DAAN PIAKLEHNAK 15

Ngaihdam Kum

(Thiam 25:1-7)

1“Kum salihnak a kim sial ten, na hum uh a leibatu cu phiat mai unna, ngaidam un hi. 2Na ngaihdam daan tuk cu hi bangin hi. Nangmu lak pen pa kha khatin, a unau Israel mi lakah sumpai a coih ahi tale ngaidam hen hi. Leiba cu sot toh pahsuh hen, itahim titale Topa amah in leiba phiahmai kum hi tin, ti zo hi. 3Ngamdang mitei leiba cu sot un hi; mahnaven nangmu Israel hinnam tei sung pen leiba cu sotleh toh pahsuh un.

4“Topa na Pathian uhin, a piak tukmi ngamah muicu pia tuk hi. Tuni ka thupiakmi zui in, ama thu komno in, na ngai uh tale, 5nangmu lak pen mi ca-ngah le mi cimkham um tukma uh ci. 6A tep bangin Topa in muicu pia tuk hi. Minam tampi tei lakah sum coih tuk uh ci, mahnaven, noh ten kuamah i lak hei pen sum leicawi pahsuh un. Minam tampi uk tuk uh ci, nangmuh cu kuamah in uk haw tukma hi.

7“Topa na Pathian uhin, a piak tukmi ngamsung khua pa kha khatah na hinpih uh Israel mi ca-ngahin bop a kul tale ihcilzet le bawm nuam ngawlin um pahsuh un.#Thiam 25:35; 8A kulzahin bawm unna, phal zetin coih un. 9Leiba phiahmai kum a nai hangin bawm nuam ngawlin um hihim pahsuh un. Mahtibang ngaihsutnak pha ngawl cu na lungmu sungah tumtik hihim pahsuh un. Na bawm nuam uh ma tale Topa i lakah au in ngen tuk a, nangmu dehvo hi tuk hi. 10Phalzet le thatho zetin pia un, ihempoh ah Topa in muicu pia tuk hi. 11Israel minam sung pen mi ca-ngah, mi cimkham le bop kulmi um leleng haw tuk hi, mahmi tei humah lawithiam un, tin thupia ing.”#Mt 26:11; Mk 14:7; Jn 12:8;

Salte Zoh Daan

(Suah 21:1-11)

12“Israel mi pa kha khat pano hihen, numei hihen nangmu sal hi tukin a zuakdun cop ahi tale kum luk sung nangma na a deh nungten kum salihnakin suakcatik hihim un hi.#Thiam 25:39-46; 13Mahti bangin na suahcaktik ten khut thacangin hawhtik pahsun. 14Topa Pathian i muicu a piakmi sung pen tuu, an le sabit thangkai zetin, na pia in hi. 15Nohte cu Izipt ngamah saltangin Topa na Pathian uhin, a suahcaktikmi ngaisung un; mah hangin hi bangin thu ka piaknak hi.

16“Mahnaven na salpa le na salnu in suakca tuk nuam ngawlin nangmah le na innkuapihte it in, nangma lak um tuk a lungkim leng tale, 17na inn kongka ah hawhpih inna, a bengvit inna, a nunsung hempoh na sal hi tuk hi. Na salnu vang mahtibang lelengin bawlin hi. 18Na sal na suahcaktik ten na ngaihsut hak pahsun; a ngangai titale nilawh pia in, na lakmi umlawh i nilawh a langbek tuah kum luk sung na nadeh sak zo hi. Mah hangin lungdamno in hah inna, Topa na Pathian in, na thil bawlmi hempoh ah muicu pia tuk hi.”

Khui le Tuu Catawntil

19“Topa na Pathian uh ca tukin, na khui le tuu tei catawntil a pa cu koih un, hih khui cu nadehnakin mang pahsuh un, tuu vang a mulmet pahsuh un.#Suah 13:12; 20Kumsialin mah khui le tuu cik cu Topa i mitmuh, amah biaknak munah na innkua hawngin ei un hi. 21Mahnaven mah ngan cu tingsapnak pa kha khat nei in, a kebai, a mitcaw, ahimata sonbangnak a nei tale Topa i lakah biakpiaknak tukin pia pahsuh un. 22Mahti bang ngante cu innah ei saw un. 23Mahnaven thi cu ei ngawlin, mah sangin tui bangin leihumah lei un hi.”#Pian 9:4; Thiam 7:26-27; 17:10-14; 19:26; Daan 12:16, 23;

Currently Selected:

DAAN PIAKLEHNAK 15: NBF1

Highlight

Copy

Compare