DAAN PIAKLEHNAK 6
6
Thupiak Ngeng
1“Topa na Pathian uhin, nangmuh a zilhtikmi a thu le a daan hempoh cu hite hi. Na luah tuk uhmi ngam na hen uhten hi daante hi zui un. 2Na khansung uh nangmuh le na casuan uhten Topa na Pathian uh cu kihca unna, ka piakmi ama daan zui un hi. 3Maw Israel mite, mah thu cu ngai in, na zui uh tale na lam uh tuangin, na pu le pa tei Pathian, Topa in, a tepsa bangin hinnam ngeng zetin suak tuk uh ci a, khuinawi le khuaihum luannak ngamnopah um tuk uh ci.
4“Maw Israel mite, phano in ngai un! Topa amah pa khat bek hi a Pathian uh hi.#Mk 12:29; 5Topa na Pathian cu na lungmu venghawng, na nunnak venghawng le na ngilnak venghawng tuah it in hi.#Mt 22:37; Mk 12:30; Lk 10:27; 6Tuni a, ka piakmi thukham hi na lungmu sung uhah cam leleng hen.#Daan 11:18-20; 7Na ca uhte zilh sawlawn un. Inn na um ten hihen, pualeu lam na hawh ten hihen, hilh leleng un hi. Na colh ten le na nadeh uh hei ten sal leleng un. 8Na baanah kencih unna, nangmuh khua phawktiktu tukin na calah belh un hi. 9Na inn kongka hum le na kongbiang humah ngan un hi.
Moses In Ngallinnak Pia
10 Topa a Pathian uhin, nangmu sak ngawlmi khuapi ngengzet umnak ngam cu nangmuhte pia tung hi, tin na pu le pa uh Abraham, Isaak le Jakob lakah thutiam hi.#Pian 12:7; 26:3; 28:13; 11Na cum uh ngawlmi na phapha tuah mah khuapi sung cu dim hi. Inn cu na cawh ngawl uhmi tuikhuk um tuk a, na bawl ngawl uhmi sabit huan le olif huan um tuk hi. Topa in mahlai ngamah a henpih hun ten na duhnah uh hempoh khamukin eih tuk na neih uh hun ten, 12sal na tannak Izipt ngam pen nohte a suahtultu Topa cu na phawhngilh ngawlnak tukin cingcai zetin nung un hi. 13Topa na Pathian bek kihca un. Ama na bek dek unna, ama min tuah bekin thutepnak bawl un hi.#Mt 4:10; Lk 4:8; 14Na elkim uh a, minam tei pathian dangte bia pahsuh un. 15Na bia uh tale Topa i thinuknak na hum uhah meipi bangin heng tuk a, cimittik khawng tuk hi, itahim titale Topa na Pathian uh cu nangmuh tuah umin, micing thei Pathian hi.
16Massah mun pen na khingkhai zo uh bangin, Topa na Pathian uh khingkhai toh pahsuh un.#Suah 17:1-7; Mt 4:7; Lk 4:12; 17A piakmi thukham hempoh cu phano in zui un. 18Topa i mai ah a dikmi le a pha mi bawl unna, na lam uh tuang tuk hi. Ngampha cu na pu le pa tei lak a, Topa i thutepmi bangin luahin, 19a tepsa bangin na ngal uhte hawlvawk tuk uh ci.
20Na ca uhten, “Ita Topa a Pathian uhin hi thukham hi zuitik him” tin thu a dot haw ten, 21‘Izipt kumpi kut nuai ah saltangmi hi hung a, Topa in, a baantha ngil tuah ohte cu pan hi. 22Na lamdang tampi le lauhuai nate Izipt mitei humah le Faro kumpi le a khutnuai bawi tei humah a bawlmi cu mu cilcel hung hi. 23Izipt ngam pen suahtulin, a pu le pa tei lak a, thu a tep bangin hi ngam luah tukin hawhpih hi. 24Topa a Pathian uhin hi thupiak le daante cu zui tukin le amah kihcatik hi. Mah bangin a bawl uh tale ohte cu cingkhawi tuk a, khangtotik tuk hi. 25Ama thupiakmi hempoh komno in, a zui thei uh tale Pathian cu a hum uhah lungdamzet tuk hi,’ tin ti un hi,’ ti hi.
Currently Selected:
DAAN PIAKLEHNAK 6: NBF1
Highlight
Copy
Compare
Share
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
