SIEMPU LAIBU 27
27
Kiciemna tawh Kisai Biehnate
1 Topa in Moses hopi-in tam bangin a gen hi: 2Israel mite hopi inlen amate kungah tam bangin gen in: Mi khat in mihing khat’ manhza tawh kikim thu tawh kisai Topa tungah a tuom vilvelin kiciemna a bawl ciengin, 3pasal khat’ kikimpi a manh pen tam bang hi ding hi: Kum sawmni panin kum sawmguh a phate’ kikimpi amanh dingin mun siengtho shekel tawh kizui-in ngun shekel sawmnga hi ding hi. 4Numei ahile a kikimpi amanh dingin shekel sawmthum hi ding hi. 5Kum nga panin kum sawmni cieng a pha pasal khat ahile pasal’ kikimpi amanh dingin shekel sawmni hi ding a, numei’ kikimpi amanh dingin shekel sawm hi ding hi. 6Hla khat pan kum nga cieng a pha, pasal khat’ kikimpi amanh dingin ngun shekel nga hi ding a, numei khat’ kikimpi amanh dingin ngun shekel thum hi ding hi. 7Mi khat kum sawmguh le a tungsie ahile pasal khat’ kikimpi amanh dingin shekel sawm le nga hi ding a, numei adingin shekel sawm hi ding hi. 8Mi khatpo in tua a kikimpi za a piehzawh sih leh siempu pa kungah amate kipeipi ding a, siempu pa in amate’ manh phaza ding tanpieh ding hi; siempu pa in a kiciem mi khatpo’ pieh zawh za ciet tawh kizui-in amanh tan ding hi.
9 Topa tungah biehna-in kitawi thei ganhing tawh kisai ahile Topa tungah tua banga a kipie na khatpopo a siengtho ahi hi. 10Tua ganhing tangin adang khat tawh kihleng lo ding a, a hoite a hoilote tawh, a hoilote a hoite tawh kihleng lo ding hi. Ganhing khat adang khat tawh na hlen leh, tua ganhing le na hlenna ganhing tegel a nituohin siengtho ding hi. 11Topa tungah biehna-in a kitawi thei lo ganhing sieng lo khat tawh kisai ahile siempu pa’ mai-ah tua ganhing kipeipi ding hi. 12Siempu pa in a hoi le a hoi lo tawh kizui-in amanh za se ding hi: Siempu pa se bang bang amanh hi pai ding hi. 13Ahi vangin tua ganhing a kitankia ding ahile a kisesa amanh’ senga- suo-sekhat kibelap ding hi.
14Mi khat po in Topa’ kungah a inn khat a siengtho dingin a ap leh, siempu pa in tua inn a hoi le a hoi lo tawh kizui-in amanh se ding hi: Siempu pa se bangin kip ding hi. 15A inn ap pa in a tat nuomkia leh amanh kitansa’ se nga-suo-sekhat piehbe ding a, tuaci’n a inn tangkia thei ding hi.
16Mi khat in Topa tungah a gamhluo leitang beh khat a ap leh amanh ciengtan dan ding pen khaici pieng ding tawh kizui-in kise ding hi: Mangbuham homer#27:16 220 liters bang tawh kikim hi. khat kipawitheina leitang pen ngun shekel sawmnga hi ding hi. 17Tua mipa in jubilee kum kipatin a logam a ap leh amanh kisena zaza kip ding hi; 18ahi vangin tua lo pen jubilee zaw cienga ki-ap ahile siempu pa in jubilee kumkia dong a omlai kumte tawh kituohin tua logam’ manh tuot ding a, jubilee kum tunkia nadinga a kisam lai kumte tawh kizui-in tuot ding a, a kum tawh kizui ma-in amanh khiem ding hi. 19Tuami lo a ap pa in ama’ piehsa lo a tat nuomkia leh amanh kitanza’ senga-suo -sekhat piehbe ding a, tuaci’n a nei masa pa kungah tua lo tungkia ding hi; 20ahi vangin tua lo a kitatkia sih a, ahi sihle midang khat kunga kizuasa ahile kitankia thei nawn lo ding hi. 21Ahi vangin jubilee hun sungin tua lo a kipieh ciengin Topa tunga ki-apsa lo bangin a siengtho hi ding hi; tua khu siempupa-a’ hi ding hi. 22Mi khat in a gamhluo logam ahi lo, a leisa logam khat Topa tunga a ap leh 23siempu pa in jubilee kum dong tawh kituohin tua logam’ manh za ding tuot ding a, tua ni-a kipanin Topa tungah a manh kiseza pen a siengtho silpiehin a pie ding hi. 24Jubilee kum sungin tua logam pen a kileina logam neipa tungah kilekia ding hi. 25Van manh sena zosie mun siengtho shekel tawh kizui-in kise ding hi: Gerah sawmni ciengin shekel khat ding hi.
26Ahi vangin ganno tacilte Topa- a’ ahi ziehin koima in ap thei lo ding a, bawng ahi a, keel ahi zongin tuate Topa-a’ ahi hi. 27Tuate pen ganhing sieng lo ahile amanh kise za’ senga-suo- sekhat tungdipin kitanh ding hi; a kitat sih leh amanh kisena bangin kizua ding hi.
28Mi khat in a nei, Topa tunga suhsiet dinga ki-apsate, mihing hitale ganhing hitale, gamhluo logamte hitale, kizua thei lo ding a, zong kitankia thei lo ding hi; a ki-ap na zosie pen Topa adingin sil siengtho pen ahi hi.#Gam 18:14 29Suhsiet dinga ki-apsa mite kitankia thei lo ding hi; amate kithat ding hi.
30Leitang pana pieng sawm-ah-khat zosie khaici ahi a, singga ahi zongin Topa-a’ ahi hi; tuate pen Topa adingin siengtho hi. 31Amau’ sawm-ah-khat a tanhkia nuomte in amanhza’ senga-suo-sekhat tungdip ding hi. 32Bawnghonte le tuuhonte panin sawm-ah-khat zosie le tuucingpa’ ciengkhut nei-a pei ganhing zosie’ sawm-ah-khat poma Topa adingin a siengtho hi ding hi. 33Koima in tuate hoi hi, hoi lo hi, ci-in ahi zongin, ahi sihle adang khat tawh hlen dingin ahi zongin kantel thei lo ding a, zong hleng thei lo ding hi; mi khat in tua khu a hlen leh ama’ hlen pen le a hlenna ganhing a nituohin a sieng hi ding a, kitankia thei lo ding hi.#Gam 18:21; Thkna 14:22-29
34Tam teng pen Sinai Muol tunga om Israel mite adingin Topa in Moses tunga a hil thupiehte ahi hi.
Currently Selected:
SIEMPU LAIBU 27: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
