२ कोरिन्थी 5
5
स्वर्गताव साःरो गेक्याँ
1आव मानुवाताव गेसिप पाल उचिस्ज़्याव मिताव चिस्द ओखेम्दी ब कुइए माताद परमेस्वरनी जैसिउ खर्क ज़ माचिस्न्या गेझ़िम स्वर्गत लिज़्या लिद गेयुँ हुबो ज़ लिज़्या। 2आव मानुवाताव गेसिपल गेलेवा भरी स्वर्गताव साःरो क्याँ दैन्याए जूँनी गेयुँ थू जैद गेनैज़्यावए गे गहनिउ ज़ गेलिज़्या। 3नो साःरो क्याँ गेदैवत ओक्याँ माल्यो पुरूस स्यासो तान्या गेमाले। 4आव मानुवाताव दुखरानी गेगहनिज़्याव नो ओपोर्याप क्याँलाई ख्याव गेपैंज़्याव ते माःक, स्वर्गताव साःरो क्याँ तान्याए जूँनी ची। है जैद आव सिन्यादा बाज़्याव गेक्याँलाई खर्क ज़ मासिन्याए ओसम़ैवक है गेलिज़्या। 5इताव दैन्या ओल परमेस्वरए ज़ जैद नैद्यासिउ। नोए उजूँनी ङ़ादा ज़ बैना मिताव छैंव उपुरूस ब याद नैसिउ।
6है जैद गेर्सार परीद गेयुँर झेंःव ज़ लिज़्या। आव मानुवाताव गेक्याँस प्रभुस सिप गेमातादी ब, 7गेमीए गेमारँःवलाई गेयुँ उहुबोनी ज़ गेदोज़्यावए, 8आव मानुवाताव क्याँस लिज़्याव देखा बुरू प्रभुस सिप लिन्या पाथ लिज़्या लिद गेयुँर सझेंःद गेदोज़्या। 9है जैद गेयुँ इताव ब लिज़्या, आव मानुवाल गेलिदी ब, आनी पुलुस्द गेबादी ब, प्रभुए उयुँलाव मिताव कातानी तान्या लिद उदिम गेदोज़्या। 10काराव ल्यो ताकिन गे भरी प़ाइँ तछा ख्रीसए ओङ़ाक च्याँःसिद फाल्सिउ परिरिज़्या। हो छ्याम आव गेजिउताव गेदोव, चाव तादी ब, माचाव तादी ब, सु सु गेदोव गेय़ेननी ज़ गेजेला गेदैरिज़्या।
मिँरालाई परमेस्वरस सखैन्या
11है जैद गे परमेस्वरनिकाव हुज़्याव छ्यासर गेसैंज़्यावए नल तापरिरक लिद मिँरालाई सम्जैद गेरासथैज़्या। नो गेदोज़्याव भरी जेजूँनी ज़ लिज़्या लिन्या ओल परमेस्वरए ज़ सैंज़्याव। जे मनी जेसैंधुकिन ताखेहो है ङालिज़्या। 12आव भरी जेङ़ाक चाव सतैंसिन्याए जूँनी माःक, जेलाई गेगुनर चेतैन्या मौका ङायाचिज़्याव ची। है जैद गे जेजूँनी गेदोज़्याव य़ेननी जे नो युँनी माताद पाखाताव चलननी यानी स॰द सघ्योःसिज़्यावरालाई थाम थुम जेराजैधुरिज़्या। 13नो गेपाँत गेलाई दासा बिसाव मिताव जेथ·रैसिदी ब परमेस्वरए ओमान नैद्यान्याए जूँनी ज़ गेदोज़्या। फरी गेगहक ल्यो मितावर जेथ·रैसिदी ब नो जेजूँनी ज़ गेदोज़्या। 14ख्रीसए मया ओदासिज़्यावए गेलाई मनी ओल ओदोव मिताव य़ेनत घलैसिज़्याव। काराव ल्यो ताकिन तोबोए प़ाइँए जूँनी उजिउ झाःद ओयासिउए प़ाइँ ज़ सिकेर। 15फरी प़ाइँए जूँनी उजिउ झाःद ओयासिउए गेलाई वाज़ तान्या भरी ऱास्द गेजूँनी उजिउ झाःद सिउनी सैंसिज़्याव ख्रीसए उजूँनी बाँचिउ परिए।
16है जैद गे पाखाताव रैंःन्यानी सुलाई ज़ गेमाराछुतैए। ख्रीसलाई ङ़ादा पाखाताव गेबिचारनी गेरँःक ज़िम्ज़ा ज़ गेथ·रैज़्याव, अबकिन ते छुतनी ज़ गेसरेस्ज़्या। 17है जैद ख्रीसए ओक्याँत ख्यासिद लिज़्याव मिँ चबनै साःरो ताज़्या। नोए ङ़ादाङाव उबिचार भरी ओचलन भरी म़ाद, होए ओपोल उयुँल साःरो साःरो बिचारर हुज़्या। 18आव भरी परमेस्वरनी हुव ज़। ओल ज़ ख्रीसनी गेलाई ओलस सखैसिक्यो। गेलाई ओयासिउ य़ेन मनी छुतरालाई परमेस्वरस सखैन्या ज़। 19है जैद गे मिँरालाई गेरासथैज़्याव पाँ आव ज़ — परमेस्वर ख्रीसनी हुद आव मानुवाताव मिँरालाई यापापर चिऊद मायाद ओलस यासखैहुक्यो। नो पाँ सथैन्या फरी ओल परमेस्वरए ज़ गेलाई जैद नैसिउ।
20है जैद गे मिँरालाई परमेस्वरए ल्योदा खुल्न्यात ख्रीसए ओकत्वाल्या मितावर गेलिज़्या। जेलाई ख्रीसए ल्योनी गेबिन्ती लिज़्या — जे परमेस्वरस खैहुचिके। 21होए गेलाई ख्रीसनी, ओङ़ाक उयुँलाव मिताव गेखत माल्योर जैन्याए जूँनी गेदोव पाप भरी कान्त ज़ ओखत माल्यो ख्रीसलाई सुघुर्द्यासिक्यो।
Currently Selected:
२ कोरिन्थी 5: NKham
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
