GAMLAH VANA 18
18
Siempute le Levi-te’ Mawpuohna
1 Topa in Aaron kungah tam bangin a gen hi: Mun siengtho tawh kisai-a mawsahna teng nang le na tapate le na pupa innkuonte in na puo ding vua, siempu nasepna tawh kisai-a mawsahna teng nang le na tapate beh in na puo ding uhi. 2Thuciemna#18:2 Ahi sihle “kipawlna, ahi sihle “thuciemna”; Heb “eduth” puonbuh mai-ah nang le na tapate na op laitahun no ang pawl ding le note’ na ang sep hu thei nadingun na pate nam ahi Levi minam na sanggamte zong zawpi in. 3Amate in note’ nasep le puonbuh nasep zosie sem ding uhi. Ahi vangin mun siengtho ahi sihle maitam vanzahte nehin a pei sih ding uhi. A pei uleh amate le note na ni-un na si ding uhi. 4Amate in kikhopna puonbuh vaipuoh teng a sem dingin note hing pawlin kikhopna puonbuh nasep zosie sem ding uhi; a pulam mi koima in ang neh sih ding uhi. 5Israel-te tungah lungthahna a tun ngai nawn lo nadingin noma ma in mun siengtho nasepte le maitam nasepte na sem ding uhi. 6Tu-in Israel-te lah pan na sanggam uh Levi-te a la pa keima ka hi hi; tu-in ahile amate pen kikhopna puonbuh nasep a sem dinga Topa tunga kipumpieh noma’ letsong ahi hi. 7Ahi vangin nang le na tapate in maitam tawh kisai na zosie le dalna puon sunga om na zosie-ah na siempu nasep uh kintahin na sem ding uhi. Na siempu nasep uh pen letsong-a#18:7 “letsonga kipie nasep bangin “ kang pieh ahi hi; ang nai a pulam mi poma kithat ding hi.
Siempute’ Tanh
8 Topa in Aaron tam bangin a hopi hi: Keima tunga ei kipie biehnate ahi Israel-te’ letsong siengthote a sai dingin nang kang koi zo hi; nang tung le na tapate tungah siempu tanh ahi zing dingin tuate kang pie zo hi. 9Mei tawh a kihal dingte lah panin nang dinga a kihen, a siengtho pen nate in: sil siengtho pena kei kunga ei pieh uh a biehna zosie uh, an tawh biehna, mawna zieha biehna, le khielna zieha biehnate, nang le na tapate-a’ hi ding hi. 10A siengtho pen na khat bangin tuate na ne ding uhi; pasal kici poma in ne thei ding hi; tua khu note dingin a siengtho hi ding hi. 11Tam zong khu noma-a’ ahi hi: Israel-te’ a kivei biehna letsongte zosie sung panin a kituomkoi poma nang le na tapate le na tanute’ kaih ahi zing dingin tuate kang pie hi; na inn sunga a siengtho mi popo in ne thei ding hi. 12Keima in sathau tuituoh pen teng, lenggazu le an a tuituoh pen teng, Topa tunga amau’ pieh a tuituoh pen ante, note kang pie zo hi. 13Topa tunga a tawi uh, a leitang vua a pieng ga masa zosie noma-a’ hi ding hi; na inn sunga om a siengtho mi popo in ne thei ding hi. 14Israel-te sunga ki-ap na vannuoi noma-a’ hi ding hi.#Siem 27:28 15Topa tunga kipie naubu phukeh masa zosie, mihing hile ganhing hile noma-a’ hi ding hi; hizongle mihing tacil pen khu na tanh ding vua, ganhing sieng lo tacil zong na tanh ding uhi. 16Hla khat pana kituot tuate tatman pen mun siengtho shekel tawh kizui-in ngun shekel nga-in na se ding uhi. (tua khu gerah sawmni ahi hi.) 17Ahi vangin bawng tacil, ahi sihle tuu tacil, ahi sihle keel tacilte na tanh sih ding uhi; tuate a siengtho ahi hi. Maitam tungah tuate na the ding vua, Topa tungah a gimnamtui, mei tawh kihal biehna-in tuate’ thau na hal ding uhi; 18hizongle a kivei a awmsa le a mal zietlam khu noma-a’ ahi ma bangin a sate zong noma-a’ hi ding hi. 19Topa tunga Israel-te in a pieh a siengtho biehna zosie, keima in nang le na tapate le na tanute tungah na kaih zing ding vua kang pieh ahi hi; tami khu nang le na suonlehlahte adingin zong ci tawh Topa mai-a tawntung thuciemna ahi hi. 20Tua ciengin Topa in Aaron kungah tam bangin a gen hi: Amau’ gamah luo na nei sih ding a, amate lahah bangma tanh zong na nei sih ding hi; nangma’ tanh keima ka hi a, Israel-te lahah nangma’ luo ka hi hi.
21Kikhopna puonbuh sungah keima in a na sepna uh ka thuhkiana-in Israel gam sunga sawm-ah-khat zosie amau’ luo dingin Levi-te tungah ka pie zo hi.#Siem 27:30-33; Thkna 14:22-29 22Tu-a kipanin Israel-te kikhopna puonbuh-ah a pei nawn sih ding vua, a pei teitei uleh khielna bawlin a si ding uhi. 23Ahi vangin Levi-te in kikhopna puonbuh sunga nasep a sem ding vua, a khielna paat uh a puo ding uhi; tua khu na khang tawntung vua ngaina kip khat hi ding hi. Ahi vangin amate in Israel-te lahah tanh nei lo ding uhi. 24Bang ding ahei cile Topa tungah biehna dinga a tuomkoi uh Israel-te’ sawm-ah-khat pen amau’ tanh dingin Levi-te tungah ka pie zo hi.
25Tua ciengin Topa in Moses hopi-in tam bangin a gen hi: 26Levi-te hopi inlen tam bangin na gen ding hi: Keima in Israel-te tung panin na tanh ding vua kang pieh ahi sawm-ah-khat na san ciengun, tua sung panin Topa tungah biehna-in sawm-ah-khat sung panin sawm-ah-khat ma na khensawn ding uhi. 27Tua na silpiehte uh, ancilna pana an le lengga suhna pana kipie bangin noma’ letsongin kiciemte ding hi. 28Note in zong Israel-te tung pana na san uh sawm-ah-khat zosie lah panin Topa tungah biehna-in tam bangin na khenkhie ding uhi; tuate sung panin siempu Aaron tungah Topa’ biehna na pie ding uhi. 29Na tung vua ang kipie letsong zosiete lah panin Topa ading biehna zosie na tuomkoi ding uhi; tuate zosie lah panin a hoi pente na siensuo ding uhi. 30Amate kungah zong tam bangin gen in: Tuate lah panin a hoi pente na tuomkoi zaw ciengun, a omlai teng pen Levi-te adingin ancilna phuol pan le lengga suhna pana a piengin kisimpieh ding hi. 31Nang le na innkuonpite in mun khat popo-ah na ne thei ding uhi; azieh pen tua khu kikhopna buh sunga na nasep thaman uh ahi hi. 32Tuate lahah a hoi pen na pieh ciengun tam thu ziehin mawsahna na thuoh sih ding uhi. Ahi vangin sina na thuoh lo nadingun Israel-te’ letsong siengtho na buasah sih ding uhi.
Currently Selected:
GAMLAH VANA 18: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
