EZEKIEL 38

Pathian Hiamnam Gog

1 Topa in, 2“Mihing pa, Ezekiel aw, Magog ngam a ummi, Meshek le Tubal uktu bawi Gog lakah a phatngawlnak thu hilhin hi. A lakah,#Mang 20:8; 3Cungnungbel Topa ka otmi bangin hilh inna, ama ngal ing. 4A nung le mai helin, a kha hawah kawizang khaihin, a ngalkapte tuah dokvawk tung. A ngalkap cu a cipuh le a cipuh ngalkapte tuah tam zetin, lumphaw le ngalnam cawi tek haw hi. 5Persia mi, Ethiopia mi le Libia mite a lamah tang haw tuk a, lumphaw le lukhu nei tiptep haw hi. 6Gomer ngam le Beth Togarmah ngam a, ngaldo thei hempoh vang a lamah tangin, miphun dangte vang a lakah tel haw hi. 7Ngalling masa piupeu tukin hilh inna, a ngalkapte cu a thupiakmi bangin mansa tukin hilhin hi. 8Kum ngeipi nungten, miphun tampi tei lak pen hi mihingte munkhatah hulop khawng a hihnak haw tuk le ngallau tuk um ngawlin himdamno in, a umnak ngam haw do tukin thupia tung. Israel mualhum ngam cu kum tampi ngamkhing hi naven atu-in, mi hempoh ngimta zetin, a umnak haw ngam cu do tuk hi. 9Amah le ama lamtangtu a ngalkapte le miphun ten huihpi bangin nuainek haw tuk a, mah ngam cu meingo bangin khuh khawng haw tuk,” ti hi.

10Cungnungbel Topa in Gog lakah, “Mah hun a hen ten thupha ngawlte ngaisungin um tuk ci. 11Ngal kulhtian nei ngawlin khuasungah mengden le ngimta zetin, a ummi, kuamah bawmtu nei ngawlte cu do tum tuk ci. 12A sia awng zomi khuapi tei mihingte cu suamin, a nate lonsak khawng tuk uh ci. Miphun tampi tei lak pen khop khawmmi hi haw a, ngan tampi le na tampi nei in, lei buppi tei lampi tawhdunnakah um haw hi. 13Sheba, Dedan mite le Spain ngam a sumbawltu ten, ‘Mi suam tukin le mi nate lonsak tukin maw na ngalkapte hulawmin mi na do? Sui le ngun, ngan le nate laksakin, mah na laksak mite tuah taivawk tukin tum cim? tin dong haw tuk,’ ” ti hi.

14Cungnungbel Topa in, Gog lakah a otmi hilh tukin keimah hah hi. “Ka mihing Israel mite ngimta zetin, a um haw laihin, 15Miphun tampi lak pen na khop khawmmi a ngilzet le a tamzet na ngalkapte tuah na umnak saklam ngam pen tul tuk ci. Cipuh humah khungin hung khawng haw tuk hi. 16Langkhat lam pen langkhat lam mawk tian ka mihing Israel cu huihpi bangin do tuk ci. Hun a kim ten miphun dang tei lakah akua hing ngim tih langtiknak tukin le nangmu lak a, ka nadehnak hangin ka thianthohnak a lang theihnak tukin ka ngam do tukin ka hahnak beel cu na hi. 17Tanglaihin, ka nadektu Israel profet tei lak pen thuthan ing, mailam hun ten Israel do tukin mi pa kha khat hah tung, ka tihmi cu nangmah ci,” ti hi. Cungnungbel Topa in hilh zo hi.

Pathian In Gog Dantat

18Cungnungbel Topa in, “Gog in Israel a do ni ten ka thinukzet tung hi. 19Ka thinuknak mei bangin a ling laih takin thuthan ing. Mah ni ten Israel ngamah nase zetin hiinhing tuk hi. 20Ngasa, vano le ngamsa hempoh a neu a ngengin, a bokvakmi tian, leihummi hempoh ten keimah lau in, can tawtok haw tuk hi. Mualsangzette kaih haw tuk a, liang sangzette le khua kulhtiante cim khawng haw tuk hi. 21Siatlalnak a phunkim tuah Gog cu a launak tukin bawl tung. Cungnungbel Topa keimah in hilh zo ing. A ngalkapte cu amuh le muh thatdun haw tuk hi. 22Natnak le thisan luannak tuah Gog cu bawlsia tung. Nguah le nial cu mei le kaat mei tuah amah le a ngalkap tei lamtangtu miphun hempoh tei humah buaksuk tung. 23miphun hempoh tei lakah mi thawmngeng ka hihnak le mi thiangtho ka hihnak cu langtik tung hi. Topa ka hihlam cu thei haw tuk,” ti hi.

Currently Selected:

EZEKIEL 38: NBF1

Highlight

Copy

Compare