MATTHAI 20
20
Sabit Huan Nadektute
1Jesuh in, “Vancung Uknak cu hi bangin hi. Mi pa khat cu a sabit huan sungah nadektu zei tukin zingtungno in tul hi. 2Nidang laihin, a ngah awng meksa haw ni khat thaman ngun tangka cang khat piak tuk lungkimin, a huanah nadektute cu hah hi. 3Zinglam nazi kuah ten bazalah hawhin, imah dek ngawl mi khenkhatte cu mu hi. 4Mah tei lakah, ‘Nohte vang sabit huanah hawhin nadek bokta un; na nitha uh a tawk zawnin pia tuk poh ing,’ tin ti hi. 5Mah hangin hawh haw hi. Mahti bangbok lengin nazi sawm le pa nih ten le taklam nazi pa thum ten a dangte hah lehleu hi. 6Taklam nazi pa nga kimkuanno ten bazalah hawh lehin, mi khenkhat a dingthong lengte mu hi. ‘Itakaw imah dek ngawlin sun nilui dingthongin, hun na botik thong uh?’ tin dong hi. 7Amuh ten, ‘Kuamah in nadeh a tiik haw ngawl hangin,’ tin don haw hi. Mahten amuh tei lakah, ‘mahti bang ahi tale sabit huanah hawh bok unna, nadek bokta un,’ tin ti hi.
8“Taklam nadeh tawp hun a hen ten huan neitu pa in huan uktu pa cu, ‘Huan nadektute sam inna, a dawlbel nadektute pepanin, a masabel na a dektute tian, a thaman haw pia in hi,’ tin ti hi.#Thiam 19:13; Daan 24:15; 9Taklam nazi pa nga ten nadeh a pantu cu a thaman haw ngun tangka cang khat ten pia hi. 10Mah hangin a masabelin, nadek a cialmi cu thaman la tukin a hawh bok haw ten tam deuh ngahbel tuk hung tin muang kuhnim haw hi. Mahnaven amuhte vang cu ngun tangka cang khat bok leng pia hi. 11Tangka cu la in, huan neitu i humah phu haw hi. 12‘A dawlbelin, na a dektute hi nazi pa khat sung bek dek haw a, kohte cu nisazet lakah sun nilui in dek ung hi. Mahnaven keimuh bangbok lengin thaman pia sisi,’ tin ti haw hi. 13Huan neitu in, “‘Ngualcamte ngai hih teh un! Nohte zol mang hi. Ni khat thaman cu ngun tangka cang khat tukin na lung uh kim si uh ci? 14Na thaman uh cu la unna, innah pinta un hi. A dawlbelin, nadeh tuk ka cialmi pa vang cu nangmu ngah zah ngah bok tukin deihsak ing. 15Ka tangka cu keima deihnak bangin man theihnak thunei ing hi, amu hum a, ka phalnak hi iksik em uh cim?” tin hilh hi.
16Jesuh in, “Mah hangin a dawlbel cu masabelin cang tuk a, masabelte cu a nungdawlbelin cang tuk hi,” tin ti hi.#Mt 19:30; Mk 10:31; Lk 13:30;
Jesuh In A Thihtuk Thu Vei Thumnak Hilh
(Mk 10:32-34; Lk 18:31-34)
17Jesuh cu Jerusalem lamah a hawh lih laihtakin, a nungzuitu sawmleh pa nih ten adangno pui in, amuh nguakcang a hawhthahin, thusonpih hi. 18“Ngai hih un! Jerusalem ah hawh tuk hung a, mahlai pen Mihing Capa cu thiampi upa le Daan zilhtu tei khutah hengtik haw tuk hi. Thah tukin son haw tuk hi. 19Mahnung ten Gentail tei khutah hengtik haw tuk hi. Gentail ten zawnsak haw tuk a, vaatin, thinglamteh humah khen haw tuk naven ni thum nungten tholeh tuk hi,” ti hi.
Nupi Pa Khat i Kutnak
(Mk 10:35-45)
20Mahten Zebedi i zi cu a cate pa nih tuah Jesuh lakah hawh haw a, Jesuh i mai ah kunin hehpih kuun haw hi.
21“Ikaw na deih?” tin Jesuh in dong hi.
A man, “Kumpipa na hih hun ten ka ca pa nihte hi pa khat na taklamah, pa khat na veilamah a khun theih hawnak tukin thupia le ci,” tin kuun hi.
22Jesuh in, “Na nget uhmi hi i ngen kam ung tih thei ma uh ci. Ka in tukmi thuaknak khuathai hi in thei ni uh cim?” tin dong hi. A capa pa nih ten, “In thei tuk ung,” tin don haw hi.
23Jesuh in, “Ka in tukmi khuathai cu in thei kha men ngai tuk uh ci. Mahnaven ka taklam le ka veilam a khungtu tuk cu ten theihnak thunei mang hi. Hi khunnakte hi cu ka Pa i leiteksa tei ca tukin hi,” ti hi.
24Mah thu cu nungzuitu adang sawm ten a zak haw ten mah unau pa nih tei humah thinuk mahtak haw hi. 25Mah hangin a venghawng haw in, Jesuh in samkhawm a, “Na theih uh bangin leihum uktute cu a ukmi tei humah huham neizet haw a, hotute vangin thuneizet haw hi.#Lk 22:25-26; 26Mahnaven nohtei lakah mahtih bangin hi tukma hi. Nohtei lak pen pa kha khatin midang sangin ngeng saw a nuam tale midang tei umlawh na a deh kul hi. 27Nohtei lak pen a masabel nuamtu cu nangmu sila in, a um masak kul hi.#Mt 23:11; Mk 9:35; Lk 22:26; 28Mihing Capa vang cu mahtih bang hi bok hi. Mihing Capa cu mite nadeh atiktu hi ngawlin, mitei nadehsaktu tukin le mi tampi i nunpan tukin a nunnak pia tukin hung hi,” tin ti hi.
Mitcaw Pa Nih Damtik
(Mk 10:46-52; Lk 18:35-43)
29Jesuh le a nungzuitute cu Jerikho khua pen a tul haw laih khin mipi in zui haw hi. 30Lampi el a khunglengmi mitcaw pa nih ten amu elno ah Jesuh hawh tih a zak haw ten, “Maw David Capa hehpih zazalin hi,” tin au haw hi.
31Mipi ten mengdenin um un tin ti haw hi. Mahnaven meng cuang ngawlin, David Capa hehpih pohin hi, tin nging sesemin au haw hi.
32Jesuh cu dingin, a pa nih haw in sam hi. “I bawlsak tuk kaw na deih uh?” tin dong hi.
33Amuh ten, “Topa khua mutik zalin hi,” tin kuun haw hi.
34Jesuh in hehpihin, a mit haw cu zen hi. Thakhatin khua muleh thei haw in amah cu zui haw hi.
Currently Selected:
MATTHAI 20: NBF1
Highlight
Copy
Compare
Share
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
