THIAMPI NADEHNAK 15

Taksa Sung pen Nai Tulmi

1 Topa in Moses le Aaron nelah, a nuailam a daan cu, 2Israel tei zui tukin pia hi. Mi pa kha khat a zahmawh sung pen nai a tul tale, a thiangtho ngawl hi. 3Cawl ngawlin a tul lelengin hei hihen, a tulleh ngawl toh ahi vangin, mahpa cu thiangtho ma hi. 4A khunnak, a zaunak cu a thiang ngawl hi. 5Mi pa kha khatin, a zaunak cu zenin, 6a khunnakah a khung tale, a zentu, khungtu cu a puan sawp ciang khawng tuk a, tuibualin mah ni cu taklam tian thiangtho ngawl hi tuk hi. 7Naitul pa cu mi pa kha khatin, a zen tale, a zentu in pua sawp khawngin, tuibual tuk hi. Mah ni taklamin mi thiangtho ngawl hi tuk hi. 8Nai a tulpa in thianthoh ngawlnak a nei ngawlmi pa i humah cil a sia tale mahpa cu a puan sawp khawng tuk hi; tuibualin, mah ni cu taklam tian, mi thiangtho ngawl hi tuk hi. 9Naitul pa i khunnak cipuh kung, ahimata khunnak cu a thiangtho ngawl hi; 10Hi pa i khunnak pawpoh a zentu cu taklam tiang mi thiangtho ngawl hi. A khunnak a puatu pawpohin ama puan sawp ciang khawng tuk a, tuibualin, mah ni taklam tian mi thiangtho ngawl hi tuk hi. 11Naitul pa in, a khut som masa ngawlin, mi pa kha khat a zen tale mahpa in, ama puan sawp ciang khawng tuk a, tuibualin, mah ni taklam tian cu mi thiangtho ngawl hi tuk hi. 12Hi pa i zen mi leibeel cu sukeh unna, thing kuang a zenmi cu som un hi.

13A dam nungten ni salih sung cawl um tuk a, mah nungten a puan sawp ciangin, tuithiang tuah tuibual tuk hi. Mi thiangtho in suak tuk hi. 14A ni liatnakin khulo pa nih ahimata laileng pa nih cu Thukham koihnak kongka ah hunpih tuk a, thiampi nelah pia tuk hi. 15Thiampi in vano pa khat cu sualhah biakpiaknakin mang tuk a, adang pa khat cu halkang biakpiaknakin mang tuk hi. Thiampi in naitulmi pa i ca tukin thiannak bawl tuk hi.

16Mi pa kha khat a behtui a tul tale, a pumpi cingin tuibual henna, mah sun cu taklam tian mithiang ngawl hi tuk hi. 17A zangtui i caknak, pat tuah bawlmi hihen, savun tuah bawlmi hihen na hempoh cu sawp ciang khawng tuk a, taklam tian thiangtho ngawl hi tuk hi. 18Nu le pa a zaukawm nung haw ten, a pa nih haw in tuibual haw tuk a, mah sun cu taklam tian mi thiangtho ngawl hi tuk hi.

19Numei in ha sial thi a neih ten ni salih sung mi thiangtho ngawl hi tuk hi. Mah numei a zentu cu taklam tian mi thiangtho ngawl hi tuk hi. 20Numeidan a neih sungin a khunnak, ahimata a zaunak cu a thiang ngawlmi hi. 21-23A zaunak hihen, a khunnak hihen a zentu in, a puante sawp ciang tuk a, tuibual tuk hi. Mahmi cu taklam tian mithiang ngawl hi tuk hi. 24Numeidan a neih sungin pano tuah a zaukawm haw tale, a zaupihtu pa vang mithiang ngawlah suak a, ni salih sung mi thiangtho ngawl hi bok hi; a zaunak vang zaunak thiang ngawl hi.

25Numei pa khatin ha sial a neihmi humah ni tampi a nei tale, a neih sung hempoh cu numei daan a neih sung bang lengin mithiang ngawl hi. 26Mahti bangin a neih sung hempoh a zaunak le a khunnak cu a thiangtho ngawl hi khawng haw hi. 27Mah na a zentu cu mithiang ngawl hi, mah hangin, a puan sawp ciangin tuibual hen hi; mah ni taklam tian, mahpa cu mi thiangtho ngawl hi tuk hi. 28A numeidan a kang nungten ni salih sung zodun hih tuk a, mahnung ten mi thiangtho hi tuk hi. 29A ni liatnakin, Topa i umnak Puanbuk kongka a, ummi thiampi nelah khulo pa nih le laileng pa nih tuah hunpih tuk hi. 30Thiampi in pa khat cu sualhah biakpiaknakin mang tuk a, a dang pa khat cu halkang biakpiaknakin mang tuk hi. Mah numei nu i thianthohnak cu thiampi in bawlsak tuk hi.

31Israel tei thianthoh ngawlnak hangin, a ngiahnak haw laizang a, ummi Topa i umnak Puanbuk a nawngkaitik ngawlnak tukin Israel mite hilh tukin, Topa in Moses hilhtik hi. Puanbuk a nintik ngangai haw tale thihnak tawk haw tuk hi.

32Pano pa khat a zahmawh pen nai a tulmi le behtui a tulmi, 33Numei pa khat ha sial a neihmi, ahimata mi pa khat numei thiangtho ngawl tuah a zaukawm haw cungcang hangin zui tukte cu a humlam a daante hi.

Currently Selected:

THIAMPI NADEHNAK 15: NBF1

Highlight

Copy

Compare