DAAN PIAKLEHNAK 2

Phillawn Ah Kum Ngeizet

1A nungdawlbel ten Topa i thu piaknak bangin kikin, Aqaba tuikel tuan lampi a, um phillawnah hawh hung hi. Edom mualhum ngamah ngeipi vakvai hung hi.#Mipum 21:4; 2Topa in ka lakah, 3“Hi mualhum ngamah ngeipi vakvai zo uh ci, atu-in saklamah hawh toh un,” ti hi. 4A nuailam a daan cu nangmu lakah pia tukin hilh hi: ‘Esau i casuan tei umnak Edom mualhum ngam palthahin hawh un hi. Amuh ten nangmuh lauzet haw tuk hi:#Pian 36:8; 5mahnaven amuh cu do pahsuh un. Itahim titale a ngam haw cu pia tuk mang hi, ke phalh tia hei co tukma uh ci. Edom ngam cu Esau i casuan tei lakah pia zo ing. 6An le tui cu lei thei tuk uh ci,’ ti hi.

7 Topa na Pathian uhin, na bawl uh hempoh ah muicu pia hi tih cu cing leleng un. Hi tihzah a, na vahvaih sung uh hempoh amah in cingkhawi hi. Kum sawm li liangluang nangmu lakah umin, sapmi nei awng ma uh ci.

8“Mah hangin Elath khua le Eziongeber khua lampi zui in hawh hung a, Tuipi Thi ah heng hung hi, mahlai pen saklam Moab ngam lamah hawhleh hung. 9Topa in, ‘Lot i casuan Moab mite cu dondak kha pahsuh un. A do hei do pahsuh un. Ar khuapi cu amu lakah pia zo ing, mah hangin a ngam haw cu demno hei na co tuk uh umma hi,’ ti hi,” tin hilh hi.#Pian 19:37;

10Ar khuapi ah Emim a tih haw mi tawmi bang mi ngengzet phun hi bok haw hi. 11Anakim cu Refaim tihvangin sam haw, mahtih bangin Emim vang Refaim tin sam bok haw hi. Mahnaven Moab miten Emim tin sam haw hi. 12Edom ngamah Hor mite um haw naven, Israel miten Topa i piakmi ngamsung a, ummi a hawlvawk haw bangin Hor mite cu Esau i casuan ten hawlvawkin, a hinnam haw siatsuahtikin, a ngam haw vang luah hawta hi.

13“Topa i hilhmi bangin Zered ngun cu tan hung hi. 14Kadesh Barnea pen tulin Zered ngun a tan uh tian, kum sawm thum le kum liat ngei hi. Topa i hilhhamnak bangin mah sung pen ngaldo thei pano hempoh cu thi khawng haw hi.#Mipum 14:28-35; 15Topa in, pa khat hei luat ngawlin a thih khawng haw tian, bawlsia hi. 16“Ngaldo thei pano hempoh a thih khawng haw ten, 17Topa in ka lakah, 18‘Tuni in Ar khua lampi tawnin, Moab ngam cu palvawk tuk uh ci. 19Lot i casuan Ammon mitei ngam el heng tuk uh ci a, amuhte cu dondak pahsuh unna, a do hei do pahsuh un. Itahim titale a lak haw a, ka piakmi ngam cu demno hei na lak uhah pia tuk mang hi,’ ” tin ti hi.#Pian 19:38;

20Mah ngam cu Refaim mite a um awng zo haw toh hangin, Refaim ngam tih vangin sam haw hi. Ammon miten Zamzummim tin sam haw hi. 21Amuh cu Anakim bangin dingsau tamzet haw a, ngil vang ngilzet haw hi. Mahnaven Topa in siatsuah khawngin, a ngam haw cu Ammon miten lonsakin luah haw hi. 22Mahti bang lelengin Edom mualhum ngam a, um Esau casuan Edom mitei humah Topa in, na bawl zo hi. Hor mite cu siatsuah khawngin, a ngam haw cu Edom miten longin luah khawng haw hi, mah hangin tuni tianin mahlai munah umta haw hi. 23Krete tuikulh a, ummi ten hanglam ngamah Gaza tian khuano a, um Avvim mite cu siatsuah khawngin, a ngam haw lonsakin luah khawng haw hi.

24 Topa in, “Atu-in tho unna, Arnon ngun cu tan un. Amor mi, Heshbon kumpi Sihon cu a ngam hempoh tuah na khut sung uhah pia zo ing. Amah cu do unna, a ngam cu luah un. 25Tuni pepan khua le ngam hempoh a mihing tei humah nangmuh launak umtik tung hi. Na min uh a lawh thawthong haw pohcawmin, mi hempoh cantawtokin lau haw tuk hi”.

Sihon Nehnak Thu

(Mipum 21:21-30)

26“Kedemoth phillawn pen Heshbon kumpi Sihon lakah palai hahin, hi bangin lemdaihnak thucah ing hi: 27‘Na ngamsung pen hawhtik zalin hi. Ka hawhnak uh lampi pen pial ngawlin hawh vawk tuk poh ung. 28An ka eih uhmi le tui le ka in uhmi man cu kimno in pia tuk poh ung hi. Topa ka Pathian uh i piakmi ngam heng tukin Jordan ngun ka tan uh tianin, 29na ngamsung pen hawhvawk tuk bek hi, ka deih uhmi hi. Edom a, um Esau casuante le Ar khua um Moab miten a ngamsung haw pen hawhvawktik zo haw hi,’ ti ing.

30“Mahnaven Kumpi Sihon in, a ngamsung pen hawh tuk cu phal ma hi. Amah a nehnak tuk uhin le atu a luah uhmi a ngam hi a lak theihnak tukin Topa na Pathian uhin, a lungmu kho tukin mi langpangtu hitik hi.

31“Topa in ka lakah, ‘Zo hemin, Kumpi Sihon le a ngam cu nangmuh do theitu hi haw ma toh hi. A ngam cu la inna, luah khawngin hi,’ ti hi. 32Sihon le a ngalkap cu eimuh do tukin Jahaz khua elah heng haw hi. 33Mahnaven Topa a Pathian uhin, Sihon cu a khut sung uhah a koih zo toh hangin, amah cu thatin, a capate le a ngalkap tianin that khawng hung hi. 34Mah hun lelengin, a khuapi haw hempoh cu la in, siatsuah khawng hung, numei, naupang le a venghawngin that khawng hung, a suakca pa khat hei um haw ma hi. 35A ngan haw vang laksak khawngin, a khuapi haw suam khawng hung hi. 36Topa a Pathian uhin nehnak pia in, a khuapi hempoh, Arnon ngun el a, um Aroer khua pen Gilead tian, ngun mawk a, um khua tianin, la khawng hung hi. A khua upnak kulhtiante cu simsial tak ma hi, sang leita tih tuk pa khat hei umma hi. 37Mahnaven Topa a Pathian uhin, hawh tuk ngawlin a kham mi ngam, Ammon ngam elkim, Jabbok luimawk, mualhum ngam khuapi le a dadang munah hawh ma hung hi.

Currently Selected:

DAAN PIAKLEHNAK 2: NBF1

Highlight

Copy

Compare