हिब्रू 7
7
पुजारी मल्कीसेदेक
1आव मल्कीसेदेक सालेम सहरलाव राजा ओल्यो, माहान परमेस्वरए उपुजारी ब ओल्यो। हो बेलाक अब्राहामए राजारालाई हारैद उहुज़्याक मल्कीसेदेकस निदैसिक मल्कीसेदेकनी असिक दैक्यो।#उत १४:१७-२० 2अब्राहामए नैंद ओरारैव भरिनी दस भा जैद तभा मल्कीसेदेकलाई एक्यो। मल्कीसेदेकए ओअर्थ ‘सतस दाज़्याव राजा’। ओराज्या सालेमए ओअर्थ फरी ‘सन्च’ ज़। 3होए उजूँनीकाव सर्सिउ भरिल कान्ल ज़ ओबाबु ओआमा, ओसाखा पुर्खा स़ोनो उजर्मिउ, उसिउ छ्याम ब मारैंःए। इतावनी ज़ नो परमेस्वरए ओज़ा मिताव खर्क ज़ माखेम्न्या परमेस्वरए ओङ़ाकाव पुजारी य़ेन ओदोज़्याव रैंःज़्या।
मल्कीसेदेक प़ाइँनी ज़ घेप्पा रैंःज़्या
4आव ब सैंच्यो, गेपुर्खा अब्राहामए नैंद ओरारैवनी दस भा जैद तभा भरी नोलाई ज़ एक्यो। ननी ज़ मल्कीसेदेक घेप्पा रैंःज़्या। 5कुधु छींङ अब्राहामए ओथोलाव लेबी थरलाव पुजारीरालाई उपुर्काव यादाज्यु भाइराए, प़ाइँ ज़ तोबोए ओथोर यातादी ब, मोसाए ओकानुननी दस भानी तभा पुजारीरालाई याव ज़ उपरिज़्याव।#गन्ती १८:२१ 6खाली मल्कीसेदेक ते लेबी थरलाव माःक। हैदी ब अब्राहामए ल्योनी मल्कीसेदेकए दस भानी तभा दैक्यो। नो मल्कीसेदेकए परमेस्वरए ओय़ाका दैव मिँलाई ज़ असिक एक्यो। 7गे ब गेसैंज़्या, असिक दैज़्यावकिन असिक याज़्याव मिँ घेप्पा ताज़्या।
8फरी, नो लेबी थरलाव पुजारीराकिन ब मल्कीसेदेक घेप्पा ज़ रैंःज़्या। नोर सिउ ज़ लिज़्यार, मल्कीसेदेक ते उसिउ मारैंःए। 9ख्वाराए अइ ब ल्यो धुर, दस भानी तभा दैव परिन्या लेबीराए ज़ अब्राहामनी मल्कीसेदेकलाई दस भानी तभा एकेर, 10काराव ल्यो ताकिन अब्राहाम स़ोनो मल्कीसेदेकनी निदैसिक लेबी थरलाव पुजारीर यापुर्खा अब्राहामए ओक्याँत याल्यो।
येसु मल्कीसेदेक मिताव ज़
11नो कानुननिकाव लेबी थरलाव पुजारीराए यादोव य़ेननी गे मिँराए जूँनी परमेस्वरए ओय़ेन भरी उतुपैव ताकिन काताए जूँनी धर्मसास्त्रल छुत किसिमलाव पुजारी तारिज़्या है उलिरिज़्याव? हारूनए ओथरनी मातान्या ओतावए परमेस्वरए ङ़ादाकिन ज़ मल्कीसेदेकए ओय़ेन मितावनी तान्या थ·रैक्यो। 12नो कानुननिकाव पुजारी य़ेन साःरोनी तान्या ओतावए नो कानुन ब साःरो ज़ ताव परिके। 13नो है गेलिज़्याव मिँ ते पुजारी थरलाव माःक लिन्या प़ाइँए ज़ गेसैंज़्या। होए ओथरल पुजारी य़ेन दावर ब सु ज़ मालेर। 14नो मिँ गेप्रभु ज़। ओथर ते यहूदा थर ची। यहूदा थरलावरालाई मोसाए पुजारी य़ेन ते हैज़ मारादोव।
15येसु उहुवत प़ाइँनी ज़ मल्कीसेदेक मिताव ओरैंःवए नो कानुननिकाव य़ेन झन ज़ उतुपिउ रैंःके। 16येसु पुजारी थरलाव कानुननी पुजारी ओताव माःक। खर्क ज़ मासिन्या जुनी ओदैवनी ओताव ची। 17किताव धर्मसास्त्रल सर्सिउ उलिज़्याव, हिताव ज़ ताके। नलाव सर्सिउ आव ज़,
“नँ मल्कीसेदेकए ओदैव मिताव पुजारी य़ेन नदैरिज़्या।
नँ खर्क ज़ माखेम्न्या पुजारी नतारिज़्या।”#भज ११०:४
18नो ङ़ादाङाव कानुनए काता ज़ माजैधुन्या अऩाकलाव ओतावए नो कानुन ख्यासिके। 19काराव ल्यो ताकिन कानुनए सुलाई ज़ परमेस्वरए उयुँलाव मिताव माराजैधुक्यो। है जैद होए ओपोल होकिन चाव आस याद नैसिउ। ननी ज़ गे परमेस्वरए ल्योङ गेकेस्ज़्या।
येसुए पुजारी य़ेन किर्यानी ज़ दैक्यो
20येसुए परमेस्वरए ल्योनिकाव पुजारी य़ेन किर्यानी ज़ दैक्यो। 21नो कानुननिकाव पुजारीराए ते किर्यानी यादैव माःक। येसुए किर्यानिकाव ओदैव पुजारी य़ेन ते धर्मसास्त्रल ब इतावनी सर्सिउ लिज़्या,
“ङा परमेस्वरए किर्या झाःद ङानै,
ङायुँ ब खर्क ज़ ङामात़ोए,
‘नँ खर्क ज़ माखेम्न्या पुजारी नतारिज़्या।’ ”#भज ११०:४
22है जैद नो परमेस्वरए ओझाःव किर्यानी नो कानुननिकाव बाचाकिन येसुनी ओयासिउ बाचा बनै चाव सतैंसिउ लिज़्या।
येसु खर्क ज़ मात़ोसिए
23नो कानुननिकाव पुजारीर याय़ेनत अजम्बरी मातार। यासिउनी यासिउनी यात़ोसिज़्याव। 24गेत्याला येसु ते खर्क ज़ मासिन्या ओतावए ओय़ेन ब खर्क ज़ माखेमे। 25है जैद येसुए परमेस्वरए ओङ़ाक एकतार ज़ पोंखारिद ओयासिज़्यावए ओल ओल्योनी परमेस्वरए ल्योक बाज़्यावरालाई एकम्न्याकावए जूँनी बाँचैसिज़्याव।
येसु ओखत माल्यो ज़ लिज़्या
26गेलाई निताव प्रधान पुजारी ज़ बनै ओचाहित ल्यो लिज़्या। नो बनै छैंव, सोजो, ओखत माल्यो, पापीराए ल्योनी पुलुस्द, स्वर्गत बाद प़ाइँरानी ओमान ल्यो पोल च़ुसिद ले। 27नोए ते ङ़ादाकिनकाव प्रधान पुजारीराए मिताव दिनकाव पुजार दाव मापरिए। ङ़ादाङाव प्रधान पुजारीराए ते उस॰कत या यापापए जूँनी, हुकिन मिँराए यापापए जूँनी पुजा यादोज़्याव। ओल येसुए ते उजिउ ज़ चरैःद पुजा भरी तखेप्त ज़ खेम्क्यो।#लेबी ९:७ 28कानुननिकाव खतैसिउ प्रधान पुजारीर नो कानुन यामासयो·धुवए याखत ल्योर ताकेर। खाली कानुनकिन छींनी परमेस्वरए उकिर्यानिकाव ताव प्रधान पुजारी ते परमेस्वरए एकम्न्याकावए जूँनी ओखत माल्यो ओथ·रैव ओज़ा ज़।
Currently Selected:
हिब्रू 7: NKham
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
