MIPUM SIALNAK 5
5
Mi thiangtho Ngawlte
1 Topa in Moses lakah, 2“Israel miten amu lak a, phaaknat a thuakmi, a zahmawh pen thi le nai a tulmi le miluang a zen hangin a thiangtho ngawlmi hempoh cu a ngiahnak mun haw pen hawlvawk tukin thupia in hi. 3Amu lak a, ka umnak a ngiahnak haw mun cu a nintik tuk ngawlin, a thiangtho ngawlmi hempoh cu numei hihen, pano hihen, hawlvawk khawng hi haw hen” tin thupia hi. 4Topa i thupiaknak bangin Israel miten zui in mi thiangtho ngawlte cu a ngiahnak haw pen hawlvawk khawng haw hi.
Sualnak Hangin Lohlehnak
5 Topa in Moses lakah,#Thiam 6:1-7; 6a nuailam a daan cu Israel tei ca in pia hi. Pano hihen, numei hihen, midang humah sualnak bawlin Topa i lakah a sual tale, 7a sualnak cu phuang tuk a, bawl sualman cu kimno in, a loh i hum pen za ah sawm nih belh tuk hi. 8Mahnaven a liamsuahmi cu thi in, a kuanmi sangtu tuk unau suahpih le unau a nei ma tale thiampi i man tukin Topa i lakah pia tuk hi. Hi a piakmi cu sualhah biakpiaknak tukin tuucang a piakmi humah a belhmi hi tuk hi. 9Israel miten Topa i lakah a cuampengin biakpiaknak a bawlmi pawpoh cu a sangtu thiampi tatuk hi. 10Thiampi in, a lakah a piak haw mi laksawng cu co tuk hi.
A Zite Tuah Lungiknak Nei Pasalte
11 Topa in Moses lakah, 12-14a nuailam a daan cu Israel tei ca in pia hi. Pasal nei laih numei in pano dang tuah a sual tale mi thiangtho ngawlin suak hi. Mahnaven a sual cu phuang ngawlin sel leleng hi, a sual laih man ngah ngawlin, amutu hei um haw ma naven a pasalin muanmawhnak nei in, a zi humah lungiknak nei leleng hi. A zi in sualnak bawl ma naven a pasalin muangmawhlo hi. A zi a cin hangin muanmawh thawthong hi. 15I lam banglam ahi hei in, hi ti bangin thu a um ahi tale, a pasalin, a zi cu thiampi lakah hawhpih tuk hi. Biakpiaknak tukin a kulmi barli sangvut cu hai lang kengin, biakpiaknak bawl tuk hi. Mahnaven olif situi le namtui leih tukma hi. Itahim titale hihi cu lungiknak a neitu a pasalin thu man a theih nuam hangin a piakmi biakpiaknak hi.
16Thiampi in mah numei nu cu biaklandawh maiah tulpihin, Topa i mai ah dingtik tuk hi. 17thiampi in leibeel pa khat la in, a sungah tui thiang dawmlaih koih tuk hi; mahten Topa i umnak Puanbuk sung a, leivul cu la in, tui ah sawh tuk hi. 18Mahnung ten thiampi in numei nu i samtom cu duk tuk a, numei nu i khut sungah sangvut koih tuk hi. Amah thiampi in tamsiatnak a hengtiktu tui cu a beel tuah hunpih tuk hi. 19thiampi in numei nu cu, “Pano dang tuah na sual ma ahi tale tamsiatnak tui in, siatsuah ma hen. 20Mahnaven pasal nei leng thahin, pano dang tuah na sual ngangai uh tale, 21Topa in, na min cu na hinnam lak a, mite tamsiatnakin mang hen, Topa in, na hapum bumtik henna, na zahmawh comtik hen. 22Hi tui cu na hapum sungah umin, na hapum bumtikin, na zahmawh vang comtik khawng tahen,” tin siatcamnak bawltik tuk hi.
Numei nu in, “Lungkim ing,” tin don tuk hi. 23Mah siatcamnak cu thiampi in ngan henna, a ngatmi cu tamsiatmi sungah nim tuk hi. 24Tui cu numei nu i pum sungah natnak nasezet piangtik tukin a intik laihngawlin, 25thiampi in numei nu i khutsung a, ummi lungiknak biakpiaknak sangvut cu la in, Topa i lakah a dan toh nungten biaklandawh humah koih tuk hi. 26biakpiaknak a, manmi hi tih langtiknakin sangvut khut dimno cu la in, biaklandawh humah haal tuk hi. Nungdawlbelin tui cu numei nu intik tuk hi. 27Pano dang tuah a sual ngangai haw tale tui in, a von natik tuk a, a hapum khang pepelin, a zahmawh vang con pepel tuk hi. Amah cu a hinnam tei lakah tamsiatmi hi tuk hi. 28Mahnaven a sual ma ahi tale siatsuah tawk ngawlin cano vang nei thei tuk hi.
29-30Hi cu pano pa khatin, a zi cingin, pano dang tuah sual haw hi tin muanmawhnak a neih ten zui tukmi daan hi. Biaklandawh maiah numei nu cu dingtikin, thiampi in biakpiaknak cu bawl tuk hi. 31A pasal cu siat kha tukma hi; mahnaven a zi cu a sual ahi tale, a sualman cu thuak tuk hi.
Currently Selected:
MIPUM SIALNAK 5: NBF1
Highlight
Copy
Compare
Share
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
