MIPUM SIALNAK 18

Thiampi le Levi Tei Dehvo

1 Topa in Aaron lakah, “Nangmah le na capate le na nampih Levi ten ka umnak Puanbuk sungah na nadehnak uhten na sualman uh cu thuak tuk uh ci. Mahnaven nangmah le na capate bekin thiampi na dehnak uh a, na sualman uh cu thuak tuk uh ci. 2Nangmah le na capa ten Puanbuk sung a, na nadeh uhten nangmah tuah dek kawm tukin le a bawmtu tukin Levi hinnam na unaupih cu tumtik bokin hi. 3Nangma lakah a neih haw mi dehvo hihen, Puanbukah a neih haw mi dehvo hihen, deksuak haw hen hi. Mahnaven Mun Thiangtho le biaklandawh a, na thiangtho cu zen hihim haw pahsuh hen. A zen haw tale amuh hihen, nangmuh hei hihen thi tuk uh ci. 4Nangma lakah nadek haw tuk a, Puanbuk sungah a dehvo hempoh cu dek khawng haw tuk hi. Mahnaven nadek tukin a ting ngawl mite cu na lak uhah tel haw tukma hi. 5Israel tei hum a, ka thinuknak a henleh ngawlnak tukin nangmah le na capate bekin, Mun Thiangtho le biaklandawh a, nadeh tuk mite cu dek khawng un hi. 6Israel tei sung pen nangmuta tukin laksawngin, na innkua pih uh Levi mite a ten saktu cu keimah ing. Amuhte cu Puanbuk sung a, nadeh a deh khawng theihnak tukin keima lakah ap mite haw hi. 7Mahnaven nangmah le na capate bekin biaklandawh le Mun Thiangthobel sung a, thiampi nadeh cu dek khawng un hi. Thiampi nadeh cu ka piak zo hangin, na dehvo uh hi. Hi nate dek tukin a tak ngawl mite cu na thiangtho elah, a hung haw tale thah hi haw tuk hi,” ti hi.

Thiampi Tei Covo

8 Topa in Aaron lakah, “Zo in, halkang biakpiaknak sial ngawl adang laksawng ka lakah a piak haw hempoh cu nangmah pia ing. Hi laksawngte cu nangmah le na capa tei ca in kumkhua na co tukin pia ing. 9Biaklandawh a, halkang biakpiaknakah haal ngawlmi laksawng thiangtho cu a nuailamte hihi; an tuah biakpiaknak, sualhah biakpiaknak le mawhnak biakpiaknak hi. Ka lak a, na piak uhmi, hi biakpiaknak thiangtho cu a venghawngin nangmah le na capa tei covo hi tuk hi. 10Biakpiaknak thiangtho cu mun thiangtho pen ei un hi, pano dang vangin ei thei bok haw tuk hi. Nangmu ca in, a thiangtho mite hi.

11“Mah hum pen Israel miten a cuampengin laksawng a piak haw mite vang nata hi tuk hi. Nangmah le na capa le canu tei ca in kumkhua na covo tukin, pia ing. Na innkua sung uh a, mi thiangtho hempohin ei thei haw tuk hi.

12“Israel miten kumsial a neih masabel haw sung pen cang phabel, sabit le olif situi a piak haw mi cu nangmah pia ing. 13A venghawngin nangmata hi tuk hi. Na innkua sung a, mi thiangtho hempoh ten ei thei haw tuk hi.

14“Israel miten ka lakah a piak haw mi hempoh cu nata hi tuk hi.#Thiam 27:28;

15“Ka lakah a piak haw mi mihing hihen, ngan hihen, capa tawntil sonbang ngawlmi hihen, a tatleh haw ten, a tatnak sumpai cu sangin hi. 16Nauno cu a tatnak man a ciangtan haw bangin ngun tangka cang nga in, ha khat a kim ten tanleh tuk hi. 17Hi naven ngan catawntil, khui, tuu le keel cu tatleh hi tukma hi. A pumin keimata hi a, biakpiaknak piak tukmi hi. A thi cu biaklandawh mawkah theh inna, a thau cu biakpiaknak a piakmi an luih biakpiaknak le namtui in mei tuah haal un hi. 18A cikte, a awm le a taklam kawng cu a cuampeng laksawng hi tuk a, nangma covo hi.

19“Israel miten ka lakah a piakmi haw a cuampeng laksawngte cu a kumkhua in nangmah le na capa le canu tei ca in pia ing a, sialeh thei ngawl thutepnak nangmah le na casuan tei lakah ka bawlmi hi,” ti hi.

20 Topa in Aaron lakah, “Co theihmi lo le lam la tukma ci, Israel ngam sungah lei ngam comi vang nei tukma ci. Itahim titale, Topa keimah hi na lo le lam, na covo ing.”

Levi Tei Covo

21 Topa in “Ka lakah Israel tei seh sawm seh khat a piakmi hempoh cu Levi mitei lakah pia zo ing. Ka umnak Puanbuk cingkhawi in, a sungah na a deh haw hangin piakmi hi.#Thiam 27:33; Daan 14:22-29; 22Israel mi kuamah hei in Puanbuk cu nek haw tukma hi. A nek haw tale, a sualmanin thihnak thuak haw tuk hi. 23Tu pepanin, Levi mite bekin Puanbuk cu cingkhawi in, a bawl sual haw tale amuh ten thuak haw tuk hi. Hi daan cu na casuante hei in, a zui haw tukmi hi. Levi miten Israel mi lakah kumkhua in co tukmi lo le lam nei haw tukma hi. 24Itahim titale Israel miten a piak haw mi seh sawm seh khat cu a co haw tukin pia zo ing. Mah a hih hangin Israel ngam sungah kumkhua in co tukmi lo le lam nei pahsuh un ka tihnak na hi,” ti hi.

Levi Tei Piakmi Seh Sawm Seh Khat

25 Topa in Moses lakah, 26Levi mitei lakah hi bangin hilh tukin thupia hi. “Topa i lakah a piak haw mi seh sawm seh khat Israel tei lak pen na ngah uhten, seh sawm seh khat cu a cuampeng laksawngin, Topa i lakah pia un hi. 27Hi laksawng cu lo bung tei cangthak le sabit thak a piak haw mi bangin ngaihsut tuk hi. 28Mah bangin Israel mi lak pen na ngah uhmi seh sawm seh khat hempoh sung pen Topa i lakah na piak tuk uhmi cu thiampi Aaron lakah pia un hi. 29Na ngahmi sung uh pen a phabel pia khawng un. 30Mah bangin a phabel na piak nung uhten a tangmi cu nangmuta hi tuk a, na cangcilnak uh le na sabit ngawinak uh pen a suakmi bangin sial hi tuk hi. 31Puanbuk sung na nadeh uh thaman a hih hangin nangmuh le na innkua hawng uhin, na nuamnak mun uh pen ei un hi. 32Na neih uhmi pen a phabel cu Topa na pia uh tale na eih uhten mawhsiatnak tawk tukma uh ci. Israel tei piakmi laksawng thiangtho a phabel cu Topa lakah na piak uh laih ngawlin, ei in nawngkaitik pahsuh un; na nawngkaitik uh tale thi tuk uh ci.”

Currently Selected:

MIPUM SIALNAK 18: NBF1

Highlight

Copy

Compare