रोमी 11
11
परमेश्वरजी यहूदीमैंए फिर म्हाँया लब
1छ बिस्याँ परमेश्वरजी खीए यहूदी म्हिमैं त्याग्दिइ वा? आङिं, कत्ति आङिं! तलेबिस्याँ ङै या अब्राहमए सन्तानउँइँले फिबै बेन्यामिनए कुलर्बै इस्राइलि ग।#फिलि ३:५ 2परमेश्वरजी ओंसोंन् त्हाँबै म्हिमैंलाइ आत्याग्दिइमुँ। परमेश्वरए छ्वेर एलिया अगमबक्ताइ लबै प्राथनाए बारेर क्हेमैंइ सेइमुँ। एलियाइ यहूदीमैंए बिरोधर परमेश्वरने छले बिल,
3“ओ याहवेह, चमैंइ क्हिए ताँ बिमिंबै म्हिमैं सैवाइ,
क्हिए मिंर ख्रो पिंबै क्ल्ह्योमैं फुवाइमुँ।
क्हिए ताँ बिमिंबै म्हिमैं न्होंरि ङ घ्रि मत्त्रे चैमुँ,
ङलाज्यै या चमैंइ सैल् म्हैइमुँ।”#१ म्रुँ १९:१०,१४
4दिलेया परमेश्वरजी एलियाने छाबै ज्वाफ पिंइ,
“बाल बिबै देवताए पूजा आलबै
हजार ङि म्हिमैं ङइ ह्रोंसए ल्हागिर थेंइमुँ।”#१ म्रुँ १९:१८
5छलेन तोगो या परमेश्वरजी दयाम्हाँया लसि त्हाँबै को-कोइ यहूदीमैं अझै चैइमुँ। 6चमैंइ धर्म-कर्म लसि आङिं, परमेश्वरए दयाम्हाँयाइ लमा खीजी चमैंलाइ त्हाँब् ग, आस्याँ खीए दयाम्हाँया छलेन् पिंबै दयाम्हाँया आतमल।
7छ बिस्याँ चु ताँए अर्थ तो तइ दि? खेंमैंइ म्हैबै मुक्ति ताँन् यहूदीमैंइ आयों। दिलेया परमेश्वरजी त्हाँबै यहूदीमैंइ मत्त्रे मुक्ति योंइ। अरू चैबै यहूदीमैंए सैं सारो तइ। 8परमेश्वरए छ्वेर छले प्ह्रिइमुँ,
“परमेश्वरजी चमैंलाइ क्होल् आखाँबै सैं पिंइमुँ,
चमैंलाइ आम्रोंबै मि नेरो आथेबै न्ह पिंइमुँ,
छतसि तिंयाँ समन् चमैं छाबन् मुँ।”#व्य २९:४; यशै २९:१०
9दाऊद म्रुँज्यै या छलेन् बिइमुँ,
“चमैंए भोज भत्यार जाल नेरो ङो धोंन् तरिगे,
चमैं चर्न थुरसि सजैं योंरिगे।
10चमैंए मि तोइ म्रोंल् आखाँब् तयारिगे,
झाइले चमैंए क्रे खोंयोंन् बिलै क्वार् तरिगे।”#भज ६९:२२-२३
11छतसि ङइ ङ्योएम्, “यहूदीमैं थुरसि नास तयाइ वा दि?” अँहँ, आत! चमैं पाप लसि क्हुरियामा चमैंइ योंल् त्हुबै मुक्ति अरू ह्रेंर्बै म्हिमैंइ योंइ। झाइले छ तब् म्रोंसि यहूदीमैंइ “ङ्योज्यै छाबै मुक्ति योंस्याँ तमल,” बिसि ह्रिस लरिगे बिब परमेश्वरए सैं मुँल। 12यहूदीमैंइ पाप लमा ह्युलर्बै ताँन् म्हिमैंइ थेबै आशिक योंइ, धै यहूदीमैंए नोक्सनउँइँले अरू ह्रेंमैंइ थेबै आशिक योंइ। छतसि ताँन् यहूदीमैंइ बिश्वास लस्याँ ह्युलर्बै ताँन् म्हिमैंइ झन् थेबै आशिक योंब्मुँ।
अरू ताँन् ह्रेंमैंए मुक्ति
13ङइ चु ताँमैं क्हेमैं अरू ह्रेंमैंलाइ बिमुँ: अरू ह्रेंर्बै म्हिमैंए ल्हागिर ङ कुल्मिंबै चेला चिब तबइले क्हेमैंए ल्हागिर के लल् योंमा ङ सैं तोंइमुँ। 14चु केइ लमा ह्रोंसए ह्रेंर्बै म्हिमैंज्यै या क्हेमैं म्रोंसि ह्रिस लसि को-कोइ परमेश्वर ङाँइ सैं एल् खाँलै। 15तलेबिस्याँ परमेश्वरजी चमैंलाइ त्याग्दिवामा ताँन् ह्युलर्बै म्हिमैं परमेश्वरए म्हि तइबिस्याँ परमेश्वरजी चमैंलाइ खी ङाँइ एपमा तो तब्मुँ? चमैं सिसि धबै सोगों तब् धोंन् तब्मुँ।
16अहान् घ्रिदे ङ्हिंदे बिले: ओंसोंबै क्हें फ्वि परमेश्वरए मिंर पिंस्याँ ताँन् क्हें पबित्र तम्। छलेन सिं धुँए जरा पबित्र मुँ बिस्याँ हाँगै या पबित्र तम्।#11:16 सिं धुँए जरा पबित्र मुँ बिस्याँ हाँगै या पबित्र तम् छलेन यहूदी ह्रेंमैंए खेमैं, अथवा अब्राहाम, इसहाक नेरो याकूब, परमेश्वरए म्हिमैं ग। छतसि चमैंए सन्तान या परमेश्वरए म्हिमैंन् तम्। 17छलेन रोमैं रोबै सिं धुँए को-कोइ हाँगमैं चोवाब् धोंले कोइ यहूदीमैं या परमेश्वरउँइँले फ्रेयाइमुँ। धै क्हेमैं अरू ह्रेंर्बै म्हिमैं तबइले क्ह्योंर्बै सिं धुँए हाँग धोंन् तसि अरू छ्याँबै हाँगमैंए माँजोरि से घ्रिले गैंदिइमुँ। छतसि यहूदीमैंए जराउँइँले खुगु योंब् धोंले क्हेमैंइ तोगो भों नेरो आशिक योंइमुँ। 18छतसि क्हेमैं च चोयाबै हाँग धों तबै यहूदीमैंलाइ हेल लल् आत। चमैं भन्दा ह्रोंसन् स्वाब मुँ ङ्हाँस्याँ, चु ताँ सैंर मैंन्: क्हेमैं सिं धुँने प्हेरबै हाँग धों तब्मैं मत्त्रे ग। क्हेमैंइ जरा आधाँदिइमुँ, बरु जराइ क्हेमैंलाइ धाँदिइमुँ।
19दिलेया क्हेमैंइ अरू ह्रेंमैंने छ बिलै, “ओं, ङलाइ रोमैं रोबै सिं धुँने गैंदिबर परमेश्वरजी च हाँगमैं चोवाइमुँ।” 20च ठिक ताँ मुँ, दिलेया चु मैंन्: चमैंइ बिश्वास आलबइले परमेश्वरजी चमैंलाइ चोवाइ। छलेन क्हेमैंइ बिश्वास लसिन् मत्त्रे टिल् योंइमुँ। छतसि थेब् आप्हैंन्, बरु न्ह क्रों मि क्रोंले टिद्। 21तलेबिस्याँ परमेश्वरजी क्ह्रोंसेंन्बै हाँगलाइ भ्योंवाइ बिस्याँ, क्हेमैंइ बिश्वास लब् पिवास्याँ क्हेमैंलाज्यै या आभ्यों रो वा? 22परमेश्वरजी खैले ल्हयो खमुँ, छलेन सैं सारो या लम् बिसि सैंर मैंन्। खीउँइँले फ्रेयाब्मैंने परमेश्वरजी सैं सारो लमुँ, दिलेया क्हेमैं परमेश्वरए ल्हयो न्होंरि टिरिस्याँ क्हेमैंइ परमेश्वरए ल्हयो योंम्। आस्याँ थोवाबै हाँगमैंलाइ धोंले क्हेमैंलाज्यै या थोवाब्मुँ। 23छलेन यहूदीमैंइ अबिश्वास लब् पिवासि धबै बिश्वास लसि एखम् बिस्याँ परमेश्वरजी चमैंलाइ ओंसों मुँबै क्ल्ह्योर हाँग धोंले गैंदिमिंब्मुँ, तलेबिस्याँ परमेश्वर धबै चमैंलाइ गैंदिल् खाँम्। 24क्हेमैं अरू ह्रेंर्बै म्हिमैं क्ह्योंर्बै सिं धुँउँइँले हाँग थोवासि बगैंचार्बै सिं धुँने से आक्ह्रिलेया गैंदिइमुँ। यहूदीमैं बगैंचार्बै सिं धुँए हाँगमैं धों तब् ग। क्ह्योंर्बै हाँगमैं भन्दा च ओंसों थोवाबै हाँगमैं धबै एपसि गैंदिब परमेश्वरए ल्हागिर झन् स्वाब तम्।
ताँन् म्हिमैंए फिर परमेश्वरजी दयाम्हाँया लब
25ओ अरू ह्रेंर्बै अलि-अङाँमैं, क्हेमैं थेब आप्हैंरिगे बिसि क्हेमैंइ चु खास ताँ घ्रि क्होल् त्हुम्: परमेश्वरजी त्हाँबै अरू ह्रेंर्बै ताँन् म्हिमैंइ येशू ख्रीष्टए फिर बिश्वास आलन् समा मत्त्रे यहूदीमैंइ सैं सारो लब्मुँ। 26च लिउँइँ ताँन् यहूदी ह्रेंमैंइ मुक्ति योंब्मुँ। परमेश्वरए छ्वेर छले प्ह्रिइमुँ:
“सियोनउँइँले जोगेमिंबै म्हि युब्मुँ,
याकूबए सन्तानलाइ दुष्ट के लबउँइँले खीजी जोगेमिंब्मुँ।#यशै ५९:२०-२१
27ङइ चमैंए पाप मेटिदिसि
चमैंने बालु फैबै बाछा पूरा लमिंब्मुँ।”#यशै २७:९
28सैं तोंबै ताँए फिर बिश्वास आलसि यहूदीमैं परमेश्वरए शत्तुर तबइले क्हेमैंलाइ फायदा तब् ग। दिलेया परमेश्वरजी चमैंए खेमैंलाइ त्हाँबइले चमैंलाज्यै या खोम्। 29तलेबिस्याँ परमेश्वरजी खीजी त्हाँबै म्हिमैंलाइ युगुर्ले आत्याग्दि, धै खीजी पिंबै आशिकमैं या आप्हें। 30स्योंम क्हेमैं अरू ह्रेंर्बै म्हिमैंइ परमेश्वरए ताँ आक्वेंमल, दिलेया यहूदीमैंइ परमेश्वरजी बिब् आङिंबइले क्हेमैंइ परमेश्वरए ल्हयो योंबै मौका योंइमुँ। 31छलेन क्हेमैंइ ल्हयो योंबइले परमेश्वरजी बिब् धोंले चमैंज्यै या ल्हयो योंरिगे बिसि तिंजोरो यहूदीमैंए सैं सारो तइ। 32तलेबिस्याँ खीए दयाम्हाँया ताँन् म्हिमैंइ योंरिगे बिसि परमेश्वरजी चमैं ताँनए सैं सारो लवासि बिब् आङिंब्मैं तल् पिंइ।
परमेश्वरए मिं थेब लले
33ओहो, परमेश्वरजी ताँनए फिर लबै दयाम्हाँया बेल्ले थेब नेरो छ्याँब मुँ। खीए ज्ञान बुद्धिए ताँमैं गैरु मुँ। खाबइ खीए ताँमैंए बयन लल् खाँम्? खाबइ खीजी लबै के क्होल् खाँम्?#यशै ५५:८ 34परमेश्वरए छ्वेर छले प्ह्रिइमुँ,
“याहवेहए सैंर्बै ताँ खाबइ सेइमुँ?
झाइले खीलाइ खाबइ सल्ला पिंल् खाँम्?”#यशै ४०:१३
35“खाबज्यै या परमेश्वरलाइ तोइ सै पिंइमुँ वा?
परमेश्वरजी खाबलाज्यै तोइ सैए खि फोल् आत्हु।”#अयू ४१:११
36तलेबिस्याँ परमेश्वरजी तोन्दोंरि सै बनेइ, तोन्दोंरि सै खीउँइँलेन् खीए ल्हागिर्न ग। परमेश्वरए मिं खोंयोंन् बिलै थेब तरिगे। आमेन, छान् तरिगे।#१ कोर ८:६
Currently Selected:
रोमी 11: GCMB
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
