१ तिमोथी 1
1
1ङा पावल गेलाई बाँचैज़्याव परमेस्वर स़ोनो आस दाद गेनैज़्याव येसु ख्रीसनी है निदाँवनी ज़ येसु ख्रीसए ओसाची खतैसिउ ङालिज़्या। 2आव ङासरो चिथी नँ तिमोथीलाई परींद ङाईंज़्या। परमेस्वरए ओपाँत गिन साचो ज़ा बाबु मिताव गिन्लिज़्या। नल्योदा गेबाबु परमेस्वर स़ोनो गेप्रभु येसु ख्रीसनी नियुँ ओय़ाल्क, नियुँ ओगराँक, नँ नयुँ ब होलाँ जैद उईंनिक।
परमेस्वरए ओपाँ धुतनी पैज़्यावर
3माकेदोनियादा ङाबाऱिज़्याकाव है ङादींज़्याव मिताव नँ एफिससल ज़ लिद परमेस्वरए ओपाँ धुतनी पैज़्यावरालाई, ‘निताव माःक’ है दाद वैंव ताके। 4नोराए ओअर्थ माल्यो घर्ती बिन्तीर झाःद अऩाकल ज़ खरङाव मरङावराए मिनर यारापैज़्यार। ननी माथ॰रिउ ओर्घांताव पाँर वाज़ पुलुस्ज़्या। परमेस्वरए उयुँलाव मिताव ते युँ हुप्न्यानी वाज़ ताज़्या। 5ङा है ल्यो ङापैंज़्याव ते, या याल साचो युँस ओखैरक, स़ोनो परमेस्वरए ओपाँत यायुँ हुप्द छैंव युँस ज़ उलिरक। 6खाली ख्वा मिँर ते आव चाव पाँलाई माथ·रैधुद अऩाकलाव पाँ जील ज़ ङोइद लेर। 7नोराए, ‘परमेस्वरए ओकानुनलाव यागुर्बार गे ज़,’ है लिज़्यार। खाली ‘आव ज़’ है यारादोदी ब यापाँव पाँ याज़ माबुझिधुर।
8गे ज़ गेसैंज़्या, चावस चलैकिन परमेस्वरए ओकानुन चाव ज़ लिज़्या। 9परमेस्वरए ओकानुन परमेस्वरस खैव मिँए जूँनी माःक। नो कानुन ते कानुन तैःज़्यावर स़ोनो माभैंःज़्यावर, परमेस्वरए ओपाँलाई सोज़्याव पापीर, चाव पाँत ल़॰द परमेस्वर माले है लिज़्यावर, याबाबु याआमार सैःज़्यावर, मिँ सैःज़्यावर, 10पातर्या पातर्नी जैसिज़्यावर, खेपा-खेपाल पातर्या जैसिज़्यावर, मिँर यो·ज़्यावर, धुत पाँज़्यावर, धुत गोहाई याज़्यावर स़ोनो परमेस्वरए साचो थ॰रिउ ओपाँकिन तँदा बाज़्यावराए जूँनी जैसिउ लिज़्या। 11नो थ॰रिउ पाँ उयुँ य़ाल्ज़्याव माहान परमेस्वरए ङालाई सथैव उपरींनाव चाव था मिताव ज़ लिज़्या।
पावलए ल्योदा परमेस्वरए उयुँ ओगराँव
12ङालाई सघैज़्याव गेप्रभु येसु ख्रीसलाई बनै धन्याबाद लिज़्या। ओल ज़ ङालाई उयुँ हुबो थ·रैद ओय़ेनत खतैनाक्यो। 13ङा ङ़ादाकिन उमिन बले·द्याद उमिनत बाज़्यावराए याखिरी पसिद बनै हाप हाप ङाख्याज़्याव। खाली आव भरी ओललाई मासरेस्द मासैंद ङादोवए उयुँ नाद ङालाई ऱास्नाक्यो। 14ङाल्योदा उयुँ य़ाल्द ङाक्याँताव ओयाँव असिक झन धोल पोगोल ताके। हिताव ज़ येसु ख्रीसनी ङादैव युँ हुप्न्या स़ोनो ओमया ओल ज़ ङालाई याँक्यो। 15आव पाँ बनै थ॰रिउ युँ हुप्न्याकाव पाँ ज़ लिज़्या — येसु ख्रीसए आव मानुवाताव पापीरालाई बाँचैन्याए जूँनी हुके। नो भरिरानी प़ाइँरानी पापी ङा ज़। 16हितावत ब येसु ख्रीसए पापीरालाई कुधु ओरासहिज़्याव प़ाइँलाई सतैंद्यान्याए जूँनी ङा पापीराकिन ब पापीलाई परमेस्वरए उयुँ गराँके। हिताव ज़ छींनीकाव ओललाई यायुँ हुप्ज़्यावराए अजम्बरी जुनी दैन्याए जूँनी ङा ङाक्याँताव ओदोव दया याङ़ाक सतैंसिउ मिताव लिज़्या। 17है जैद छींङ पै रहिज़्याव सुए ज़ यामारँःधुज़्याव खर्क ज़ मासिज़्याव गेराजा, तोबोका तोबो परमेस्वरलाई ओमान ब ओताक, ज़गैवलाव उमिन ब छींङ पै उरहिक। आमेन।
तिमोथीलाई पावलए ओयो हुकुम
18परमेस्वरनिकाव ङाज़ा तिमोथी, ङ़ादा नजूँनी परमेस्वरए उपुरूसनी यापाँव पाँलाई य़ाका दाद परमेस्वरए ओय़ेनत नँ सिपाईं मिताव जैसिद नो पाँदा ध्यावना दाव ताके। 19ख्रीसताव नयुँ नसुहुबोलाई जात्त ज़ माऱास्द छैंव युँस दाव ज़ नैयो। ख्वाराए ते छैंव युँस दान्या यामाभैंःवए यायुँ यासुहुबोलाई ब झन ज़ नोक्सान जैकेर। 20हुमेनियस स़ोनो अलेक्जेन्दरनी ब निताव ज़ ताकिनी। है जैद ख्रीसए उमिन बले·न्या ओमाताज़्याव ओल्यो लिन्या घदार्सिनिक लिद नोनिलाई सैतानए उकुइत ज़ झाःद ङानिनै।
Currently Selected:
१ तिमोथी 1: NKham
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
