हिब्रू 2

परमेस्‍वरए ओपाँत धिद लिन्‍या

1है जैद गे गेथैज़्याव परमेस्‍वरए ओपाँत झन ज़ धिद ल्‍यो ताके, म़ानी तँदा बान्‍या ओछ्यास लिज़्‍या। 2परमेस्‍वरए मिँरालाई ओचाकर्‍यारानी ओरायो कानुन थ॰रिउ ओतावए नो कानुनलाव पाँ मादाद याख्यावनी सजा ब दैकेर। 3गे झन प्रभुनिकाव नाःल्‍दिउ बाँचैन्‍या पाँ गेमाभैंःकिन कातानी ची नो ओसजानी उस्‍किउ गेदैरिज़्‍याव? नो पाँ ङ़ादा गेप्रभुए ओल ज़ ओरासथैज़्‍याव। हाःकिन गे फरी नो पाँ भरी ओलसकाव लिज़्‍यावराए ल्‍योनी गेदैके। 4परमेस्‍वरए फरी नोराए यापाँ थ·रैद्यान्‍याए जूँनी अचम्‍बलाव ओय़ेनर दाव परींद ओसरेसर सतैंद याएक्‍यो। स़ोनो छैंव पुरूसनिकाव बरदानर ब ओल ओपैंज़्याव मितावनी भाःद याएक्‍यो।

परमेस्‍वरए ओराज्‍या ओज़ाए उकुइत याद नैव

5गे नो हुरिज़्या है गेलिज़्याव परमेस्‍वरए ओराज्‍या ओल ओचाकर्‍याराए याकुइत ते नैद मारायो। 6धर्मसास्‍त्रल ब तोबोए अइ लिद सर्द नैव,

“अ परमेस्‍वर,

मिँ काता ची उलिज़्‍यावदा?

मिँलाई काराव नमामेंःधुज़्‍याव?

नोलाई काराव नचेतैज़्‍याव?

7नँ जाँवा पै नमताव नचाकर्‍याराकिन मिँलाई ज़िम्‍ज़ा नजैके।

फरी नो मिँलाई ज़ सघ्योःद बनै ओमान ल्‍यो नजैके।

8ताव भरी ब होए उधूँल ज़ जैद नएके।”#भज ८:४-६

परमेस्‍वरए नो मिँलाई प़ाइँ उकुइत ओयोए ओल उधूँल माल्‍यो काता ज़ माले। खाली गे ज़ गेसैंज़्‍या, नाम नमलाव तावर मिँराए धूँल मातातावर कुधु ज़ लिज़्‍यार। 9नो धर्मसास्‍त्रलाव पाँ भरी येसुए ओक्‍याँत वाज़ थ॰रिउ लिज़्‍या। आव मानुवाताव मिँराए जूँनी परमेस्‍वरए उयुँ ओनावए नो सिन्‍याक पै सज़िम्‍सिद हुके। परमेस्‍वरए ओचाकर्‍याराकिन जाँवा पै सज़िम्‍सिउ नो ज़ लिज़्‍या। मिँराए जूँनी उजिउ झाःद ओरायोनी परमेस्‍वरए सघ्‍योःद बनै ओमान ल्‍यो ओजैव ब नोलाई ज़।

परमेस्‍वरए ओज़ा मिँ ज़ मिन्सिके

10ताव भरी ओल उजूँनी ओल ज़ जैज़्‍याव परमेस्‍वरए गे मिँरालाई ओज़ार जैद ओज़गैल रैन्‍या पैंक्‍यो। है जैद गे प़ाइँलाई बाँचैन्‍याए जूँनी ओज़ा येसुलाई मिँराए यादैज़्‍याव मिताव दुखर सहिउ परींन्‍या ज़्‍यासो लिज़्या लिन्‍या थ·रैक्‍यो। 11गेलाई परमेस्‍वरए उयुँलाव मिताव छैंवर जैद ओबाबुस सखैज़्‍याव येसुस तोबोए ओथोर ज़ गेताज़्‍या। है जैद गेलाई ‘ङाभाइर’ है दान्‍या ओलाज माहुइ। 12नोए उजूँनी धर्मसास्‍त्रल इताव सर्सिउ लिज़्‍या,

“अ परमेस्‍वर, ङा ङाभाइरालाई नमिन सथैन्‍या ङाले।

नोराए याखार्ल नमिन सघ्योःद्यान्‍या गितर गैन्‍या ङाले।”#भज २२:२२

13फरी तोथोल,

“ङा परमेस्‍वरए ओक्‍याँत ख्यासिद लिन्‍या ङाले”

स़ोनो,

“परमेस्‍वरए ङापासल झाःद ओयाँव ओज़ारास ज़ ङालिज़्‍या।”#यसै ८:१७-१८

14परमेस्‍वरए ओज़ार मिँर तान्‍या ओतावए ओल ओज़ा येसु मनी नोराए जूँनी मिँ ज़ मिन्सिद सिके। नितावनी ज़ सिन्‍या सजाल झाःज़्याव सैतानए ओहक ख्यादिक्‍यो। 15स़ोनो, सिन्‍या ताया लिद छे·द याजिउ भरी दुखस लिज़्‍यावरालाई ब यापले·क्‍यो।

16येसु परमेस्‍वरए ओचाकर्‍यारालाई माःक, अब्राहामए ओथोरालाई सघैना उहुव ची। 17है जैद उयुँ य़ाल्‍द गे मिँराए गेपापए सजा फो·द्याद परमेस्‍वरस सखैन्‍याए जूँनी प्रधान पुजारी जैसिद गेजूँनी परमेस्‍वरस पाँद्यान्‍याए जूँनी ओल येसु प़ाइँल ज़ गे मिँ स्‍यासो ताव ज़ उपरिज़्याव। 18ओल ब प़ाइँ दुखर दार्द जाँचिसिद उथ॰रिउनी वाज़ गे मिँरालाई गेयुँए बले·द माचावल ओपारैसिज़्याव भरिल जोगोइव धुव।

Currently Selected:

हिब्रू 2: NKham

Highlight

Copy

Compare