MIPUM SIALNAK 15

Biakpiaknak Daante

1 Topa in Moses lakah, 2a tepsa ngamah a hen haw ten Israel tei zui tukin a nuailam a, daan pia hi. 3Halkang biakpiaknak hihen, thu tepdun kimtiknak biakpiaknak hihen, mai thinthawhnak tuah bawlmi biakpiaknak hei hihen, biaknak puai bawl ten bawlmi biakpiaknak hihen, Topa i lakah na piak uhten khuicang, ahimata tuu, ahimata keel pia un hi. Hi piakmi an luih biakpiaknak cu Topa i ca in namtui hi. 4Topa i lakah mahtih bang biakpiaknak a bawltu hempoh ten olif situi khuat tuah cawhhelmi cangho vam cuai lang tuah an tuah biakpiaknak vang bawlcih tuk hi. 5Halkang biakpiaknak tukin tuucangno a piak sial ten sabittui khuat khat cu in tukmi biakpiaknakah pia cih tuk hi. 6a piak haw mi cu tuucang ahi tale, intuk biakpiaknakah sabit hai khat le a lang, an tuah biakpiaknak tukin olif situi hai khat le a lang tuah cawhhelmi cangho vam cuai khat vang pia tuk hi. 7Hiti bang biakpiaknak a bawlmi cu Topa i ca in namtui mi hi. 8Topa i lakah khuicang cu halkang biakpiaknakin hihen, thutep kimtiknak biakpiaknakin hihen, mai thinthawhnak tuah bawlmi biakpiaknakin hihen, a piak ten, 9an tuah biakpiaknak cu olif situi hai nih tuah cawhhelmi cangho vam cuai khat, intuk biakpiaknakin, 10sabit hai nih vang pia cih tuk hi. Hi biakpiaknak cu Topa i lakah namtui mi hi.

11Biakpiaknakin khuicang hihen, tuucang hihen, tuu le keel hihen a piak haw ten, hi a hum a, nate cu piakcih pepel hi tuk hi. 12Ngan pa khat sangin tam saw deuh a pia haw tale, a tamzahin, na dang piak mite vang khan hi bok tuk hi. 13Ngamsung mi hempoh ten Topa i lakah namtui an luih biakpiaknak a bawl haw ten, a hum a, bawl tuk hempoh cu bawl khawng haw tuk hi. 14Ngamdangmi pa kha khatin, demno sung a um hang hei hihen, kumkhua in, na lak uhah a um ten hihen, Topa i lak a, namtui an luih biakpiaknak a pia tale, a hum a, daan cu zui bok tuk hi. 15Nangmuh hihen, ngamdangmi nangmu lak a, ummi hei hihen, hih daan cu a kumkhua in, na zui tuk uhmi hi. Nangmuh le amuh cu Topa i mai ah bangten uh ci. 16Nangmu ca in hihen, amu ca in hihen, daan le bawl tuk cu bangten hi tin ti hi.#Thiam 24:22;

17 Topa i piakmi ngam a hen haw ten, 18Israel tei zui tukin a nuailam daan cu Topa in Moses lakah pia hi. 19Mahlai ngam pen suakmi an a eih haw ten, an khenkhat cu Topa i lakah a dangno laksawngin pia haw tuk hi. 20Kumsial an a lak ceng haw ten, cangthak tuah bawlmi cangho phil khat cu Topa i lakah laksawngin pia haw tuk hi. 21Topa i lakah cang a lak celh haw ten cangho vam a bawl haw mi sung pen hi laksawng cu a kumkhua in pia leleng haw tuk hi.

22 Topa keimah in, Moses lak a, ka piakmi daan hi, mi pa kha khatin tuptahnak um ngawlin a zui ngawl kha sualin hei hihen, 23mailam ni kha khat ten Topa i thupiakmi hi Israel mipi ten zui ngawlin a um haw ten hei hihen, 24mipi ten thutheih ngawl hangin a bawl khak sual haw mi ahi tale, halkang biakpiaknak tukin khuicang pia haw tuk hi. Hihi cu Topa i lakah piakmi namtui hi a, an tuah biakpiaknak le intuk biakpiaknak tuah pia cih haw tuk hi. Mah hum pen sualhah biakpiaknak tukin keelcang vang pia haw tuk hi. 25Thiampi in mipi tei ca in thianthohnak tuk biakpiaknak cu bawl tuk a, ngaihdam hi haw tuk hi. Itahim titale bawl himmi hi ngawlin bawl khak sualmi a hih hangin sualhah biakpiaknak le halkang biakpiaknak Topa i lakah a piak haw hangin hi. 26A venghawng haw in, a thil bawl sualmi ah a tel haw hangin Israel mipi hihen, a lak haw a, um ngamdangmi hihen, ngaihdam khawng hi tuk hi.

27Mi pa khatin cangpakin sualnak bawl kha sual ahi tale sualhah biakpiaknak tukin kum khat kim keel nu pia tuk hi.#Thiam 4:27-31; 28Topa i mitmuhin, a sualnak pen thiantik tukin thianthoh biakpiaknak cu thiampi in bawlsak tuk a, amah cu ngaihdam hi tuk hi. 29Hi daan cu Israel ahimata ngamdangmi hihen, ngamsung mi hempohin, thil a bawl sual haw ten zui tukmi daan hi.

30Mahnaven, Israel le ngamdangmi hihen, ngamsung a ummi hihen, bawlhim sualnak bawlin Topa a zawnsak haw tale thah hi haw tuk hi. 31Itahim titale Topa i awn cu deih ngawlin a thupiakmi cu a nawkvawk him haw, a hih hangin a thihnak haw cu na hi, tin ti hi.

Sabbath Nawkvawktu

32Vei khat cu Israel mite ngamkhingah a um haw laihin, pano pa khat cu Sabbath ni-in thingcom hi. 33Amah cu man haw a, Moses, Aaron le mipi maiah henpih haw in, 34bawl tuk a theih haw ngawl hangin thawng sungah khumin cing haw hi. 35Topa in Moses lakah, “Mahpa cu thah tuk hi. Ngiahbuk pualeu lamah tulpih unna, mipi ten suang tuah sep hum haw hen,” ti hi. 36Mah hangin ngiahbuk pualeu lamah hawhpihin, Topa i thupiakmi bangin amah cu suang tuah sep haw in thi hi.

Puancepte

37 Topa in Moses cu, 38Israel tei lakah hilh tukin thupia in, “Na puan mawk uhah a cep bawl unna, a cep hempoh ah mepian nim tuah coih un hi. Mahmi cu na casuan uh tianin, na bawl tuk uhmi hi.#Daan 22:12; 39Hi puancep na muh sial uhten ka thupiakmi hempoh thei lehin, zui tuk uh ci. Mahtin na zeltelnak uh, na lungmu uh hazawlnak le na mit uh i muhmi pawpoh na bawl nuamnak uh pen supnak nei in, keimah nung hek tukma uh ci. 40Puancepin ka thupiakmi hempoh phawktik lehin, keimata hi loli tuk uh ci. 41Keimah hi Topa na Pathian uh ing. Na Pathian uh hi tukin Izipt ngam pen a tulpihtu Topa na Pathian uh ing. Keimah cu Topa ing hi,” ti hi.

Currently Selected:

MIPUM SIALNAK 15: NBF1

Highlight

Copy

Compare