DAAN PIAKLEHNAK 12

Biakpiaknak Tuk Mun Pa Khat

1“Topa in, na pi le pu tei Pathian in, a piakmi ngam luahtumin, mah ngam sungah na um sung hempoh uhin, na zui tuk uhmi daan le thukham cu hite hi. 2Na luahtum tuk uhmi ngammi tei pathian dang biaknak mun mualsang le mualbo, thingnuaite ah hihen a biaknak mun hempoh cu siatsuah khawng un hi. 3A biaklandawh phelet khawngin, a biaknak suangphut sukeh khawng un. Zehsah thingphut mi Asher cu haal khawng unna, hilai munah a pathian dang a biakleh ngawlnak tukin a milim cek keh khawng un.”#Daan 7:5;

4 Topa na Pathian uh cu hih hinnam tei pathian dang a biak haw bangin bia pahsuh un. 5Topa in, na hinnam venghawng uhin ngamsung pen ama umnak tukin mun pa khat teng tuk a, mahlaiah hawhin bia un hi. 6Mahlaiah na biakpiaknak hempoh uh halkang biakpiaknak, na sumpi uh le na piak uhmi a dadang, Topa piak tukin na tep uhmi laksawng, thinthawhnak tuah na piak uh biakpiaknak na khui uh le na tuu tei catawntil cu pia un hi. 7Mahlai mun, Topa na Pathian uh i maiah muicu pia tuk a, nangmah le na innkua hawng uhin an na eih uh sial ten na lung uh dam tuk hi; itahim titale Topa na Pathian uhin muicu pia zo hi.

8“Mah hun a hen ten masalam a na bawl uh bangin bawl toh pahsuh un. Tumasuanin, a kuakua hei in, nuam poh bawlin ngamta uh ci; 9itahim titale Topa na Pathian uh i piakmi, lemdaihnak ngam heng ma laih uh ci. 10Jordan ngun na tan uhten, Topa in ngam cu luahtik tuk a, ngiahbuk sam tuk uh ci. Na ngal tei khut sung pen hup tuk a, ngimta zetin um tuk uh ci. 11Topa in ama umnak tukin le na biaknak tuk uhin mun pa khat teng tuk a, mahlai munah ama piaktikmi hempoh, na biakpiaknak uhte, halkang biakpiaknak, le biakpiaknak dadang, na sumpi uh le na piak uh mite, na thutep uhmi laksawng cu Topa i lakah pia un hi. 12Topa na Pathian uh i mai ah na canu le capate, na umlawh le khuasung a, ummi Levi mite tuah lungdamno in um un. Levi mite cu co mi leingam a neih haw ngawl hangin hi. 13Na nuamnak mun pohah biakpiaknak bawl pahsuh un; 14Topa in nangmu hinnam tei ngam sungah mun pa khat teng tuk a, mahlai munah biakpiaknak bawl un. Mahlai bekah biakpiaknak bawl unna, ka thupiakmi bangin bawl khawng un hi.

15Mahnaven ilai munah na um uh hei in, na ngan uhte cu ngo in ei un hi. Topa i a piak zahin ei un. Na venghawng uhin mi thiangtho hihen, thiangtho ngawl hei hihen ei khawng un; sazuk cik le sakhi cik na eih uh bangin ei un. 16Mahnaven a thi cu ei pahsuh un hi. Tui bangin leihumah lei un hi.#Pian 9:4; Thiam 7:26-27; 17:10-14; 19:26; Daan 15:23; 17Na umnak mun pawpoh pen na sumpi piakmi an, sabit le olif situi cu ei pahsuh un. Topa i lakah na piakmi hempoh, na khui le tuu tei catawntil, Topa i lak a, na thutep uhmi laksawng, thinthawhin, na piak uh biakpiaknak le biakpiaknak dadang vang ei pahsuh un. 18Hi biakpiaknak cu nangmuh le na canau uhte, na umlawh uhte le na khuasung a, um Levi mite tuah Topa na Pathian i mitmuhin amah biakpiaknak munah lungdamno in mahlai pen ei un hi. 19Ngamsung a, na um sung hempoh uhah Levi mite cu hahsuah pahsuh un.

20“Topa na Pathian in, a tep bangin, na ngam uh a zal dedeuh tale na nuamnak mun hempoh pen an cu ei thei tuk poh uh ci. 21Pathian biaknak mun a khawla leita ahi tale, ka thupiakmi bangin, Topa i piakmi khui le tuu cu ngo unna, na nuamnak inn uh pen a cik cu ei un hi. 22Akua hei hihen mi thiangtho le a thiangtho ngawl hihen sazuk cik le sakhi cik a eih bangin ei tuk hi. 23A cik na eih uhten a thi cu ei hihim pahsuh un hi, itahim titale thi cu a nunnak a hih hangin a cik le a thi cu ei langkhat pahsuh un.#Thiam 17:10-14; 24Thi cu ei pahsuh un. Tui bangin leihumah lei un hi. 25Thi na ei uh ma tale Topa cu a lungdam tuk a, nangmuh le na canau tei lamtuang tuk hi. 26Na biakpiaknak uhte le Topa i lak a, na thutepnak uh laksawng cu Pathian biaknak munah hunpih un. 27Halkang biakpiaknak cu Topa i biaklandawh humah a thi le a cik tuah pia unna, biaklandawhah a thi theh tuk nave uhcin, a cik cu ei un hi. 28Topa na Pathian i mitmuhin, a pha le a dik mi tuah nungca in, a thupiakmi na zui uh tale, kumkhua in nangmuh le na casuan tei lam cu tuang tuk hi.

Milim Bia Pahsuh Un

29Ngal na do uhten Topa na Pathian uhin hih minam cu siatsuah tuk a, a ngam haw luahtum tuk uh ci. 30Topa in, a siatsuah khawng ten a biaknak haw i zolkhak tuk ngawlin ngalling un; a thu haw na cung uh tale pailal tuk uh ci. Amuh bangin bia bok tuk hung, tin ti bok thawthong pahsuh un. 31Topa na Pathian uh cu milim bia tei biak bangin bia pahsuh un. Itahim titale milim biaknak cu Topa i deih ngawlmi le ningdelhmi hi. A canu le capa haw tianin, biakpiaknakah pia in, a biaklandawhah haal hum haw hi.

32Ka thupiakmi hempoh cu zui khawng un; imah bet pahsuh un, pa khatno hei zam pahsuh un.#Daan 4:2; Mang 22:18-19;

Currently Selected:

DAAN PIAKLEHNAK 12: NBF1

Highlight

Copy

Compare