दर्सन 13
13
अजिङ्गरए ल्योनी हक दैव राछ्यास
1हाःत ज़ समुन्द्रनी तोबो बनै छे छे ङम्सिउ राछ्यास मिताव पुलुस्द उहुज़्याव ङारँःके। नोए उरँःर दस गोता, ओङ़ैर सात गोता यालिज़्याव। दस गोता उरँःत तोबो तोबो मुकुत जासिसिउ उलिज़्याव। सात गोता ओङ़ैत फरी तोबो तोबो परमेस्वरकिन स॰द युँ माजामो मिनर सर्सिउ उलिज़्याव।#दान ७:३ 2नो ङारँःव राछ्यास च्याँकुला स्यासो उलिज़्याव, उखँर निमए उखँ स्यासो उलिज़्याव, ओयाः घ्योःव लाए ओयाः स्यासो उलिज़्याव। नोए ओसक्ती, ओराज्या, ओहक भरी नो अजिङ्गरए ल्योनी दैद ओनैज़्याव।#दान ७:४-६ 3नोए ओङ़ै भरिनी तोबो ओङ़ैत सिवा जप जैद पल्सिउ घाइनी गराँव मिताव ज़ ङारँःके।
मानुवाताव मिँ भरिए नोलाई रँःद अचम्ब ताद उछीं उछीं ज़ याबाज़्याव। 4नोए उछींत बाज़्यावराए, “आव राछ्यासए ओहक भरी अजिङ्गरए ल्योनी ज़ उहुव ओल्यो,” लिन्या सैंद, नो अजिङ्गरए ओसेवा दोकेर, स़ोनो, “आव राछ्यासकिन घेप्पा सु ची उलिज़्याव? आवस लरैं दाधुन्या ब सु ची उलिज़्याव?” लिद नोए ओसेवा मनी दोकेर। 5नो राछ्यासलाई फरी परमेस्वरकिन स॰द परमेस्वरस याः दान्या, स़ोनो ओमन लागिउ य़ेन दान्या बयालीस मैना पै हक यासिउ उलिज़्याव।#दान ७:८,२५; ११:३६; १२:७ 6है जैद ज़ नोए परमेस्वरए उउपर्त माचाहिउ पाँर झाःद, उमिनर बले·द्याद, परमेस्वर उलिज़्याव पो स़ोनो स्वर्गताव परमेस्वरए उमींराए याङ़ैत ब माचाहिउ पाँर झाःद पाँके। 7नोलाई परमेस्वरए छैंव उमींरास लरैं दाद नोरालाई हारैधुन्या हक यासिउ उलिज़्याव। नोए ओहक भरी प़ाइँ राज्यालावर, प़ाइँ जातलावर, प़ाइँ थोलावर, प़ाइँ खामनिकाव पाँज़्यावराए याङ़ैताव ज़ ओल्यो।#दान ७:२१ 8है जैद आव नाम नम ओमातादकिनकाव अजम्बरी जुनीलाव पोस्तोकोल यामिन माल्यो भरिए नोए ओसेवा दान्या लेर। नो पोस्तोको सैःसिउ पाथाए उकुइत लिज़्या।#भज ६९:२८
9है जैद जोए थैन्या उयुँ लिज़्या, नोए चावस ओथैवक।
10हो बेलाक जोलाई झ्यालखानाल बान्या जैसिउ लिज़्या, हो झ्यालखानाल ज़ बान्या ले।
जोलाई तरवालीए सैःन्या जैसिउ लिज़्या, हो तरवालीनी ज़ सिन्या ले।
आनी ज़ परमेस्वरए छैंव उमींर थ॰रिद युँ हुबो ताव परिके।#यर १५:२; ४३:११
छींनीकाव राछ्यास
11नकिन फरी ब नाम जींनी पुलुसो छुत तोबो राछ्यास ङारँःके। नोए उरँः पाथाए उरँः स्यासो ऩेब्लो उलिज़्याव, ओर्गा अजिङ्गरए ओर्गा स्यासो उलिज़्याव। 12नोए नो ङ़ादाङाव राछ्यासए ओहक भरी ओचलैज़्याव, आव मानुवाताव मिँरालाई नो ङ़ादा ओङ़ै पल्सिउ घाइ गराँव स्यासो राछ्यासए ओसेवा दाव ओरापरींज़्याव। 13नोए अचम्बलाव सरेसर जैद नमतिन मानुवात मेंः मुल्कार ब मिँराए याङ़ाक सतेद ओराएज़्याव। 14नोए नो ङ़ादाङाव राछ्यासए ल्योनिकाव ओरैव हकरानी अचम्बलाव सरेसर जैद आव मानुवाताव मिँरालाई झुकैद नो ङ़ादा ओङ़ै तरवालीए पल्सिउ गराँव राछ्यासए अङग्या तोबो जैव यापरींक्यो। 15नोए नो अङग्यालाई उस॰ झाःद्यान्या सक्तीर दैद नोलाई पाँधुन्या जैक्यो। हाःकिन नो अङग्याए ओसेवा दाव माभैंःज़्याव भरिरालाई सैःव यापरींक्यो। 16नकिन नोए मिँ भरिरालाई घेप्पा ज़िम्ज़ा, धनीर गरीबर, बाँदा माबाँदार प़ाइँलाई ज़ वोर्फताव याकुइत तादी ब, याचाँदीत तादी ब, तोबो सरेस झाःव यापरींक्यो। 17नो सरेसत नो राछ्यासए उमिन कितर ओनमर झाःसिउ उलिज़्याव। नो सरेस माल्योराए सुए ज़ काता ज़ लँःव यामादैज़्याव, काता ज़ यो·व ब यामादैज़्याव।
18आव बुझिन्याए जूँनी गहक चाहिज़्या। जोए ओगहक लिज़्या, होए नो राछ्यासए ओनमर ओसैंवक। नो नमरए तोबो मिँए उमिन सतैंज़्याव। नोए ओनमर छ सय छयसथी ज़।
Currently Selected:
दर्सन 13: NKham
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
