तीतस 3
3
परमेस्वरए उयुँ य़ालो
1है जैद नलावर सरकारए ओकानुन चलैन्या हक दैवराए याधूँल लिद मुइलिउर ताद प़ाइँलाई तान्या य़ेन ओदोरक लिद यासम्जैयो। 2सुए ज़ अर्काए उमिन बले·द ताएरक। सुस ज़ माइ़सिद प़ाइँस सहिसिद यायुँ झ्यासोर ओतारक। 3गे ब ङ़ादा काता ज़ मासैंन्यार परमेस्वरए ओपाँ माभैंःद तँदा बावर गेल्यो। गे जोत ब गेयुँ मानैधुद गेमन लागिउ य़ेनर दाद गेजिउ भरी अर्काए उमीं चाव रँःद मी तून्या, सोसिन्या, हेला रँःसिन्या वाज़ गेदोज़्याव। 4हैदी ब गेलाई बाँचैज़्याव परमेस्वरए गेलाई उयुँ ओनाव उयुँ ओगराँव सतैंद ओयासिउ बेलाक ज़, 5अजम्बरी जुनील बान्या जैसिक्यो। निताव ओजैसिउ गे गेकमैव धर्मए माःक। ओल परमेस्वरए उयुँ गराँद छैंव उपुरूसए गेलाई सछैंद साःरोल ओजर्मैसिउनी वाज़ गेताके। 6नो उपुरूस गेलाई बाँचैज़्याव येसु ख्रीसए ल्योनी परींद्यासिक्यो। ननी ज़ गेक्याँत ओअसिकर ब धोल पोगोल ज़ ताज़्या। 7है जैद गेल्योदा परमेस्वरए उयुँ ओगराँवनी ओङ़ाक उयुँलाव मितावर गेतावए अजम्बरी जुनीदा गेयुँ थू गेजैज़्या।
साचो थ॰रिउ पाँत लिन्या
8आव ङासरो भरी साचो पाँ ज़ लिज़्या। है जैद नँ नोरालाई पुर्थस सम्जैव ताके। हो ताकिन ची परमेस्वरए ओपाँत हुवर चाव य़ेनत कलँ लिन्या लेर। आव पाँर गेजूँनी थ॰रिउ चाव ज़ लिज़्या। 9गे अऩाकलाव पाँर, खरङाव मरङाव काता काताराए मिनर स़ोनो मोसाए ओकानुनलाव पाँरानी खर्लेसिन्यारानी अछतङ ल्यो ताके। आव भरी अऩाकलाव याचाहित माल्योर वाज़ लिज़्यार। 10निताव पाँरानी फातैज़्याव मिँलाई तखेप ऩेखेप पै सम्जैव ताके। है जैद ब ओमाताकिन नोलाई ऱास्द नैव ताके। 11निताव मिँए उयुँ बिप्यानी ता·सिउ ओतावए मादान्या वाज़ दाद ओलनी ज़ पापी थ॰रिज़्या।
तुपैन्या पाँर
12ङास लिज़्यावनी अर्तिमास स़ोनो तुखिकसनिलाई नल्योदा तोबो ङानिपरींरिज़्या। नो मिँ उहुव प़ाइँना नधुकिन ङास निकोपोलिसल दैसिहुव ताके। ङा य़ुँदा भरी नल ज़ ङालिरिज़्या। 13सरकारी वकिल जेनास स़ोनो अपोल्लोसनिलाई माथैंव मायो·वल सघैद चावस निपरींयो। 14नलाव गेसकाव मिँराए ब निताव माथैंव मायो·वलाई सघैन्या चाव य़ेन ओपैसिरक। परमेस्वरए ओय़ेनत काम मालागिउर तातारक।
15ङास लिज़्यावराए प़ाइँए जेरो है दींज़्यार। नल्योङाव लिज़्याव गेलाई मया दाज़्याव यायुँ हुबोरालाई जेरो है यादोयो।
जे प़ाइँए ल्योदा परमेस्वरए उयुँ ओय़ाल्क।
Currently Selected:
तीतस 3: NKham
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
