MATTHAI 24

Jesuh In Biakinn Siatnak Tuk Hilh

(Mk 13:1-2; Lk 21:5-6)

1Biakinn pen Jesuh a hawh tul laih takin nungzuitute a lakah hung haw in, Biakinn sak a nase dan sonpih haw hi. 2Jesuh in, “Mahzuh hi, hi hempoh cu mu khawng zo toh uh ci. Thungai in hilh ing: Biakinn suang pa khatno hei hi ama umnak lengah um tukma hi; a venghawngin khiak kulh khawngin um tuk,” ti hi.

Haksatnak le Bawlsiatnak Thu

(Mk 13:3-13; Lk 21:7-19)

3Jesuh cu Olif Mual humah a khun laihtakin, a nungzuitute kuamah i theih ngawlin a lakah hawh haw in, “Hilh hemin i tuk ten kaw na hilhmi bangin a hen tuk? Na hunlehnak tuk le hun a bonak tuk, hun nai zo tih theihnak tukin melciknak i heng tuk kaw,” tin dong haw hi.

4Jesuh in, “Ngalling un, kuamah in zol haw pahsuh hen. 5Mi tampi ten keima minin hung haw tuk a, ‘Keimah hi Khrih ing hi,’ ti in mi tampi zol haw tuk hi. 6Lam naino le lam khawla pi ah hihen, ngaldonak thawmvang za tuk na ve uhcin lau pahsuh un. Mahti bang thil cu um tuk naven a tawpnak heng tihnak hi ma laih hi. 7Ngam khat le ngam khat dodunin, kumpi pa khat le pa khat thatdun haw tuk hi. Leihum mun hempoh ah paam le hiinhing um tuk hi. 8Mahti bang thilte cu naukei vonna bang tuk hi.

9Mahten nohte cu man haw tuk a, dantat tuk le thah tukin mi khutah hengtik haw tuk hi. Keima hangin miphun hempoh ten hua haw tuk hi.#Mt 10:22; 10Mi tampi ten a upnak haw zamsanin le pa khat le pa khat zuakdunin, huadun haw tuk hi.#Mt 10:22; 11Mahten profet manngawl tampi piang haw tuk a, mi tampi zol ngah haw tuk hi. 12Sualnak cu khangin, ihdunnak kiam tuk hi. 13Mahnaven a dawltawpnak tian thuak le nang zo ten nunpatnak ngah haw tuk hi.#Mt 10:22; 14Mahten miphun hempoh tei theih khawng tukin vancung Uknak Thuthangpha hi leihum khua hempoh ah phuan hi tuk hi. Mah nungten a tawpnak cu heng tuk hi.

Ningdelhhuai Thil Nawngkai

(Mk 13:14-23; Lk 21:20-24)

15Profet Daniel in, a hilh hamsa mi, ‘Ningdelhhuai Thil Nawngkai,’ cu mu tuk uh ci. Mahmi Thil nawngkai cu mun thiangtho ah ding tuk hi.#Dan 9:27; 11:31; 12; 16Mahten Judea ngam a umte cu mual humah tai haw hen. 17A inn hum a ummi cu a inn sungah van la tukin tolh pahsuh hen.#Lk 17:31; 18Lo a um ten puan la tukin kikleh pahsuh hen. 19Mah hun le mah ni cu numei naupai le naukai nei tei ca in itih zahin haksa kam ni? 20Phalbi hun le Sabbath ni ngelcelin thinsu in, na tai lih ngawlnak tukin Pathian nelah thungen un hi. 21Itahim titale leipi a pian tung pepan tuni tian a heng awng ngawlmi mullinghuai haksatnak a lauhuai nate heng tuk a, mahtih bang a lauhuai haksatnak cu tunung hei ten hengleh tukma toh hi.#Dan 12:1; Mang 7:14; 22Mahnaven mah hun cu Pathian in, a hun comtik zo hi; hun com ngawlin a umta bang ahin, kuamah suakca tukma hi. Mahnaven Pathian in, a tensa tei ca in, a ni cu comtik tuk hi.

23Mahten mi pa kha khatin, ‘Zo un, hilai hah Khrih um,’ mahma tale, ‘Hilai khah um,’ tin, a ti haw tale sang pahsuh un. 24Itahim titale Khrih man ngawl, naal profette tul haw tuk a, thasiahhuai nalamdangte bawlin a cangthei tawpin, Pathian i tensa mite zol haw tuk hi. 25Phawklengta un hi. A laih ngawlin hilh ham ing.

26“Miten, ‘Zo un, ngamkhingah um hi,’ tin, a ti haw tale hawh pahsuh un. ‘Hilai hah ngelh hi,’ a ti haw hei in sang pahsuh un.#Lk 17:23-24; 27Itahim titale Mihing Capa cu nisuahnak lam pen nitumnak tian thakhat thu in, a al pupum thei khuaphelep bangin hung tuk hi.

28“Miluang umnak hempoh ah mulukolhte hulawm haw tuk hi.#Lk 17:37;

Mihing Capa Hunnak Tuk

(Mk 13:24-27; Lk 21:25-28)

29“Mahmi haksatnak hun a bo ten ni thim tuk, hade vakleh tukma toh, van pen aksite cakin, van a ummi vaknak huhamte cu amu hawhnak lampi pen pial haw tuk hi.#Isa 13:10; 34:4; Ezk 32:7; Joel 2:10, 31; 3:15; Mang 6:12-13; 30Mahten Mihing Capa i tolhleh hun melciknak tukin vanah lang tuk hi. Mihing Capa cu van a, meingo hum pen vaknak huham le sunloihnak ngengpi tuah a hun cu mu haw tuk a, leihum miphun hempoh cu kap haw tuk hi.#Dan 7:13; Zek 12:10-14; Mang 1:7; 31A nging zetmi pengkul tum haw tuk a, lei ningli ah a vancungmite tiikin, van mawk khatlam pen khatlam mawk tianah a ummi a tensate cu hulawm haw tuk hi.

Theikung Pen Theihhamnak

(Mk 13:28-31; Lk 21:29-33)

32“Thei kungpi in cihnak hilh hen. Theikung pen a kangkaknote tawtin, a cehte a tawt haw ten khuakhal hun nai zo tih thei uh ci. 33Mahti bang bokin hi thil hempoh na muh uhten a hun naizet zo tih thei un hi. 34Thungai in hilh ing; atu a nunglaihmi hempoh a thih khawng haw laih ngawlin hi thil hempoh hi kim khawng tuk hi. 35Lei le van cu bo haw tuk naven, ka awnkam cu bo awng hihim tukma hi.

Kuamah in A Hun le Can Thei Haw Ma

(Mk 13:32-37; Lk 17:26-30, 34-36)

36Mah ni le hun cu kuamah in thei haw ma hi; van a ummi vancungmi hihen le Capa in hihen thei haw ma hi; Pa bekin thei hi. 37Noah khan laihin, a piangmi bangin Mihing Capa i hunleh ni ten mah bangin piangbok tuk hi.#Pian 6:5-8; 38Tuihautung laih ngawl sung cu in le ei in, zi nei, pasal nei in um haw hi. Noah timbaw sungah a tum ni tian nop zetin um haw hi. 39Hitih bangin tuihautungin, a tai khawng laklawh tian a piang tukmi kuamah in thei ham haw tukma hi. Mihing Capa i hun lehnak tuk vang mahtih bangbok leng tuk hi.#Pian 7:6-24; 40Mah hun a hen ten lo ah mi pa nih nadek haw tuk a, pa khat cu lakkai hi tuk a, pa khat cu zamsanin um tuk hi. 41Andeng litu numei pa nih tei sung pen pa khat cu lakkai hi tuk a, pa khat cu zamsan hi tuk hi. 42“Mah hangin ngallingin um un; ituk ten na Topa heng tuk him tih thei ham ma uh ci. 43Inn neitu pa in nguca pa i hen tuk a thei ham tale hihbu ngawlin cing tuk a hih hangin nguca pa cu a inn keu in tum thei tukma tih cu na theihsa uh hi.#Lk 12:39-40; 44Mah hangin ngalling le mansa lelengin um un, itahim titale Mihing Capa cu na muanmawh khak ngawl laihtak uhin heng tuk hi.

Umlawh Muantak le Muantak Ngawl

(Lk 12:41-48)

45“Mahti bang ahi tale, akua tuk him, muantak le a cip umlawh cu? Muantak le a cipmi umlawhpa cu a bawipa in, a dang umlawhte a khawngtu in koih tuk hi, a hun man zetin umlawh dangte an pia theimi hi tuk hi. 46Phano in, na deh lih laihtakin, a bawipa a hungkikleh tale itih zahin kaw mah umlawhpa cu a lung a dam tuk? 47Thungai in hilh ing; mah umlawhpa cu a bawipa in, a thil hempoh cingtu in koih tuk hi. 48Mahnaven umlawh cip ngawl ahi tale, ka bawipa pin pal tukma laih poh, ngei em tuk laih poh tin ti in, 49umlawh dangte zawnsakin zukham misilte tuah an ei in um haw tuk hi. 50Mahten a bawipa cu a ngallin ngawl le a theihkhak ngawl laih hun, a ngaihsut khak ngawlin hengkikleh tuk hi. 51A bawipa in mahpa cu hawlvawkin, mi ultung tei umnakah kuat tuk a, mahlai munah kap le hacang ngawi in um tuk hi,” tin ti hi.

Currently Selected:

MATTHAI 24: NBF1

Highlight

Copy

Compare