२ पत्रुस 3

परमेस्‍वरए पापीरालाई सजा यान्‍या छ्याम

1अ ङायुँलाव ङानैं ङामेंर, आव चिथी ङ़ादाङाव ङापरींवस ऩेब्‍लो ताकिनी। आव ऩेब्‍लो चिथील ज़ जेलाई सम्‍जैद छैंव जेयुँलाई झन ज़ सझेंःद ङायाचिज़्‍या। 2भाःकाव छैंव अगमबक्ताराए यापाँ स़ोनो गेलाई बाँचैज़्याव गेप्रभु येसु ख्रीसए ओराअर्थैव भरी ओसाचीराए यायाःनी जेथैव पाँ ब मामेंःद चेतैच्‍यो लिद ङासर्ज़्‍या।

3प़ाइँरानी ङ़ात आव सैंच्‍यो, ख्रीस फरी उहुन्‍या बेलाक मिँराए परमेस्‍वरए ओपाँलाई हसैद जो यायुँनी हुज़्‍या हो ज़ दाद ल़॰व ज़ लिन्‍या लेर। 4नोराए अइ लिन्‍या लेर, ‘खै, ख्रीस फरी हुरिज़्‍या लिन्‍या ओयाचिउ य़ाका काराव ओमायो·ज़्‍याव? गेसाखा पुर्खाराए पालाकिन आःपै परमेस्‍वरए आव संसार किताव उसिर्जैव, हिताव ज़ लिज़्‍या,’ है दान्‍या लेर। 5निताव यापाँए तोबो पाँ ते मेंःद नैर — परमेस्‍वरए ओल ओपाँनी आव नाम स़ोनो नम ओजैज़्‍याक ऱी भरिलाई ऩेभा जैद तभा नमत झाःक्‍यो, तभा नामल नैक्‍यो।#उत १:६-९ 6तछा नो ऱीर ओराथोम्‍क बनै घ्योःव भल हुद आव नामलाव लिज़्‍याव भरी यासफ्या·क्‍यो।#उत ७:११ 7फरी ओल ओपाँनी ज़ आज्‍यालकाव नाम नमलाई ब मेंःए खेम्‍न्‍याए जूँनी नैसिउ लिज़्‍या। हो छ्याम ज़ पापीरालाई ब सजा याद यासफ्या·रिज़्‍याव।

परमेस्‍वरए उरिस थामिउ ज़ नैज़्‍याव

8अ ङायुँलाव ङानैं ङामेंर, आव पाँ ब तामेंःच्‍यो, परमेस्‍वरनी ते तछा हजार बर्स स्‍यासो ब लिज़्‍या, हजार बर्स तछा स्‍यासो ब लिज़्‍या।#भज ९०:४ 9प्रभु फरी हुरिज़्‍या लिन्‍या ओयाचिउ य़ाका ख्‍वा ख्‍वाराए याबिचारनी धिलो ओरैंःदी ब ओल ते धिलो मादोव। ओल ते झन प़ाइँए जेय़ेन सहिद, ‘सु ज़ नर्गल माबाद ङाल्‍योदा याहुकिन ताखेहो’ लिद कींद नैचिउ। 10खाली प्रभु हुन्‍या छ्याम कुना हुज़्याव मिँ स्‍यासो सुए ज़ यामासैंद उमँःजानी हुरिज़्‍या। हो बेलाक नम बनै स़्यो स़्यो क़िद खेम्‍द, नताव लिज़्‍याव सोरोर स़्यावैर यानी ज़ चाँःद चुयाप तान्‍या लेर। आव नाम स़ोनो नलाव लिज़्‍याव भरी ब चक चक खेम्‍न्‍या ले। 11-12आव संसार नितावनी ओखेम्‍रिज़्‍यावए जे प्रभु उहुरिज़्‍याव छ्यामकावए जूँनी खर्क हुके लिद कींद जेनैक परमेस्‍वरए ओसतत लिद बनै छैंवस लिच्‍यो। हो बेलाक नम बनै चाँःद चुयाप तान्‍या ले। नताव लिज़्‍याव सोरोर स़्यावैर ब प़ाइँ ज़ य़ेप य़ेप ऱावए बिलैन्‍या लेर। 13हैदी ब गे ओयासिउ य़ाकानी सत वाज़ लिन्या साःरो नाम नम ओजैरिज़्‍याव ओयेम चिऊद ज़ गेनै।#यसै ६५:१७; ६६:२२; दर्सन २१:१

ख्रीस फरी ओमाहुवा पै थ॰रिद लिन्‍या

14है जैद ङायुँलाव ङानैं ङामेंर, जे नो ओयेम चिऊन्‍यार जेतावए, ‘ओल उहुक गेलाई गे गेल खैवर, थ॰रिउर, गेखत माल्‍योर ओदैहुसिउक’ लिद धिद लिच्‍यो। 15आव ब सैंच्‍यो, परमेस्‍वरए गेलाई प़ाइँ सहिद्याद कींद ओनैसिज़्‍यावनी अजम्‍बरी जुनील बान्‍या मौका यासिज़्‍याव। गेयुँलाव मिताव गेदाज्‍यु पावलए मनी परमेस्‍वरनी ओदैव बुद्धीनी हिताव ज़ सर्द नैद्याचिउ। 16इताव ङापाँर पावलए छुत छुत ओचिथील ब कुधु ज़ सर्द यानैव। ख्वा ख्वा ओसरोर जाँ धो बुझिउ ताद यार्ती माल्‍यो माथ॰रिउराए तँदा ज़ लाँज़्‍यार। धर्मसास्‍त्रलाव पाँर ब नदा ज़ जोरैनाज़्‍यार। नितावराए यानोक्‍सान याज़ जैज़्‍यार।

17है जैद ङायुँलाव ङानैं ङामेंर, जे इताव पाँरानी ङ़ादा ज़ सैंद जेतहस लिच्‍यो, म़ानी माचाव मिँराए गल्‍ती यापाँल अलमलिद, थ॰रिद जेलिज़्‍यावलाई सम़ैन्‍या जेले। 18बुरू गेलाई बाँचैज़्याव गेप्रभु येसु ख्रीसए ओदयाल थ॰रिद ओललाई झन ज़ सरेस्‍नाच्‍यो। ओललाई आख ब, छींङ पै ब बनै ज़गै मगैव ज़ ओताक। आमेन।

Currently Selected:

२ पत्रुस 3: NKham

Highlight

Copy

Compare