KILAHNA 10
10
Vantungmi le Laiziel Neu
1Tuale vantung panin a thahat adang vantungmi khat ang kumsuh ka mu a, ama meiipi-in a kituom a, a lu tung sonah sakhi-guihlung khat a om hi; a maitang ni bangin tang a, a kengte meikuong khuompite tawh kibang hi. 2A khut sungah laiziel neu khat phensa-in a tawi hi. Tuipi tungah a zietlam keng nga-in leitungah a veilam keng nga a, 3humpi hawh bangin a hawh vapuoh hi. A hawh ciengin vanto sagite aw ang ging hi. 4Vanto sagite ang gin zaw ciengin kei zong a giel dingin ka kisa leh, “Vanto sagite’ thugente giel sinlen imcip in,” ci-in vantung panin aw khat ka za hi. 5Tua ciengin ka musa tuipi tung le leitunga a ding vantungmi in,
van lamah a zietlam khut lamto-in
6kumtawnin a hingzing pa,
vantung le a sunga omte, leitung le a sunga omte, tuipi le a sunga omte a siempa tawh kiciem hi: “A kiheh nawn sih ding hi, 7ahi vangin a sagina vantungmi in a pengkul ang mut ding ni ciengin ama in kamsang ama’ nasemte#10:7 Gk “silate “ kungah a tangko ma bangin Pasien’ thusim ang tangtung ta ding hi,” ei ci hi.#Pei 20:11; Thkna 32:40; Dan 12:7; Amos 3:7
8Tua ciengin vantung panin ei kihopina aw khat ka zakia a, “Pei inlen tuipi tung le leitunga a ding vantungmi khut sunga a kiphensa laiziel va la ta’n,” ei ci hi. 9Tuaci’n vantungmi kungah ka pei a, tua laiziel neu ei pie in, ci-in ka gen hi; tuale ama in keima kungah, “Tami la inlen ne in; na gilpi sungah ang kha ding a, hinanle na kam sungah khuoizu bangin ang hlum ding hi,” ei ci hi. 10Tuaci’n vantungmi khut sung panin tua laiziel neu la-in ka ne hi; ka kam sungah khuoizu bangin hlum a, ahi vangin ka neh zaw ciengin ka gilpi a khasah hi.#Ezk 2:8–3:3
11Tua ciengin amate in keima kungah, “Nang in mi tampite, minamte, ham tuomtuomte, le kumpite tawh kisai genkholnate, na genkia pelmaw ding hi,” ei ci hi.
Currently Selected:
KILAHNA 10: ZBOTF01
Highlight
Copy
Compare
Share
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
