रोमी 9
9
परमेश्वरजी त्हाँबै यहूदी ह्रें
1तोगो ङइ बिबै ताँ क्ह्रोंसेंन्बै ग। ङ ख्रीष्टल् ग, ङ स्योर आते। धै पबित्र प्ल्हए न्होंर मुँबै ङए सैंज्यै या स्योर आते बिसि ङए सैंइ साक्षि पिंम्। 2ताँ तो जा बिस्याँ, ङइ खोबै यहूदी म्हिमैंए बारेर ङए सैंर ल्हें दुःख नेरो पिर मुँ। 3ङए ह्रेंर्बै अलि अङाँमैंइ खोंयोंइ आखाँबै छ्ह योंबै ल्हागिर परमेश्वरजी ङलाइ सराप पिंसि ङन् ख्रीष्टउँइँले फ्रेवाल् त्हुलेया ङ सैं तोंमल।
4परमेश्वरजी चमैंलाइ ह्रोंसए म्हिमैं तबै ल्हागिर त्हाँइ। खीजी चमैंलाइ ह्रोंसए प्हसेमैं लसि खीए औदिबै केमैं उँइँमिंइ। खीजी चमैंए खेमैंने बाछा फैसि ठिम पिंइ, धै खीए सेवा लबै या लोमिंइ, छले खीजी फैबै बाछामैं चमैंइ योंइ।#प्रस ४:२२ 5स्योंम्बै मिं कालदिबै थे-थेबै चिबनाँब्मैं यहूदीमैंए खेमैंन् ग। धै ख्रीष्ट या म्हि तसि च ह्रेंर्न फिइ। म्हि तनाबिलेया खी ताँन् म्हिमैंए फिर ग्याल्स लबै परमेश्वर ग। छतसि खोंयोंन् बिलै खीए मिं थेब् लल् त्हुम्। आमेन, छान् तरिगे।
6ल्हें यहूदीमैं ख्रीष्टए लिलि आप्र बिबर्न परमेश्वरजी चमैंए खेमैंने फैबै बाछामैं फाक्कर्न तइ बिब् वा? आङिं, तलेबिस्याँ इस्राएली ह्रेंर फिबै ताँन् म्हिमैं परमेश्वरजी त्हाँबै म्हिमैं ग बिल् आखाँ। 7झाइले अब्राहामए ताँन् सन्तानमैं परमेश्वरए च्ह-च्हमिमैं आङिं। अब्राहामल च्ह ङ्हिं मुँनबिलेया परमेश्वरजी छ बिल,
“इसहाकउँइँले योंबै सन्तान मत्त्रे क्हिए सन्तान ठर्दिब्मुँ।”#उत २१:१२
8चुए अर्थ, से कोउँइँले फिब्मैं#9:8 से कोउँइँले फिब्मैं चमैं केब्स्यो हागार ङाँइँले योंबै सन्तानमैं (गलाती ४:२२-२३) परमेश्वरए च्ह-च्हमिमैं आङिं। बरु परमेश्वरजी बाछा फैसि पिंम् बिसि योंबै च्ह-च्हमिमैं मत्त्रे अब्राहामए सन्तान ठर्दिम्। 9तलेबिस्याँ परमेश्वरजी अब्राहामने छले बाछा फैथेंल,
“क्हुरिमा चु त्हेर्न ङ युमा क्हिए प्ह्रेंस्यो साराई च्ह फिब्मुँ।”#उत १८:१०
10च च्ह ङ्योए खे इसहाक मुँल, लिउँइँ इसहाकए प्ह्रेंस्यो रिबेकाइ जौंले च्हमैं फिइ। 11चमैंइ छ्याँब आछ्याँब तोइ आलमन् फो न्होंर मुँमन् चमैंए के ङ्ह्योसि आङिं, बरु परमेश्वरजी बिब् धोंलेन्, च च्हमैं ङ्हिंर घ्रिलाइ त्हाँल बिबै प्रमाण उँइँबर 12“थेब च्योंबए के लबै म्हि तब्मुँ,” बिसि ओंसोंन् खीजी रिबेकाने बिल।#उत २५:२३
13“याकूबलाइ म्हाँया लसि त्हाँइ,
दिलेया एसावलाइ ङइ आखो बिसि,” परमेश्वरए छ्वेर प्ह्रिइमुँ।#मला १:२-३
14चु ताँर ङ्योइ तो बिब् दि? परमेश्वरजी अनिया लइ बिब् वा? आङिं, कत्ति अनिया आलइमुँ! तलेबिस्याँ
15“ङइ खाबए फिर म्हाँया लदा ङ्हाँमुँ, चलाइन म्हाँया लम्।
ङइ खाबै फिर ल्हयो खदा ङ्हाँमुँ, चए फिर्न ल्हयो खम्।”
बिसि खीजी स्योंमन् मोशाने बिल।#प्रस ३३:१९ 16छतसि म्हिए इच्छा नेरो भोंइ आङिं, परमेश्वरए म्हाँयाजी म्हिलाइ त्हाँब् ग। 17मिश्र ह्युलर्बै फारो म्रुँए बारेर परमेश्वरए छ्वेर छले प्ह्रिइमुँ,
“क्हिइ ङए शक्ति ह्युल तिगोंन् उँइँरिगे,
धै ङए शक्ति मुँबै मिं बिप्ररिगे ङ्हाँसि,
ङइ क्हिलाइ म्रुँ लमिंइ।”#प्रस ९:१६
18छले परमेश्वरजी खीजी ल्हयो खदा ङ्हाँब्मैंए फिर ल्हयो खम्, धै सैं सारो लमिंदा ङ्हाँब्मैंलाइ खीजी सैं सारो लम्।
कुमाले नेरो स भाँडोए अहान्
19क्हेमैं न्होंरि को-कोइइ बिमुँ, “छ बिस्याँ परमेश्वरजी तले म्हिमैं छ्याब् मुँबन् ठर्दिमुँ? तलेबिस्याँ खीए इच्छाए बिरोधर खाब् राल् खाँम्?” 20छतसि म्हिमैंइ परमेश्वरए बिरोध लसि पोंबै घ्याँ आरे। सए भाँडोइ कुमालेलाइ “क्हिइ तले ङलाइ छाब् लल?” बिम् रो वा? आबि!#यशै २९:१६; ४५:९ 21कुमालेइ ह्रोंसइ चेंबै सउँइँले ह्रोंसए सैंर मैंब् धों तबै भाँडो लबै हग मुँ। छतसि चइ चेंबै सउँइँले कोइ छ्याँबै केए ल्हागिर मत्त्रे ओलेबै भाँडो बनेम्, कोइ खोंयोंन् बिलै ओलेबै भाँडो बनेम्। कुमालेइ मैंब् धोंले बनेम्।
22छलेन परमेश्वरलै या ह्रोंसए ह्रिस नेरो शक्ति उँइँबै सैं मुँ। दिलेया ह्रिसर कुमालेइ भाँड कोचेब् धोंले कोचेल् त्हुबै म्हिमैं मुँलेया खीजी चमैंए आछ्याँबै केमैं सैदिसि टिइमुँ। 23चमैंलाइ तले सैदिइ बिस्याँ परमेश्वरजी खीए बेल्ले थेबै मान तबै चारबै ह्वे ताँनलाइ उँइँबै सैं लइ। च ह्वे ङ्योज्यै या योंरिगे बिसि ङ्योलाइ थेबै केर फेबै भाँडो धों तब् लमिंइ, 24तलेबिस्याँ खीजी हुइबै म्हिमैं ङ्यो ग। खीजी यहूदीमैं मत्त्रे हुइब आङिं, अरू ह्रेंमैंलाज्यै या हुइमुँ। 25होशे मिं मुँबै अगमबक्ताइ अरू ह्रेंमैंए बारेर परमेश्वरए छ्वेर छले प्ह्रिइमुँ,
“ओंसों ङए म्हिमैं आङिंब्मैंलाइ
तारे ङए म्हिमैं बिब्मुँ।
ङइ आखोबै ह्रेंमैंलाज्यै
लिउँइँ ङइ खोसि हुइब्मुँ।#होशे २:२३
26क्हेमैं ङए म्हिमैं आङिं बिबै क्ल्ह्योर्न
‘क्हेमैं सोगों परमेश्वरए सन्तान ग’ बिसि हुइब्मुँ।”#होशे १:१०
27यशैया मिं मुँबै अर्को अगमबक्ताइ यहूदीमैंए बारेर छले बिइमुँ,
“यहूदीमैंए सन्तान मा ङ्युँइर्बै बालुवा धोंलेन् ल्हें तलेया
चमैं न्होंरि च्युगुदे मत्त्रेन् जोगेब्मुँ।
28तलेबिस्याँ याहवेहजी युनन् सजैं पिंसि
ह्युल नास लवाब्मुँ।”#यशै १०:२२-२३
29चु भन्दा ओंसों यशैयाइ चु या बिइमुँ, “स्वर्गर्बै सेनामैंए चिब याहवेहजी सदोम नेरो गमोरा बिबै सहरर्बै म्हिमैं नास लवामा ङ्योए ल्हागिर सन्तान घ्रि या आथेंस्याँ ङ्यो यहूदीमैं च सहरर्बै म्हि धोंलेन् नास तबर फेमल।”#यशै १:९
यहूदीमैंइ परमेश्वरए फिर बिश्वास आलब
30छतसि ङ्योइ तो बिल् त्हुम्? ठिमइ बिब् धोंले आप्रलैया अरू ह्रेंर्बै म्हिमैंइ बिश्वास लबइले परमेश्वरजी चमैंलाइ खीए उँइँरि ठिक ठर्दिइ। 31दिलेया यहूदीमैं परमेश्वरए उँइँरि ठिक ठर्दिबै ल्हागिर ठिमइ बिब् धोंलेन् लल् म्हैइ दिलेया लल् आखाँ। 32तले आखाँ बिस्याँ चमैंइ बिश्वास आलल्ले धर्म-कर्म लसि परमेश्वरए उँइँर ठिक ठर्दिम् बिसि मैंरिल। छतसि चमैंए ल्हागिर येशू ख्रीष्ट प्हले थुरबै युँमा धोंन् तइ। 33येशू ख्रीष्टए बारेर परमेश्वरए छ्वेर छले प्ह्रिइमुँ,
“ङ्ह्योद्, ङइ यहूदीमैंए म्हाँजोरि प्हले थुरबै युँमा थेंम्,
च युँमार ल्हें म्हि थुरसि क्हुरयाब्मुँ,
दिलेया खीए फिर बिश्वास लब्मैं
खाबै या सैं च्योंब तल् त्हुरिब् आरे।”#यशै २८:१६
Currently Selected:
रोमी 9: GCMB
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
