दर्सन 12
12
मेंमा स़ोनो अजिङ्गर
1हाःत ज़ नमत तोबो बनै अचम्बलाव सरेस रैंःके। नत तोबो मेंमा निमी स्यासो झ़ार झ़ारो क्वाइसिसिउ, उखँ धूँल स़्यावै, ओङ़ैत बाह्र गोता सोरोए मुकुत जासिसिउ उलिज़्याव। 2नो मेंमा ज़ा दैन्या ताद बनै घर्लिद ओघर्ज़्याव।
3नकिन फरी ब नमत तोबो सरेस रैंःके। नत तोबो बनै घ्योःव घ्यामो अजिङ्गर पुलुस्द उलिज़्याव। नोए ओङ़ैर सात गोता, उरँःर दस गोता यालिज़्याव। सात गोता ओङ़ैत मुकुत जासिसिउ उलिज़्याव।#दान ७:७ 4नोए ओर्मेःए नमताव सोरोर स़ोंभानी तभा भरी स़ेल्द नामल याख्याक्यो। नो अजिङ्गर फरी, “नो ज़ा दैन्या घर्लिज़्याव मेंमाए ज़ा ओदैवत ङाकैया,” लिद ओङ़ाक वैंसिद उलिज़्याव।#दान ८:१०
5नो मेंमाए खेपा ज़ा दैक्यो। नो ज़ प़ाइँ राज्यालाव मिँरालाई उकुइत झँए झुइ रैद राज्या चलैहुरिज़्याव मिँ। नोलाई परमेस्वरए स्वर्गताव ओपोल ज़ छींद लाँक्यो।#यसै ६६:७; भज २:९ 6नो मेंमा फरी परमेस्वरए म़ोंसिन्या पो जैद ओयोए धोंःद बनङ म़ोंसिनाके। नङ ज़ बाह्र सय साथी दिन ङासिके।
7हाःत ज़ स्वर्गत घ्योःव लरैं ताके। मिखाएल#12:7 यहू १:९ चिऊन्या। ओचाकर्यारास नो अजिङ्गरस लऱिनाकेर। नो अजिङ्गर मनी ओचाकर्यार रैद मिखाएलस लऱिद,#दान १०:१३,२१; १२:१ 8यार्सार खेम्द स्वर्गताव यालिन्या पोनी हारिद पुलुस्केर। 9नो अजिङ्गर स्वर्गतिन नामल ख्यासिके। नो दियाबलस यादोज़्याव भाःकिनकाव घुल, मानुवाताव मिँरालाई झुकैज़्याव सैतान ज़। नो मेल ओख्यासिक ओचाकर्या भरी ब ओलस ज़ तेकेर।#उत ३:१
10फरी स्वर्गत तोबो बनै घ्योःव गा अइ लिद ओपाँज़्याव ङाथैके,
“अब ते गेपरमेस्वर प़ाइँनी झेंःस्या ताद, ओसक्तीरास ओराज्या ब तयार जैद नैव।
नो राज्या चलैन्या हक ओज़ा येसु ख्रीसए ओल उकुइत ज़ रैद नैव।
अब ते गेदाज्यु भाइरालाई लाकनी रील परमेस्वरए ओङ़ाक छ्याप लैज़्याव सैतान स्वर्गतिन नामल ख्यासिके।#अयू १:९-११; जक ३:१
11परमेस्वरए उमिनतावर ते नो पाथाए उझीनी परमेस्वरस खैवर यातावए,
स़ोनो याजिउए मया मादाद परमेस्वरए ओपाँत साची यान्यात जात्त ज़ यामाऱासोए,
सैतानलाई हारैद याज़ झेंःस्या ताकेर।
12है जैद जे स्वर्गत लिज़्यावर प़ाइँ रेंचिके।
जे मानुवात स़ोनो समुन्द्रल लिज़्यावरालाई ते थैए माँतकन ज़ लिज़्या।
काराव ल्यो ताकिन सैतान जेल्योल ख्यासिद, ‘ङाबेला छ्या ज़ लिज़्या’ लिद बनै ज़ रसिद ले।”
13नो अजिङ्गर नामल ओख्यासिउत नो खेपा ज़ा दैव मेंमाए उखिरी पसिनाके। 14हाःत ज़ नो अजिङ्गरए ओङ़ाकिन भुर्द बनङाव उलिन्या पो जैसिउङ केस्न्याए जूँनी नो मेंमालाई घेप्पा काप्च्यागाए ओकर ऩेब्लो यासिउ उलिज़्याव। नो बनल आधास चार बर्स ङासिके।#दान ७:२५; १२:७ 15नो अजिङ्गरए फरी नो मेंमालाई ऱीए गबगैवक लिद ओयाःनी बनै घ्योःव भल ख्यादिक्यो। 16नामए नो मेंमालाई सघैन्याए जूँनी नो अजिङ्गरए ओयाःनिकाव ऱी भरी नाम फैसिद होल ज़ सझ़ाल्दिक्यो। 17निताव रँःद नो अजिङ्गर नो मेंमास झन ज़ उरिस चोद ओज़ा भरिरास ज़ लरैं दोनाक्यो। नोए ओज़ार परमेस्वरए ओपाँर दाद येसुए ओसाचीत लिज़्यावर ज़।
18हो बेलाक नो अजिङ्गर समुन्द्र छ्योकाव बालुवाल च्याँःसिद उलिज़्याव।
Currently Selected:
दर्सन 12: NKham
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
