စံးထီၣ်ပတြၢၤ. ၈၈
၈၈
စီၤကိးရးအဖိခွါအထါ, တၢ်သးဝံၣ်လၢ တၢ်အခိၣ် အဂီၢ်, လၢတၢ်မၤအၢအတၢ်နးတၢ်ဖှီၣ်, ပှၤအ့စရၤ ဃးဖိစီၤဟ့မၣ်အသိၣ်တၢ်.
1ယွၤ, တၢ်အုၣ်က့ၤခီၣ်က့ၤယၤအကစၢ်ဧၢ, လၢမုၢ် ဆါဆဲးလၢမုၢ်နၤန့ၣ်, ယကိးထီၣ်လၢနမဲာ်ညါလီၤ.
2မ်ယတၢ်ထုကဖၣ်ဟဲနုာ်လၢနမဲာ်ညါတက့ၢ်. ဒိးနနၢ် လၢယဃ့ကညးတၢ်တက့ၢ်.
3အဂ့ၢ်ဒ်အံၤ, ယသးပှဲၤဒီးတၢ်မၤကိၢ်မၤဂီၤ, ဒီးယသး သမူအိၣ်ဘူးဒီးပျုၤပူၤလီၤ. 4တၢ်ဂံၢ်ယၤဒီးပှၤလၢအ လဲၤလီၤဆူတၢ်ပူၤ, ယမၤသးဒ် ပှၤကညီတဂၤလၢအ ဂံၢ်အဘါတအိၣ်ဘၣ်အသိးန့ၣ်လီၤ.
5တၢ်လဲၤသဒၣ်ယၤ လၢပှၤသံအကျါ, ဒ်ပှၤလၢအ ဘၣ်တၢ်မၤသံအီၤ အိၣ်လၢတၢ်ပူၤလၢ နတသ့ၣ်နီၣ် ထီၣ်လၢၤဘၣ်အီၤ, ဒီးဘၣ်တၢ်ဒီၣ်တဲာ်ဝဲလၢနစုပူၤအ သိးန့ၣ်လီၤ. 6နပာ်လီၤယၤလၢတၢ်ပူၤအယိာ်ကတၢၢ်, လၢတၢ်ခံးကျါ, လၢထံယိာ်အပူၤတဖၣ်လီၤ. 7နတၢ် သးထီၣ်အိၣ်ဃၢလၢယလိၤ, နမၤနးမၤဖှီၣ်ယၤလၢန လပီဝါခိၣ်ခဲလၢာ်လီၤ. စ့လၤ.
8နဒုးအိၣ်ယံၤဒီးယၤပှၤလၢအသ့ၣ်ညါယၤတဖၣ်, န ပာ်ယၤလၢ တၢ်သးဘၣ်အၢအလီၢ်လၢအမဲာ်ညါလီၤ. ယဘၣ်တၢ်ကးတံာ်ဃာ်ယၤ, ဒီးယဟဲက့ၤထီၣ်တသ့ ဘၣ်. 9ယမဲာ်ယုာ်လၢတၢ်နးတၢ်ဖှီၣ်အဃိလီၤ. ယွၤ ဧၢ, ယကိးထီၣ်နၤကိးမုၢ်နံၤမုၢ်နၤဒဲး, ယယူာ်ထီၣ်ယ စုဆူနအိၣ်လီၤ.
10နကမၤလီၤလးတၢ်လၢပှၤသံအမဲာ်ညါဧါ. ပှၤလၢအ သံတ့ၢ်တဖၣ်န့ၣ်ကဂဲၤဆၢထၢၣ်စံးထီၣ်ပတြၢၤနၤဧါ.စ့လၤ.
11ပှၤကစံၣ်တဲၤတဲလီၤ နဘျုးနဖှိၣ်လၢတၢ်သွၣ်ခိၣ်ပူၤ, နတၢ်မ့ၢ်တၢ်တီလၢတၢ်ဟးဂီၤအပူၤဧါ. 12နတၢ်လီၤလး ကအိၣ်ဖျါလၢတၢ်ခံးကျါ, ဒီးနတၢ်တီတၢ်လိၤလၢတၢ် သးပ့ၤနီၣ်အကီၢ်ပူၤစ့ၢ်ကီးဧါ.
13ယဲဒၣ်အံၤ, ယကိးထီၣ်နၤ, ယွၤဧၢ. လၢမုၢ်ဂီၤယ ဘါထုကဖၣ်တၢ်န့ၣ်ကဟဲလၢနမဲာ်ညါလီၤ. 14ယွၤဧၢ, နညိကွံာ်ယသး, ဒီးနပာ်တဒၢနမဲာ်ဒီးယၤဘၣ်မနုၤ လဲၣ်.
15ယဘၣ်တၢ်နးတၢ်ဖှီၣ်, ဒီးယသးကဟးထီၣ်တ့ၢ်လၢ ယဖိၣ်သၣ်ခွါထီၣ်လံၤလံၤလီၤ. ယဘၣ်နတၢ်မၤပျံၤမၤ ဖုး,ဒီးယသးဟးဂီၤလီၤ. 16နသးထီၣ်ဆူၣ်လဲၤပူၤလၢယ ဖီခိၣ်, နတၢ်မၤပျံၤမၤဖုးန့ၣ်မၤဟးဂီၤယၤလီၤ. 17အိၣ်ဝး တရံးယၤဒ်ထံအသိးသ့တနံၤကျၢၤ, ကဝီၤဃာ်ယၤတ ပူၤဃီလီၤ. 18ပှၤအဲၣ်ယၤ, ဒီးယတံၤယသကိးန့ၣ်နဒုး အိၣ်ယံၤဒီးယၤလီၤ. ပှၤသ့ၣ်ညါယၤန့ၣ်အိၣ်ဝဲလၢတၢ် ခံးကျါလီၤ.
Currently Selected:
စံးထီၣ်ပတြၢၤ. ၈၈: KSWM
Highlight
Share
Copy
Want to have your highlights saved across all your devices? Sign up or sign in
Sgaw Mason Bible © Bible Society of Myanmar, 1853.