MARKA 5

Jesuh In Khawhuai Zelhpa Damtik

(Mt 8:28-34; Lk 8:26-39)

1Jesuh le a nungzuitute cu Galilee tuipi ngal a, Gerasa mitei ngamah heng haw hi. 2Jesuh i hawmkuang sung pen a tolh bek le, mithi khansung pen a tulpa in, Jesuh cu muak hi. Amah cu mithi khan lakah bialin, um hi. 3Kuamah in amah cu thikkhau vawh thei haw ma hi. 4Itahim titale thikkhau tuah kenin, kol a bulh li haw hei in, thik khau cu cat lelemin, a kolte kehtik lelem hi, kuamah in amah neh zo haw ma hi. 5A sun a zanin, mithi khansung le mual humah umin, amah le mah suanghiam tuah atcopin, nging zetin ham ngungun in um hi.

6Mahnaven Jesuh cu khawlapi pen hung li amuh ten thakhatin tai ngutin, a mai ah khukdinin bok a, 7“Jesuh, A sangbel Pathian Capa! kei lakah i bawl kin kam? Kei na bawlsiat ngawlnak tukin Pathian min suangin, thupia in,” tin ngingzet au hi. 8Jesuh in, “Dawi ngilo, hi pa i sung pen tulin!” tin thupia hi.

9Jesuh in, na min akua kaw? tin, a dot ten, “Mahpa in ka min cu ‘Honpi’#5:9 Honpi tihmi cu “Legion” tihmi Latin awn lakmi hi a, “Tampi” tihnak hi in, Rom ngalkap hon khatah thawng luk hawng um haw hi. hi, itahim titale tam ngangai ung,” tin don hi. 10Mahlai ngam pen Jesuh i hawlvawk ngawlnak tukin a lakah kuun li haw hi.

11Mual humah vok honpi taa dawduam li in mu haw hi. 12Khawhuai ten, “Kohte hilai vok tei sungah ka tum theihnak tuk uhin vok hon lakah hawhtikin,” tin ngen haw hi. 13A ngetnak haw bangin Jesuh in thupia in, khawhuaite cu tulin vok sungah tum haw hi. Mah vok honpi cu thawng nih hawng hi haw in, tuipi hum a, liang sangpi pen peksuk tawtokin tuipi sungah thi khawng belh haw hi.

14Vok khaltute cu khuasung le ngamsung hempoh ah tai kawkawi in, a piangmi thute hilhin thangtik haw hi. 15Mite Jesuh lakah a hen haw ten Honpi a nei khawhuai polh mipa cu puan silhin, micipbel bangin khungleng amuh haw ten lauzet haw hi. 16Khawhuai zelhpa cu iti bang damnak ngah kaw? tih thu le vok honpi tei thu a mutu ten midangte hilh sawlawn haw hi.

17Mah hangin Jesuh nelah, “Ka ngamsung uhah um pahsun; mundang lamah thawn le ci,” tin kuun haw hi.

18Jesuh hawmkuang sungah tum tuk a elh ten khawhuai zelhpa in, “Nangmah zui bok tung!” tin dong hi.

19Mahnaven Jesuh in zui tuk awi ngawlin, “Na innah pin inna, Topa in, na humah nemcuamnak ngengpi a bawlnak thu le nangma humah hehpihnak a neihnak thute na hilhin,” tin ti hi.

20Mahpa cu pinlehin, Jesuh i hehpihnak thu hempoh cu Dekhapolis, ngamsung hempoh ah hilhin, mi hempoh ten lamdangsazet haw hi.

Jairus Canu le Jesuh Puancep Zen Nu

(Mt 9:18-26; Lk 8:40-56)

21Jesuh cu hawmkuang sungah khungin tuipi ngal lamah hawh hi. Ngalkhat lam tuimawkah a um laihtakin, mi honpi a lakah hungin, a kimkotah dim uk haw hi. 22Mahlai takin pumkhawm inn uktu Jairus hungin, 23Jesuh amuh ten a kebulah bokin, “Ka canu thi awndiak toh hi, damin, a nunleh theihnak tukin hung inna, a humah na kut suan poh le ci, dam tuk,” ti hi.

24Jesuh cu amah tuah hawh langkhat haw hi. Mi honpi ten a zui bok haw hangin nawkdun phuphut haw hi.

25Mahlai takin numei pa khat thitulnat kum sawm le kum nih vei nu pa khat um hi. 26A natnak cu sibawi tampi bawltikin, a neih hempoh bo khawng zo naven, imah nemcuam ngawlin luai dedeuh hi. 27Jesuh i thu a zak ten, “A puancepno bek ka zen ngah ahin, dambel tung,” tin ngaisung hi. 28Mihonpi tei nunglamno pen hawh dedenin, Jesuh puancep mawkno cu zen ngah hi.

29A zenkhak bek le, a thi tul cu cawlin, a kang paih ten ka sung a, natnak hi dam zo tih theih hi. 30Jesuh cu ama sung pen a huham a tullam a theihbek ten nunglam hekin, “Ka puan zen ngahtu akua kaw?” tin dong hi.

31A nungzuitu ten, “Mihing hi zong nawkdun kha phuphut lih mu leng sisi, akua in ka puan zen ngah kaw, tin ita dong kha nge cim?” tin ti haw hi.

32Mahnaven Jesuh in amah zentu mu nuamin, a elkim zo kawkawi hi. 33Numei nu in ka humah i thu piang hum tih thei cawmin, lauzet le a can tawtok thahin Jesuh mai ah bokin, a thu hempoh hilh khawng hi. 34Jesuh in, “Ka canu aw, na upnakin nangmah damtik zo hi. Thinnop zetin pin inna, na tidam tahen,” ti hi.

35Jesuh i thuson lih laih takin Jairus inn pen mi hungin, “Na canu thi zo hi, ita Sazapa noksak leng nge cim?” tin ti hi.

36Jesuh in mahpa i thute ngai kha ngawlin, “Lau pahsun, upnak bek nei in,” tin Jairus lakah hilh hi. 37Jesuh in midang kuamah zui phal ngawlin, Peter, James le a nau Johan bek zuitik hi. 38Pumkhawm inn uktu pa i inn a hen haw ten mithawm lung leilui in, mi tampi kap li za haw hi. 39Innsung a tum ten, “Ita hi bangin kap li uh cim? Numei nu cu thi ma hi, a hihbu hi,” a tih ten mithi ngal ten nautatin nuihsan thong haw hi.

40Mah hangin Jesuh in thi ngaltu hempoh cu pawlamah tultik khawng hi. Jairus tei nupa le a pui mi pa thumte tuah bekin, numei nu i umnakah tum haw hi. 41Jesuh in numei nu i khut pen lenin, “Talitha koumi,” ti hi. Talitha koumi i sullam cu, “Numei nu aw, tho in hi, ti ing,” tihnak hi.

42A tih celh bek ten thakhatin numei nu cu dingto paihin, lamciah thei paih hi. (Amah cu kum sawm le kum nihmi hi.) Mi hempoh ten lamdangsa in candalh haw hi. 43Hi thu piangte kuamah i lakah son tuk ngawlin nasezet kham hi. Mah celh ten, “Numei nu cu a eih tuk an na pia un,” tin hilh hi.

Currently Selected:

MARKA 5: NBF1

Highlight

Copy

Compare