KAMX 19

Ephesu nuex Polu Httuiuc tueq

1Korinhtu ghaq nuex Apollo vhttax baunglaung Polu kuex ghaq htauk mungx kox nuex khuemc kay yix Ephesu nuex httuiuc kaz tueq. Kvruex ghaq nuex sangac bix wvyvmc rulc rvhumc vtueq, 2piq rueq tsuingshiq muex, “Nuimshiq kuex kvmluimx wvnc tuit shex ningkhvnc nuex Vsawc Siyac lvp tuit shex haz?” ngoz tueq wiz tueq.

Tsuingshiq rueq, “Lvp miq doc Vsawc Siyac httax yaq lvmx kuex nuiyshiq rueq vtay muinz tay miq doc,” ngoz tueq tvralc tueq.

3Polu rueq, “Kvkhoc ngoz ruiux kuex nuimshiq rueq yvmx khoc phvnx yuix luip lac lvmz tuinx?” ngoz tueq wiz tueq.

Tsuingshiq rueq, “Yohan yuix luip,” ngoz tueq tvralc tueq.

4Polu rueq, “Yohan rueq yuix luip lvmz kuex tsuingshiq mvrax wawc thuinz kvlayc wvnc jix tvkoc dvyx kuq tueq, piq yix nuex kay jix waz Yesu muex kvmluimx rax yaq, ngoz tueq Israel miqsaz muex jungphvnx kuq tueq,” ngoz tueq jungx tueq.#Mat 3:11; Mak 1:4,7-8; Luk 3:4,16; Yoh 1:26-27

5Tsuingshiq rueq kvruex kvjaz kuex tay vtueq Taungjix Yesu muingc maq yuix luip lvmz wuez tueq. 6Polu rueq tsuingshiq htauk nuex yauk tvdaungc kuq koq tueq Vsawc Siyac kuex tsuingshiq htauk nuex svt kaz tueq; kvkaq tsuingshiq rueq phvnx ruip saz kvjaz maq kvjak tueq, Tishox bomjungc muinz jungphvnx kuq wuez tueq. 7Tsuinghez lotlaz waz rokshiz rac wanueyc rvtueq.

8Polu rueq yapix lex thuimx tup vjux thoz yuimx nuex miq htenc rulc rvjungc phvnc vtueq, Tishox Mungtan lvmx kuex miq rueq tuiuz wvnc tvkoc hisungx muq maq jungphvnx kuq tueq. 9Yuq muinz miq wvyvmc kuex thuinz tsanc hvlc kvmluimx muq ningkhvnc nuex nuk waz htumc nuex Taungjix lvmx phvnc kuex shummarc ngoz ngax wuez tueq. Kvkhoc rvtueq Polu rueq tsuingshiq kox wawc dung kaz ruiux kvmluimx jix miqsaz htenc kuex pungx nuex tv-phvlc wvnc vtueq, Tirannu ngoz yaq waz luik tvluingc juing khok nuex wvraungx nuiyq tek tvluing jungphvnx kuq tueq. 10Kvkhoc wawc nueyc tup tvluing jungphvnx kuq vtueq, Asia mungx nuex httaz jix Yuda miqsaz htenc nuiyc Greek miqsaz htenc rueq Taungjix bomjungc kuex tay wvnc lvp tueq.

Skewa Sahez

11Tishox rueq Polu yauk maq vwangc juing htenc kuex tvkhic yaq. 12Miq htenc kuex Polu rueq shuimc juing phajet nuiyc khvy phux kuex vthuiuz vsac jix nuiyc htaungc kvpumz jix kox nuex lvmz wvnc koq tueq, vthuiuz vsac jix kuex hvlx wvnc ruiux, htaungc htenc kuex miqmac kvpumz yaq jix gvnz wawc dung wvnc wuez tueq. 13Yuda miqsaz phvnx wawc khuemx vtueq htaungc yurc jix miq wvyvmc rueq Taungjix Yesu muingc jungx vtueq htaungc yurc tvkoc hunglaungx wuez tueq. Tsuingshiq rueq, “Polu rueq tvluing jungx wvnc tueq Yesu muingc ruingc vtueq mnoz kuex ngaz rueq yurc gay vphaungx,” ngoz tueq miq htauk nuex kvpumz yaq htaungc kvmac ngoz kuq tueq. 14Htaungc yurc jix hez kvruex kuex Yuda Shomc Wayungx Skewa ngoz yaq waz sahez waz mvshix rvtueq.

15Yuq muinz htaungc bac rueq tsuingshiq muex, “Yesu muinz ngaz rueq tuiuz yaq, Polu lvmx muinz ngaz rueq tuiuz yaq, nuimshiq kuex ukhaq lac rvtuinx?” ngoz tueq wiz tueq.

16Kvruex htaungc bac kvpumz jix waz rueq tsuinghez kuex nutshut nutshix khvrc wvnc koq tueq, tsuinghez sumx vtueq tvmac tsac rvhumc ruiux, khvy htenc puk juir gay vtueq, kvruex yuimx kvwawc yuz wvnc wuez tueq. 17Kvkhoc yaungx wvnc tueq lvmz kuex Ephesu ghaq nuex httaz jix Yuda miqsaz htenc nuiyc Greek miqsaz htenc rueq tay tueq, tsuingshiq kuex kawc yawc kvkhuirc vtueq Taungjix Yesu muingc jungc kuex tvtsanc nganc wuez tueq. 18Kvmluimx yoalx jix paunghvlc kaz vtueq miqmac rueq shuimx wvnc tueq lvmz htenc kuex rvkhauk laz kvjungc wuez tueq. 19Mantan yauk shuimc jix paunghvlc rueq muinz tsuingshiq luik dvp htenc kuex lvmz wvnc vtueq nuk waz htumc nuex wvr nuex jauk gay tueq. Kvruex luik dvp vhtawz kuex wvl koq tueq kuimphox sawx munc bv-ngac tanc rvtueq. 20Kvkhoc rvtueq Taungjix bomjungc kuex hungc vlaungc vhttax maq yungx luz wvnc tueq.

Ephesu nuex Rvmulc Tsvlc wvnc tueq

21Kvhtenc kvruex yaungc wvnc lot yix maq Polu kuex Makedonia mungx nuiyc Akaia mungx maq raz tueq Yerusalem nuex kay tvkoc tvmaung tueq. Piq rueq, “Kvruex ghaq kvyuq kay yix maq Roma nuex muinz ngaz vkay juing,” ngoz tueq. 22Piq htuiz daungx jix Timothy nuiyc Erastu kuex Makedonia mungx nuex tvkaz gay tueq, piq kuex Asia mungx nuex hvlwvl shiz httax tueq.

23Kvruex baunglaung Taungjix lvmx phvnc ningkhvnc nuex Ephesu nuex pinhtumc rvmulc tsvlc wvnc tueq. 24Kuimphox maq yac yuimx tvhungx jix waz Demetriu rueq kuimphox maq Artemi htaungc nyuiuz yac yuimx kuex tvhungx vtueq jek waz bix tvkoc kuimphox paunghvlc tvlvp kuq tueq. 25Piq rueq kvruex yauk shuimc jix lotlaz nuiyc kvkhoc shuimc jix vganc jix htenc kuex tvtuimx ruiux, “Kungjix bix lex, vruex yauk shuimc vmaq naungshiq yungx luz wvnc vtix kuex nuimshiq rueq muinz tuiuz vshuinx. 26Polu ngoz yaq waz vraq kuex Ephesu ghaq nuex dvyx muinz rvmuq, Asia mungx wvmungx tuimx nuex, miq yauk maq vtvhungx guirx tishox htenc kuex tishox htenc rvmuq, ngoz tueq miq paunghvlc tvshonx vtueq lvmx tvyaq kuq yaq kuex nuimshiq rueq tay tuit khiz tuit shex. 27Naungshiq yauk shuimc muingc bac kay hiz dvyx muinz rvmuq, yungx luz yaq tishox nyuiuz Artemi shomc yuimx kuex khuec guez muex yaungx vtueq, Asia wvmungx tuimx nuiyc mungkawx lotlaz maq nawk palx wuez yaq tishox nyuiuz yungc loayc bac wvnc tuex kvmac rvwvlc juing rvtuex!” ngoz tueq jungx tueq.

28Kvruex kvjaz kuex tay vtueq jek waz bix htenc kuex thuinkhaq vtueq, “Ephesu wawc Artemi kuex vyungx vluz rvtueq!” ngoz tueq guyc wuez tueq. 29Wvghaq pumz thuirx tvruingx wvnc vtueq miq htenc rueq Polu rulc khuemc naungc jix Makedonia ghaq jix Gaiu nuiyc Arestarku kuex lvp vtueq ghaqyungx moalx tap nuex yauk lox maq het shvlx wvnc tueq. 30Polu muinz miq phungc mungx kvyuq nyuip wvnc dvnc tueq, yuq muinz kvmluimx jix miqsaz htenc rueq piq nyuip wvnc muq tvkoc tvwanc tueq. 31Polu piq kungjix mungx hong wawc vrangx vpangx vhttax jix wvyvmc rueq muinz piq kuex moalx nuex nyuip waung muq tvkoc miq tvkaz vtueq bomjungc tvjungc kaz tueq. 32Kvyuq rvtuimx tueq jix htenc kuex rvmulc tsvlc tvruingx wvnc vtueq vbez kuex miqmac mac guyc sez wvnc tueq. Wvyvmc jix kuex miqmac yvmx ruemc wuez rvtuimx yaq nguinx kvdoc muinz tuiuz wuez muq. 33Yuda miqsaz rueq Alesander kuex nuk miqsaz htumc nuex tvkaz koq tueq, nuk miqsaz wvyvmc rueq kvruex waz kuex rvmulc tsvlc yaq vyuq seng yaq shvmx ngoz tueq tvmaung wuez tueq. Alesander rueq nuk miqsaz thuinz tvsuing muex vyauk tenz vtueq vyaq nuiyc vlvmx lvmz kuex jungc kuy tvkoc hungx tueq. 34Yuq muinz piq kuex Yuda miqsaz ngoz tueq miq htenc rueq tuiuz vtueq, “Ephesu wawc Artemi kuex vyungx vluz rvtueq,” ngoz tueq shalhtaz nueyc tanc guyc wuez tueq.

35Vtvsuip nuex ghaqyungx wawc luik wuiyq jix waz rueq nuk miqsaz htenc kuex kuiyqshuik tvsuingx gay ruiux, “Ephesu miqsaz htenc lex, Ephesu ghaqyungx kuex vyungx vluz Artemi shomc yuimx nuiyc raungx maq vdvy kaz lung yac yuimx rueq tvkhup wungx yaq ghaqyungx rvtueq kuex miq ruip rawx rueq tuiuz yaq. 36Vruex lvmx htenc kuex uraq muinz khawx lot muq, kvkhoc rvtueq nuimshiq kuex kuiyqshuik httax kuinz, tvmaung guez maq yvmx muinz shuimc mvy muq. 37Nuimshiq rueq tsuingshiq kuex vruex yuq shvlx wvnc tuit, tsuingshiq rueq naungshiq shomc yuimx mungx nuex nyuip vtueq yauk laungc yalawx maq shuimx kaz muq, naungshiq phara nyuiuz muex muinz shummarc muq. 38Kvkhoc rvtueq Demetriu nuiyc vkungjix jek waz hez rueq miq washiz shiz rulc bomc dung ruiux kuex, tvrac rungx daz shuex raungnuiyq nuex mungx walaungx bix httax yaq kvyuq rv-phoc kuinz. 39Yuq muinz nuimshiq muex vganc khuec vkhac httax ruiux kuex tvrac rulc rv-ngvlc rvtuimx yaq kvyuq htvp htaz rax tuex. 40Yvmx khoc lac ngoz ruiux lec majuiuc raungnuiyq rvmulc thuirx tvruingx vtuinx lvmx kuex naungshiq ningkhvnc nuex rvtueq ngoz tueq mvrax nyvnc juing lvmx shex dung kaz, vkhoc rvmulc tsvlc juing lvmx muinz vguez, rvmulc tsvlc vtix lvmx vruex naungshiq rueq vlvmx tvkhic kuy juing muinz vguez,” ngoz tueq jungx kuq tueq. 41Kvkhoc jungc kuy lot yix ghaqyungx wawc luik wuiyq jix waz rueq nuk miqsaz htenc kuex kvruex wawc tvkaz gay tueq.

Currently Selected:

KAMX 19: HNOT01

Highlight

Copy