१ थेसलोनिकी 2
2
थेसलोनिकेल पावलए ओय़ेन
1गेनैं गेमेंर, गे जेल्योक गेहुव अऩाकलाव माताके लिन्या जे ज़ जेसैंज़्या। 2गे ङ़ादा फिलिप्पील दुखर दैद बीज्यात ब गेताके। आव ब जेसैंज़्या। जेल्योक गेहुवत फरी ब गेखिरी यापसिज़्यावत ब परमेस्वरए ल्योनी घ्योःव युँ दैद माछे·द ज़ चाव था गेसथैचिके।#ओसा १६:१९-२४; १७:१-९
3गे गेसथैचिउ भरी गेलाई तान्यानी ब माःक, बिप्या युँनी ब माःक, कप्तैंनी ब माःक। 4बुरू परमेस्वरए गेलाई छाँतिद चाव था सथैन्या गेपासल झाःद ओयासिउनी ज़ गेसथैचिज़्या। नो, अइज़ मिँरालाई खुसी जैन्याए जूँनी माःक, गेयुँलाव पाँ सैंज़्याव परमेस्वरलाई खुसी जैन्याए जूँनी गेसथैचिज़्या। 5जे ज़ जेसैंज़्या, गे जेल्योङ ‘गेलाई कातार यासिर सैं’ लिद खर्क ज़ जेस रग रग जैद गेमापाँए। परमेस्वर साची लिज़्या। 6फरी जे जेल्योनी तादी ब छुतराए ल्योनी तादी ब घेप्पा मिन ब गेमाखिमे। 7गे ख्रीसए ओखतैसिउ ओसाचीर गेलिदी ब गेमान ब गेमाहाइए। बुरू नुइँ सवैज़्याव आमाए ओज़ालाई पाथस ओनैज़्याव मिताव गे ब जेल्योङ मुइलिउर ताद गेलिके।
8जे गेयुँलाव मितावर जेतावए जेलाई बनै मया दाद परमेस्वरए चाव ओथा यान्या वाज़ माःक, गेजिउ यान्या ब खुसी ज़ गेताके। 9गेनैं गेमेंर, गेय़ेनर जे ब जेचेतैज़्याखेहो। गे जेल्योङ गेलिक सुलाई ज़ घच ताताक लिद गे ज़ लाकनी रील दुखस य़ेन दाद परमेस्वरए चाव ओथा ब गेसथैचिके। 10जे ओपाँत बाज़्यावराए जेल्योदा गे कैफत मादाद बनै सोजो छैंव युँस ज़ गेदोके। नोए ओसाची परमेस्वर स़ोनो जे ज़ जेलिज़्या। 11याबाबुए ओज़ारालाई है ओरादोज़्याव मिताव गे ब जेलाई तोबो तोबोनी जेर्सार हाइद्याद, 12जेलाई ओल ओराज्यालाव ज़गै मगैवल खुल्ज़्याव परमेस्वरए उमिनत ताव परिन्या मितावर घतारक लिद घलैद काचाबुल दाव गेपरींचिके।
गेपाँ परमेस्वरए ओपाँ ज़ जेथ·रैके
13गेल्योनी परमेस्वरए ओपाँ जेथैक, ‘आव ते मिँराए यासिर्जैव पाँ ते माःक, परमेस्वरए ओपाँ ज़ ची’ लिद जेथ·रैवए गे जेजूँनी परमेस्वरलाई धन्याबाद चरैःव ज़ गेनैज़्या। नो पाँए जेयुँ हुप्ज़्यावराए जेयुँल ओय़ेन ब दाव ज़ नैज़्याव। 14नो पाँ जेथ·रैवए, जे गेनैं गेमेंर, येसु ख्रीसलाई यायुँ हुबो यहूदिया खन्दल लिज़्याव परमेस्वरए ओमन्दली स्यासोर जे ब जेताके। नोराए यहूदीराए ल्योनी कुधु दुखर सहिकेर। हिताव ज़ जे मनी जेदेसलावराए ल्योनी कुधु दुखर जेसहिके। 15नो यहूदीराए ज़ गेप्रभु येसु ख्रीसलाई ब सैःकेर, ङ़ादा अगमबक्ता भरिलाई ब यारासैःकेर। गेलाई ब यादेसनी खेपैसिकेर। है जैद नोर सुरास ज़ माखैद परमेस्वरकिन ब तँदा ज़ लिज़्यार। 16गे छुत जातलावरालाई परमेस्वरए ल्योदा घुहुरक लिद परमेस्वरए ओपाँ गेरासथैक मनी वैंसिज़्यार। इतावनी ज़ पापए तर्त पाप दाद यापापए गोइँ सयो·नाज़्यार। है जैद नोराए याक्याँत परमेस्वरए उरिस परिद ले।
पावलए उयुँ थेसलोनिकीरास दैसिन्या
17गेनैं गेमेंर, गे जाँवा पै जेल्योदा हुव गेमादैके। हैदी ब गेमामेंःचिए, गेयुँ ते जेस ज़ लिज़्या। जेस फरी ब दैसिद गेङाः गेङाः जोरैन्या बनै युँ गेदोज़्या। 18खाली ङ़ादा जेल्योदा हुव गेपैंज़्याक सैतानए वैंसिक्यो। ङा पावल झन जेल्योदा कुधु पाला ज़ हुव ङापैंके। 19गेप्रभु येसु फरी उहुक ओङ़ाक गेआस, गेयुँ होलाँ जैद्यान्या, गेसिङार नैद्यान्या ब जेकिन सुर ची यातारिज़्याव? 20हो बेलाक गेइज्यात नैद्याद गेलाई सरेंन्यार ब जे ज़।
Currently Selected:
१ थेसलोनिकी 2: NKham
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
