒋᓴᒪᓂᑐᐤ ᙭ᑕ ᒥᔭᐤ ᒥᓯᐛ ᒐᒂᔪᐤ ᒐᒋ ᑎᐸᔨᑎᒥᔨᒋ᙮ 28ᐃᔅᐱᔅ ᒥᓯᐛ ᒐᒂᔪᐤ ᒋ ᒥᔭᑭᓄᐅᒐ ᙭ ᒐᒋ ᑎᐸᔨᑕᐧᒃ ᐊᑯ ᐎᔾ ᙭ ᒐ ᐱᔅᑕᔨᒥᑎᓱᔅᑐᐛᑦ ᒋᓴᒪᓂᑐᐛ, ᐊᓂᔭᔪᐛ ᑲ ᒥᔨᑯᑦ ᒥᓯᐛ ᒐᒂᔪᐤ ᒐᒋ ᑎᐸᔨᑕᐧᒃ᙮ ᐊᑯ ᒪᒃ ᒋᓴᒪᓂᑐᐤ ᓇᔅᒡ ᒥᓯᐛ ᒐᒂᔪᐤ ᑭᔭ ᒥᓯᐛ ᐊᐛᔪᐛ ᒐ ᑎᐸᔨᒪᑦ᙮
29ᑕᐅᒡ ᐊᓐᒡ ᐊᒋ ᓯᑲᐃᑕᑯᓯᒡ ᐊᓂᔭ ᐅᒋ ᐊᐛᔪᐛ ᓴᔅ ᐊᒋ ᓂᐱᔨᒋ᙮ ᑕᓐ ᒪᒃ ᐛ ᐃᑎᒡ ᐊᓂᔭ ᑲ ᐃᑎᒡ᙮ ᐛᔅ ᑕᑈ ᐊᑲ ᒥᓐ ᐅᓂᔅᑲᓇᑭᓄᐛᒂ ᐊᓐᒡ ᓴᔅ ᑲ ᓂᐱᒡ ᒐᒂᔪᐤ ᐛᒋ ᓯᑲᐃᑕᑯᓯᒡ ᐊᓂᔭ ᐅᒋ ᐊᐛᔪᐛ ᓴᔅ ᐊᒋ ᓂᐱᔨᒋ᙮ 30ᐊᑯ ᒪᒃ ᓂᔾ, ᒐᒂᓐ ᐊᓯᑯᒻ ᑎᐸᐃᑭᓇ ᐛᒋ ᐱᔅᑎᓂᓱᔭᓐ ᐊᓐᑕ ᒂᔅᑕᑎᒂᒡ ᐊᑲ ᐊ ᑎᑯᓂᒂ ᐅᓂᔅᑲᓄᐅᓐ᙮ 31ᓂᐧᑲᓂᓯᑐᒄ, ᐊᓯᑯᒻ ᒋᓯᑲᐛ ᓂ ᐸᓱᐛᐸᑕᓐ ᓂᐳᐅᓐ᙮ ᐊᓐ ᐊ ᐃᓯ ᒪᒥᒋᐃᔭᒄ ᑕᐱᔅᑯᓐ ᐊ ᐎᒐᐅᒄ ᐅᑎᐸᔨᒋᒐᐤ ᒋᓴᔅ ᐊᑯᑕ ᐛᒋᐱᔨᒡ ᐅ ᒐᒋ ᐃᔅᒋᔄᔭᓐ᙮ 32ᒧᔭᒻ ᒪᒃ ᒧᒡ ᑲ ᒪᓯᐊᐅᒐᐅᓐᒋ ᓇᐸᐅᒡ ᒧᔭᒻ ᐊᐛᓯᓯᒡ ᑲ ᑯᔅᑕᑎᑯᓯᒡ ᑲ ᐃᑕᔨᑕᑯᓯᒡ ᐃᐱᓴᔅ ᑲ ᑕᒡ ᒐᒂᓐ ᑲ ᐎᐧᑯᒋᑎᒪᓱᔭᓐ ? ᒧᔭᒻ ᑕᑈ ᐊᑲ ᐅᓂᔅᑲᓇᑭᓄᐛᒂ ᐊᓐᒡ ᓴᔅ ᑲ ᓂᐱᒡ ᐊᑯᔅ ᑭᑈ ᒋᐸ ᐃᑐᑕᓇᓄᐤ ᐊᓐ ᑲ ᐃᓇᓄᐅᒡ ᒐ ᐃᑐᑕᑭᓄᐅᒡ,
ᒥᒋᓱᑕᐤ ᑭᔭ ᒥᓂᒂᑕᐤ, ᐛᔅ ᐛᐸᒐ ᒋᑭ ᓂᐱᓇᓄᐤ᙮
33ᐊᑲᐎᔾ ᒋᑭ ᐅᒋ ᐎᔭᓯᒥᑯᓇᐛᐤ᙮ ᑕᑈᒥᑭᓐ ᐊᓐ ᑲ ᐃᓇᓄᐅᒡ, “ᐊᓐᒡ ᑲ ᒥᒐᑎᓯᒡ ᐊᐛᓐᒋ ᐊ ᐱᐸᐎᒐᐛᑭᓄᐎᒡ ᐊᑯᑕ ᐛᒋᐱᔨᒡ ᓂᑎᒥᒄ ᐊ ᐃᑎᓇᓄᐅᒡ᙮” 34ᐎ ᐛᔅᑭᒪᔨᑎᒧᒄ ᒪ᙮ ᐊᑯᓐ ᐊᑯ ᐃᔅᐱᔅ ᒥᒋᑐᑎᒧᒄ᙮ ᒋᐸ ᓴᒂᔨᒧᓇᐛᐤ ᐊ ᐃᑎᑎᑯᒡ ᐱᔅᒐ ᐊᓐᑕ ᐊ ᑎᓯᔭᒄ ᐊᑲ ᒋᔅᒐᔨᒪᒄ ᒋᓴᒪᓂᑐᐤ᙮
ᑕᓐ ᒐ ᐃᓯᓇᑯᓯᒡ ᐊᓐᒡ ᒐ ᐅᓂᔅᑲᓇᑭᓄᐎᒡ ᓂᐳᐅᓂᒡ ᐅᒡ
35ᒪᒃ ᒋᑭ ᒋ ᑯᒂᒋᒐᒧᐤ ᐊᐛᓐ, “ᑕᓐ ᐊ ᐃᑕᔨᑕᑯᓂᔨᒡ ᐊᐛᓐ ᐊ ᐅᓂᔅᑲᓇᑭᓄᐅᑦ ᐊᒋ ᓂᐱᑦ ? ᑕᓐ ᒐ ᐃᓯᓇᑯᓂᔨᒡ ᐎᔪᐤ ᐅᓂᔅᑲᓇᑭᓄᐅᒐ ?” 36ᐊᔪᐛᒡ ᓇᒪ ᒋᑦ ᐃᑕᔨᑕᓇᓄᐤ ᐊᓐ ᑲ ᐃᓯ ᑯᒂᒋᒐᒧᔭᒄ᙮ ᒪᒥᑐᓇᔨᑎᒧᒄ ᒪ ᒐᒂᓐ ᐊ ᓂᑕᐅᒋᑕᑭᓄᐅᒡ᙮ ᓂᔅᑎᒻ ᐊᓐᑕ ᑕᒥᒡ ᐊᔅᒋᒡ ᐊᔅᑕᑭᓄᐤ ᓂᑕᐅᒋᑕᑭᓐ ᐊᑎ ᐛᒋ ᒋᒋ ᓂᑕᐅᒋᒡ ᒐᒂᓐ᙮ ᐊᓐ ᒪᒃ ᑲ ᐊᔅᑕᑭᓄᐅᒡ ᐊᓐᑕ ᐸᑎᒪ ᒋᑭ ᓂᐱᒥᑭᓐ᙮ ᐊᑯ ᒪᒃ ᐃᔭᒄ ᒐ ᐱᒪᑎᓯᒥᑲᒡ, ᐊᑯ ᐃᔭᒄ ᒐ ᓂᑕᐅᒋᑦ᙮ 37ᐊᓐ ᒪᒃ ᓂᑕᐅᒋᑕᑭᓐ ᑲ ᐊᔭᑭᓄᐅᑦ ᐊᓐᑕ ᐊᔅᒋᒡ ᓇᒪ ᓇᔅᒡ ᒋᔅᒐᔨᑕᑯᓐ ᑕᓐ ᐊᓐ ᒐ ᐃᓯᓇᒂᒡ ᐃᔅᐱ ᒋ ᐃᓯ ᓂᑕᐅᒋᒐ᙮ 38ᒋᓴᒪᓂᑐᐤ ᒪᒃ ᐎᔾ ᐎᔭᔨᑎᒻ ᑕᓐ ᒐ ᐃᓯ ᓂᑕᐅᒋᑕᔨᒋ ᒥᓯᐛ ᓂᓇᐧᑯᐤ ᐊ ᐃᓯᓇᑯᓯᔨᒋ ᓂᑕᐅᒋᑕᑭᓇ᙮ 39ᒪᒃ ᒪᒥᑐᓇᔨᒪᐧᑯᒡ ᐃᔪᒡ, ᐊᐛᓯᓯᒡ, ᐱᔭᓯᓯᒡ ᑭᔭ ᓂᒪᓯᒡ᙮ ᒥᓯᐛ ᐃᔭᒡ ᐃᓯᓇᑯᓂᔪᐤ ᐎᔪᐛᐛ᙮ 40ᑎᑯᓇ ᒋᒋᒋᓯᒄ ᒥᔪᐛ ᑭᔭ ᑎᑯᓇ ᐊᔅᒋᔪᐤ ᒥᔪᐛ᙮ ᐃᔭᒡ ᒪᒃ ᐃᓯ ᒋᔅᑕᔨᑕᑯᓇ ᒋᒋᒋᓯᒄ ᒥᔪᐛ ᑕᓐ ᐊ ᐃᓯ ᒋᔅᑕᔨᑕᒂᒋ ᐊᔅᒋᔪᐤ ᒥᔪᐛ᙮ 41ᑎᑯᓂᔪᐤ ᐊ ᐃᓯ ᒥᔽᔅᑐᐛᑦ ᐱᓯᒻ᙮ ᑎᐱᔅᑲᐤ ᐱᓯᒻ ᑭᔭ ᑎᑯᓂᔪᐤ ᐊ ᐃᓯ ᒥᔽᔅᑐᐛᑦ᙮ ᑭᔭ ᐅᒐᑭᑕᐧᑯᒡ ᑎᑯᓂᔪᐤ ᐊ ᐃᓯ ᒥᔽᔅᑐᐛᒡ᙮ ᐊᓐᒡ ᐅᒐᑭᑕᐧᑯᒡ ᓂᓇᐧᑯᐤ ᐃᓯᓇᑯᓂᔪᐤ ᐊ ᐃᓯ ᒥᔽᔅᑐᐛᒡ᙮
42ᐊᐅᑯᓐ ᒧᔭᒻ ᐊ ᐃᓯᓇᒂᒡ ᒥᔪᐤ, ᐃᔅᐱᔅ ᑲ ᓇᐃᐧᑲᑭᓄᐅᒋ ᐊᑎ ᐃᔭᔪᐅᓐ ᐊᓐ ᒥᔪᐤ᙮ ᐃᔅᐱ ᒪᒃ ᐅᓂᔅᑲᓇᑭᓄᐅᒐ ᓂᐳᐅᓂᒡ ᐅᒡ, ᐊᓂᔭ ᐎᔪᐤ ᑲᒋᒡ ᒋᑭ ᐱᒪᑎᓯᒥᑭᓂᔪᐤ᙮ 43ᐊᓐ ᑲ ᓇᐃᐧᑲᑭᓄᐅᒡ ᒥᔪᐤ ᓇᒪ ᐱᒪᑎᓯᒥᑭᓐ ᑭᔭ ᐎᓇᑯᓐ᙮ ᐃᔅᐱ ᒪᒃ ᐅᓂᔅᑲᓂᑭᓄᐅᒐ ᓂᐳᐅᓂᒡ ᐅᒡ ᐊᔪᐛᒃ ᒋᑭ ᓱᒋᓯᒥᑭᓐ ᑭᔭ ᒋᑭ ᒥᔽᓱᐤ᙮ 44ᐊᐛᓐ ᐊ ᓇᐃᐧᑯᐛᑭᓄᐅᑦ, ᐊᓂᔭ ᐎᔪᐤ ᐎᔭᔅ ᒥᔪᐤ ᐃᓯᓇᑯᓂᔪᐤ᙮ ᐃᔅᐱ ᐅᓂᔅᑲᓇᑭᓄᐅᒐ ᐊᓐ ᑲ ᓇᐃᐧᑯᐛᑭᓄᐅᑦ, ᐊᓂᔭ ᐎᔪᐤ ᐊᒐᐧᒄ ᒥᔪᐤ ᒋᑭ ᐃᓯᓇᑯᓂᔪᐤ᙮ ᑎᑯᓐ ᐎᔭᔅ ᒥᔪᐤ᙮ ᑎᑯᓐ ᑭᔭ ᐊᒐᐧᒄ ᒥᔪᐤ᙮ 45ᒥᓯᓇᑕᐤ ᐊᓐᑕ ᒋᓴᒪᓂᑐᐤ ᐅᑦ ᐃᔨᒧᐅᓂᒡ ᐊᑎᔅᑕᒡ, “ᐊᓐ ᓂᔅᑎᒻ ᓇᐸᐤ, ᐊᑕᒻ, ᒋ ᐅᓯᐊᑭᓄᐤ ᒐᒋ ᐱᒪᑎᓯᑦ᙮” ᐊᓐ ᒪᒃ ᒪᔅᑕᔾ ᐊᑕᒻ ᐊᐅᒄ ᙭, ᐊᒐᐧᑯᐤ ᐎᔾ, ᐎᔾ ᒥᔨᐛᐤ ᐱᒪᑎᓯᐅᓂᔪᐤ᙮ 46ᓂᔅᑎᒻ ᒥᔪᐤ ᒋ ᒥᔨᑯᓇᓄᐤ ᐅᑕ ᐊᔅᒋᒡ᙮ ᐊᑯ ᒪᒃ ᐸᑎᒪ ᒐ ᒥᔨᑯᐅᔭᐧᒄ ᐊᒐᐧᒄ ᒥᔪᐤ᙮ 47ᐊᓐ ᓂᔅᑎᒻ ᓇᐸᐤ ᐊᑕᒻ, ᐃᔅᐱ ᑲ ᐅᓯᐃᑯᑦ ᒋᓴᒪᓂᑐᐛ ᐊᓯᔅᒋᒡ ᒋ ᐅᒋ ᐅᓯᐃᑯᐤ᙮ ᙭ ᒪᒃ ᒋᒋᒋᓯᑯᒡ ᒋ ᐅᑐᑕᐤ ᐎᔾ᙮ 48ᒥᓯᐛ ᐊᐛᓐᒋ ᐅᑕ ᐊᔅᒋᒡ ᑲ ᐱᒪᑎᓯᒡ ᒧᔭᒻ ᐊᑕᒻ ᑲ ᐃᓯᓇᑯᓯᔨᒋ ᐃᓯᓇᑯᓱᐅᒡ᙮ ᐊᑯ ᒪᒃ ᐊᓐᒡ ᐊᐛᓐᒋ ᐊᓐᑕ ᒋᒋᒋᓯᑯᒡ ᒐ ᑕᒡ ᒧᔭᒻ ᙭ᑕ ᐊ ᐃᓯᓇᑯᓂᔨᒋ ᒋᑭ ᐃᓯᓇᑯᓱᐅᒡ᙮ 49ᒧᔭᒻ ᒪᒃ ᐊ ᐃᓯ ᓂᔅᐱᑐᐛᐧᒄ ᐊᓐ ᐊᓯᔅᒋᒡ ᑲ ᐅᒋ ᐅᓯᐊᑭᓄᐅᑦ ᒐᔅᑎᓇᔅ ᑭᔭ ᒋᑭ ᓂᔅᐱᑐᐛᓄᐤ ᐊᓐ ᒋᒋᒋᓯᑯᒡ ᑲ ᐅᑐᑕᑦ᙮
50ᒪᐅ ᐛ ᐃᓯ ᐎᑎᒪᑎᑯᒡ ᓂᐧᑲᓂᓯᑐᒄ᙮ ᐅᔭ ᒋᔭᓄᐛ ᑲ ᐎᔭᓱᐅᒋ ᑭᔭ ᑲ ᒥᐧᑯᐅᒋ ᓇᒪ ᒋᑭ ᒋ ᑎᑯᓇ ᐊᓐᑕ ᒋᓴᒪᓂᑐᐤ ᐅᒋᓴᐅᒋᒪᐅᓂᒡ, ᑭᔭ ᐊᓐ ᒐᒂᓐ ᒐ ᓂᐱᒥᑲᒡ ᑲ ᐅᓯᑕᑭᓄᐅᒡ ᓇᒪ ᑲᒋᒡ ᒋᑭ ᒋ ᐱᒪᑎᓯᒥᑭᓐ᙮ 51ᒋ ᐎᑎᒪᑎᓇᐛᐤ ᒐᒂᓐ ᐊᑲ ᒋᔅᒐᔨᑕᑭᓄᐅᒡ᙮ ᓇᒪ ᒥᓯᐛ ᒋᑭ ᐅᒋ ᓂᐱᓇᓄᐤ᙮ ᒥᒄ ᒪᒃ ᒥᓯᐛ ᐊ ᑎᓯᔭᐧᒄ ᓯᔅᒋᑯᒡ ᒋᑭ ᒂᔅᒋᓇᑯᐃᑯᐅᓇᓄᐤ᙮ 52ᐃᔅᐱ ᐸᑕᒂᒐ ᐳᑕᒋᑭᓐ ᐸᐃᒂᐤ ᐊ ᐱᓴᐧᑲᐱᑦ ᐊᐛᓐ ᐊᐅᑯᓐ ᒐ ᐃᔅᐱᔅ ᒋᓯᐱᔨᒡ ᐊ ᒂᔅᒋᓇᑯᐃᑯᐅᔭᐧᒄ᙮ ᐊᑯ ᒪᒃ ᐊᓐᒡ ᑲ ᓂᐱᒡ ᒐ ᐅᓂᔅᑲᓇᑭᓄᐎᒡ ᓂᐳᐅᓂᒡ ᐅᒡ ᑲᒋᒡ ᒐᒋ ᐱᒪᑎᓯᒡ᙮ ᐊᑯ ᒪᒃ ᒥᓯᐛ ᒐ ᒂᔅᒋᓇᑯᐃᑯᐅᔭᐧᒄ᙮ 53ᐛᔅ ᒥᔪᐛ ᑲ ᔭᔪᓂᔨᒋ ᒋᑭ ᒂᔅᒋᓇᑯᑕᑭᓄᐛ ᒐ ᐊᑲ ᒋ ᔭᔪᓂᔨᒋ᙮ ᑭᔭ ᒋᑭ ᒂᔅᒋᓇᑯᑕᑭᓄᐛ ᐊᑲ ᓂᑕ ᒥᓐ ᒐ ᓂᐱᒥᑲᒋ᙮ 54ᐃᔅᐱ ᒪᒃ ᐊᓐᒡ ᐊᐛᓐᒋ ᑲ ᓂᐱᒡ ᐅᓂᒥᑭᓂᒂᐛ ᐎᔪᐛᐛ ᐅᓂᔅᑲᓇᑭᓄᑥᐛ ᑲᒋᒡ ᐱᒪᑎᓯᐅᓂᒡ ᐃᔅ ᐊᑯ ᒐ ᐃᔅᐱᔨᒡ ᐊᓐ ᑲ ᐃᑎᔅᑕᒡ ᒋᓴᒪᓂᑐᐤ ᐅᒥᓯᓇᐃᑭᓂᒡ, “ᓴᔅ ᓇᒪ ᑎᑯᓐ ᓂᐳᐅᓐ, ᓴᔅ ᓇᔅᒡ ᒋ ᓴᐧᑯᒋᑕᑭᓄᐤ᙮”
55ᓴᔅ ᓇᔅᒡ ᒋ ᔭᔪᑕᑭᓄᐤ ᓂᐳᐅᓐ᙮ ᓇᒪ ᐛᐛᒡ
ᒋᑭ ᒋ ᐊᐧᑯᐃᑯᓇᓄᐤ ᐊᑯ᙮
56ᐛᔅ ᒥᒐᑎᓯᐅᓐ ᐊᐅᒄ ᐊ ᐃᑐᑕᐃᐛᒥᑲᒡ ᓂᐳᐅᓂᒡ᙮ ᐎᓱᐛᐅᓂᔪᐤ ᒪᒃ ᓴᐧᑯᒋᐱᑎᑯᐤ ᐊᐛᓐ ᒐᒋ ᒥᒋᑐᑕᐧᒃ᙮ 57ᒋᑭ ᓂᓇᔅᑯᒪᓄᐤ ᒪᒃ ᒋᓴᒪᓂᑐᐤ ᒋᑎᐸᔨᒋᒐᓯᒥᓄᐤ ᒋᓴᔅ ᙭ ᐅᒡ᙮ ᔅᒋ ᐃᑐᑎᒪᑯᓇᓄᐤ ᒐ ᐊᑲ ᒋ ᓴᐧᑯᒋᐃᑯᔭᐧᒄ ᓂᐳᐅᓐ, ᐃᔭᐱᒡ ᑲᒋᒡ ᒐᒋ ᐱᒪᑎᓯᔭᐧᒄ᙮
58ᐊᐅᒄ ᒪᒃ ᐅ ᐛᒋ ᓯᒋᒥᑎᑯᒡ ᓂᐧᑲᓂᓯᑐᒄ ᑲ ᓴᒋᐃᑎᑯᒡ, ᐊᔨᒋᑲᐳᐅᒄ ᐊ ᐱᒪᑎᓯᔅᑐᐛᒄ ᐅᑎᐸᔨᒋᒐᐤ᙮ ᐊᑲᐎᔾ ᓄᑎᐳᓂᒄ᙮ ᓱᒃ ᒧᔅ ᐊᑐᔅᒐᔅᑐᐛᐧᒄ ᐅᑎᐸᔨᒋᒐᐤ᙮ ᐛᔅ ᒋ ᒋᔅᒐᔨᑕᓇᐛᐤ ᒐᔅᑎᓇᔅ ᐊᑲ ᒐᔅᑲ ᔭᐱᑎᓯᔅᑎᐛᒄ ᐅᑎᐸᔨᒋᒐᐤ᙮
Currently Selected:
1 ᑯᕆᓐᑎᔭᓇ 15: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
