SIEMPU LAIBU 4
4
Mawna Zieha Biehnate
1 Topa in Moses kungah, 2Israel mite hopi inlen tam bangin gen in: Mi khatpo in bawl lo ding ahi Topa’ thupiehte khatpo sawm khol lopi-in a bawl khah ciengin:
3Sathau siengtho kinusa siempu pa maw-in mipite tungah tua bangin mawna a tut leh, ama in mawna zieha biehna dingin Topa tungah genbaang lo bawngtangno khat pie ding hi. 4Ama in Topa mai kikhopna buh tunkotah tua bawngtang peipi-in bawngtang lutungah a khut ngam ding hi; Topa mai-ah tua bawngtang kigo ding hi. 5Sathau siengtho kinusa siempu pa in bawngtang’ si themkhat la-in kikhopna buh sungah a tawi ding hi. 6Siempu pa in tua bawngtang si sungah a khutme die-in, Topa mai mun siengtho dalna diel mai-ah a si kimkhat sagi vei the ding hi. 7Siempu pa in kikhopna buh sung Topa mai-a om gimnamtui halna maitam sakite tungah tua gansi nu ding a, ama in kikhopna buh tunkot mai-a om meihal biehna maitam bulah adang gansite zosie sung ding hi. 8Ama in mawna zieha biehna bawngtang panin a thau zosie, a sungkuo a tuom a thau zosie le a sungkuo kimvela om a thau zosie; 9a kawnga a kal gel le tuate tunga om a thaute; le a kal gel tawh kilahtha ding a sin tunga beh a tepkai te, 10thunuom biehna bawngtang panin tamte a kilah ma bangin ama in la ding a, siempu pa in meihal biehna maitam tungah tuate haltum ding hi. 11Ahi vangin ama in bawngtang vun le a tel zosie, le a lu a kengte, a sungkuo le a eeh- 12bawngtang sa a omlai teng zosie- giephuol pulam mun siengtho khatah peipi-in sing kitaw mei tungah hal ding hi; tua pen vut kibuohna munah kihal ding hi.
13Sawmhlim lopi-in Israel mihon buppi khiel kha-in a kikhawm mihonte in tua thu phawkha loin amate in bawl lo ding, ci-in Topa in a thupiehte khat po semin khielna a tut uleh; 14a bawlsa uh mawna a kithei ciengin mawna zieha biehna dingin a kikhawm mihonte in bawngtang khat peipi-in kikhopna buh mai-ah tawi ding uhi. 15Mihon upate in Topa mai, bawngtang lu tungah a khut a ngam ding vua, tuaci’n Topa mai-ah tua bawngtang kigo ding hi. 16Sathau kinusa siempu pa in kikhopna buh sungah bawngtang si kimkhat peipi ding a, 17siempu pa in tua gansi sungah a khutme die-in, dalna puon mai Topa mai-ah gansi sagi vei the ding hi. 18Ama in kikhopna puonbuh sunga om Topa mai-a maitam kite tungah tua gansi kimkhat nu ding a, a sidang teng pen kikhopna buh tunkota om meihal biehna maitam bulah sung ding hi. 19Ama in a thau zosie la dawhin maitam tungah haltum ding hi. 20Mawna zieha biehna bawngtang a bawl bang lien ma-in tami bawngtang zong bawl ding hi; amate adingin siempu pa in thoidamna bawlpiehin a mawna uh thoidamin a om ding hi. 21Ama in giephuol pulamah bawngtang puo-in a masa bawngtang a hal ma bangin hal ding hi; tua khu mi honpite dingin mawna zieha biehna ahi hi.
22 Topa Pasien in bawl lo ding a ci ama’ thukhamte lahah khat popo, vaihawmpa khat in sawm lopi-in bawlkha-in mawna a tut ciengin, 23a gamtatnasa mawna a kitheisah leh, ama in genbaang lo keeltang khat biehna-in peipi ding hi. 24Ama in keeltang lu tungah a khut ngam ding a, Topa mai, meihal biehna gan kigawna munah tua keeltang go ding hi; tua khu mawna zieha biehna ahi hi. 25Siempu pa in a khutme tawh mawna zieha biehna dinga kizang gansi kimkhat la ding a, meihal biehna maitam kite nu-in, meihal biehna maitam bulah a omlai gansi zosie sung ding hi. 26Thunuom biehna dinga kizang sathaute ma bangin, ama in a thau zosie maitam tungah a hal ding hi. Tua ahi ziehin siempu pa in a mawna ziehin ama ading thoidamna bawlpieh ding a, tua pa’ mawna kimaisah ding hi.
27 Topa’ thukhamte lahah bawl lo ding a kici thukhamte khatpopo na lah vuah mi maimai khat in sawm lopi-in bawlin a maw leh, 28na gamtatnasa khielna ang kithei ciengin na bawlsa mawna zieha na biehna dingin genbaang lo keel anu khat na tawi ding hi. 29Mawna zieha biehna gan lu tungah na khut na ngam ding a, tuale meihal biehna munah mawna zieha biehna kigo ding hi. 30Siempu pa in a khutme tawh gansi kimkhat la-in meihal biehna maitam kite nu ding a, a sidang teng maitam bulah sung ding hi. 31Thunuom biehna dinga kigo gan thaute a kilah bangin ama in a thau la dawhin Topa dinga a gimnamtui dingin siempu pa in maitam tungah tuate hal ding hi. Tua bangin siempu pa in note tangin thoidamna bawlin na mawna uh kimaisah ding hi.#Gam 15:27-28
32Mawna zieha biehna dingin tuuno khat na tawi leh, tua tuuno genbaang lo hi ding hi. 33Mawna zieha biehna gan lu tungah na khut na ngam ding a, tuale meihal biehna gan kigawna munah mawna zieha biehna dingin tua gan kigo ding hi. 34Siempu pa in a khutme tawh mawna zieha biehna dinga kigo gansi la-in, meihal biehna maitam kite tungah nu ding a, a sidang teng pen maitam bulah sung ding hi. 35Thunuom biehna panin tuu thau a kilah bangin a thau zosie na la ding a, siempu pa in Topa tunga meihal biehna tawh maitam tungah tuate hal ding hi. Tua bangin siempu pa in na bawlsa na mawnate tangin thoidamna hing bawlpiehin na mawna kimaisah ding hi.
Currently Selected:
SIEMPU LAIBU 4: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
