MALAKHI 3
3
Ang Pei Ding Kamtaipa
1En un, ka lampi siel dingin ka mai-ah ka kamtaipa ka sawl ding a, note in na suisui uh Topa a biehinnpi ah thakhatin ang pei ding hi. Note in na hlagul uh thuciemna kamtaipa ang pei ding hi,” Vanglien Topa in ci hi.#Mat 11:10; Mrk 1:2; Luk 1:76; 7:27 2Ahi vangin ama ang pei ni ciengin koi in thuoh zo ding a, ama ang kilah ciengin koi in nang zo ding ahei?
Azieh pen ama sia siensahna mei le puonsawpte’ savan tawh kibang hi.#Joel 2:11; Kln 6:17 3Ngun haltui-in a siengsahpa bangin ama to ding a, amate in Topa tungah thuman biehnate a pieh masangsie uh ngun le kham bangin ama in Levi’ suonlehlahte siengsahin haltui ding hi.#3:3 Ahi sihle “Topa adingin a man biehnate” 4Tua ciengin Judah le Jerusalem in a pieh uh biehnate, nidang lai bangin Topa adingin lungkimhuoi ahi ding hi.
5Tua ciengin thukhen dingin note kungah kang pei ding hi; keima in aitawite, angkawmte, a manlopi-a kiciemte, a kiguoi nasemte’ thaman pie loin a gawt mite, meigong le tagate, pemtate a pampaihte, le keima ei giing lote zosie langkhatah teci pangin mallangin thu ka khen ding hi, Vanglien Topa in ci hi.
6Bangzieh ahei cile keima Topa ka kikhel sih hi; tua ahi ziehin no Jacob’ tapate aw, na mangthai sih ding uhi. 7Na pu na pate uh’ hun lai-a ki panin ka thukhamte panin pielin tuate na zui sih uhi. Kei kungah hing kilekia un, tua hile kei zong na kung vuah kang kilekia ding hi, Vanglien Topa in ci hi. Ahi vangin note in, “Bang hing ci kilekia ding ka hi uh ahei?” na ci uhi.
Pasien’ Na Guhpieh Sin
8Mi khat in Pasien’ na a guhpieh ding amah? Hizongle note in keima’ na nei guhpieh uhi! Ahi vangin note in, “Bangci dan a kang guhpieh uh ahei? na ci uhi. Na sawm-ah-khatte ule na biehnate vuah nei guhpieh uhi! 9Note in keima’ na nei guhpieh ziehun na minam buppi-un awsie tawh note ang kisamsie hi! 10Ka inn sungah an a op thei nadingin sawm-ah-khat a kimin hing peipi unlen, keima ei zelah un, Vanglien Topa in ci hi. Keima in note adingin vantung tawlette hongin thupha a dimletin kang buohsuh ei, kang buosuh sih ei, ei en un.#Siem 27:30; Gam 18:21-24; Thkna 12:6; 14:22-29; Neh 13:12 11Keima in na leitang pieng na ante uh, kauphe#3:11 Heb “a netum pa” in a suhsiet lo nadingin ka hosie ding hi; lolai-a na lenggui uh ga loin a om sih ding hi, Vanglien Topa in ci hi. 12Tua ciengin na gam uh kipah thanopna gam ahi tah ziehin minam zosie in note a nuomsa minamin ang ngaisun ding uhi, Vanglien Topa in ci hi.
13Note in keima langkhatah kam khauh na ham zo ta uhi, Topa in ci hi. Hinanle note in, “Nangma langkhatah bangci ham ka hi uh ahei?” na ci uhi. 14Note in, “Pasien’ na i sep pen a mawhnapi ahi hi. Eite in a thupieh i zuina uh ahi a, Vanglien Topa mai-ah a kapte banga i va kawikawina uh ahi zongin, bang i phattuompi uh ahei? 15Tu-in eite in a kiphasahte mi nuomsa i ci uhi; sietna bawlte a cithei beh hi loin, amate in Pasien a zelah uh ciengin a suohta uhi,” na ci uhi.
Mi Muonhuoite’ Thaman
16Tua ciengin Topa a zatah mite khatlekhat a kiho uhi. Topa in amate thudonin a thu uh a ngaipieh a, Topa a zatah mite le a min a lungngai mite adingin ama mai-ah phawna laibu khat kigiel hi. 17Amate keima-a’ hi ding a, na ka sep ni ciengin amate keima’ neituomte ahi ding uhi, Vanglien Topa in ci hi. Nu le pate in amau’ na a sem a tate a hinkhawi bangin ken zong amate ka hinkhawi ding hi. 18Tua ciengin midihte, migilote, Pasien’ na a sem mite le a sem lo mite kikalah a kilamdanna uh note in khatvei na mukia ding uhi.
Currently Selected:
MALAKHI 3: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.