SAWLTAHTE 21

Jerusalem ah Paul a Zinna

1Amate tawh ka kikhen zaw ciengun tembaw tawh Cos tuikul ah tangtahin ka pei vua, a zing ni-in Rodes tuikul tungin tua panin Patara#21:1 Adang tang laibute ah “le Myra” ci-in kibelap hi. khuo ka tung uhi. 2Phoenicia gam zuon ding tembaw khat ka mu ziehun tua tembaw tuongin ka pei uhi. 3Cyprus tuikul ka mu ciengun a veilamah ka pei vua, Syria gam galkai-in Tyre khuo ka tun ciengun tembaw in a vante suo ding ahi ziehin tua munah ka kum uhi. 4Tua munah nuazuite ka mu vua, ni sagi sung ka tam uhi. Jerusalem ah Paul a peisuoh lo nadingin Hlagau Siengtho tungtawnin amate in a gen uhi. 5Khum munah ka nite uh a tawp ciengin ding dawhin ka khuolzinna uh ka zom uhi; tuale amate in a unpi-un a zi a tate utawh khuo pulamah ei hla uhi. Kohaw zong tua mun tuipieu ah khupdingin thu ka ngen vua, 6khatlekhat mangpha ka kipai uhi. Tua ciengin tembaw tungah ka tuong vua, amate inn lamah a kilekia ta uhi.

7Tyre khuo panin tuipi tung khuolzin a tawp#21:7 Ahi sihle “zopsuoh” ciengin Ptolemais khuopi ka tung uhi; tua munah thu um mite#21:7 Gk “sanggamte” hopi-in amate tawh ni khat ka omton uhi. 8A zing ciengin pei-in Caesarea khuo ka tung uhi; tuale upa sagite lahah khat ahi lungdamna thugen pa Philip inn ah ka tam uhi.#Sawl 6:5; 8:5 9Ama in pasal nei nai lo kamsang letsong a nga tanu li#21:9 Gk “tanu lite, ngahnu siengthote” a nei hi. 10Tua munah ni tampi ka tam sungun Judah gam panin Agabus min nei kamsang khat ang peisuh hi.#Sawl 11:28 11Kote kungah ama hing pei a, Paul’ kawnggah la-in tua tawh a khut le a kengte a khi zaw ciengin, “Hlagau Siengtho in, ‘Jew mite in Jerusalem khuo ah tami kawnggah nei pa tam bangin khi-in Gentile-te khut sungah pie ding uhi,’ ei ci hi,” a ci hi. 12Tami thu ka zah ciengun kote le tua sunga om mite in Jerusalem ah Paul a peito lo nadingin ka hlo uhi. 13Tua ciengin Paul in, “Bang dingin note tam bangin kapin ka lungsim kitapkhap nadingin gamta na hi uh ahei? Bangzieh ahei cile hencipna hi khop loin Topa Jesu’ min adingin Jerusalem ah sina nangawn a thuoh dinga a kithawisa ka hi hi,” ci-in a dawng hi. 14Ama a kizawl zawh lo ciengin, “Topa’ deina bang hi taheh!” ci simlo ka dai khawl ta uhi.

15Tua nite zaw ciengin kithawi-in Jerusalem khuo ah ka peito uhi. 16Caesarea khuo panin zong nuazui pawlkhat in ei zui vua, ka zintun nading uh nuazui masa khat ahi Cyprus-te Mnason inn dongah ei hla uhi.

James Kungah Paul Haw

17Jerusalem khuo ka tun ciengun sanggamte in lungdam tahin ei na dawn uhi. 18A zing ciengin James kungah Paul tawh ka va haw ta vua, upate zosie zong a na om uhi. 19Paul in amate a hopi zaw ciengin a nasepna tungtawnin Gentile-te lahah Pasien’ nasepnate khat zaw khat a bansut hi. 20Amate in tua thu a zah ciengun Pasien a phat uhi. Tua ciengin amate in, “Sanggam pa aw, Jew mite lahah thu um mi tul bangza om zo ci na thei a, a unpi-un thukham zui ding lam a pawnthaw mamate ahi uhi. 21Gentile-te lahah a teng Jew mite zosie in Moses’ thukham a taisan nading ule a tate uzong a tep uh kitan loin a ngainate uh a zui lo nadingun genin na hil lam amate kungah kigen zo hi. 22Amate in tam sunga nang tun lam za valon ding uh ahi ciengin bang law ding i hi ahei? 23Tuaci’n kang gen bangun bawl in. Kote in a kiciemsa mi li ka nei uhi. 24Tuate tawh kipawl inlen ngaina kisiensuona ah amate tawh va kihalin a lu a heukieu man ding uzong sum va pie ta’n. Tua bangin bawl lacin mi zosie in nang tungtang a gensa thu uh bangma ahi lo lam le nang mama zong thukham zui na hi lam ang thei ta ding uhi.#Gam 6:13-21 25Ahi vangin Gentile thu um mite ading ahile milim biehna ante, sasi, lawlmeh#21:25 Adang tang laibute ah “lawlmeh sate” ci om lo hi. sate le numei-pasal pahtatnate a tan nading uh, ka thukhensatna uh lai ka hlah zo uhi,” a ci uhi.#Sawl 15:29 26Tua ciengin Paul in tua mite zawpi a, a zing ni-in amate tawh amama a kisiensuo zaw-in biehinnpi sungah lut a, siensuona ni a tawp hun ding le amate ciet in biehpiehna a bawl ding uh hunte a va theisah ta hi.

Biehinnpi Sungah Paul Kiman

27Ni sagi a cin kuon ciengin Asia gam pana Jew mite in biehinnpi sungah ama a mu ciengun mihonte hantawhin a man vua, 28“Israel mite aw, ei panpi un! I mite, i thu kham le tami mun langpangin muncin tenga om mi zosie tungah thu hil kawikawi pa tam pa ahi hi; tua banah ama in Gentile-te peipi-in biehinnpi sungah lutsah a, tami mun siengtho a buasah hi,” ci-in a awng vapuoh uhi. 29Azieh pen masanglai khatin khuo sungah ama le Ephesus khuomi Trophimus a kithuo a mu vua, tuaci’n biehinnpi sungah Paul in ama ang lutpi hi ngelngel va, ci-in a ngaisun uhi.#Sawl 20:4 30Tua ciengin khuozang buppi buoi a, mite zong a hontai uhi. Amate in Paul a man vua, biehinnpi sung panin ama kaiphitin thakhatin kotpite a kha pai uhi. 31Amate in Paul tha a sawm laitahun Jerusalem khuopi buppi buoi hi, ci-in galkapmangpa kungah thu na kipuoh hi. 32Ama in thakhatin galkapte le galkap bute hlanin amate lamah a taisuh pai uhi. Amate in galkapmangpa le galkapte a mu ciengun Paul a vuo nawn sih uhi. 33Tua ciengin galkapmangpa zong pei a, ama manin siakhau ni tawh khi dingin thu a pie hi; ama koi hi a, bang sem ahei ci thu ama in dong hi. 34Mihonpi lahah pawlkhat in thu khat gen a, adang pawlkhat in thudang khat ma genin a awng gawp uhi; mihonte buoi mama a, ama in lah a thu a theicien lo ziehin galkap len sungah Paul a peipi nadingun thu a pie hi. 35Kenlei cielah Paul a tun ciengin mihonte gilo seng ahi ziehin galkapte in ama a puo uhi. 36A zui mihonpi in “Ama that un!” ci-in a awng vapo uhi.

Paul Ama le Ama Kisut

37Galkap len sungah Paul a lutpi kuonun ama in galkapmangpa kungah, “Thu khat kang gen thei diei mah?” ci-in dong hi. Galkapmangpa in, “Greek ham na thei ei mah? 38Tua ciengin masang lai khat a kumpi ledo dinga mi holtuo, senel gama misuom tul li a peipi Egypt mipa hi lo na mah?” ci-in a dong hi. 39Paul in, “Khuopi thupi mama khat ahi Cilicia gam Tarsus khuopi-a pieng Judah mi khat ka hi hi; hepina tawh mipite kungah thu ei gensah in,” ci-in a dawng hi. 40Ama in phalna a pieh ciengin Paul zong kenlei ciel tungah dingin mipite a dai thei nadingin a khut zah phei-in a sip bepun Hebrew kam#21:40 Tua khu “Aramaic kam” ahi hi. tawh thu gen a:

Currently Selected:

SAWLTAHTE 21: ZBOTF01

Highlight

Copy