ZECHARIAH 7
7
A Kineitawm Antanna Kimawsah
1Kumpi Darius in a uh a kum lina, Chislev a kici a hla kuo na, a ni li ni-in, Zechariah tungah Topa’ thu tung hi. 2Tu-in Bethel mite in Sharezer le Regem-melech, a mite utawh Topa’ tungah a thum dingin a sawl vua, 3Vanglien Topa’ inn sunga siempute le kamsangte kungah, “Kum tampi sung ka bawlsa bangin a hla ngana sung kapin antang lai ding ka hi uh amah?” ci-in a dongsah hi. 4Tua ciengin ka kungah Topa’ thu ang tung hi: 5Gam sung mi zosie le siempute kungah tam bangin gen in: Tam kum sawm sagi sung a hla ngana le a hla sagina sungin an tangin na kaa uh ciengin tua khu kei adinga antang na hi uh amah? 6Note in na neh na dawn uh ciengin noma dinga an ne tui dawn hi lo na hi uh amah? 7Jerusalem ah mite tengin a kimvela khuote tawh a nopsah lai le Negeb le Shephelah ah mite a ten lai-in kamsangte tungtawnin Topa thugente tam thute ma hi lo amah?
Pasien’ Kalhte Nielna Zieha Dan Thuohna
8Zechariah tungah Topa’ thu tungin tam bangin ci hi: 9Vanglien Topa in tam bangin gen hi: A manin thukhen unlen khatlekhat tungah migitna le hepina kilah un. 10Meigong, taga, pemta, ahi sihle mizawngte gawt sih un; na lungsim sung vuah khatlekhat kisietsah nading gel sih un. 11Hizongle amate in ngai nuom loin lungkhau tahin a liengko uh a heisan vua, a zah lo nadingun a bil a hum uhi. 12Thukham le Vanglien Topa in kamsang masate tungtawnin ama’ hlagau tawh a gen thute a zah lo nadingun amate in a lungsim a khausah uhi. 13Keima#7:13 Heb “ama” in amate ka hlat ciengin a zah lo uh bang lienin amate in keima ei hlat ciengun ken zong ka za sih ding hi, Vanglien Topa in ci hi. 14Tuale keima in a thei ngai nai vawt lo uh minamte lahah amate pumpei tawh ka thezah ding hi. Tua bangin a nuasie uh leitang gamkhing suoh a, tuaci’n gam nuom kimlai koima’ suhva tova nawn lona gamdai a suohsah uhi.
Currently Selected:
ZECHARIAH 7: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
