လံာ်စီၤမိၤရှ့လွံၢ်ဘ့ၣ်တဘ့ၣ်. ၁၈
၁၈
1ဒီးယွၤစံးဘၣ်စီၤအၤဟရိၣ်, နဲဒၣ်, ဒီးနဖိခွါတဖၣ်, ဒီးနပၢ်အဟံၣ်အိၣ်ဒီးနၤန့ၣ် ဘၣ်စိာ်တၢ်အလီၢ်စီဆှံအ တၢ်အၢလီၤ. ဒီးနၤဒီးနဖိခွါတဖၣ်အိၣ်ဒီးနၤန့ၣ်ဘၣ်စိာ် သုပှၤလုၢ်တၢ်အဒိၣ်အတၢ်အၢလီၤ.
2ဒီးနဒီပုၢ်ဝဲၢ်စ့ၢ်ကီး, ပှၤလ့ၤဝံဖိတဒူၣ်နပၢ်အဒူၣ်, ဟဲ စိာ်ဒီးနၤဒ်သိးအကဘျုးအသးဒီးနၤ, ဒီးမၤနခ့နပှၤအ တၢ်န့ၣ်တက့ၢ်. မ့မ့ၢ်နဲဒၣ်ဒီးနဖိခွါအိၣ်ဒီးနၤတဖၣ်န့ၣ် ဘၣ်မၤတၢ်လၢတၢ်အၢၣ်လီၤအီလီၤအဒဲအမဲာ်ညါလီၤ.
3ဒီးအဝဲသ့ၣ်တဖၣ်န့ၣ် ဘၣ်ကွၢ်နတၢ်ကွၢ်, ဒီးတၢ် ကွၢ်ဘၣ်ဃးဒီးဒဲဒီဖျၢၣ်ညါလီၤ. ထဲအတဘၣ်သုးဘူး အသးဒီးတၢ်အလီၢ်စီဆှံအတၢ်ဖိတၢ်လံၤ, ဒီးတၢ်လုၢ် လီၢ်ဘၣ်, ဒ်သိးအဝဲသ့ၣ်မ့ၢ်ဂ့ၤ, သုဝဲစ့ၢ်ကီးမ့ၢ်ဂ့ၤအသု တသံတဂ့ၤန့ၣ်လီၤ.
4ဒီးအဝဲသ့ၣ်တဖၣ်န့ၣ်ကအိၣ်လၢနပူၤ, ဒီးကွၢ်တၢ် ကွၢ်ဘၣ်ဃးဒီးတၢ်အိၣ်ဖှိၣ်အဒဲ, လၢဒဲအတၢ်မၤခဲလၢာ် အဂီၢ်လီၤ. ဒီးပှၤတခီဘီမုၢ်တဘၣ်သုးဘူးအသးဆူသု အိၣ်ဘၣ်.
5ဒီးသုဝဲသ့ၣ်တဖၣ်န့ၣ် သုဘၣ်ကွၢ်တၢ်ကွၢ်ဘၣ်ဃး ဒီးတၢ်အလီၢ်စီဆှံ, ဒီးတၢ်ကွၢ်ဘၣ်ဃးဒီးတၢ်လုၢ်လီၢ်, ဒ်သိးတၢ်သးထီၣ်အသုတဘၣ်လၢၤ ပှၤအံၣ်စရ့လးဖိ တဂ့ၤလီၤ.
6ဒီးယဲဒၣ်အံၤကွၢ်ကွၢ်, ယဟံးန့ၢ်သုဒီပုၢ်ဝဲၢ်ပှၤလ့ၤဝံဖိ လၢပှၤအံၣ်စရ့လးဖိအကျါလီၤ. တၢ်ဟ့ၣ်လီၤအီၤလၢ သုလၢတၢ်ဟ့ၣ်လၢယွၤအမံၤ, ဒ်သိးအကမၤတၢ်အိၣ် ဖှိၣ်အဒဲအကုၢ်အပှၤအတၢ်မၤလီၤ.
7ဒီးနဲဒၣ်ဒီးနဖိခွါတဖၣ်အိၣ်ဒီးနၤန့ၣ် ဘၣ်ကွၢ်သုပှၤ လုၢ်တၢ်အဒိၣ်အတၢ်, လၢကယဲၢ်တၢ်ဘၣ်ဃးဒီးတၢ် လုၢ်လီၢ်, ဒီးလၢယၣ်ဘျးထီၣ်အသးလၢညါခီ, ဒီးသု ကမၤတၢ်လီၤ. ယဟ့ၣ်လီၤလံသုလၢပှၤလုၢ်တၢ်အဒိၣ် အတၢ်မၤ, တၢ်ဟ့ၣ်ဘၣ်ဃးဒီးတၢ်မၤလီၤ. ဒီးပှၤတခီ ဘီမုၢ်ဖိလၢအသုးဘူးအသးကဘၣ်တၢ်မၤသံအီၤလီၤ.
8ဒီးယွၤကတိၤတၢ်ဒီးစီၤအၤဟရိၣ်, ကွၢ်ကွၢ်, တၢ် ဟ့ၣ်လီၤလံနၤလၢတၢ်ကွၢ်ဘၣ်ဃးဒီး ယတၢ်ဝံၢ်တဖၣ်, လၢပှၤအံၣ်စရ့လးဖိ အတၢ်စီဆှံတဖၣ်ခဲလၢာ်အကျါ လီၤ. ယဟ့ၣ်လီၤအီၤလၢနၤဒီးနဖိခွါတဖၣ် လၢတၢ်ဖှူ အဃိ, လၢတၢ်အလုၢ်အလၢ်အထူအယိာ်လီၤ.
9အအံၤကကဲထီၣ်နတၢ် လၢတၢ်စီဆှံကတၢၢ်တဖၣ် အကျါလၢတၢ်ပူၤဖျဲးဒီးမ့ၣ်အူတဖၣ်အကျါန့ၣ် ကယဲၢ် အမၤဘူၣ်, ကယဲၢ်အမၤဘူၣ်ကိၣ်, ဒီးကယဲၢ်အတၢ် လုၢ်တၢ်ဒဲးဘး, ဒီးကယဲၢ်အတၢ်လုၢ်တၢ်ကမၣ်ခဲလၢာ် လၢအကမၤဘူၣ်ယၤန့ၣ် မ့ၢ်တၢ်စီဆှံကတၢၢ်လၢနဂီၢ်, ဒီးလၢနဖိခွါတဖၣ်အဂီၢ်လီၤ, 10ဒီးနဘၣ်အီၣ်အီၤလၢ တၢ်အလီၢ်စီဆှံကတၢၢ်အပူၤလီၤ. ကယဲၢ်ပှၤပိာ်ခွါက အီၣ်ဘၣ်အီၤလီၤ. ကကဲထီၣ်တၢ်စီဆှံလၢနဂီၢ်လီၤ.
11ဒီးအအံၤမ့ၢ်နတၢ်, တၢ်ဝံၢ်လၢအတၢ်ဟ့ၣ်အပူၤ, ဒီး ကယဲၢ်ပှၤအံၣ်စရ့လးဖိအတၢ်ဝၢ်လီၤ. ယဟ့ၣ်လီၤလံ အီၤလၢနၤ, ဒီးလၢနဖိခွါတဖၣ်, ဒီးလၢနဖိမုၣ်တဖၣ် အိၣ်ဒီးနၤ, လၢတၢ်အလုၢ်အလၢ်အထူအယိာ်လီၤ. က ယဲၢ်ပှၤကဆှီတဖၣ်လၢနဟံၣ်ပူၤန့ၣ် ကအီၣ်ဘၣ်ဝဲကိး ဂၤဒဲးလီၤ.
12တၢ်သိအဂ့ၤကတၢၢ်ခဲလၢာ်, ဒီးစပံးထံအဂ့ၤကတၢၢ် ခဲလၢာ်, ဒီးဘုကၠူၣ်အဂ့ၤကတၢၢ်ခဲလၢာ်, ဒီးတၢ်အဆိ လၢအမၤဘူၣ်ယွၤန့ၣ်ယဟ့ၣ်လီၤလံအီၤလၢနၤလံ, 13က ယဲၢ်တၤသၣ်လၢအမံဆိလၢကီၢ်ပူၤန့ၣ် လၢအကဟဲစိာ် ဆူယွၤအအိၣ်ခဲလၢာ်န့ၣ် ကကဲထီၣ်နတၢ်လီၤ. ပှၤက ဆှီလၢနဟံၣ်ပူၤန့ၣ် ကအီၣ်ဘၣ်ဝဲကိးဂၤဒဲးလီၤ. 14က ယဲၢ်တၢ်လၢ အဘၣ်တၢ်ပာ်အီၤဒီးတၢ်ဆိၣ်န့ၣ် ကကဲ ထီၣ်နတၢ်ခဲလၢာ်လီၤ.
15ကယဲၢ်တၢ်လၢအအိးထီၣ် တၢ်ဒၢအလီၢ်လၢတၢ်ညၣ် ခဲလၢာ်အကျါလၢပှၤဟဲစိာ်ဆူယွၤအအိၣ်, ပှၤကညီမ့ၢ် ဂ့ၤ, ဆၣ်ဖိကီၢ်ဖိမ့ၢ်ဂ့ၤ, ကကဲထီၣ်နတၢ်ခဲလၢာ်လီၤ. ဘၣ်ဆၣ်ဒီးပှၤကညီအဝဲၢ်ကိန့ၣ် နဘၣ်ပှ့ၤက့ၤအီၤသ ပှၢ်တၢၢ်, ဒီးဆၣ်ဖိကီၢ်ဖိတကဆှီဘၣ်န့ၣ်နဘၣ်ပှ့ၤက့ၤ အီၤလီၤ.
16ဒီးတၢ်လၢအကဘၣ်တၢ်ပှ့ၤက့ၤအီၤန့ၣ် လၢအသးပှၢ် တလါလံၤလံၤနဘၣ်ပှ့ၤက့ၤ ဒ်နပာ်အပှ့ၤအသိးလၢစ့ ယဲၢ်ၡက့လးအဂီၢ်, ဒ်တၢ်အလီၢ်စီဆှံအၡက့လးအသိး လၢအမ့ၢ်က့ရၤခံဆံလီၤ.
17မ့မ့ၢ်ဂီၤဖံးမိၢ်အဝဲၢ်ကိ, ဒီးသိမိၢ်အဝဲၢ်ကိ, ဒီးမဲာ်တဲး လဲးမိၢ်အဝဲၢ်ကိန့ၣ်နတဘၣ်ပှ့ၤက့ၤဘၣ်,မ့ၢ်တၢ်စီဆှံလီၤ. နဘၣ်ဖှံအသွံၣ်လၢတၢ်လုၢ်လီၢ်အဖီခိၣ်, ဒီးနဘၣ်ဆိၣ် ကဲၤကွံာ်အသိ, တၢ်လုၢ်လၢမ့ၣ်အူ, လၢတၢ်နၢမူလၢယွၤ အဂီၢ်လီၤ. 18ဒီးအတၢ်ညၣ်တဖၣ်ကကဲထီၣ်နတၢ်ဒ်တၢ် ဝၢ်အသးနါပှၢ်,ဒီးဖံဘၣ်ခိၣ်အထွဲန့ၣ်မ့ၢ်နတၢ်အသိးန့ၣ် လီၤ.
19ဒီးကယဲၢ်တၢ်ဝံၢ်လၢ တၢ်စီဆှံတဖၣ်အကျါ လၢပှၤ အံၣ်စရ့လးဖိမၤဘူၣ်ယွၤအကျါခဲလၢာ်န့ၣ် ယဟ့ၣ်လီၤ လံနၤ, ဒီးနဖိခွါတဖၣ်, ဒီးနဖိမုၣ်တဖၣ်အိၣ်ဒီးနၤလၢ တၢ်အလုၢ်အလၢ်အထူအယိာ်လီၤ. မ့ၢ်တၢ်အၢၣ်လီၤ အထူအယိာ်ဘၣ်ဃးဒီး အံသၣ်လၢယွၤအမဲာ်ညါလၢ နဂီၢ်, ဒီးလၢနချံနသၣ်အိၣ်ဒီးနၤအဂီၢ်လီၤ.
20ဒီးယွၤစံးဘၣ်စီၤအၤဟရိၣ်, နတန့ၢ်ဘၣ်သါတၢ်လၢ အကီၢ်ပူၤ, ဒီးနတန့ၢ်ဘၣ်နဂီၢ်လၢအကျါဘၣ်, တၢ် လၢယၤအံၤယမ့ၢ်နဂီၢ်, ဒီးနတၢ်န့ၢ်သါလၢပှၤအံၣ်စရ့ လးဖိအကျါလီၤ.
21ဒီးကွၢ်ကွၢ်, ယဟ့ၣ်လီၤလံဆံဆဲၣ်ပူတပူခဲလၢာ်လၢ အံၣ်စရ့လးအပူၤလၢပှၤလ့ၤဝံဖိလၢ တၢ်န့ၢ်သါအဂီၢ် လၢအတၢ်မၤလၢအမၤဝဲအဃိ, တၢ်အိၣ်ဖှိၣ်အဒဲအတၢ် မၤန့ၣ်လီၤ.
22ဒီးပှၤအံၣ်စရ့လးဖိ တသုးဘူးလၢၤဘၣ်အသးဆူတၢ် အိၣ်ဖှိၣ်အဒဲဘၣ်, ကဘၣ်ဘၣ်ဖုးအတၢ်ဒဲးဘးဒီးသံဝဲ လီၤ.
23မ့မ့ၢ်ပှၤလ့ၤဝံဖိဘၣ်မၤ တၢ်အိၣ်ဖှိၣ်အဒဲအခ့အပှၤအ တၢ်မၤ, ဒီးစိာ်အတၢ်အၢလီၤ. မ့ၢ်တၢ်အလုၢ်အလၢ်အ ထူအယိာ်လီၤလၢသုစၢၤသုသွဲၣ် အစိၤစိၤအဃၣ်ဃၣ် လၢအဝဲသ့ၣ်တဖၣ်န့ၣ် တန့ၢ်ဘၣ်သါတၢ်လၢပှၤအံၣ် စရ့လးဖိအကျါဘၣ်လီၤ.
24ဒီးပှၤအံၣ်စရ့လးအတၢ်ဆံဆဲၣ်ပူတပူလၢအဝံၢ်ဝဲလၢ တၢ်ဝံၢ်လၢယွၤအဂီၢ်န့ၣ် ယဟ့ၣ်လီၤလံလၢပှၤလ့ၤဝံဖိ လၢတၢ်န့ၢ်သါအဂီၢ်လီၤ. မၤသးဒ်န့ၣ်ဒီးယစံးတ့ၢ်အီၤ, လၢပှၤအံၣ်စရ့လးဖိအကျါန့ၣ် တဘၣ်န့ၢ်တၢ်ဟ့ၣ်သါ ဘၣ်လီၤ.ဒီးယွၤကတိၤတၢ်ဒီးစီၤမိၤရှ့, ဒီးစံးဝဲဒၣ်, 25-26ကတိၤ တၢ်ဒီးပှၤလ့ၤဝံဖိ, ဒီးစံးဘၣ်အီၤ, တုၤသုဟံးန့ၢ်တၢ်ဆံ ဆဲၣ်ပူတပူလၢပှၤအံၣ်စရ့လးဖိအစုပူၤ, လၢယဟ့ၣ်လီၤ သုလၢအီၤလၢသုတၢ်န့ၢ်သါအဂီၢ်ဒီး, သုဘၣ်ဝံၢ်တၢ်ဝံၢ် လၢအပူၤလၢယွၤအဂီၢ်တပူ, ဆံဆဲၣ်ပူတပူလၢတၢ်ဆံ ဆဲၣ်ပူတပူန့ၣ်အကျါလီၤ.
27ဒီးသုတၢ်ဝံၢ်န့ၣ် တၢ်ကပာ်အီၤလၢသုဂီၢ်ဒ်ဘုလၢတၢ် ယီၢ်ဘုအလီၢ်ပူၤ, ဒီးဒ်တၢ်ပှဲၤလၢနီၣ်စံၢ်စပံးထံအသၣ် အသိးန့ၣ်လီၤ.
28ဒ်န့ၣ်သိးသုဘၣ်ဝံၢ် တၢ်ဝံၢ်စ့ၢ်ကီးလၢယွၤအဂီၢ်လၢ ဆံဆဲၣ်ပူတပူ လၢသုဒိးန့ၢ်လၢပှၤအံၣ်စရ့လးဖိအစုပူၤ ခဲလၢာ်အကျါ, ဒီးသုဘၣ်ဟ့ၣ်ယွၤအတၢ်ဝံၢ်လၢအီၤဆူ ပှၤလုၢ်တၢ်အဒိၣ်စီၤအၤဟရိၣ်လီၤ.
29လၢသုတၢ်ဟ့ၣ်ခဲလၢာ်အကျါန့ၣ် သုဘၣ်ဝံၢ်ယွၤအ တၢ်ဝံၢ်လၢကယဲၢ်အတၢ်ဂ့ၤကတၢၢ်အကျါ, တၢ်စီဆှံ လၢအကျါလီၤ. 30ဒီးသုဘၣ်စံးဘၣ်အီၤ, တုၤသုဝံၢ် တၢ်အဂ့ၤကတၢၢ်လၢအကျါဒီး, တၢ်ကပာ်အီၤလၢပှၤ လ့ၤဝံဖိအဂီၢ်, ဒ်တၢ်အိၣ်လၢယီၢ်ဘုအလီၢ်ပူၤ, ဒီးဒ် တၢ်အိၣ်လၢနီၢ်စံၢ်စပံးသၣ်အပူၤအသိးန့ၣ်လီၤ.
31ဒီးသုကအီၣ်ဘၣ်အီၤလၢအလီၢ်ကိးပူၤဒဲး, သုဝဲဒီးသု ပှၤဟံၣ်ဖိလီၤ. အဂ့ၢ်ဒ်အံၤ, မ့ၢ်သုမၤတၢ်လၢတၢ်အိၣ် ဖှိၣ်အဒဲပူၤအဘူးအလဲလီၤ. 32ဒီးတုၤသုဝံၢ်တၢ်အဂ့ၤက တၢၢ်လၢအကျါဒီး, သုတဘၣ်တၢ်ဒဲးဘးလၢအဃိဘၣ်. ဒီးသုတဘၣ်မၤဘၣ်အၢ ပှၤအံၣ်စရ့လးဖိအတၢ်စီဆှံ တဖၣ်ဘၣ်, သုကသံဘၣ်ဖုးလီၤ.
Currently Selected:
လံာ်စီၤမိၤရှ့လွံၢ်ဘ့ၣ်တဘ့ၣ်. ၁၈: KSWM
Highlight
Copy
Compare
Share
Want to have your highlights saved across all your devices? Sign up or sign in
Sgaw Mason Bible © Bible Society of Myanmar, 1853.