१ पत्रुस 3
3
ज्या-रीलाव पाँर
1जे रे दाव मेंमार, जेरेराए यापाँ धूँल लिच्यो। हो ताकिन ची परमेस्वरए ओपाँ माभैंःज़्याव जेरेर जे है जेमारादोदी ब चाव य़ेन जेदोज़्यावए परमेस्वरए ल्योदा हुन्या लेर। 2छैंव जेय़ेन स़ोनो परमेस्वरए ओमान नैद जेएज़्याव रँःद यायुँ परमेस्वरए ल्योदा जैव ब धुर। 3जेक्याँ जेबनैसिक जेचेम परीद, सुन चाँदी जासिद, चाव चाव क्वा क्वाइसिद, पाखाताव सतैंन्या वाज़ ताताक। 4हो देखा बुरू जेयुँल बनैसिचिके। युँलाव खर्क ज़ मालिसिन्या सोभा आव ज़ — थकानस, तहस लिन्या। नोलाई ज़ परमेस्वरए चाव रँःज़्याव। 5परमेस्वरए ओक्याँत ख्यासिउ भाःङाव छैंव मेंमाराए ब हिताव य़ेन ज़ दोकेर। यारेराए यापाँ धूँल लिद यायुँल बनैसिकेर। 6साराए मनी ओरे अब्राहामलाई ‘प्रभु’ लिद ओपाँ भरी भैंःके। जे ब माछे·द साचो छैंव य़ेन जेदोकिन साराए ओज़ार ज़ तान्या जेले।#उत १८:१२
7जे ज्या दाव खेपाराए मनी, ‘ङाज्याए ओर्सा ङार्सा स्यासो माले’ लिद अखत्यासो माजैसिद लिच्यो। स़ोनो, ‘आव साःरो जुनी सिप ज़ गिन्दैके’ लिद ज्याए ओमान ब नैदिच्यो। जिन जिन्माखैकिन जिन्पोंखारिज़्याव परमेस्वरए ल्योङ कातानी ओकेस्रिज़्याव?
8है ङादाचिउ भरिए ओअर्थ आव ज़ — जे जेल खैद तोबो फूलाव मिताव जैसिद हुनी होदा सम्जैसिच्यो। मासघ्योःसिद नैं मेंए ल्योदा जेयुँ ब ओगराँक। 9माचावलाई माचाव फर्कैद ताएच्यो। याथल्चिदी ब जे ताराथल्च्यो। बुरू असिक याराएच्यो। काराव ल्यो ताकिन आवए जूँनी ज़ खुल्सिउर जेलिज़्या। निताव जेदोकिन जे परमेस्वरए ल्योनिकाव असिक दैन्या जेले। 10धर्मसास्त्रल ब इताव सर्सिउ लिज़्या,
“जोए फाबिन्या चाव जुनी पैंज़्याव,
होए ओसेलाई माचाव पाँनी जोगोइद,
ओयाःनी धुत पाँ तापले·वक।
11बुरू माचावनी ओल्द चावदा बाद, प़ाइँस खैन्या उखिमोक।
12काराव ल्यो ताकिन प्रभुए उमी धर्मी मिँराए याक्याँत वाज़ लिज़्या।
ओर्ना ब यापोंखारिज़्यावदा घ्याँ जैद याएज़्याव।
माचाव य़ेन दोज़्यावरालाई ते क़ुरनी याचिऊज़्याव।”#भज ३४:१२-१६
चाव य़ेनत दुख सहिन्या
13चाव य़ेनत कलँ जेलिकिन सुए ज़ मावैंचिर। 14खाली कैताराक चाव जेय़ेनत दुख जेदैकिन धन्याकावर जेताज़्या। जेखिरी पसिज़्यावर रँःद ताछे·च्यो, हार तामानिच्यो। 15बुरू ख्रीसलाई जेयुँलाव जेर्गे जैच्यो। सुवाराए नो आस दाद जेनैज़्यावए जूँनी यासुधिचिकिन नोरालाई मास॰द चावस पलास्द्यान्यात झाःसिद लिच्यो।#यसै ८:१२-१३ 16जो य़ेन जेदोदी ब छैंव युँस दोच्यो। हो ताकिन ची जेमिन बले·द यायाचिदी ब, ख्रीसनिकाव चाव जेय़ेनए लाज मोर्नो ताद थाम थुम तान्या लेर। 17परमेस्वरए जेजुँ दुख दैन्या जैद ओयाचिकिन माचाव य़ेनत दुख दैज़्याव देखा चाव य़ेनत दैन्या चाव लिज़्या। 18काराव ल्यो ताकिन ओल ख्रीसए ब जेलाई परमेस्वरस सखैन्याए जूँनी जे अधर्मीराए जेपोल ओल धर्मी मिँ थाँसिद जेपाप भरी तखेप्त ज़ ख्याद्याचिक्यो। उजिउ झाःद ब पुरूसनी सोके। 19नो पुरूसनी ज़ नर्गल लिज़्यावरालाई मनी ओपाँ यासथैनाक्यो। 20नो नर्गल लिज़्यावर भाःङाव नोआए ओपालाकिनकाव परमेस्वरए ओपाँ माभैंःज़्यावर ज़। नोआए नो ऱी जहाज जैन्या ओमाखेमा पै ‘कसा यायुँ माफर्कैर’ लिद परमेस्वरए कींद ओरानैज़्याव। खाली नो ऱीनी जम्मा आथ जना वाज़ बाँचिकेर।#उत ६:१–७:२४ 21नो ऱीनी बाँचिन्याए ओअर्थ ऱील सछैंसिन्या मिताव ज़ लिज़्या। नल मनी ऱीनी जेबाँचिज़्या। खाली हुर्सिद पाखाताव जेक्याँताव रीः जेख्यावनी ते माःक, परमेस्वरए ओङ़ाक जेयुँलाई सछैंद परमेस्वरस य़ाका जेनैज़्याव ची। येसु ख्रीस सिउनी ओसैंसिउनी जे ब जेबाँचिज़्या। 22ओल स्वर्गत बाद परमेस्वरए ओवोर्दा च़ुसिद ले। नल स्वर्गताव चाकर्यार, याहक ल्योर, यासक्ती ल्योर प़ाइँ उधूँल ज़ लिज़्यार।
Currently Selected:
१ पत्रुस 3: NKham
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
