THIAMPI NADEHNAK 9

Aaron In Biakpiaknak Bawl

1A ni liat ni-in, Moses in Aaron le a capate cu Israel pui tu tuah sam khawm hi. 2Aaron lakah, “Khuicangno pa khat le tuucang pa khat sonbang ngawl veve la inna, Topa i nelah pia in; khuicang cu sualhah biakpiaknak tukin hi a, tuucang cu halkang biakpiaknak tuk hi. 3Israel mite hilh inna, sualhah biakpiaknak tukin keelcang pa khat le halkang biakpiaknak tukin khui dawnno le tuu dawnno kum khat kim veve, sonbang ngawlmi hunpih haw hen; 4pawlkom biakpiaknak tukin khuicang pa khat le tuucang pa khat vang hunpih haw hen. Situi cawhhelmi an tuah biakpiaknak tuah Topa i nelah pia haw hen hi. Itahim titale tuni in Topa cu a lak hawah lang tuk hi,” tin Moses in ti hi.

5Moses i thupiakmi bangin a venghawngin Puanbuk maiah hunpih khawng haw a, Israel mi a venghawng haw in, mahlaiah Topa bia tukin ding haw hi. 6Moses in, “Topa i sunloihnak na lak uhah a langnak tukin hi hempoh hi bawl tukin Topa in thupia zo hi,” ti hi. 7Aaron i nelah, “Biaklandawhah hawh inna, na sualnak le mipi tei sualnak cu hahsak a hih theihnak tukin hi sualhah biakpiaknak le halkang biakpiaknak cu bawlin hi. Hi biakpiaknak cu mipi tei sualhahnak tukin Topa i thupiaknak bangin bawlin,” ti hi.#Heb 7:27;

8Aaron cu biaklandawhah hawhin, ama sualhahnak tukin khuicangno cu ngo in hi. 9A capa ten khuicang thi cu a nelah pia haw in, mah thi sungah a khutzung a nip nungten thi cu biaklandawh ningli a, lei ah noih hi; a tangmi thi cu biaklandawh bulah leih hi. 10biaklandawh humah a thau, a kal le a thinkak thau cu Moses nelah Topa i thupiakmi bangin haal hi. 11Mahnaven a taksa le a vun cu a ngiahnak haw pualamah haal haw hi.

12Ama ca in biakpiaknak ngan cu ngo hi. A capa ten a thi cu dongin, amah pia haw hi. Aaron in mah thi cu biaklandawh ningli ah theh hi. 13A lu le a taksa dang cu pia haw a, amah in biaklandawh humah haal hi. 14A sungngil le a nunglam ke a som ciang nungten halkang biakpiaknak humah haal hi.

15Mah nungten mipi ca in biakpiaknak bawl hi. Mipi sualhahnak piak tukmi keelcang cu la in, ama sualhahnak tuk a bawl bangin ngo in pia hi. 16Halkang biakpiaknak tukin ngan vang cu la in, a daan bangin biakpiaknak bawl hi. 17An tuah biakpiaknak vang bawl a, cangho vam khutdim la in, biaklandawh humah haal hi. Hihi cu zing sial bawlmi halkang biakpiaknak sial ngawl bawlmi hi. 18Mipi ca pawlkom biakpiaknak khuicang le tuucang vang ngo hi. Mah thi cu a capa ten dongin pia haw a, amah in biaklandawh ningli ah theh hi.#Thiam 3:1-11; 19Aaron in, a thau, a mei thau, a sungngil thau, a kal le a kal tuamtu thau, a thinkak thau cu la in, 20a awm sa humah a koih nungten biaklandawh humah haal hi. 21Moses i thupiaknak bangin a awm le a taklam kawngte cu a cuang laksawngin, Aaron in Topa i nelah pia hi.

22Aaron in biakpiaknak hempoh a celh ten, mipi tei humah a baan pa nih zaakin, muicu pia hi. A piak ceng ten tolhsuk hi.#Mipum 6:22-26; 23Moses le Aaron cu Topa i umnak Puanbuk sungah tum haw in, a tulleh haw ten mipi cu muicu pia in, a venghawng haw i humah a vakmi Topa i huham cu lang hi. 24Phawhkhak ngawlin Topa in mei khesuk a, biaklandawh hum a, biakpiaknak cik hempoh le a thau cu kang khawng hi. Mahmi cu mipi ten amuh haw ten, au in, a mai haw lei tawngkha tianin bok haw hi.

Currently Selected:

THIAMPI NADEHNAK 9: NBF1

Highlight

Copy

Compare