KAH LA 5
5
Hehpih Kut Thungetnak
1 Topa aw, ka hum uh a hengmi
hi phawkngil zal pahsun.
Hu zo inna, ka zahcaknak uh
muhsak zalin hi.
2Ka ngam uh le ka lo le
lam neihmi uhte cu
ka theih awng uh ngawl tei
khut sungah heng hi.
Ka inn uhte cu ngamdang tei
ta in cang hi.
3Ka pa uhte ngal ten that haw,
ka nu uhte meivong cang haw a,
nu le pa nei ngawl
mi ca-ngahin suak ung.
4Ka intuk uhmi tui ka lei uh kul hi;
ka tuah tuk uhmi thing vang
a man ka piak uh kul.
5Ka ngawng uhah ngawngkol khaihin,
ngamsa bangin
catngawl hilmi ung hi.
Cawlzet nave ung
colh phal haw ma hi.
6Ka nuncak theihnak tuk uhin,
Izipt ngam le Assiria ngamah
an ngenin hawh ung.
7Ka pu le pa uhte cu
a sual haw hangin
thi khawng zo haw hi.
Mahnaven a sualman haw cu
keimuh ten thuak ung.
8Sal sangin, a pha ngawl saw ten
uk haw hi.
A khut sung haw pen a suah theitu,
kuamah um haw ma.
9Mi that theite ngamsung tihkimah
mi suam tukin dim haw
a hih hangin thih lau thahin
an zei in hawh ung.
10Ka ngil uh a kial hangin
ka taksa uhte satik khawng,
ka vun uhte cu thuangthu bangin sa hi.
11Zion Mualhum loli pen
ka zi uhte man haw hi.
Judah khua hempoh ah ka canu uhte
sualpih haw hi.
12Ka hotu uhte pui in,
a ngawng haw pen
awk hum haw hi.
Ka putek uhte vang maizahnak
imah pai haw ma.
13Ka tangval uhte sal bangin,
cang ngawitik haw;
A puak haw mi thing
a ngit leita hangin
ka naupang tualleng uhte cu
lum li haw hi.
14Ka putek uhten a khun meknak haw
khuapi kongka cu
zamsan zo haw hi.
Ka tangval uhten
a tum mek haw mi
tum ngingte cu
zamsan zo haw hi.
15Ka nunnak sung uh pen
lungdamnak pai vawk zo.
Ka nopnak uh le ka lamnak uh cu
lungsiatnakin thek zo.
16Ka tuangkhawn tuk uh
imah umma toh hi.
Ka sual zo uh hangin
siatnak heng hi.
Atu-in cimnak thuak ung.
17Ka thin uh hak leita zo a,
ka hitui uh hangin,
ka mit uh mal zo hi.
18Itahim titale, Zion mual cu vengzet hi,
taisan mi le khualop
a hih toh hangin cingnete
vak kawkawi haw hi.
19Mahnaven, Topa aw,
nang cu kumkhua in kumpi hi ci.
Na bawi khunnak cu kumkhua in,
kho leleng tuk hi.
20Ita kohte nunghek leleng laih nge cim?
Ituk ten kohte phawkleh
tuk nge cim?
21Na lakah pui kikleh zalin,
Topa, pui kiklehtik zalin hi.
Masa laih a, ka sunloihnak uhte
pia kikleh zalin hi.
22Kumkhua in keimuh lawl ngangai
tuk toh cim?
Na thinuknak hi,
a pha hun nei tukma toh maw?
Currently Selected:
KAH LA 5: NBF1
Highlight
Copy
Compare
Share
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
