Roma 4

Thoccokot lon nocïkït thAprein

1Oron theret Aprein oththan pothiki thonnon taththa? Ngintha akka kwinat nti ilon len? 2Amma ïcarïcat Aprein pokat pothikkiettat poporot nti ire ngung, kwonat lon cik ila kwipot ka thoura ngngin anaruk okonnoka tokït koKapik. 3Akka lokurrakot iatham itti, “Aprein poccokothe lon loKapik nocïkït ana lothikkiekathok poporot tokït koKapik.”#Thokuꞌre ncik 15.6; Roma 4.22

4Inenni amma pul oreko, aꞌrupu iakin ettat nti ire wakannoka nuthuk anaruk nti ire iakin thorekot. 5Anaruk pul ipakannoreko anaruk aponekket cïkït noKapik ikathikkie ul iokithak woporot, thoccokot lon nocïkït thopul pen thathikkiek poporot. 6OThauth peret menik cakuruk akka kwerethe thethïe thopul ipa Kapik othikkie poporot okonnoka nti ire ngung tulluk,

7“Loporot nakkwion

itha Kapik koccïkïnthet thukungkun then

ana lon len ilokithak loꞌrumakothe.

8Loporot nopul

ipa Kapik kakannongantene lon ilokithak lung kirrkkir.”#Mocumur 32.1–2

9Thethïeko thoul iokekkothe tulluki ana okonnoka thoul iakannokekkori? Onïn thokat cik anïn ere ina itti Aprein pokat pettathe thoporot nti ithoccokot lon nocïkït thung. 10Elli lokat cik acintha? Lokat cik akkwokekkothe ntiri? Lokat cik akkwarthuk okekkori? Lakannoka akkwarthuk okekkot anaruk akkwokekkothe ntit. 11Ana kwokekkathe othakka itti aloka lon ilakene itti kwokat poporot tokït koKapik, thoporot itha kwoccot nti ithoccokot lon loKapik nocïkït akkwarthuk okekkot. Elli lokat cik othakka itti akwoka oththan poul ioccokothe lon loKapik nomïkït akin thakannokekkot ana othakka itti athoporot oka thokkwion ithakannokekkot cakuruk. 12Ana ook oththan poul iokekkothe appik ana iakonnokekkot anaruk oththan poul iaik wammakot kathar kothoccokot lon nocïkït thongappa Aprein itha kwonat akkwarthuk okekkot.

Thonekket lon cik thinako nthoccokot lon nomïkït

13Aprein ana opeon thakannonekkettanthet lon cik itti okin thapakkot nocapu, othakka itti akka okin thokat akin ommakot lon lothonceꞌret lon cik anaruk nthoporot tokït koKapik ithanthan nthoccokot lon loKapik nocïkït. 14Akka amma okkwion ithikkoik llon lothonceꞌret lon cik thapakkot nocapu, thoccokot lon loKapik nomïkït thella lon cik ana thonekket lon cik thella lon cik cakuruk, 15akka thonceꞌret lon cik thana thua ka thoKapik. Anaruk na thonceꞌret lon cik thaik, ul wakannoccïkot lon cakuruk.

16Ittina, thonekket lon cik thao nothccokot lon loKapik nocïkït othakka itti aloka nthoporot thoKapik ana athettat nyukul nyAprein appik, akonnoka okkwion thothonceꞌret lon cik tulluk anaruk cakuruk ul ioccokothe lon loKapik nomïkït ilakin thoccot nAprein. Ook ongappa ponnon appik. 17Ana ammakka lokurrakot itti, “Mpothikkierung oththan poul woppot.”#Thokuꞌre ncik 17.5 Ook ongappa ponnon tokït koKapik ika kwoccokothe lon len nocïkït, Kapik ken ikethet ul thikkoik iillet ana ikakkot aꞌrupu iellat cik.

18Aprein poccokothe lon loKapik nocïkït ana manna kwellat lon cik, ana oꞌrïkot cik itti kwathakka oththan poul appik, ammakka liꞌrettathok itti, “Nyukul nyang nyathakka ittina”#Thokuꞌre ncik 15.5 19Thoccokot lon nocïkït loKapik thAprein thakannoropat cik antoka manna itti kwinat nan itti kwocokkat pꞌrin ponat luput arrial ukuluk pakannokwono, ana opari oCcara pokat pocoꞌrot cakuruk nti inyukul. 20Ana icci kwakannonakat mïkït meꞌra nothonekket lon cik ila Kapik konekkenthok cik, anaruk kwopoꞌrathe than ithoccokot lon loKapik nocïkït ana ethet Kapik thïrïk, 21ana kwinat nan kicce itti Kapik kakkot lon ila konekketheik itti kakkot. 22Ilen akka “Kapik kothikkiekanthok poporot tokït kung.” 23Lon itti, “Kwothikkiettat” lakannokurrakinok pellek, 24anaruk lokurrakinet ton cakuruk oron ithoccokothe lon loKapik nomïkït ikurokiet oIeccuo nti ithio, Ili Kapik wonnon. 25Kwonekittat akwothio nti ilon ilokithak lonnon ana kurokot akwothikkieron thoporot tokït koKapik.

Currently Selected:

Roma 4: Lumun

Highlight

Copy