१ कोरिन्थी 9
9
पावल बाँदा मिताव ओजैसिउ
1काता ङा फुर्सुल ताव माःक रो? काता ङा परमेस्वरए ओसाची खतैसिउ माःक रो? काता ङा गेप्रभु येसुलाई रँःव मिँ माःक रो? काता जेलाई गेप्रभुए ओपाँत सिर्जैज़्याव ङा माःक रो? 2छुतराए ल्योनी परमेस्वरए ओखतैनाव ओसाची ङामारैंःदी ब जेनी ते ङालिज़्या ज़। परमेस्वरए ओपाँनी जेक्याँताव ङादोव भरी ओसरेस ज़ रैंःज़्या।
3ङा ङाउपर्त पाँज़्यावराए जूँनी ङाजवाप आव ज़, 4ङा ङाय़ेनए जूँनी ज़्यान्या ओन्यार दैन्या ओमाताज़्याव रो? 5पत्रुस, गेप्रभुए ओभाइर स़ोनो उपुर्काव ओसाचीराए यायुँ हुबो याज्यार यास यास यारालाँज़्याव मिताव ङा ब ङामादैए रो? 6गिन बारनाबासस वाज़ पो पोङ परमेस्वरए ओपाँर गिन्रासथैक गिन ज़ छुत य़ेनर दाद ङासिन्या रो? 7सिपाईंए ब राजाए ओय़ेन ओदोक ओल ओज़्याव ज़्याद मादोव सानी। एँःलाव य़ेन दोज़्याव मिँए ब नलाव ओसै दैज़्याव सानी। बेधा गावलाए ब बेधाराए याहारनु ज़्याव दैज़्याव सानी।
8आव ङापाँज़्याव भरी मिँए उबिचारनी वाज़ माःक, परमेस्वरए ओकानुनल ब लिज़्या। 9धर्मसास्त्रलाव मोसाए ओकानुनल ब इताव सर्सिउ लिज़्या,
“दाइ झाःज़्याव घेंलाई
ओयाःत महला झाःद्यान्या माताए।”#ब्य २५:४
आव पाँ परमेस्वरए घेंए उजूँनी वाज़ ओपाँव रो? 10नो पाँ गे मिँराए गेजूँनी ब सर्सिउ लिज़्या सानी। छुतए ओएँः कीज़्याव मिँए ब ‘याःथन ङादैया’ लिद कीज़्याव। छुतए ओबाला प़ोद्याज़्यावए ब याःथनए उजूँनी ज़ प़ोज़्याव। 11है जैद गे ब जेखार्ल परमेस्वरए ओपाँ वास्ज़्यावरालाई चाहिज़्यावर जेल्योनी ज़ दैव परिन्या सानी। 12गेकिन छींनी जेल्योङ परमेस्वरए ओपाँ सथैना हुवराए निताव दैन्या हक उलिकिन गे गेहक ब ल्यो परिन्या ज़।
हैदी ब निताव हक खर्क ज़ गेमाचलैए। बुरू ख्रीसए चाव ओथा कातानी ब तावैंसिक लिद प़ाइँ गेसहिज़्या। 13जे ब जेसैंज़्याखेहो, ध्यान झ़िमल परमेस्वरए ओसेवा दोज़्यावए मिँराए याचरैःव ज़्यावनी ओङासिज़्याव। पुजारीए ब मिँराए थानत याचरैःहुव मारनी उजुँ ओदैज़्याव।#ब्य १८:१ 14हिताव ज़ गेप्रभुए ब ओल ओपाँ सथैज़्यावरालाई ननी ज़ ङासिन्या जैद याएक्यो। 15हैदी मनी ङा ते आव हक भरी ङामाचलैए। ङा जेलाई, “काराव जेमायाँज़्याव” है ङालिज़्याव ते माःक। ङालाई परमेस्वरए ओय़ेनत सुवाराए तलब मिताव जैद कातार यायाँकिन ङासुनी कातानी उरहिरिज़्याव? हो देखा बुरू ङालाई सिन्या पाथ लिज़्या। 16परमेस्वरए नो य़ेनत ङालाई ओखतैनावए ओपाँ सथैन्या ङासुनी नैन्याए जूँनी ते माःक, ओपाँ मासथैद माताए। परमेस्वरए ओपाँ ङामारासथैकिन कातानी ङायुँ होलाँ ओतारिज़्याव? 17आव य़ेन ङानी ज़ ङारूजिउ ताकिन ते जेला रैदी ब ज़्यास्खेहो। खाली ङा ङाखुसीनी माताद परमेस्वरए ज़ आव य़ेनत ओखतैनावए ङा दाव ज़ परिज़्या। 18है जैद ङा ङाजेला ते ङा दैन्या ङाहक भरी ऱास्द सुए ल्योनी काता ज़ मारैद अइज़ परमेस्वरए ओपाँ सथैन्या लिज़्या।
19है जैद ङा प़ाइँ मिँराए ल्योनी फुर्सुल ताव ङालिदी ब, कुधु मिँरालाई ख्रीसए ल्योदा जैन्याए जूँनी प़ाइँराए याबाँदा मिताव जैसिद ङाले। 20यहूदीरालाई ख्रीसए ल्योदा जैन्याए जूँनी यहूदी ब ङाजैसिके। मोसाए ओकानुन धूँल लिज़्यावरालाई ख्रीसए ल्योदा जैन्याए जूँनी नो कानुन धूँल ङामालिदी ब कानुन धूँलाव ङाजैसिके। 21फरी मोसाए ओकानुन मासैंतावरालाई ख्रीसए ल्योदा जैन्याए जूँनी ङा परमेस्वरए ओकानुन स़ोनो ख्रीसए उधूँल ङालिदी ब कानुन माल्यो मिताव ब ङाजैसिके। 22चाव माचाव माछुतैधुज़्यावराए या किताव याबिचारिज़्याव ङा ब हितावनी ज़ ङारासम्जैके। है जैद ङा जुनी ब परमेस्वरए ल्योदा तोबो ऩेब्लो जैन्याए जूँनी प़ाइँ मिँराए जूँनी प़ाइँ ज़ ङाजैसिके। 23आव ङादोज़्याव भरी ख्रीसए चाव ओथाए उजूँनी ज़ ङादोज़्या। ननी ज़ परमेस्वरए ओपाँताव असिकर ङा ङाजुँ ब दैन्या ङाले।
बाजी दैन्यात कलँ लिन्या
24जे ज़ जेसैंज़्याखेहो, धोंःन्यात दाँजिसिज़्यावर बाजी दैन्या ते तोबो वाज़ ताज़्या। है जैद जे ब बाजी दैन्या मितावनी ज़ दाव ताके। 25फरी घेप्पा घेप्पा खेलल दाँजिसिज़्यावर ब झाःसिन्यात बनै कलँ लिज़्यार। नोराए खेम्न्या बाजी थाँसिउए जूँनी दोज़्यार, गे ते खर्क ज़ माखेम्न्या स्वर्गताव इनाम दैन्याए जूँनी गेदोज़्या। 26है जैद ङा माताकिद धोंःज़्याव स़ोनो बतासत मुत्का झाःज़्याव मिताव ङार्सा सैःद ङामादोए। 27बुरू ङा नो खेललाव झेंःस्याराए यादोज़्याव मिताव ङाक्याँलाई काबु जैद काचाबुल दाव ङापरींज़्या। है ङामाजैकिन ङा छुतरालाई परमेस्वरए ओपाँत रैज़्याव मिँ झन नोराकिन ङा ज़ काम मालागिउ तान्या ङाले।
Currently Selected:
१ कोरिन्थी 9: NKham
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
