१ थेसलोनिकी 5
5
1गेनैं गेमेंर, आव भरी आव बेलाक आव छ्याम तारिज़्या लिन्या जेलाई सर्द्याव मापरिए। 2जे ज़ चावस जेसैंज़्या, गेप्रभु हुन्या छ्याम रील कुना हुज़्याव मिँ स्यासो ज़ हुरिज़्या। 3मिँराए, ‘गेलाई काता ओछ्यास ब माले, थाँतस ज़ गेलिज़्या’ है यालिज़्यावत ज़ किताव ज़ा दैन्या मेंमाए ज़ा दैन्या ओबेथा उमँःजानी हुज़्या, हिताव ज़ नोराए याक्याँत मनी परमेस्वरए ल्योनी नास हुरिज़्या। सु ज़ उस्किउ दैन्या मालेर। 4खाली जे, गेनैं गेमेंर, चुम चुमोल लिज़्याव स्यासोर ते जेमाले। जेलाई ते ख्रीस फरी उहुन्या छ्याम नो कुना हुज़्याव मिँ उहुज़्याव स्यासो तान्या माले। 5जे ते लाकाव पलाँए ओज़ार ची, रीलाव चुम चुमोए ओज़ार माःक। 6गे उपुर्कावराए माँःती ङ़ल्द लिन्या माःक, गे ते सैंसिद झाःसिद ल्यो ताके। 7माझाःसिद ङ़ल्द लिन्या स़ोनो मँःद काता ज़ मासैंव तान्या ते चुम चुमोलाव रीलाव य़ेन ची। 8है जैद पलाँवल य़ेन दाज़्यावर गेतावए गे मामँःव मितावर ताव परिके। किताव लरैंदा बाज़्याव मिँ ओछाती जोगोइन्याए जूँनी झँए पाता ओजासिज़्याव हिताव ज़ जे ब परमेस्वरलाई मया दाद ओललाई वाज़ जेयुँ सुहुबो ताके। फरी नो मिँए ओङ़ैत झँए तुपी ओजासिज़्याव मिताव जे ब ‘अजम्बरी जुनी यान्या ज़ ले’ लिद आस दोव ताके।#यसै ५९:१७ 9परमेस्वरए गेलाई उरिस चोवर ओजैसिउ माःक, गेलाई ते उजिउ झाःद्याज़्याव गेप्रभु येसु ख्रीसनी बाँचिन्यार ओजैसिउ ची। 10गेजूँनी उसिउए ओल ओमाहुवा पै गेसिदी ब, गेलिदी ब, गे प़ाइँ तछा ओलस ज़ सिप तान्या गेले। 11है जैद आव पाँरानी जे जेल जेयुँर होलाँ जैद जेयुँर सझेंःसिच्यो। नो आःपै ते दोव ज़ जेनैज़्या।
प्रभुए ओपाँ पैज़्यावरालाई यामान नैद्यान्या
12अ गेनैं गेमेंर, जेस गेबिन्ती तोबो लिज़्या, जेजूँनी ध्यावना दाद प्रभुए ओपाँ पैज़्याव जेलोम्बारालाई यामान नैद याराएच्यो। 13नोरालाई, ‘गेजूँनी आः चाव य़ेन दोज़्यार’ लिद यागुन मामेंःद प़ाइँल यामान नैद याराएच्यो। जे जे ब खैद लिच्यो।
य़ाका दान्या पाँर
14अ गेनैं गेमेंर, आव ब य़ाका दोच्यो, है दासिउ मातीद मामुइलिउरालाई यारासिङार्च्यो, छेपोवारालाई यायुँ सघ्योःद याराएच्यो, माथ॰रिउरालाई पाथ यारापारैच्यो, प़ाइँलाई सहिद यारासुम्च्यो। 15जे जेल सुए ज़ खिस ताफेरैसिच्यो, बुरू जे जेल स़ोनो छुतलाई मनी तान्या खिम्च्यो। 16एकतार रेंद ज़ लिच्यो। 17पोंखारिउ ज़ नैच्यो। 18प़ाइँत ज़ धन्याबाद चरैःच्यो। जे येसु ख्रीसस लिज़्यावराए निताव दान्या परमेस्वरए उयुँलाव मिताव ज़ ताज़्या। 19छैंव पुरूसलाई तावैंच्यो। 20छैंव पुरूसनी पाँज़्यावए ओपाँ ब तासोच्यो। 21बुरू पाँ भरी बनै चावस थ·रैद चाव भरी जेयुँल नैच्यो। 22बले·ज़्याव भरिरानी अछतङ लिच्यो।
परमेस्वरए ओअसिक
23अब प़ाइँलाई सखैज़्याव परमेस्वरए ओल ज़ जेलाई जेखत माल्यो छैंवर ओजैचिउक। स़ोनो गेप्रभु येसु ख्रीस फरी उहुन्या छ्याम पै जेलाई जेपुरूस, जेयुँ, जेक्याँ ओपो·स ज़ ओखत माल्यो नैद ओयाचिउक। 24जेलाई खुल्ज़्याव परमेस्वर युँ हुबो ज़ लिज़्या, जुनी ब सयो·द्याचिरिज़्याव।
तुपैन्या पाँर
25अ गेनैं गेमेंर, गेजूँनी ब पोंखारिद्यासिच्यो। 26नलाव लिज़्याव दाज्यु भाइरालाई मयास#5:26 रोम १६:१६ चिऊन्या। जेरो है यारादोच्यो। 27जेलाई प्रभुए उमिननी ङाअर्थैचिज़्या, आव चिथी परमेस्वरए उमिनत लिज़्याव प़ाइँलाई चावस यारासथैच्यो।
28गेप्रभु येसु ख्रीसए उयुँ जेल्योदा ओगराँक।
Currently Selected:
१ थेसलोनिकी 5: NKham
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
