EZEKIEL 36

Pathian Muicu Israel Humah

1 Topa in, “Mihing pa, Ezekiel aw, Israel mualsang tei lakah thu hilh inna, Cungnungbel Topa Keimah in, a lak hawah ka hilhmi thu hi ngai tukin hilhin hi. 2Israel i ngal ten, ‘Tanglaih mualte khi eimuta zo hi,’ tin tuangkhawng haw hi.

3Profet awn tuah phuang inna, Cungnungbel Topa keima hilhmi hi thanin hi. Elkim ngam ten Israel mualhum ngamte la in, a sim haw ten mi hempoh ten Israel cu nuihsan haw hi. 4Mah hangin Cungnungbel Topa keimah in, elkim ngamte simin, a nuihsan lih haw ten noh mualsang le mualniamte, luino le munlawnte le taisanmi khua tei lakah ka hilhmi hi ngai un.

5Cungnungbel Topa keimah in, elkim ngamte, Edom ngam hum bebelah hilh zo ing. Nuihsan le nautatnak tuah ka ngam cu la in, mun nopte luah khawng haw hi.

6Mah hangin Israel ngamah profet awn tuah phuangin hi. Miphun dang ten zawnsakin, mualphotik haw a, Cungnungbel Topa keimah in, cingin thinuknak tuah ka hilhmi hi. Israel mualte, luino le munlawn tei lakah hilhin hi. 7Cungnungbel Topa keimah in, na elkim ngamte cu zakca le mualpho in um tukin tiam ing. 8Mahnaven na mualsang uh humah thingceh tawtleh haw tuk a, ka mihing Israel nangmu eih tukin ngah tuk hi. Na inn uhah pinpal tuk uh ci. 9Nangmu lamah tang tung a, na ngam uh cu bung lehin, anci cingleh tuk uh ci. 10Na mihing uh vang pungzaitik tung. Khuapi sungah um tuk uh ci a, siatsuah sa mite cu tungdingleh pepel tuk uh ci. 11Mihing le ngamsate vang pungtik tung. Tumasuan sangin mihing tam saw deuhin, cano tampi nei tuk uh ci. Tumasuanin, na umdan sa uh bangin mahlai ah um tuk uh ci a, tumasuan sangin mi khangto in bawl tung hi. Topa ka hihlam thei tuk uh ci. 12Ka mihing Israel cu puikikin, a ngamsung hawah umlehtik tung hi. Nangmu ngam hi tuk a, na cate uh vang ngilkialin um haw tukma hi.

13“Cungnungbel Topa keimah in hilh ing. Miten hi ngam cu a mihingte a eitu le ama ngamsung canote a ngutu ngam hi, tin ti haw hi. 14Mahnaven atu pepanin, mihing cik eitu le mai canote a ngutu hileh tukma toh uh ci. Cungnungbel Topa keimah in hilh zo ing. 15Miphun dang tei cekpan bawlnak le a nuihsan lihnak haw cu hi ngam ten zaleh haw tukma toh hi. Hi ngam ten a miphun i canote vang nguleh tukma toh hi. Topa Pathian keimah in hilh zo ing,” ti hi.

Israel i Nun Thak

16 Topa in, 17“Mihing pa, Ezekiel aw,” Israel mite a ngam sungah a um haw laihin, a nungcang le a bawlmi haw in, a ngam cu nintik hi. Numei cu ha sialin, a numeidan a neih laihin, mithiang ngawlin ngaihsut a hih haw bangin a nungcang haw hi ka mai ah thiang ma hi. 18A ngamsung hawah mi thisan luangtikin le milimte bia in, a nintik haw hangin ka thinuknak cu a hum hawah nase zetin leihsuk ing. 19A nungcang haw le a bawlmi haw hangin lawl ing a, ngam dadangah khen khek khawng ing. 20A hawhnak ngam hempoh ah miten, ‘A Pathian haw i piakmi ngam taisan haw, tin a tih haw hangin ka min thiangtho cu thangnautik haw hi.’ 21Israel miten a hawhnak haw ngam tihkimah keimah a thangnautik haw hangin ka min thiangtho cu pammai sazet ing.

22“Atu-in, Cungnungbel Topa keimah in, a lak hawah ka hilh nuammi thu hi Israel tei lakah hilhin hi. Thil ka bawl tukmi cu Israel nangmuh ka ngaihsut hangin kha ma hi. Na hawhnak ngam tihkimah ka min thiangtho cu thangnautikin, pammai ka sak hang hi. 23Miphun tei lakah ka min cu thangnautikin, a nase zetmi ka min thianthohnak ka langtik ten Topa ka hihlam thei haw tuk hi. Cungnungbel Topa keimah in hilh zo ing. Miphun tei lakah ka min thianthohnak langtiktu tukin nangmuh mang tung. 24Miphun tihkim le ngam tihkim pen nohte kai khawm tung a, nangmu ngamah kihpih tung. 25Tuithiang tuah theh tung a, milim biaknak le a nawngkaitiktu hempoh vang thiangthotik tung. 26Lung thak le thin thak pia tung. Suang bangin a cangmi na lungmu uh cu laksak tung a, niamkhiatnak lungmu pia tung hi.#Ezk 11:19-20; 27Na sung uhah ka hawvang khum tung a, ka daante le ka thupiakmite zui thei tuk uh ci. 28na pu le pa tei lak a, ka piakmi ngam sungah um tuk uh ci. Noh cu ka mihing hi tuk uh ci a, kei cu na Pathian uh hi tung. 29Nangmuh a nintiktu hempoh lak pen hup tung. Na an uh pungzaitikin, pamnak tawkleh tukma toh uh ci. 30Na thingngah uh le na lo sung an uhte pungzaitik tung a, paam ngawltohin miphun tei lakah zakcaleh tukma toh uh ci. 31Na nungcang pha ngawl uh le thil sual na bawl uhte cu phawk kiklehin, na sualnak uh le na mawhnak uh hangin ningdelhdun tuk uh ci. 32Israel mite ka bawlmi hempoh hi nangmuh ka ngaihsut saknak hang hi kha ma, tih hi na theih tukin deih ing. Na bawl uhte hangin zakca le mualpho in um un. Cungnungbel Topa, keimah in hilh zo ing,” ti hi.

33Cungnungbel Topa in, “Na sualnak hempoh pen ka thianthohtik ten na khuasung uhah umlehin, a sia sa mite sa kikleh tuk uh ci. 34Lo a hawhtu hempoh ten na lo uhte cam belbulin, a um cu mu khawng haw naven na lo uhte cu bung lehtik tung hi. 35Ngamkhing a suak sami ngam cu Eden huan bang suahleh hi, tih cu mi hempoh ten mu haw tuk hi. Siatsuah sami, suam sami le zamsan zomi khua cu luahtum lehin, ngal kulhtian tuah a tian khawng cu mu haw tuk hi. 36A suakca calam ngam elkim ten hi khua a tungding lehtu le ngamkhing sungah an a cing lehtu cu Topa keimah hi tih thei haw tuk hi. Mahti bangin bawl tung, tin thu a tiamtu cu Topa keimah hi ing a, bawlsuak tung,” ti hi.

37Cungnungbel Topa in, “Israel mite cu keima lakah bopnak a ngentu miphunin bawlleh tung a, tuuhon bangin pungzaitik tung. 38Jerusalem khuapi cu puai hun ten biakpiaknak tuute a dim haw bangin, khualopin, a suakmi khua hempoh cu mihing dimtik tung hi. Topa ka hihlam cu thei haw tuk,” ti hi.

Currently Selected:

EZEKIEL 36: NBF1

Highlight

Copy

Compare