GAMLAH VANA 31
31
Midian-te tawh Kidona
1 Topa in Moses hopi-in ama kungah, 2“Midian-te tungah Israel-te’ phu la in; tua zaw ciengin na mipite kung na zuon ding hi,” a ci hi. 3Tuaci’n Moses in mite kungah, “Midian-te tungah Topa’ phulahna a sem ding, pei-in Midian-te a do dingin na mite pawlkhat galhiem guon un. 4Israel minamte lah panin galdo dingin nam khatah mi tulkhat ta na kuonsah ding uhi,” a ci hi. 5Tuaci’n Israel tul tampite lah panin minam khatah tulkhat ta kidong a, gal do dingin mi tul sawm le tulni galhiem kiguon hi. 6Moses in amate, minam khatah tulkhat ta, a khut sungah biehinn vanzahte le patau kona pengkulte a tawi siempu Eleazar’ tapa#31:6 Gk: Heb ah “gal sungah” ci-in kibelap hi. Phinehas tawh galdo dingin a kuonsah hi. 7Topa in Moses a thupieh bangin Midian-te a do vua, pasal zosie a that uhi. 8A mi tha uh adangte banah Midian kumpi nga teng: Evi, Rekem, Zur, Hur, le Reba a that uhi; amate in Beor’ tapa Balaam zong namsau tawh a that uhi. 9Israel-te in Midian numeite le a tasente salin a man nuhi; amate in a tuuhonte ule a na zosie uzong galvan lahin a la sieng uhi. 10Amate in a tenna uh khuopite le a giephuol zosie uh mei tawh a haltum vua, 11ahi vangin gal sunga a mat zosie uh, mihing le ganhingte a peipi sieng uhi. 12Tua ciengin Jericho mun Jordan gei, Moab zanglei giephuola om Moses, siempu Eleazar, le Israel mihonpite kungah a galmatte ule a vanlahte a tut uhi.
Galdona Pan Kilekia
13Moses, siempu Eleazar, le mihon makai zosie zong giephuol pulamah vai dawn dingin a pei uhi. 14Galdona pana ang pei mi tul tampi a uhte le mi za tampi a uh galkapmangte tungah Moses lungthah hi. 15Moses in amate kungah, “Numei zosie na hinkhawi uh amah? 16Tam sunga om numeite in Peor vai-ah Balaam’ thuhilna ziehin Topa tungah Israel-te a zuoutatsah vua, tuaci’n Topa’ mihonte lahah gimna a tung hi.#Gam 25:1-9 17Tua ahi ziehin tu-in nausente lahah pasal poma that unlen, pasal tawh a lumtonsa numei poma zong that un. 18Ahi vangin pasal tawh a lumton nai lo ngahnuno zosie noma dingin hingkhawi un. 19Ni sagi sung giephuol pulamah om un; mi khat po a that ahi sihle misi luong a thamkha poma in a ni thum ni le a ni sagi ni-in noma le na galmatte uh na kisiensuo ding uhi. 20Na puon zosie uh, savun tawh kibawl na zosie, keel mul tawh kibawl na zosie le sing tawh kibawl na zosie na siensuo ding uhi,” a ci hi.
21Siempu Eleazar in gal sunga kuon galkapte kungah tam bangin a gen hi: “Topa in Moses a thupieh thukham ngaina tami ahi hi: 22Kham, ngun, sumngo, sia, langva, le hangeh, 23mei a do zo poma mei-ah kihalin a sieng hi ding hi. Ahi vangin siensuona tui tawh zong kisiensuo ding hi; tuale mei a do zo lo poma tui tawh kisiensuo ding hi. 24A ni sagi ni-in na puonte uh sawpin a siengtho na hi ding uhi; tua zaw ciengin giephuol ah na pei thei ding uhi,” a ci hi.
Galmatte le Vanlahte Hawmna
25 Topa in Moses hopi-in ama kungah, 26“Nangma, siempu Eleazar, le mihonte’ pupa innkuon lutang teng in gal sunga kiman teng, mihing le ganhing, a ni-in sim un. 27Gal van kingate khen ni suo unlen, gal kuon galhangte le mihonte hawmpieh un. 28Topa’ sieh dingin gal a kuon galhangte’ satanh panin mihingte, bawngtangte, laate, tuuhonte ahi sihle keelte zanga ciengin khat ta tuomkoi un. 29Tua lah panin alang la-in Topa tunga biehna dingin siempu Eleazar tungah pie un. 30Ahi vangin Israel-te’ nga alang sung panin mihingte, bawngtangte, laate, tuuhonte ahi sihle keelte-ganhing zosie- sawmnga ciengin khat ta la-in Topa’ biehbuh a kem Levi-te tungah na pie ding uhi,” a ci hi.
31Tua ciengin Topa in Moses a thupieh bangin Moses le siempu Eleazar in a bawl uhi.
32Galkapte in a lah zaw ciengin vanlah a omlaite a gawmin: Tuutang tul zaguh le tul sawmsagi le tulnga, 33bawng tul sawmsagi le tulni, 34laa tul sawmguh le tulkhat, 35le pasal tawh a lumton nai lo ngahnuno a unpi-in tul sawmthum le tulni ahi hi.
36Gal kuonte’ nga ahi tanh alang pen tuu tul zathum le tul sawmthum le tulsagi le zanga hi a, 37Topa’ sieh ding pen tuu zaguh le sawmsagi le nga ahi hi. 38Bawng tul sawmthum le tulguh hi a, tua lah panin Topa’ sieh ding pen sawmsagi le ni ahi hi. 39Laa tul sawmthum le zanga hi a, tuate lah panin Topa’ sieh ding pen sawmguh le khat ahi hi. 40Mihing tul sawm le tulguh hi a, tuate lah panin Topa’ sieh ding pen mihing sawmthum le ni ahi hi. 41Topa in Moses a thupieh bangin Moses in siempu Eleazar tungah Topa bieh nading siekaih a pie hi.
42Galkapte tung panin Moses in Israel-te tanh dinga a khenkhiet alang teng ahile, 43mihonte’ tanh alang teng pen tuu tul zathum le tul sawmthum le tulsagi le zanga, 44bawng tul sawmthum le tulguh, 45laa tul sawmthum le zanga, 46le mihing tul sawm le tulguh ahi hi. 47Moses in Israel-te’ nga alang sung panin mihing le ganhing sawmnga ciengin khat ta la a, Topa in Moses a thupieh bangin Topa’ biehbuh a kem Levi-te tungah a pie hi.
48Tua ciengin galkap a tul tampite tunga uliente ahi, tul tampi a uhte le za tampi a uhte, Moses kungah a pei vua, 49“Ko na nasemte in ka uhna nei vua om galhangte ka sim zo ta vua, khat zong a pelem ka om sih uhi. 50Topa mai-ah kote dinga thoidamna bawl nading, Topa’ biehna dingin kham tawh kibawl nate, banbulte le tauciente, min gielna khutsipte, bilbate, le khite, ka mu ciet uh kang tawi uhi,” a ci uhi. 51Moses le siempu Eleazar in amate tung panin khutsiemna tawh kibawl kham zosie a sang uhi. 52A tul tampi a uhte le a za tampi a uhte tung pana kinga Topa’ tunga a pieh uh khamte a unpi-in shekel tul sawm le tulguh le zasagi le sawmnga gih hi. 53(Galkapte in amate ading ciet van a kilah uhi.) 54Tuaci’n Moses le siempu Eleazar in a tul tampi le a za tampi a uhte’ tung panin khamte a sang vua, Topa mai-ah Israel-te a kiphaw nadingin kikhopna buh sungah a koi uhi.
Currently Selected:
GAMLAH VANA 31: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
