MIPUM SIALNAK 35

Levi Mitei Lakah Piakmi Khuapite

1Jerikho khua el Jordan Ngun ngal lam, Moab munlawn pen Topa in Moses lakah,#Josh 21:1-42; 2“Israel mite hilh inna, a co haw mi ngamsung pen Levi mitei umnak tukin khuapite le khuapi el a, ngan tei tatnak tuk ngamte pia haw hen hi. 3Hih khuapite cu Levi mitei comi hi tuk a, mahlaiah um haw tuk hi. A elkim cu a khui le a ngan dadang tei tatnak tuk hi. 4A khua el haw a, ngan tatnak ngam cu khua kulhtian pen tehin, pi thawng khat le za nga pepanin khua kimkotin hi tuk hi. 5Mah hangin ngan tatnak ngam cu a khua haw pen pi thawng thum zal tuk a, khua kimkotah umin, a laizangah khuapi cu um tuk hi. 6Levi mitei lakah belhnak tukin khuapi pa luk pia unna, mi pa kha khatin mi a that kha tale, a buknak tuk hi. Mah humah adang khuapi sawm li le pa nih pia unna, 7a venghawngin, a ngan ngam haw tuah khuapi sawm li le liat hi tuk hi. 8A hin haw tek i neihmi Levi mitei khuapi zah tuk cu a ngam haw a ngeng le a neunak bang hi tuk,” ti hi.

Belhnak Khuapite

(Daan 19:1-13; Josh 20:1-9)

9 Topa in Moses lakah,#Daan 19:2-4; Josh 20:1-9; 10Israel mite hilh tukin thupia in, “Jordan Ngun tanin Kanaan ngam na tum uhten, 11mi pa khatin mi a thah kha sual tale, a belhnak tukin khuapi teng un hi. 12Mahlaiah beltuk tukin thahmi tei u le nau ten phuba a la nuam haw hei um tuk hi. Mi that a not haw pa cu mipi maiah a thu a soncat haw laih ngawlin that haw pahsuh hen. 13Khuapi pa luk teng un; 14Jordan Ngun i nisuahnak lamah khuapi pa thum, Kanaan ngamah khuapi pa thum teng un hi. 15Hi khuapi cu Israel mi hihen, ngamdangmi a um ngei laih ngawlte, ahimata ngei a umzote hihen, mi a thah khak sual haw ten a belhnak haw tuk khuapi hi tuk hi.

16-18“Mahnaven, mi pa khatin thik hiamnam mangin, mi a that tale laithat a hih hangin amah cu thahleh hi bok tuk hi. 19A thahmi pa i u le nau naibelin laithat pa cu thatleh bok tuk hi. A muhnak mun poh pen that tuk hi.

20“Mi pa khatin midang pa khat cu hua in liangah nawm vawk, ahimata na pa kha khat tuah sepin maw, 21ahimata a khuttum tuah sawhin, a thi tale laithat a hih hangin amah cu thahleh hi bok tuk hi. A thahmi i u le nau naibelin laithat pa cu that bok tuk hi. A muhnak mun poh pen that tuk hi.

22“Mi pa khatin, a luatmi kha ma naven midang pa khat nawmvawk sual, ahimata pa kha khat tuah sep kha sualin, a thi tale; 23A ahimata phano zo ngawlin mi pa khatin suang lawnin, liamsuah tuk tum cu hi ma naven, a ngal hei kha ma naven, midang pa khat a sep hum kha sual tale, 24mipi ten a thu a son haw ten, a thi mi i u le nau, phuba latu tuk pa saw pan ngawlin, mi a that kha sualtu cu pan saw in, a thu sonsak haw tuk hi. 25Mipi ten laithat a not haw mi pa cu phuba a la nuamtu a thah mi pa i u le nau tei lak pen hupin, a belhmi khua ah kuatleh un hi. Mi a thah laihin Thiampi Sang a dektu a thih laklawh cu mah laih khua ah um tuk hi. 26Laithat pa cu a belhmi khua pen tulin, 27a thahmi i u le nau ten mu in, a that haw tale hihi cu phuba la a hih hangin laithat hi ma hi. 28Laithat pa cu belhmi khuapi ah Thiampi Sang a nun sung hempoh um tuk hi. Thiampi Sang a thih nungten kikleh thei tuk hi. 29Hih daan cu nangmuh le na casuan uhten ilai banglai ah na um uh hei in, na zui tuk uhmi hi.

30“Laithat a not haw mi pa cu thutheitu pa nih maw, pa nih sangin tamin maw, a um haw bek ten laithat hi tin thah theih hi tuk hi. Thutheitu pa khat bek i theih cu laithat hi tin suak kha thei deuh tukma hi.#Daan 17:6; 19:15; 31Laithat pa cu thah hi tuk hi. Thahnak pen luat tukin sum tuah tandun thei tukma hi. 32Belhnak khuapi ah a beeltu cu Thiampi Sang a thih laih ngawl sung a khua ah kikleh tukin tatnak sum a pia vangin sang pahsuh un hi. 33Na kiktik uh tale na umnak na ngam uh cu nawngkaitik uh ci a, lai thahnak hangin ngam cu nawngkaitikin mi pa kha khat a thahnak haw ngam thiangtik tukin laithatpa a thah bok haw tih ngawl, thianthohtiknak dang imah umma hi. 34Na umnak ngam uh cu nawngkaitik pahsuh un, itahim titale keimah hi Topa hi ing a, Israel tei lakah um ing,” ti hi.

Currently Selected:

MIPUM SIALNAK 35: NBF1

Highlight

Copy

Compare