SUAHTULNAK 30

Namtui Halnak Biaklandawh

(Suah 37:25-28)

1“Zimui namtui halnak tukin thingha tuah biaklan dawh un hi. 2Tong khat sau, tong khat zal, a tung le a vang a canve tong nih sangmi hi tuk hi. Thingzum na bulh uhte cu biaklandawh tuah pehdun khawng haw tuk hi. 3A hum a, a kil pa li le thingzum bulh cu suikhu luan khawng unna, a kimkot cu sui tuah khup un hi. 4A puaknak zawlte lentu tukin suikual pa nih bawl unna, a leklam i nuai, a siklam pa nihah bulh un hi. 5Hi a zawnnak zawl cu thingha tuah bawl unna, suikhu luan un hi. 6Nangmuh ka tawhnak tuk mun, a sin neimi Thutiam Kuang mai a, khai mi puanzak maiah biaklandawh cu na koih un hi. Mahlaiah nangmuh tawk tung hi. 7Aaron in meivak mi a zoh ten mah biaklandawh humah zingsialin zimui namtui haal tuk hi. 8Taklam meivakmi a thek thei ten, zimui namtui cu haal tuk hi. Hi zimui namtui na piak uhmi cu catngawlin bawl leleng un. 9Hih biaklandawh humah a thiangtho ngawl khammi zimui hihen, halkang biakpiaknak a, manmi ngan, an hei hihen, koih pahsuh un, inmi biakpiaknak a man mi tui vang leih pahsuh un hi. 10Kum khatah vei khat, Aaron in thingzum bulhmi pa li tei humah sual ngaihdamnak tukin biakpiaknak a, manmi sathi tuah mah biaklandawh cu thiangthotik tuk hi. Hi vang hi kum sial bawl leleng hi tuk hi. Topa i lak a, piakmi a thiangtho zetmi biaklandawh hi tuk,” ti hi.

Topa i Umnak Puanbuk Ca Siah

11 Topa in Moses lakah, 12“Israel mite mipum na sial uhten Topa i lakah mi hempohin, a nunnak tat lehnak man piata haw hen hi; itahim titale mipum sial laihin, a lak hawah siatsuahnak a hen tuk ngawlnakin hi. 13Mipum sialnak cazin sungah a telmi hempohin cuaikhainak a ciangtan haw mi zahin, Topa i lakah biakpiaknakin pia khawng haw hen hi.#Suah 28:25-26; Mt 17:24; 14Kum sawm nih le a humlam mi hempoh mipum sialnak cazin sungah telhcih a hih hangin hi sumpai cu Topa i lakah pia ten haw hen hi. 15Na nun man uh Topa i lakah na piak uhten mihau ten a tam saw pia ngawlin le mi ca-ngah ten a dem saw pia tih deidatnak um ngawlin bangten pia un hi. 16Israel mi lak pen hi sumpai cu khon unna, Keima umnak Puanbuk sung a, nadehnakin mang un hi. Topa in Israel mite cu a cin lelengnak tukin le na nunnak uh ca in piakmi sumpai cu hi tuk,” ti hi.

Khut le Ke Somnak Daalkuang

17 Topa in Moses lakah, 18“Khut le ke somnak tukin kuang pa khat daal tuak bawl unna, a tawdam vang daal tuah bawl un hi. Khawmnak buk le halkang biakpiaknak biaklandawh laklawhah mah daalkuang cu koih unna, a sungah tui koih un hi.#Suah 38:8; 19Aaron le a capa ten a khut haw le a ke haw somnakin mah tui cu mang haw tuk hi. 20Topa i lakah halkang biakpiaknak bawl tukin pumkhawmnak buk sungah a tum haw ten le thiampi nadekin biaklandawh a nek haw laih ngawlin, tui a bual haw tale thi haw tukma hi. 21A thih haw ngawlnak tukin a khut le a ke cu som hihim haw tuk hi. Hihi cu amuh le a casuan haw tianin, a kumkhua in, a zui leleng haw tukmi daan,” ti hi.

Noih tuk Sathau le Zimui Namtui

22 Topa in Moses lakah,#Suah 37:29; 23“Zimui phun phabelte: cingnai pawng sawm nih, a namtui mi sinnamon thing nai pawng sawm, a namtuimi cutau tui pawng sawm, 24thingha nai pawng sawm nih, biakinn cuai khainak a, khai mi tatak le olif thau khuat nga la un hi. 25Hite cu zimui cokhel thiamtu tei cawhhelmi bangin cokhel unna, thihtuk sathau in mang un hi. Mahmi cu a thiangthomi thihtuk sathau hi tuk hi. 26Hi sathau cu Keima umnak Puanbuk, Thutiam Kuang, 27cangho koihnak cabuai le a nate, meivaknak khuam le a nate, zimui namtui halnak biaklandawh, 28halkang biakpiaknak biaklandawh le a na hempoh, khutsomnak kuang le a tawdamte cu maat khawng tuk uh ci. 29Mahti bangin buk sung a, nate cu Pathian ca tukin na thiangthotik un hi. A thiangtho ngangai mi zehsahin suak tuk hi. Hi nate a zentu hempoh cu a thiangthomi in suak bok haw tuk hi. 30Aaron le a capate cu sathau thih unna, keima thiampi a hih haw theihnak tukin thiangthotik un hi. 31Israel tei lakah, ‘Hi thihtuk sathau thiangtho cu nangmu ca in Khang khat nung Khang khatin situi thiangtho hi tuk hi. 32Mi thawthong humah leih pahsuh unna, hi sathau thiangtho bangin a namtui mi zimui le sathau cokhelin mang pahsuh un hi. A thiangthomi sathau a hih bangin a thiangthomi hi tin ngaisung un hi. 33Hi sathau bawlmi bang cungin, a bawltu le thiampi sialngawl midang humah a mangtu pawpoh cu a miphun sung pen vawk hi tuk hi,’ tin hilhin,” ti hi.

Zimui Namtui

34 Topa in Moses lakah, “Zimui namtui a phunkim: stakte, onikha, galbanum le a sitmi frankinsens zimui tei lak pen a zahve ten la in hi. 35Mahte cu zimui bawl thiamtu tei a bawl haw bangin komno in cokhel inna, zimui namtui in bawlin hi. Mahte cu ciangzet tukin le thiangthotik tukin ci tuah al tikin hi. 36Khenkhat cu zan niknek tukin ngawi inna, khenkhat cu ka tawhnak tuk mun, Puanbuk sung a, Thutiam Kuang maiah biakpiaknakin theh tuk uh ci. Hih zimui namtui cu a thiangtho zetmi in ngaisung un hi. 37Mah zimui namtui cu nangmu ca tukin mang pahsuh un. Hih zimui namtui cu Topa lakah piaksami na thiangtho a hihlam thei un hi. 38Mi pa kha khatin mah zimui namtui bang cu bawlin a mang ahi tale, a miphun sung pen hawlvawk hi tuk,” ti hi.

Currently Selected:

SUAHTULNAK 30: NBF1

Highlight

Copy

Compare