EZEKIEL 30

Topa In Izipt Dantat Tuk

1 Topa in, ka lakah hilhleh hi. 2“Mihing pa, Ezekiel aw,” profet awn tuah phuang tul inna, Cungnungbel Topa ka otmi cu hi bangin nasezet au in, thanin hi:

A lauhuaimi ni heng tuk!

3Mah ni cu nai zo hi,

Topa in,

a dehnak tuk ni cu

miphun tei ca in khua nim le

haksatnak ni hi.

4Izipt ngamah ngaldonak um tuk hi.

Ethiopia ngamah haksatnak

um tuk hi.

Izipt ngamah mi tampi

thah hi haw tuk hi.

Ngam cu siatsuah khawng

haw tuk a,

ngamkhingin suaktik

haw tuk hi.

5“Mah ngaldonakah Ethiopia ngam, Libia ngam, Lidia ngam, Arabia ngam, Kub ngam le ka mihing tei lak hei pen ngalkap a zawn haw mi tampi thi haw tuk,” ti hi.

6 Topa in, “Saklamah Migdol pen hanglamah Aswan tian, Izipt ngam a huptu hempoh cu ngaldonakah thi khawng haw tuk hi. A muh le muh a muangdun zetmi Izipt ngalkapte cu siatsuah khawng hi haw tuk hi. Cungnungbel Topa keimah in hilh zo ing. 7A ngam haw cu leihum buppi ah ngamkhing belin suak tuk a, a khua haw cu calubuakin suak khawng pilpial haw tuk hi. 8Izipt ngam cu mei tuah haal tung, a huptute thah khawng a hih haw ten Topa ka hihlam thei haw tuk hi.

9“Mah ni cu hengin, Izipt cu siatsuah khawng a hih ten lungmuang zetin, a umtu Ethiopia mitei lakah timbaw tuah kamtaitu hah tung a, Ethiopia mite cu mulling haw tuk hi. Mah ni cu heng pal tuk,” ti hi.

10Cungnungbel Topa in, “Izipt tei hauhnak botiktu tukin Babilon kumpi Nebuchadnezzar mang tung. 11Amah le a ngalkapte cu ngam siatsuahtu tukin hung haw tuk hi. Izipt ngam cu ngalnam tuah do haw tuk a, ngamsung cu miluang tuah dim tuk hi. 12Nail ngunpi kotik tung a, Izipt ngam cu mipha ngawl tei khutnuai ah koih tung. Ngamdangmi ten a ngam buppi haw cu siatsuah khawng haw tuk hi. Topa keimah in hilh zo ing,” ti hi.

13Cungnungbel Topa in, “Memphis a um milimte le pathian manngawlte cu siatsuah khawng tung. Izipt ngamuktu kuamah um haw tukma toh, mi hempoh a thinsutik tung. 14Izipt hanglam a, Pathros khua cu khuaveng zetin koih tung, saklam a um Zoan khua vang mei tuah haal tung. Thebes khua cu dantat tung. 15Izipt ngamsung a kulhtian nasebel a neitu Pelusium khua cu ka thin pulhangnak thuaktik tung. Thebes khua i hauhnak cu siatsuah tung. 16Izipt cu mei tuah haal tung a, Pelusium cu haksatnak thuak tuk hi. Thebes khua kulhtiante cu phelet khawng hi tuk a, khuasung cu tui dim tuk hi. 17Heliopolis khua le Bubastis khua tangvalte cu ngalkhutin thi haw tuk a, midangte cu sal matmi hi haw tuk hi. 18Izipt tei ngilnak cu siatsuahin, a sunsakzet haw mi a tha neihnak haw ka botik ten, Tahpanhes humah khuathim heng tuk hi. Thimnakin Izipt cu khuh tuk a, Izipt ngam khuasung mite hempoh cu ngalmatmi in suak haw tuk hi. 19Izipt ka bawlsiat ten Topa ka hihlam cu thei tuk uh ci,” ti hi.

Izipt Kumpi i Huham Bo

20Sal ka tannak uh kum sawm le kum khat kum, ha khat ha, ni salih ni-in, Topa in ka lakah, 21“Mihing pa, Ezekiel aw, Izipt kumpipa i baan cu ektuah zo ing. Damleh tukin le ngalnam lenleh thei tuk tianin kuamah in somsak ngawlin kensak haw tukma hi. 22Atu in, Cungnungbel Topa keimah in, hi bangin hilh ing. Izipt kumpi i ngal cu keimah ing. A baan langkhat a pha laihmi hihen, a ek zo mi hihen, ektuah tung a, a khut pen a ngalnam cu cak tuk hi. 23Leihum khua tihkimah Izipt mite cu khen khek khawng tung. 24Babilon kumpi baan cu ngiltik tung a, ka ngalnam cu a khut sungah pia tung. Izipt kumpi baan cu ektuah tung a, tau ua-uanin, a ngal tei mai ah liamin, lum u-ung tuk hi. 25Hi zuh hi, amuh cu nawmtamtik tung a, Babilon kumpi cu ngiltik tung. A lakah ka ngalnam cu pia in, Izipt ngam lamah a hek ten mi hempohin, Topa ka hihlam thei haw tuk hi. 26Leihum khua tihkimah Izipt mite cu khen khek khawng tung. Topa ka hihlam cu thei haw tuk,” ti hi.

Currently Selected:

EZEKIEL 30: NBF1

Highlight

Copy

Compare