१ कोरिन्थी 6
6
मुद्दा माझाःन्या
1जे जेल नैं मेंस माखैव पाँर ओताक कै जैद परमेस्वरए उमिनताव मिँरालाई फालो मापरींद एकसब्द्या अदालतङ जेबाज़्याव? 2काता जे परमेस्वरए उमिनतावराए तछा मानुवाताव मिँरालाई याराफाल्रिज़्यार लिन्या जेमासैंए रो? मानुवाताव पाँर तछा जेनी ओफाल्सिकिन कै जैद इताव जेखार्लाव तकेज़ा पाँर जेमाफ्या·धुज़्याव? 3हो बेलाक फरी परमेस्वरए ओचाकर्याराए याय़ेन ब गेफाल्रिज़्या। झन आव गेजिउताव पाँर कै जैद माफाल्न्या? 4इताव फाल्न्या पाँर जेखार्ल उहुक काराव मन्दलीए कान्ल ज़ ओमारागनिउरालाई फालो परींन्या? 5इताव पाँत जेलाज माहुज़्या? जे जेल जेपाँ फाल्धुन्याकावर तोबो ब जेमालिज़्याव रो? 6झन जे नैं मेंरालाई परमेस्वरलाई यायुँ माहुबोराए ल्योक लाँद मुद्दा ब जेझाःनाज़्या। 7खास दाद जे जेल मुद्दा जेझाःसिकिन हो ब लाज मोर्नो ज़ लिज़्या। बुरू निताव माखैन्या पाँर गाल्द कोरलैंर जेसहिकिन तान्या ओल्यो। 8जे ते झन जेनैं मेंराए क्याँत ज़ लाँप चोंप दाद अन्याय जेदोज़्या।
9अधर्मीर परमेस्वरए ओराज्याल माबाधुर लिन्या जेमासैंए रो? है जैद जे ताझुकिच्यो, नो अधर्मीर इतावर ज़ — पातर्या पातर्नीर, अङग्या पुजा दोज़्यावर, अर्काए ओज्या रैज़्यावर, खेपा-खेपास मेंमा-मेंमास पातर्या पातर्नी जैसिज़्यावर, 10कुज़्यावर, लुभीर, मँःए मँःए बाऱिज़्यावर, थल्ज़्यावर, धुतैद ज़्याज़्यावर, आव भरी परमेस्वरए ओराज्याल बाधुन्या मालेर। 11जे ब ख्वा ख्वार हिताव ज़ जेल्यो। आज्याल ते नो भरिनी परमेस्वरए छेद छैंवर जैद नैचिउ। झन गेप्रभु येसु ख्रीसए उमिननी स़ोनो परमेस्वरए उपुरूसनी जेखत माल्योर थ॰रिद जेले।
गेक्याँ कोभा य़ेनए उजूँनी माःक
12जे ख्वाराए है जेलिज़्याखेहो, “गेलाई कानुननी वैंसिउ य़ेन काता ज़ माले।” हैदी ब ङा फरी जेलाई है ङादाचिज़्या, प़ाइँ य़ेन क्याँए जूँनी माले। ङाकुइत प़ाइँ य़ेन उलिदी ब ङा कोभा य़ेनए ओबाँदा ङामाताए। 13जे ते झन है जेलिज़्या, “ज़्याव भरी फूए उजूँनी जैसिउ लिज़्या, फू ब ज़्यावए उजूँनी जैसिउ लिज़्या।” खाली ङा ते है ङालिज़्या, परमेस्वरए ऩेथोलाई ज़ खेम्न्या ले। गेक्याँ युँ माजामो य़ेनए जूँनी माःक, प्रभुए जूँनी ची। फरी गेलाई चाहिज़्याव भरी प्रभुए ओल ज़ जोरैद यासिज़्याव। 14परमेस्वरए गेप्रभुलाई किताव सिउनी ओसोचोइव, गेलाई ब नो ओसक्तीनी ज़ तछा अजम्बरी जुनील सोचोइसिरिज़्याव। 15जे जेक्याँ ख्रीसए उखँ कुइर ताद लेर लिन्या आःपै जेमासैंए रो? हिताव ताकिन ख्रीसए ओक्याँ काराव पातर्नी मेंमाए ल्योदा लाँन्या? निताव सुए ज़ तादोवक। 16जो पातर्नी मेंमास बाज़्या हो पातर्नीस तक्याँल ज़ गनिसिज़्यानी सानी। धर्मसास्त्रल ब नितावए उजूँनी अइ लिद सर्सिउ लिज़्या — “ज्या-री तावनी तक्याँ ज़ ताज़्यानी।”#उत २:२४ 17खाली जो मिँ परमेस्वरए ल्योदा जोरैसिज़्या, नो परमेस्वरस तपुरूस ताज़्या।
18पातर्या पातर्नी जैसिन्यानी अछतङ ल्यो ताके। उपुर्काव पाप भरी ते क्याँकिन पाखाङ ज़ ताज़्या। पातर्या पातर्नी जैसिज़्यावए ते ओल उउपर्त ज़ पाप दोज़्याव। 19आव गेक्याँ परमेस्वरए छैंव उपुरूसए उझ़िम लिन्या जेमासैंए रो? नो परमेस्वरए ल्योनी गेदैव छैंव पुरूसए गेक्याँत बास दाद नैव। है जैद आव गेक्याँ गे गेमीं माःक, 20गेलाई परमेस्वरए गेएः फो·द्याद उलँःसिउर ची। है जैद गे आव गेक्याँए परमेस्वरए उमिन सरैंःद्याव ताके।
Currently Selected:
१ कोरिन्थी 6: NKham
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
